Dzɔ̌n 20

1A m bùghò an tsuʼ fə̀ sʉesʉ fo alo ewə̄n, Mèle Maʼdàlɛ̂n n ndùw chì wò ùtsuʼ alo eshìaa, bùghò kôʼ wò mo ghe m bəŋso nùghù tìa zo an dzughu zə eshìaa. 2Ù n daŋso nyə̀ŋ ndùw kòʼ ndùw Sǎemòm Pità ghèe ghê tsə̀ndə̄ghā è lì zəla Yɛso mò ŋgeē ləghaa, ù n dzɛ̀ â ghee enyəa, “Ghe ŋ gwən e Mughu ù te è nî nùghù sə alo eshìaa, yia kwo yo luʼū kəla ghe ndûw naŋā wə̄n a te.” 3Pità, ghèe tsə̀ndə̄ghā è li zə n sə̀ nùghù ndùw fughu alo eshìaa. 4Ghe n sə̀ tsə̀ghà tsùghù â nyəŋ zo, tsə̀ndə̄ghā e li zə ŋ kuuwn nyə̀ŋ tsə̀ghà tsùghù Pità, tɛ̀ ndùw fughu alo eshìaa esə̄, 5ghəa ù sò ghaā tsughu enyəa e lɛɛ̄n nyəā ndûw, ù ŋ kòʼ nyə̀ ndùw kô mbəghalaŋ kə̀ gha ko kə ŋgwuūn doʼō fughu. Ù ŋ kè kuūwn nyəā ndûw dzə̂ fughu. 6Sǎemòn Pità n daŋso ndùw bùghò a bâà wə̄n, shùaa nyə̀ daŋso ndùw ko ùghue fughu alo eshìaa, nyə̀ kòʼ tsùghù sùghò mbəghalaŋ kə te ko, kə zîi doʼō, 7à bà kə ndzʉ kəla ghe mò gaʼ tuw kə Yɛso kò a te, mo kə nyoʼn ŋgwuun dòʼò nə̀ŋònə̄ŋ. 8Tsə̀ndə̄ghā zə̀a è mò bughò tɛ̂ sə ko fughu alo eshìaa n daŋso nyə̀ ndùw èsugho, kòʼ è tsughu daŋso boo è fughu; 9nu ghe fə̀ lo mo ghe kaām tɔ̂ʼ kèle shwaʼ u Kəzə̀ wəla u dzɛ enyəa Yɛso ki alekpuuw kɔʼɔ̄sə̄ alo evʉ̄. 10Tsə̀təndə̄ghā ti tə n daŋso nùghù ndùw èbàm an ndughu tə ghee.

Yɛso gbə̀n sə kɔʼ an sə kə Mèle Màʼdàlên

11À n lo mò Mèle mô nǎam ti fughu â vʉa èshìaa, dìi, ghəa ù sò diī êzə̀, ù ŋ ghaa tsughu alelɛɛ̄n nyəā ndûw fughu alo eshìaa, 12ù ŋ kòʼ nyə̀ ndùw tsə̀təndə̄ghā tə Kəzə̀ tə bə̀ghà mo tə n la ghue zo an ndzʉ tə̀ fəmā to, dôʼ an luʼù kəla Yɛso mò nyə̂ŋ a te; u mɔ̀ʼ alo kətuw, u mɔ̀ʼ a tsəla efwēe. 13Tsə̀təndə̄ghā tə Kəzə̀ ti m bvʉ â wə̄n enyəa, “Wizən, ghù sə̀ ŋ kûu ŋ kwò mò?” Ù n dzɛ̀ â ghee enyəa, “À lǒ bòʼ ghe n nì nùghù gwə̄n e Mughù waŋā zo, yìa Ŋ̀ kwo yo luʼū wəla ghe nî naŋā wə̄n a te.” 14A m bùghò ù kə̀a tsughu êzə̀, ù mo e fə̀là tsùghu ùghue, ù ŋ kòʼ kɔ̂ʼ Yɛso mò vʉ̀a ù ti, ù n sô kǔuwn kwo yo enyəa à lò Yɛso. 15Yɛso m bvʉ â wə̄n enyəa, “Wìzən, ghù sə̀ ŋ kuu ŋ kwò mò? Ghù kəŋo ndùghò fɛ à?” A m bùgho Mèle sô mòʼò enyəa à lǒ ghùw ù sum ù lì, Mèle n dzɛ̀ â wə̄n enyəa, “Mughùbè, abugho à lǒ mò ghù ŋ gwən e wə̄n e boʼò nùghù, ghù n teso wò luʼū kəla ghù ndùw nyə̂ŋsò naŋā wə̄n a te, tò Ǹ ndûw boʼò nughù.” 16Yɛso n tɔŋɔ tsughu wə̄n enyəa, “Mèle.” Mèle m fə̀n tsùghù ughue, tɔŋɔ ndùw wə̄n an shwaʼ u Hibùlù enyəa, “Làbonì!” (Mo e moʼnlò enyəa à lǒ Wàdè). 17Yɛso n dzɛ̀ â wə̄n enyəa, “Kà mugho mɔ̀m, nuu Ŋ̀ kaām kɔʼ tɛ̀ dzə̀ a vʉ̀a Bə̀ghà; laam ndùw a vʉ̀a waazə̂ ghaŋa gho, ghù dzɛ â ghee enyəa M̀ fɛ ndùuw a vʉ̀a Tsele waŋa wəla à lò sugho tsùghò, tɔ̂ɔŋ Zə̀ kɛʼɛ.” 18Mèle n ndùw kòʼ ndùw sùghò tsə̀təndə̄ghā tə Yɛso, dzɛ à ghee enyəa, “Mùghò ŋ kòʼ Mughu ù te.” Ù n daŋso nì dzɛ̀ ndùw shwaʼ u Yɛso vʉ̀ â ghee.

