Ma̱te̱yo̱ 20

Tubzenet ci ol wak a̱li̱ngli̱ng manato

1A̱du̱wa̱k Ye̱su̱ nuyak ciginnek a̱nne̱k ne, “Ogon ba̱a̱li̱ne̱t ci ta̱mu̱-kengo ki e̱e̱ti̱ ci een manyi ma̱na̱, okko orong ol cik a̱li̱ngli̱ng ma̱ne̱ cinne. 2Elema zin enne ku̱ru̱k o̱ro̱bi̱ya̱c co̱de̱ ci een zi̱i̱t ci okko enne a̱li̱ngli̱nge̱ tu̱b i̱i̱te̱n co̱de̱, kar zin kaanyik nogo koot manato li̱ngli̱ngo̱n.

3“Imma baling okko i̱i̱ een torkoc nge̱rre̱t, uk reena kar kicin ol u̱gge̱ cik abile ollin i̱llo̱i̱ li̱ngli̱ngo̱n. 4Kar zin enne kozozek nogo, a̱nne̱k ne, ‘Oot niga bu̱k li̱ngli̱ngo̱n ma̱ne̱ cinanni, ka̱ru̱we̱kku̱ng atin o̱ro̱bi̱ya̱ cik mayek.’ 5Oot zin nege.

“Uk zin bo̱do̱k enne dee ngamani baling iginge i̱i̱ ize i̱i̱yo̱ ci yo̱mo̱no̱, u̱tu̱gu̱ zin enne zoz neci dee, anyik ol u̱gge̱ li̱ngli̱ngo̱n kar enne kurumek ki gonoggi ki̱li̱ngli̱nge̱t ma̱ne̱ cinne. 6Imma baling okko i̱i̱ een tu̱r yo̱mo̱na̱, uk zin enne bo̱do̱k uruba ol cik abile gaganiko. I̱jji̱n zin enne nogo, ‘Nya ming abillu ngatu ko̱, iróng ogonnu gi̱i̱ imma?’

7“O̱bo̱dde̱k zin nege nonno, ‘Eci ngen e̱e̱ti̱ imma kaanyyet li̱ngli̱ngo̱n.’

“Iizek zin enne nogo ne, ‘I̱yo̱ko̱ zin, oot niga bu̱k li̱ngli̱ngo̱n ma̱ne̱ cinanni.’

8“Imma baling ize yo̱mo̱n, u̱du̱wa̱k manyi ma̱na̱ e̱e̱t wa een ddi̱ki̱ryo̱i̱t ebek ol wak a̱li̱ngli̱ng ma̱ne̱ neci ko̱, ne, ‘Tu̱ ol wak li̱ngli̱ngo̱nta̱k ko̱ do̱o̱k kar ru̱we̱k nogo o̱ro̱bi̱ya̱ cigge̱k, kate ngati ol balik i̱i̱zo̱ li̱ngli̱ngo̱n vu̱rrta̱ ke̱.’

9“I̱vi̱ta̱ ol balik i̱i̱zo̱ li̱ngli̱ngo̱n yo̱mo̱na̱ ngati izewe i̱i̱ tu̱r ke̱, u̱ru̱we̱k zin enne nogo o̱ro̱bi̱ya̱c co̱de̱ ci een zi̱i̱t kize ci i̱i̱te̱n co̱de̱. 10Baling ovvo ol wak olowak li̱ngli̱ngo̱n ke̱ ovvo engera o̱ro̱bi̱ya̱c co̱de̱ ci een zi̱i̱t, i̱no̱ni̱t izeto ne, ‘Ka̱gga̱mnya̱ atidic o̱ro̱bi̱ya̱ cik meelek.’ Abarik u̱ru̱kto̱zi̱k nogo bu̱k, o̱ro̱bi̱ya̱ cik een ki cik gonoggi balik a̱vvu̱ vu̱rrta̱ ke̱. 11Baling engertta nege o̱ro̱bi̱ya̱ cigge̱k, utuburet zin nong ngati manyi ma̱na̱. 12Kar kizeto ne, ‘A̱li̱ngli̱ng ol balik a̱vvu̱ vu̱rrta̱ ko̱ i̱i̱ co̱de̱ ṯok, kar zin i̱nna̱ anyik nogo o̱ro̱bi̱ya̱ cik atubo ki agita ol balik ka̱li̱ngli̱ngnya̱ oroot wazin do̱o̱k koore ci a̱bu̱re̱ ko̱.’

13“Kar zin manyi ma̱na̱ kobodek e̱e̱t co̱de̱, a̱nne̱k ne, ‘Goona, ngen anna kacac e̱e̱t imma! Ngen wanai i̱nna̱ lema li̱ngli̱ngo̱n ci a̱li̱ngli̱nge̱ tu̱b o̱ro̱bi̱ya̱c co̱de̱ ci een zi̱i̱t? 14I̱yo̱ko̱ zin, idimtta o̱ro̱bi̱ya̱ ciko kar oto. Korongi anna ku̱ru̱we̱t ol do̱o̱k o̱ro̱bi̱ya̱ kutubto ki ol wak a̱vvu̱ vu̱rrta̱ ke̱ ki ciggo̱k. 15Iróng wo̱ye̱ anna kengeri o̱ro̱bi̱ya̱ cigannik anna manyi go̱o̱le̱ ci koronge anna? Eci anna ki̱i̱rke̱, anyai zin i̱nna̱ meder ngatinanni.’

16“Kar zin ol cik a̱vvu̱ vu̱rrta̱ kizeto atin o̱o̱tti̱, kar ol balik a̱vvu̱ oowa ko̱ kizeto vu̱rrti̱.”

