Matana Enjil 18

Bag. 18.

1Man lehdar hirani Yesug abidi talin targi isigsan: „Ni terre edi dul simechina mulkir?“

2Yesu tod wekki uwedtargi wide tinna seler ebros wide wesum: 3„Aleged irgi wetidirrin, ir on widergi affitoni galganmenkurun, kidir simechina mulkir bitomnun. 4Tennewertigi in ogicchod nawite uskuril, ter teran edi dul simechina mulkir. 5Wer on ogicchod habbe ini galigki jamegirkin ann eriged, aigi jamegirsin galgum.“

6„Won wer on in kinatonirton habbekki, aiged aamnelirton, atrekin, tennai gen esum tenna gumurro kulu jundi wekki soligros wide essi doli werro kidirar. 7Urmud alamdum, atrachina jiradilo. Atrachina tarar lezmebun. Ama urmud zol tekked talna tirtindum. 8Enna i on wala os on ekki atrekin, eddeton merrigi warigir lufos. Ennai genum ayarro i habbekked wala fogorayan tokin, ig dimendir i owiged wala osi owiged tosindogor. 9Enna mis on ekki atrekin, kujirgi ennaiton lufos. Ennai genum ayarro misi werayan tokin, ig jehenebdir misi owiged tosindogor.“

10„Innewertichigi harsewe in kinatonigi hagradti. Mine irgi wetidirrin, tinna malaikari simechir dali abo simechir dalna koigi dime urwedagran.“

11„Minerg ankomnum, zolna tod tasum kashiry an wide dukiry an dabbuligi. 12Mingi innewertichir awerun? Zol wernai doir imil wer dangon, tiddeton wer dabkin, tisaïn wide iskodti mugosir gunan dogor, man daboselgi talin jurgi bikashmunu? 13Won ter on eledkin, aleged irgi wetidirrin, tekked biguren, elessinna wattigi, man tisaïni wide iskod dabmenilin dogor digrigir. 14Ikkegon inn abo simechir dal awerismunum habitodder in kinatonirton dabingi.“

15„Imbes on endogor hatyekin, tennai talin jurgi ekkon tekkon aguden barer adbe. Ter on ekki gijirtirkin, er imbeski widegressum. 16Ter on ekki gijirtirmenkin, ekkodon wekki ya owigi arejju, mine er wenna weregi kogorkirw an shahid owi ya toskin agiliged. 17Ter on tirgongi gijirtidirmenkin, kenisagi wetiru. Kenisagon gijirtirmenkin, ter wide ennai jelebdigon mekisdigon galganin.“

18„Aleged irgi wetidirrin, iri ariddogor digirrun male, simer bidigtakkin. Iri ariddogor kusrun malegon, simer bikustakkin.“

19„Widegon irgi wetidirrin, ow on iddeton ittiwrigi timekran haja werisrander, bitirtakkitidirin abo simechir dalged. 20Minerg ankomnun, ow on wala toski ann erir agar werro jamekran, teddo ai tinna seler erin.“

21Mani wattigi Butrus tekk abidi talin targi wesum: „Wo tir, gir mukkottekki ambeski, andogor hatyekin, aigon wide tekki gafretirrin? 22Gir kolodbokono?“ Yesu tekki wetirsum: „Ai ekki awetirminim gir kolodt an, ama gir sebaïngi gir kolodti.“

23„Ikkegon simechina mulki ogij or wer galgum, tenna nugdigi hasbadti werselgi. 24Idigi ugudisin kello tekki owolgirtirsan wezna eluf diminged dinebul wekki. 25Tennaigon orki kobil dameningad, or amresum: ‚Janosw an tekkon, tenn engon, tenn affichigon, tennai darel malegongi, tenna dengi kob an.’ 26Ter nugud tenna osichinai digir ungos wetirsum: ‚Andogor ennewertigi nosogir. Aigon ekki malegi biwidegirtirrin.’ 27Orna dugsi tenna nugudt abidi guyrangad, talge mugossum, juw an. Widegon tenna dengi wakossirsum. 28Ter nugud belligon nugud tenna tiwri wekki abidisum. Tendogorgon dinar imil wekki kosum. Teddokollo gosirton morogressum gidinbokon. Wide wetirsum: ‚Aigi endogor koringi kob.’ 29Tenna tiwri tenna osichinai digirrigi beddisum in wereged: ‚Andogor ennewertigi nosogir. Aigon ekki bikobrin.’ 30Ama nugud monossum. Wide arejjurgi habsir luf undursum, tenna dengi kobinbokon. 31Nugdi echeli weri awsingi uru nalosirgi, desen igir torgi tinna tirtinai targi awtakkel malegi wetirsan. 32Tekkon tenna lehdayen man nugudti uwedtargi wetirsum: ‚Nugud mili, enna dengi ai ekki wakossirsim, er aigi beddingad. 33Won endogorgon dakomnum enna tiwrigi shefegad, ai ekked shefegesin nawre?’ 34Tenna tirti igir torgi aazibeligi tidirsum, tenna dengi kobinbokon. 35Ikke teran abo simendi bawin ir wer nutinged, timbeski tenna a kamilged gafretirmenilgi.“

Currently Selected:

Matana Enjil 18: XNZ1912

Highlight

Copy