Римлянэнгэ 2

Дэвлэ́скиро Сэ́ндо

1Нанэ ту́кэ примангипэн, кажно ману́ш, саво́ сэндинэла явирэ́с, одолэ́-паць сэндоса ту кокоро́ явэ́са сэндиндло, пал-дова́ со, ко́ли ту сэндинэса явирэ манушэ́с, ту кэрэ́са дова́-паць кокоро́ пэ́скэ. 2Нэ амэ джина́са, со пэ адалэ́ манушэ́ндэ, кон кэрэ́ла дасаво-паць, исын чачуно́ Дэвлэ́скиро сэ́ндо. 3Ману́ш, ту со думинэса, со обджала Дэвлэ́скиро сэ́ндо, ке́ли ту сэндинэса манушэ́н, савэ́ кэрэ́на дасавэ́ рэ́нды и кокоро́ дова́-паць кэрэ́са? 4Ци ту на гинэса Дэвлэ́скиро лачхипэ́н, вырикирибэн и ужакирибэ́н, и, хай, ту на ґалёса, со Дэвлэ́скэ трэй, соб (кай) ту тэ рискирэс пэ́скиро джиибэ́н кэ Ёв? 5А пир тыро́ накандыпэн и напорискирдо кэ Ёв ило́, ту кокоро́ пэ́скэ кэдэса буты́р холы́ пэ дывэ́с ваш Дэвлэ́скири холы́, ке́ли Ёв откэрэла Пэ́скиро сэ́ндо, 6ке́ли Дэвэ́л отдэ́ла кажнонэ́ манушэ́скэ пхэнэ́ла пал лэ́скирэ рэ́нды: 7одолэ́нгэ, кон саро́ часо кэрэ́ла лачхэ́ рэ́нды и пир дава́ родэ́ла сла́ва, чачипэ́н и бимэрибнаскиро ко́нцо (яго́ро), Ёв дэ́ла ве́чно джиибэ́н. 8Нэ одолэ́н, кон кэрэ́ла пир пэ́скири годы́ и на приґалёла чачипэ́н, а кэрэ́ла фуипэ́н, кодолэ́с ужакирэ́ла холы́ и холямипэн Дэвлэ́стыр, 9ту́га и калыпэ́н явэ́на кажнонэ́ (сваконэ) манушэ́скирэ илэскэ, саво́ кэрэ́ла фуипэ́н, англэды́р Юдэ́нгэ, и адя́кэ-паць и Элинэ́нгэ (Грекэ́нгэ/Баламэ́нгэ): 10а сла́ва и паты́в, и рама́нё кажнонэ́ манушэ́скэ, саво́ кэрэ́ла лачхипэ́н, англэды́р Юдэ́нгэ, и адя́кэ-паць и Элинэнгэ (Грекэ́нгэ): 11Пал-дова́ со Дэвэ́л кутякирэла шэра́ (ра́внэс) сарэ́ манушэ́н. 12Одолэ́ мануша́, савэ́ на джиндлэ́ Зако́но и кэрдэ́ грэ́хи, ёнэ на пир Зако́но и хасёна; нэ одолэ́, савэ́ джиндлэ́ Зако́но и кэрдэ́ грэ́хи, ёнэ пир Зако́но и явэ́на сэндиндлэ; 13пал-дова́ со, на одолэ́ мануша́ исын чачунэ́ анги́л Дэвлэ́стэ, савэ́ шунэ́на Зако́но, а кодолэ́, савэ́ кэрэ́на пир Зако́но, ёнэ явэ́на зракхнэ́. 14Пал-дова́ со, ке́ли Наюдэ́ндэ нанэ Зако́но, ёнэ кэрэ́на кокорэ́ пэ́стыр, сы́рбы пир Зако́но, тэды ёнэ, савэ́ндэ нанэ Зако́но, исын Зако́но кокорэ́ пэ́скэ; 15ёнэ и сыкавэ́на, со Зако́но исын сы́рбы чхиндло́ дрэ лэ́нгиро ило́, лэ́нгири паты́в и годы́ допхэнэ́ла пал дава́, екх мо́ло ёнэ затэрдёна екх пал екхэ́стэ, а яви́р мо́ло бангякирэна екх екхэ́с; 16дро дова́-паць дывэ́с, ке́ли Дэвэ́л пир бахталы́ зан (звесь), сави́ мэ роспхэндём, явэ́ла тэ сэндякирэ́л сарэ́ чораханэ манушэ́нгирэ рэ́нды пир Исусо́стэ Христосо́стэ.

Ю́ды и Зако́но

17Ко́ли ту пэс гинэса Юдоса и розгинэса пэ Зако́но, и шарэсапэ Дэвлэ́са, 18и джинэ́са Лэ́скири во́ля, и ґалёса, со исын фэдэды́р, сыклыи Законо́стыр; 19и ту сан твардо, со ту сан лыджаибнаскиро корорэнгэ и ту сан дуд ваш одолэ́ манушэ́нгэ, савэ́ псирэ́на дро калыпэ́н (цямлыпэ́н); 20ту сан сыкляри (наставнико) ваш дылынэнгэ и сыклякирибна́скиро бияторэнгэ, конэ́стэ исын дро Зако́но саро́, со дасаво исын джиныбэ́н и чачипэ́н: 21Сыр ту сыклякирэса явирэ манушэ́н, а англэды́р ту кокоро́ на сыклёса? 22Ту ракирэ́са тэ на кэрэ́н биладжаипэ́н, а ту кокоро́ кэрэ́са биладжаипэ́н? Ту́кэ, хай, древа́н на пир ило́ и́долы, а кокоро́ ту обчорэса лэ́нгирэ кхангирья? 23Ту, саво́ шарэсапэ, со ту джинэ́са Зако́но, а кокоро́ кэрэ́са на пир Зако́но, – далэ́са ту ладжакирэса Дэвлэ́с? 24Палдава́ исын чхиндло́: “Пал тумэ́ндэ На́юды явэ́на тэ тэлякирэн Дэвлэ́скиро лав.” 25Палдава́ обчхиныбэн янэ́ла ту́кэ лачхипэ́н, ко́ли ту ракхэса Зако́но: нэ ко́ли ту кэрэ́са на пир Зако́но, тэды тыро́ обчхиныбэн нисо́ на мол. 26И ко́ли ману́ш, саво́ исын наобчхиндло, кэрэ́ла саро́, со исын чхиндло́ дро Зако́но, ци на явэ́ла лэ́скиро наобчхиныбэн тэ гинэлпэ лэ́скэ дро обчхиныбэн? 27И мануша́, савэ́ бияныпнастыр на сыс обчхиндлэ́, а кэрэ́на пир Зако́но, ци ёнэ явэ́на тэ сэндинэ́н тут, саво́ на кэрэ́ла пир Зако́но и джинэ́ла Свэ́нто Чхиныбэ́н? 28Пал-дова́ со, на одова́ исын Юдо, кон исын Юдо яврестыр, и на дова́ обчхиныбэн, саво́ исын кэрдо́ пэ маса́ яврестыр; 29нэ одова́ исын чачуно́ Юдо, саво́ андра́л исын дасаво, и дова́ исын обчхиныбэн, саво́ исын дро ило́, пир ду́хо (фа́но), а на пир Зако́но, дасавэскэ манушэ́скэ явэ́ла шарибэ́н на манушэ́ндыр, а Дэвлэ́стыр.

Currently Selected:

Римлянэнгэ 2: ROMBALT

Highlight

Copy