Yɛso gbə̀n sə kɔʼ an sə kə tsə̀təndə̄ghā tə wə̄n

19An nə̀gha è guŋso zo an tsuʼ fə te fo, mò à fə̀ lo tsuʼ fə sûesʉ fo alo ewə̄n, tsə̀təndə̄ghā tə Yɛso tə̀ n lo an ndughu mo ghe n dzùa nàŋa gbâʼ wò, ghe sô tsəŋo ghî à ne a Tə̀dzûu ghò, Yɛso m gbən sə kɔʼ an sə kə ghee, dzɛ â ghee enyəa, “Bughuun zə lo ghɛ̀ à ghee.” 20A m bughò ù dzɛ̀ tsughu êzə̀, ù dè ndùw ghu a wə̄n, à ti e bùghū e wə̄n zo. Tsə̀təndə̄ghā tə te tə n daŋso dòʼò tsughu aleduʼnlo aŋghə̂a ghe kôʼ kɔʼ Mughu ù te. 21Yɛso n dzɛ̀ kpèʼe ndùw â ghee enyəa, “Bughuun zə e lo ghɛ̀ à ghee. Ghəa bəghà mò tum wô mugho, à lò sugho eghala Ǹ tuū səaa ndûw ghɛ.” 22A m bùghò Yɛso dzɛ̀ tsughu êzə̀, ù n zwìi ndùw a zəŋò ghee, dzɛ̀ â ghee enyəa, “Nì nlo Zuʼ tə Zɔlɔ to. 23#Mat 16:19; 18:18 Abugho ghùw wɛʼɛ ghuūw maʼà bo e ghûw zò, ghe ŋ ghuuw màʼà sùghò bo e wə̄n; mò ghɛ̀ kâ bo e ghûw ghuuw màʼà, bôo tə wə̄n tə n lo ko nû.”

Yɛso gbə̀n sə kɔʼ an sə kə Tɔ̀mâs

24Â n lo êzə̀ mò Tɔ̀mâs wəla ù fə̂ lo sugho tsə̀ndə̄ghā è Yɛso, ghe fə̀ tɔɔŋ sugho wə̄n enyəa à lǒ ŋgɔ̀ɔŋmbɛ ŋ kuuwn yò an nəgha zəla Yɛso mò bugho a te. 25Ghəa ù ndùw bugho, tsə̀təndə̄ghā tə̀ li ti fi dzɛ̄ nû â wə̄n enyəa, “Ghàʼ m Mughu ù te kôʼ.” Ù n dzɛ̀ â ghee enyəa, “Ǹ lo boom ko mò mùghò n tɔ̀ʼ kòʼ nyə tsughu nwa u təmbɛ wo aŋ ghu a wə̄n, Ǹ zêen koʼò tsughu, M̀ mɔ̂ɔ ndûw sughò ti ebughū e wə̄n aŋ ghu kaŋa.”

26A m bùghò tsuʼu n tsəghà tsughu efāa, tsə̀təndə̄ghā tə Yɛso tə̀ n lo kpeʼe an ndughu, Tɔ̀mâs n lo ghèe ghee. À n lo mò gbâʼ ù fêen n dòʼò nù, ghe n tɛ̀ fìi kɔ̂ʼ Yɛso mò ù ti am bvʉa e ghee, ù n dzɛ̀ â ghee enyəa, “Bughuun zə lo ghɛ̀ à ghee.” 27Ù n daŋso dzɛ̀ â Tɔ̀mâs enyəa, “Gaʼ wò wɛ u kəghu wʉ̂a fɛ, ghu koʼ ghu ghaŋa gho; dǎan sə wò ghu kə̀a kò, ghù mɔm wo tiibùghu zaŋā zo; kà e lo mò ghù kì yo fə̀ŋ, e ki boo zo.” 28Tɔ̀mâs m bɛ̀lɛ̀ ndùw wə̄n enyəa, “Ghù lò Mughùbè waŋā à Zə̀ kaŋa ko.” 29Yɛso n dzɛ â wə̄n enyəa, “Ghù mô êzəŋ e boo, bòʼ aŋghəa ghù kòʼ wô mugho; Bughunlo e lo â ghì ghəla ghe boō fughu mo ghe kâ bùʼ kòʼ.”

So kə eghəa kəla ghe tɔm mwàʼsò kə ko a te

30Yɛso n dè ndə̀mà tə tə̀tsə̌a a sə̀a tsə̀təndə̄ghā tə wə̄n to mo ghe kâ fɛ am mwàʼsò kən tɔm naŋā; 31ghe ghəa ghən fɛ kuuwn tɔm naŋa aleghəə̄ŋ tsughu enyəa ghɛ̀ boo fughu enyəa Yɛso lǒ Kə̀lestò, Wɛ u Kə̀zə̀, àsùghò enyəa, am boo zɛʼɛ̄ to ghɛ̀ mo kele mughù zò an zən e wə̄n.

Currently Selected:

Dzɔ̌n 20: agq

Highlight

Copy