Ma̱te̱yo̱ 22

Tubzenet ci kwo̱o̱r ci rucento

(Lu̱ka̱ 14:15-24)

1Ozozik zin bo̱do̱k Ye̱su̱ ol tubzenet ci edemeze enne nogo, ize ne, 2“Ogon ba̱a̱li̱ne̱t ci ta̱mu̱-kengo ki alaani ci adiman da̱i̱ne̱t ci adak ol eezene ci ngerinne. 3I̱tto̱n alaani du̱cca̱k ciginnek abunna ovvo awa ol balik u̱du̱wa̱k enne nogo ke̱, ubunntta da̱i̱ne̱t. Utuburet zin ol ne̱ke̱, iróng ngen a̱vvu̱.

4“I̱tto̱n zin bo̱do̱k alaani du̱cca̱k u̱gge̱ dee kar kizek ne, ‘U̱du̱kta̱k ol balik kawa anna ke̱, kidimana anna da̱i̱ne̱t: Kotodonga anna tomonya cik adiye. Ubunntta kaala do̱o̱k. I̱vi̱tta̱k da̱i̱ne̱t cik rucentak.’

5“Imma ol balik u̱du̱wa̱k enne kar ki̱vi̱ta̱k da̱i̱ne̱t ce̱e̱za̱ ko̱ iróng edeconik zoz neci, abarik ovvo li̱ngli̱ngo̱n cinne̱ng, okko neci manato, okko co̱de̱ cuwa okko ataline kaal ciginnek. 6A̱gga̱mi̱t zin ol ne̱ke̱ uggak du̱cca̱k kar kodomit nogo bak a̱ru̱k ka̱da̱i̱to̱. 7Utubur alaani nong oroot. I̱tto̱n zin enne aciir ciginnek kar ku̱ru̱we̱t ol wak a̱ru̱k du̱cca̱k waginnek ko̱, kar bo̱do̱k kutuzet orog neci.

8“Izek zin alaani du̱cca̱k ciginnek ne, ‘Ubunntta da̱i̱ne̱t cik ogone ol eezen ko̱, iróng zin ol balik kawa anna ke̱ agano ming a̱vvu̱ rucenet cu. 9I̱yo̱ko̱, oot go̱o̱lo̱we̱, anyaktta ol cik arubakku niga ngin neci ki̱vi̱ta̱ kadait da̱i̱ne̱t ciko.’ 10Oot zin du̱cca̱ha̱ go̱o̱lo̱we̱ kar kanyakta ol do̱o̱k ce̱e̱z ecito, cik gerzek icima cik abunna, kibbitet zin e̱re̱nno̱wa̱ ce̱e̱z neci.

11“Imma baling okko alaani a̱kku̱ abunna okko acin e̱re̱nno̱k, icin zin enne e̱e̱t co̱de̱ ci iróng aim ru̱u̱ma̱ni̱ cik rucentak. 12I̱jji̱n zin alaani nonno, ‘Goona, i̱i̱zo̱ i̱nna̱ ngintu ku̱ ming iróng aimi ru̱u̱ma̱ni̱ cik rucentak ko̱?’ Adal zin nonno zoz, iróng ngen abarizek alaan.

13“Iizek zin alaani du̱cca̱k ciginnek ne, ‘A̱gga̱mi̱t e̱e̱t necu e̱ce̱bi̱t zo̱o̱ ki azzin kar zin u̱ju̱ktte̱k re̱e̱nu̱n, nginti mu̱hu̱ri̱ ke̱, nginti okko enne a̱lu̱we̱ nyigite cik lo̱o̱tu̱.’

14“Eci u̱tu̱ye̱ ol cik meelek, abarik zin ahalai ol cikidik.”

A̱ru̱we̱k ol mucuru alaan ci a̱ddi̱ki̱re̱ Romi

(Marko 12:13-17; Lu̱ka̱ 20:20-26)

