Матфеё 10

Дэшуду́й Апо́столы

1И ке́ли Ису́со кхардя́ дэшудуен сыкляибнытконэ́н кэ Пэ, Ёв дыя́ лэ́нгэ зор пэ налачхэ́ ду́хи, соб (кай) тэ традэ́н яври́ лэн манушэ́ндыр и састякирэн кажно насвалыпэн и дукх. 2Акэ, дэшудуенгирэ – Апостолэнгирэ лава́: пэ́рво Си́моно, савэ́с кхардэ́ Пэ́три, и Ендри (Андреё), пшал лэ́скиро, Заведеёскиро Яково, и Иа́но, пшал лэ́скиро. 3Филипо и Варфаламеё; Тамашо и Матфеё, мытоскиро скэдыибнари, Алфеёскиро Яково и Фадеё, 4Си́моно Кананито и Юда Искариото, саво́ здыя Лэс.

Дэшуду́й Сыкляибны́тка Кэрэ́на Исусо́скири Буты́

5Ису́со бичхадя́ адалэн дэшудуен и дыя́ лэ́нгэ строга упхэныбэна́: “На заджа́н дрэ штэ́ты, кай На́юды дживэ́на, на заджа́н дро Самаритянэнгиро фо́ро; 6а джа́н фэды́р кэ мануша́ Израилёскирэ кхэрэ́стыр, савэ́ исын хасякирдэ́ сыр бакрэ́. 7И ке́ли тумэ́ заджа́на, пхэнэ́н лав пал Дэвлэ́стэ, ракири́: ‘Явдя́ пашылэды́р Кралипэ́н дро Болыбна́скиро Раё, Савэ́са хулаинэла Дэвэ́л.’ 8Састякирэн насвалэн, жужакирэн проказытконэн, отджиджякирэн мулэн, традэ́н яври́ налачхэ́ ду́хи (фаны); би ловэнгиро дорэснэ́, би ловэнгиро отдэ́н. 9На лэн пэ́са ни сувнака́й, ни руп, ни харко́ма (медь) дрэ кисыка пэ кусты́к, 10ни саква (сумка) пэ дром, ни дуй ґа́да, ни ґэритка, ни дэсто́. Пал-дова́ со бутярно исын мол тэ хал. 11И дро вари-саво́ фо́ро ци гав тумэ́ тэ на заджа́н, уджинэ́н, кон исын патывало ману́ш дро дава́ фо́ро, и ячэ́нпэ одо́й анги́л, сыр тэ джа́н. 12И сыр заджа́на дро кхэр, пхэнэ́н ‘рама́нё’ (миро) манушэ́скэ, ракири́: ‘Тэ явэ́л рама́нё тумарэ́ кхэрэ́скэ’; 13и ко́ли тумэн лачхэ́с прилэ́на дро дава́ кхэр, мэк рама́нё (миро), со тумэ́ мангнэ́ Дэвлэ́стыр, тэ ячэ́лпэ дро кхэр; ко́ли над, мэк тумаро́ лав мангипнаса Дэвлэ́скэ тэ рисёл палэ кэ тумэ́. 14Нэ кон на прилэ́ла тумэн и на шунэ́ла лав тумаро́, триинскирэн пыло тумарэ́ ґэрэндыр, сыр явэ́на тэ джа́н яври́ кхэрэ́стыр ци форо́стыр. 15Чачэс, Мэ ракира́ва тумэ́нгэ: локхэды́р явэ́ла манушэ́нгэ Содомостыр и Гомора́тыр дро дывэ́с, ке́ли Дэвэ́л явэ́ла тэ сэндинэл, сыр кадалэ́ фороскэ.

Мануша́ Явэ́на тэ Традэ́н Апостолэ́н

16Акэ, Мэ бичхава́ва тумэн сыр бакрэ́н машки́р рувэндэ; явэ́н годьварэ́ сыр сапа, и бибангипнаскирэ сыр голумбы. 17Нэ ракхэ́нпэ манушэ́ндыр: пал-дова́ со явэ́на тэ здэн тумэн пэ сэ́ндо, и явэ́на тэ марэ́н тумэн чупняса дрэ лэ́нгирэ синагоги; 18и тырдэна тумэн кэ тхэмэ́скирэ барыдыра́ и кэ кра́лья пал Миро лав, соб (кай) тэ допхэнэн пал Ма́ндэ лэ́нгэ и Наюдэ́нгэ. 19Нэ сыр ёнэ здэна тумэн, на пиридживэн, сыр и со тэ пхэнэ́н тумэ́нгэ: пал-дова́ со явэ́ла дыно́ тумэ́нгэ, со тэ пхэнэ́н дрэ дова́-паць мардо́ (шту́нда); 20пал-дова́ со дава́ на тумэ́ явэ́на тэ ракирэ́н, нэ тумаро́ Болыбна́скирэ-Дадэ́скиро Ду́хо (Фа́но) явэ́ла тэ ракирэ́л дрэ тумэ́ндэ. 21И пшал здэла пшалэ́с пэ мэрибэ́н, и дад пэ́скирэ чхавэ́с; и чхавэ́ ґаздэ́напэ пэ дадэндэ и мулякирэна лэн. 22И сарэ́ мануша́ явэ́на тэ на сыкавэ́н паты́в тумэ́нгэ пал лав Миро, нэ кон явэ́ла тэ тэрдёл твардэс кэ ко́нцо (кэ яго́ро), кодова́ зракхэ́лапэ. 23И ке́ли явэ́на тэ традэ́н тумэн дро екх фо́ро, нашэ́н дро яви́р; пал-дова́ со Мэ, чачэс, ракира́ва тумэ́нгэ: на кончынэна тумэ́ тэ обджан сарэ́ фо́рья Израилёскирэ, сыр явэ́ла Чхаво́ Манушэ́скиро. 24Сыкляибны́тко (учэнико) исын на барэды́р сыклякирибнаристыр, писха́ри (ра́бо) на барэды́р пэ́скирэ ра́стыр. 25Ухты́лла (до́си) ваш сыкляибнытконэскэ, соб (кай) ёв тэ явэ́л дасаво, сыр лэ́скиро сыклякирибна́скиро (учытелё), и писха́ри дасаво, сыр лэ́скиро рай. Ко́ли сэмякирэ хула́с прокхардэ Вельзэвуло, сыр бутэды́р налачхэ́ лавэ́нца кхарна хула́скирэ кхэритконэн?’