A̱du̱wa̱k Ye̱su̱ bo̱do̱k nuyak daiz cinne

(Marko 10:32-34; Lu̱ka̱ 18:31-34)

17Baling okko Ye̱su̱ Jerusalema, uwe zin nuyak waginnek een omoto ki rama ko̱ abanyca, kar ku̱du̱wa̱k nogo zoz cu, 18“Kovvo naga rok Jerusalem, anyak atin ol cik ovvo adawa Ngerrti E̱e̱to̱, ovolongek alaat cik olli wawaco Ce̱e̱ze̱ wa Ta̱mu̱ta̱dde̱no̱ ki de̱me̱zzo̱k wak lo̱ti̱nno̱k wak Musesi. Ovvo atin nege ettedeka annit Ngerrti E̱e̱to̱ daiz. 19Kar zin nege ka̱gga̱mte̱ya̱ annit ol wak iróng een Ya̱u̱d, kar atin nege komomoztan, bak a̱ru̱ka̱ kar zin kotodoyya keet ci een ta̱la̱ke̱c. Imma i̱i̱nya̱we̱ cik een i̱i̱yo̱ kingazi atin anna daiza dee!”

Edemez Ye̱su̱ ol gool ci baizo

(Marko 10:35-45)

20I̱ki̱ya̱ zin ngaa ci Zebedee wa een e̱e̱ti̱ Je̱mi̱si̱ ki Jon, anyaha ki dooli waginnek een rama ko̱ bu̱k rok Ye̱su̱. Kar zin ngaa neci kakatek u̱zu̱ngti̱nne̱ ngati Ye̱su̱, orong abunna enne ming ogonik nonno gi̱i̱ ci orong enne.

21I̱jji̱n zin enne ngaa neci, “Orongi i̱nna̱ nya?”

O̱bo̱de̱k zin ngaa neci nonno, “Anyik dooli cigannik een rama ko̱ ka̱vvu̱to̱ ki i̱nne̱t nga̱to̱de̱. Anyik co̱de̱ ka̱vvu̱ angeta okko co̱de̱ aave a̱zza̱, ming ize atin i̱nna̱ alaan ci lo̱o̱c cu.”

22U̱du̱wa̱k zin Ye̱su̱ nogo, “Iróng niga a̱gga̱yyu̱ zoz ci a̱jji̱nnu̱ ko̱. Auddu wo̱ye̱ atin de̱de̱ niga piryanzet ci kokko atin anna karuba ko̱?”

Abarizet zin nege, azi ne, “I̱i̱ny, kanimnya!”

23U̱du̱wa̱k zin Ye̱su̱ nogo, “Inimet de̱de̱ ki i̱yo̱ko̱ anna ming kanimi ko̱. Ma̱i̱je̱ zoz ci okko e̱e̱ti̱ imma ngatinno̱ng aave angeta icima a̱zza̱, iróng een annit ci ka̱du̱wa̱. Baba ci adiman zoz necu do̱o̱k.”

24Baling ovvo nuyaha cik een omoto ko̱ aziye zoz wa a̱jji̱nne̱ Je̱mi̱si̱ ki Jon, Ye̱su̱, utuburtek zin nege nong gotonen cik een rama ko̱ oroot. 25Utu zin Ye̱su̱ nogo do̱o̱k nga̱to̱de̱ kar kizek ne, “A̱gga̱yyu̱ alaat cik ol wak iróng een Ya̱u̱d ming orong kanyait komiz ci abale nege ol wak a̱li̱ngli̱ng ki nogo, ogon ol wak a̱li̱ngli̱ng ki nogo bu̱k niko. 26Iróng een niko ngatinno̱ng, abarik, ming orong e̱e̱ti̱ kize alaan ci a̱ddi̱ki̱re̱ orgene cunno̱ng, anyik nonno kize du̱ca̱i̱t cunno̱ng, 27kar bo̱do̱k ming orong e̱e̱ti̱ kize oo, anyik nonno kize du̱ca̱i̱t ci ollu. 28Imma Ngerrti E̱e̱to̱ iróng a̱kku̱ ki̱vi̱ta̱ ol ki̱li̱ngli̱ngte̱k nonno, abarik, a̱kku̱ ki̱ki̱ya̱ ki̱li̱ngli̱nge̱k ol, kar kaanyik baiz cinne kize wawac ci ol cik meelek.”

Angaru Ye̱su̱ ol cik ru̱be̱ni̱k rama

(Marko 10:46-52; Lu̱ka̱ 18:35-43)

29Baling utungtek Ye̱su̱ ki nuyak waginnek orog ci een zara Je̱ri̱ko̱ lo̱o̱c, unuwet zin ol cik meelek nogo vu̱rrta̱. 30Aavtte da̱ ol uggak cik ru̱be̱ni̱k rama goola abanyca. Baling iziyyet nege azi ne, a̱kku̱ Ye̱su̱ go̱o̱le̱ neci, egerenyit zin, “Manyi, Ngerrti Da̱vi̱de̱, eelaweta.”

31Itivanit zin koole nogo a̱nne̱k ne ijaktte, abarik egerenyit zin oroot, “Manyi, Ngerrti Da̱vi̱de̱, ti̱ri̱ze̱tta̱!”

32Ibil zin Ye̱su̱ kar zin ki̱jji̱no̱, “Orongnyu dim ku̱tu̱gu̱we̱u̱ng anna i̱ge̱t nya?”

33Izeto zin bo̱do̱k nege ne, “Manyi, korongnya kicintewa!”

34Atamatek zin Ye̱su̱ nogo, kar zin ku̱u̱m ebere cigge̱k. Icinte zin nege ataman niko, kar zin kunuwet nonno.

Currently Selected:

Ma̱te̱yo̱ 20: tex

Highlight

Copy