15U̱lu̱tte̱ zin ol cik een Varacis ko̱ kar ki̱no̱ni̱t gool ci ovvo nege atin a̱gga̱m Ye̱su̱ zo̱ze̱ ci a̱du̱wa̱ enne utuge cinne. 16I̱tto̱ntta̱k zin nege Ye̱su̱ nuyak cigge̱k ki olli alaan He̱ro̱di̱. I̱jji̱nne̱t zin nonno, “De̱me̱zo̱i̱t, ka̱gga̱yya̱ e̱e̱ni̱ i̱nna̱ e̱e̱t ci abunna, edemezi i̱nna̱ ol zoz ci Ta̱mu̱ta̱dde̱no̱ go̱o̱le̱ wa een de̱de̱, eci iróng i̱nna̱ edeconik zoz ci ollu. 17I̱yo̱ko̱ du̱wa̱kke̱ta̱, i̱no̱ni̱ i̱nna̱ nya zo̱ze̱ cu? Abunna ka̱ru̱we̱ka̱ mucuru alaan ci a̱ddi̱ki̱re̱ Romi#22:17 Alaan ci a̱ddi̱ki̱re̱ Romi: Een enne alaan ci a̱ddi̱ki̱rne̱ alaat cik lo̱o̱cco̱k u̱gge̱ ki bo̱do̱k Ju̱de̱ya̱ ki Ga̱li̱li̱ lo̱o̱ce̱ ci Ya̱u̱do̱. Awu olli Romi alaan ci a̱ddi̱ki̱re̱ kize Kesari. yo icima da̱ gerza?”

18Ma̱i̱je̱ Ye̱su̱ a̱gga̱ zoz ci gerze anyak nege zi̱nze̱tti̱nne̱. Ize zin ne, “Niga ol wak a̱ru̱kku̱ talaben, nya ming orongnyu annit ku̱yu̱we̱ ko̱? 19Ye̱le̱ka̱ o̱ro̱bi̱ya̱c ci a̱ru̱we̱ ol mucuru.” Anyakttak zin nonno o̱ro̱bi̱ya̱c co̱de̱ ci een zi̱i̱t, 20kar zin enne ki̱jji̱n nogo, “Ri̱ri̱to̱n ci ngene icu? Zar cik ngene ci e̱he̱rye̱ to ko̱?”

21O̱bo̱dde̱k zin nege Ye̱su̱, “Ri̱ri̱to̱n ci alaan ci a̱ddi̱ki̱re̱ Romi ki zar ciginnek.”

Iizek zin enne nogo ne, “Abunna oroot, aanycik alaan ci a̱ddi̱ki̱re̱ Romi kaal ciginnek. Imma kaala cik Ta̱mu̱ta̱dde̱no̱, aanycik Ta̱mu̱ta̱dde̱n.”

22Baling iziyyet nege zoz ci a̱du̱wa̱ Ye̱su̱ ko̱, u̱ku̱lte̱k je̱e̱n, kar zin kutungttek nonno lo̱o̱c, oot reena.

Rucenet ming ovvo ol ingazi daiza

(Marko 12:18-27; Lu̱ka̱ 20:27-40)

23I̱i̱te̱ne̱ neci ele i̱vi̱tta̱k ol cik een Saddocis wak azi ne, iróng ol ingazi daiza ko̱ i̱jji̱nne̱t Ye̱su̱, 24“De̱me̱zo̱i̱t, a̱du̱wa̱kke̱t Musesi zoz ci azi ne, ming a̱da̱i̱ e̱e̱ti̱ ngen ngaa cinne ki̱ti̱ra̱ dooli, anyik gotoni kurumte ki ngaa neci kar ki̱ti̱ra̱ dooli cik ovvo e̱e̱ggi̱n cik gotoni bali a̱da̱k ke̱. 25Anyak ba̱li̱ye̱ logoz turgerem cik een gotonen. Uruco lo̱gu̱t wa een a̱bu̱ kar ka̱da̱k ming ngen ki̱ti̱ra̱ dooli u̱gge̱, kar zin gotoniya co̱de̱ kurumte ki ngaa neci boye ke̱. 26A̱da̱k bo̱do̱k gotoniya neci ming ngen ki̱ti̱ra̱ dooli u̱gge̱, kar ngaa necu kurumte ki gotoni mac imma bo̱do̱k, zee bak arumze ki gotonoggi mac cinne do̱o̱k turgerem. 27Imma bali vu̱rrta̱ a̱da̱k ngaa neci bu̱k. 28I̱yo̱ko̱ zin, du̱wa̱kke̱ta̱, een atin ngaa neci ngaa ci ngene ming ovvo ol ingazi daiza? Eci enne abaito ki nogo do̱o̱k ngati e̱e̱ggi̱nne̱ turgerem.”

