Abakwane̩ 46

Jeko̩b kpai abo-wñ ño̩ wʼIjipti

1Abe̩le̩ Israe̩l mʼe̩wñ du kʼi ne̩ ko, oñ i mʼo̩na ule̩-wñ du, oñ i lewa Birshiba, tak i kʼe̩wñ kpa ñw O̩jo̩ e-Aise̩k ata-wñ. 2O̩jo̩ la ko̩la ñw Israe̩l ef ane̩ ego odu, kakini, Jeko̩b, Jeko̩b. Oñ i kakini, Omi de̩. 3Tak i kakini, Omi chʼO̩jo̩, O̩jo̩ e-ata-we̩; e̩ ki railo egwo̩ru nyʼIjipti n; todu o̩mo̩ nadʼuwe̩ chʼuche̩ichi lile. 4Nagwo̩ru nyʼIjipti kpai uwe̩; nañʼadʼuwe̩ te̩gu kwo o̩mo̩ wa chuu; Jose̩f la adʼo̩wo̩-wñ bʼuwe̩ eju ma. 5Taku Jeko̩b kwo Birshiba alo; oñ amo̩ma Israe̩l mu Jeko̩b ata-ma du, kpai abimo̩to̩-ma, kpai amo̩ya-ma ef o̩ko̩ane̩ e-ku Fero du kpuche̩ wa adʼu. 6Ma ño̩ mʼame̩wñ ukpa-ma kpai ane̩-ma ku ma fiye̩ jo̩ ane̩ Kenan ko, oñ ma lewa Ijipti, Jeko̩b kpai ugbe̩-wñ du, 7amo̩ma-wñ e̩ne̩ke̩le̩, kpai amaaju-wñ e̩ne̩ke̩le̩, amo̩ma-wñ onobule̩, kpai amaaju-wñ onobule̩, e-kʼamo̩ma-wñ e̩ne̩ke̩le̩ bi; i la mʼamugbe̩-wñ chaka ko wʼIjipti kpai owñ.

8Odu abimo̩to̩ Israe̩l ku ma wʼane̩ Ijipti le̩ de̩, Jeko̩b kpai amo̩ma-wñ e̩ne̩ke̩le̩. Rube̩n, o̩mo̩gba Jeko̩b, 9amo̩ma Rube̩n e-e̩ne̩ke̩le̩ la che Hano̩k kpai Palu kpai He̩zro̩n kpai Karmi. 10Amo̩ma Simeo̩n e-e̩ne̩ke̩le̩ la che: Jemue̩l kpai Jamin kpai Ohad kpai Jachin kpai Zohar kpai Sho̩l ki chʼo̩ma kʼonobule̩ Kenan oka bi ñw u. 11Amo̩ma Lifai e-e̩ne̩ke̩le̩ la che̩: Ge̩rsho̩n kpai Ko̩hat kpai Me̩rari. 12Amo̩ma Juda e-e̩ne̩ke̩le̩ la che: E̩r kpai O̩nan kpai Shela kpai Pe̩re̩z kpai Zera (Er kpai Onan muda leku ane̩ Kenan); amo̩ma Pe̩re̩z e-e̩ne̩ke̩le̩ la che: He̩zro̩n kpai Hamul. 13Amo̩ma Isakar e-e̩ne̩ke̩le̩ la che: To̩la kpai Pufa kpai Job kpai Shimro̩n. 14Amo̩ma Ze̩biulo̩n e-e̩ne̩ke̩le̩ la che: Se̩re̩d kpai E̩lon kpai Jalee̩l. 15(Abo-i chʼamo̩ma Lea e-e̩ne̩ke̩le̩ e-kʼi bi ñwu Jeko̩b Padan-aram, manyʼo̩ma-wñ onobule̩ Daina; onugo amo̩ma-wñ e̩ne̩ke̩le̩ kpai onobule̩ du chʼogue̩gwa nyoke me̩ta.) 16Amo̩ma Gad e-e̩ne̩ke̩le̩ la che: Zifion kpai Hagi kpai Shuni kpai E̩zbon kpai Eri kpai Arodi kpai Areli. 17Amo̩ma Ashe̩r e-e̩ne̩ke̩le̩ la che: Imna kpai Ishfa kpai Ishfi kpai Be̩raya kpai Sera o̩maye-ma onobule̩. Amo̩ma Be̩raya e-e̩ne̩ke̩le̩ la che̩: Hebe̩r kpai Malkie̩l. 18(Abo-i chamo̩ma e̩ne̩ke̩le̩ e-Zilpa, ku Le̩ban du ñwu Lea o̩ma-wñ onobule̩; abo-i chʼabo kʼi la bi ma ñwu Jeko̩b—owñ chʼonugo one̩ me̩gwe̩fa.) 19Amo̩ma e̩ne̩ke̩le̩ e-Reche̩l o̩ya Jeko̩b che: Jose̩f kpai Be̩njamin. 20Ane̩ Ijipti ma bi Manasa kpai Ifraim ñwu Jose̩f, ama chʼe-kʼAse̩nat o̩ma Potife̩ra kʼi chʼatama On le̩, bi ñw u. 21Amo̩ma Be̩njamin e-e̩ne̩ke̩le̩ la che: Bila kpai Be̩ke̩r kpai Ashbe̩l kpai Gera kpai Neaman kpai Ehi kpai Rosh kpai Muppim kpai Huppim kpai Ard. 22(Abo-i chʼamo̩ma e̩ne̩ke̩le̩ e-ki Reche̩l bi ñwu Jeko̩b—onugo one̩ le̩ du chʼe̩gwe̩le̩.) 23Amo̩ma Dan e-e̩ne̩ke̩le̩ la che: Hushim. 24Amo̩ma Naftali e-e̩ne̩ke̩le̩ la che: Jazee̩l kpai Guni kpai Jeze̩r kpai Shile̩m. 25(Abo-i chʼamo̩ma e̩ne̩ke̩le̩ e-Bilha ku Leban du ñwu Reche̩l o̩ma-wñ onobule̩, abo-i la chʼabo kʼi bi ma ñwu Jeko̩b—onugo one̩ le̩ du chʼebie.) 26Onugo one̩ du ku ma lebo̩ Jeko̩b wa Ijipti, owñ chʼabo ku ma kwo uta-wñ dufu, amo̩ya amo̩ma Jeko̩b la dʼo̩ n; onugo one̩ du le̩ chʼo̩gbo̩ me̩ta nyoke me̩fa; 27amo̩ma Jose̩f e-e̩ne̩ke̩le̩ ku ma bi ñw u Ijipti chʼonugo one̩ meji; onugo one̩ du ki chʼabunyi Jeko̩b ki wʼIjipti chʼo̩gbo̩ me̩ta nyoke me̩gwa.