Дарэ́н Екхэ́ Дэвлэ́стыр

26На андыршан кадалэ́ манушэ́ндыр: пал-дова́ со нанэ нисо́ чорахано, соб (кай) тэ явэ́л гарадо́, и гарадо́, соб (кай) тэ на явэ́л джиндло́. 27Со Мэ пхэна́ва тумэ́нгэ екх пэ екх, ракирэ́н сарэ́нгэ, и со тумэ́нгэ мануша́ пхэнэ́на пэ кан, пхэнэ́н пэ кхэри́тко бэ́рга. 28На андыршан кодолэндыр, савэ́ мулякирна маса́, нэ савэ́ на могинэ́на тэ мулякирэ́н тумаро́ ду́хо (фа́но); нэ дарэ́н кодолэндыр, савэ́ могинэ́на тэ мулякирэ́н и ду́хо (фа́но) и маса́ дро лю́но (адо). 29Ци на дуй шпаки (вороб΄и) бикнэнапэ пал екх асариё? И ни екх лэ́ндыр на пэрэ́ла пэ пхув би волякиро тумарэ́ Дадэ́скиро. 30Тумэ́ндэ аж и бала́ пэ шэро́ сарэ́ гиндлэ́. 31На андыршан жа: тумэ́ сан бут мо́лы кучэдыр, сыр кадалэ́ бут шпаки.

Кон исын пал Христосо́стэ, и Кон исын пэ Лэ́стэ

32Палдава́ кажнонэс, кон приґалёла Ман и роспхэнэ́ла пал Ма́ндэ анги́л манушэ́ндэ, кодолэ́с Мэ приґалёвава анги́л Мирэ́ Дадэ́стэ, Саво́ исын дро Болыбна́скиро Раё; 33и вари-савэ́стыр, кон отпхэнэлапэ Ма́ндыр анги́л манушэ́ндэ, кодолэстыр Мэ адя́кэ-паць отпхэнавапэ анги́л Мирэ́ Дадэ́стэ, Саво́ исын дро Болыбна́скиро Раё.

Ису́со Янэ́ла на Рама́нё (Миро), а Марибэ́н

34На думинэн, со Мэ яндём рама́нё (миро) пэ пхув; Мэ явдём тэ янав на ‘рама́нё’, а марибэ́н. 35Пал-дова́, со Мэ явдём тэ дурьякирав манушэ́с лэ́скирэ дадэ́стыр, и чха ла́кирэ датыр, и борья сасятыр, 36манушэ́скирэ вэ́рги исын кодолэ́, савэ́ исын лэ́скирэ кхэрэ́стыр. 37Конэ́скэ исын дро́го лэ́скиро дад ци буты́р, сыр Мэ, кодова́ исын на́лачхо Ма́нгэ, и кодова́, савэ́скэ исын дро́го чхаво́ ци чхай буты́р, сыр Мэ, кодова́ исын на́лачхо Ма́нгэ, 38и вари-кон, кон на лэ́ла трушу́л пэ́скиро и на джа́ла Ма́нца, кодова́ исын на́лачхо Ма́нгэ, 39и вари-кон, кон ракхэ́ла пэ́скиро джиибэ́н, кодова́ хасякирэ́ла лэс; и вари-кон, кон мэрэ́ла пал Ма́ндэ, дорэсэ́ла ве́чно джиибэ́н.

Дэвлэ́скиро Отдыибэ́н пал Лачхо́ Прилыибэн

40И вари-кон, кон прилэ́ла тумэн, хай, Ман прилэ́ла, и ёв, саво́ прилэ́ла Ман, прилэ́ла Кодолэ́с, Саво́ бичхадя́ Ман. 41И вари-кон, кон прилэ́ла пророко́с сыр пророко́с, кодова́ дорэсэ́ла (долэла) отдыибэ́н сыр проро́ко и вари-кон, кон прилэ́ла патяибнытконэ манушэ́с сыр патяибнытконэс, кодова́ дорэсэ́ла отдыибэ́н сыр патяибны́тко ману́ш. 42И вари-кон, кон дэ́ла хоць тахта́й (чаша) шылало пани́ екхэ́скэ адалэ́ тыкнэндыр сыр сыкляибнытконэскэ, чачэс, Мэ ракира́ва тумэ́нгэ: ёв на хасякирэ́ла пэ́скиро отдыибэ́н.”

Currently Selected:

Матфеё 10: ROMBALT

Highlight

Copy