29O̱bo̱de̱k zin Ye̱su̱ nogo, “Abaccu niga oroot eci iróng niga a̱gga̱yyu̱ Waraga ci Ta̱mu̱ta̱dde̱no̱, icima komiz cinne. 30Ming ovvo ol ingazi daiza, iróng atin ol aruce icima a̱ti̱ye̱ bo̱do̱k. Ogon atin ol ki anjilonya cik Ta̱mu̱ta̱dde̱no̱ ta̱mu̱-kenga. 31Ma̱i̱je̱ i̱yo̱ko̱ zoz ci ingane ol daiza ko̱, ngen da̱ niga ikebit zoz ci a̱du̱wa̱kku̱ng Ta̱mu̱ta̱dde̱n, azi ne, 32‘Ke̱e̱ni̱ anna Ta̱mu̱ta̱dde̱n ci Aburahami, Ta̱mu̱ta̱dde̱n ci I̱sa̱ko̱ ki Ta̱mu̱ta̱dde̱n ci Ya̱ko̱bo̱’#Lu̱ge̱z 3:6,15? Iróng enne een Ta̱mu̱ta̱dde̱n ci ol wak a̱da̱i̱to̱, een enne ci ol wak aruge.”

33Baling iziyyet koole zoz necu, u̱ku̱lte̱k zin de̱mzi̱ne̱t ci Ye̱su̱.

Ti̱lo̱wi̱ne̱t wa riili ommog veelek

(Marko 12:28-34; Lu̱ka̱ 10:25-28)

34Imma baling a̱gga̱c Varacis ommog Ye̱su̱ ol cik een Saddocis zoza, i̱no̱ni̱t zin nege ji̱ne̱ne̱t ci ovvo nege a̱jji̱nne̱ Ye̱su̱. 35I̱jji̱n zin e̱e̱ti̱ co̱de̱ ngatinne̱ng ci een a̱ri̱to̱i̱t ci zoz wa lo̱ti̱nno̱k wak Musesi, a̱nne̱k ne:

36“De̱me̱zo̱i̱t, ti̱lo̱wi̱ne̱t jang ci riili ommog veelek lo̱ti̱nno̱we̱ balik eher Musesi ke̱?”

37O̱bo̱de̱k zin Ye̱su̱ nonno, “‘Irez Manyi Ta̱mu̱ta̱dde̱n zinine cunne ki vongize cunne ki bo̱do̱k komize cunne do̱o̱k.’#Deuteronomy 6:5 38Een necu ti̱lo̱wi̱ne̱t ci een oo ommog veelek. 39Imma ti̱lo̱wi̱ne̱t ci een rama riili bo̱do̱k ko̱, azi ne, ‘Irez e̱e̱t ci locariyo#22:39 E̱e̱t ci locariyo: Oob Ye̱su̱ keng ci ireze i̱nna̱ locari cunne. IkebLu̱ka̱ 10:27-37. ki i̱yo̱ko̱ ming irezi i̱nna̱ ele cunne ko̱.’#Leviticus 19:18 40Annu lo̱ti̱nno̱wa̱ cik Musesi do̱o̱k ki a̱ri̱tto̱k wak zoz ci Ta̱mu̱ta̱dde̱no̱ lo̱ti̱nno̱k cik een rama ko̱.”

I̱jji̱n Ye̱su̱ ol cik een Varacis zoz ci Ki̱ri̱sto̱

(Marko 12:35-37; Lu̱ka̱ 20:41-44)

41Baling u̱lu̱tte̱ ol cik een Varacis, i̱jji̱n zin Ye̱su̱ nogo, 42“I̱no̱nnu̱ niga nya zo̱ze̱ ci Ki̱ri̱sto̱? Een enne ngerrti ngene?”

Izettek zin nonno ne, “Een Ki̱ri̱sto̱ Ngerrti Da̱vi̱de̱!”

43O̱bo̱de̱k zin Ye̱su̱ nogo, “Nya zin ba̱li̱ye̱ Da̱vi̱de̱ ozoz komize ci Vongiz ci A̱li̱le̱ awu nonno azi ne, ‘Manyi’? Eci azi Da̱vi̱de̱ ne,

44“‘A̱nne̱k Manyi Manyi cinanni#22:44 A̱nne̱k Manyi Manyi cinanni: Awu Manyi Ta̱mu̱ta̱dde̱n Ye̱su̱, azi ne, een enne Manyi. ne:

“A̱vvu̱ a̱tte̱ cinanni a̱zzo̱ ngati a̱di̱ngdi̱nga̱ni̱ ol,

zee ku̱tu̱gu̱ anna mo̱ddo̱ wagunnek,

ka̱vvu̱to̱ zoone cigunnek.”’#Caliwon 110:1

45Ming awu Da̱vi̱de̱ nonno, ‘Manyi,’ okko wo̱ye̱ enne bo̱do̱k een ngerinne ku̱?” 46I̱llo̱i̱ zin e̱e̱t imma ci abarizek nonno, kar bali vu̱rrta̱, iróng e̱e̱ti̱ imma ngen a̱jji̱n nonno ji̱ne̱ne̱t neci dee.

Currently Selected:

Ma̱te̱yo̱ 22: tex

Highlight

Copy