28Tak i fu Juda kpe̩ tʼo̩gba-wñ nyʼugbo Jose̩f, kʼi jiwe o̩na Goshe̩n ñwu ma; oñ ma lewa ane̩ Goshe̩n. 29Taku Jose̩f ko ane̩ nyef o̩ko̩ ogu-wñ, i mute̩gu aledo Israe̩l ata-wñ nyi Goshe̩n; oñ i dʼo̩la-wñ dufu ñw u, i la fʼo̩wo̩ lo nyʼo̩lo̩-wñ, oñ i nʼo̩lo̩-wñ araku gbane̩ gbane̩. 30Tak Israe̩l ka ñwu Jose̩f kakini, Dagba u leku ke, abu kʼu fʼeju-we̩ li, kʼe̩ la deju-i. 31Taku Jose̩f ka ñw amo̩maye-wñ kpai abo unyi ata-wñ, kakini, Nate̩gu nyʼaka ñwu Fero, oñ naka ñw u kakini, Amo̩maye-mi kpai abo unyi ata-mi ku ma jʼane̩ Kenan lewa ugbo-mi me̩; 32aboke̩le̩ le̩ che abo ku ma kʼije̩ ñw ame̩wño̩re egini je̩; todu ama chʼabo ku ma nʼame̩wñ ukpa; ma la nʼame̩wño̩re̩-ma egini kpai amokuno-ma kpai e̩wñ du ku ma ne wa. 33Oñ i awatu e̩gba ku Fero ado̩ me̩ kʼi kakini, Uko̩lo̩ e̩wñ me̩ che? 34Ame̩ ki kakini, Ame̩wñukpa e̩ne̩ chʼobe amadu-we̩-i, akwo o̩jo̩ imo̩to̩-wa gbogbo wa ifai, tʼawa, tʼamata-wa, todu kʼame̩ ki dodo ane̩ Goshen; todu adide ame̩wño̩re̩ egini du chʼe̩wñ ihie̩ne̩ ugbo abo Ijipti.

Currently Selected:

Abakwane̩ 46: IGL70

Highlight

Copy