Kananet 38

Ju̱da̱ ki Tamar

1Imma i̱i̱te̱ne̱ neci, utungek Ju̱da̱ gotonoggi lo̱o̱c kar ku̱lu̱k kuk kabak ki e̱e̱t ci orog ci een zara Adullam ci een zara Hirah. 2Kar nginati u̱ru̱mto̱ Ju̱da̱ ki do̱le̱c ci e̱e̱t ci Kanaani een zara Shua. I̱ti̱k zin enne do̱le̱c neci kar kabaito bu̱k; 3anyaho zin enne kar ki̱ti̱rra̱ ngerinne ci akannek zar cik een Er. 4Kar bo̱do̱k kanyaho dee kar ki̱ti̱rra̱ do̱le̱c ci maci akannek nege zar cik een Onan. 5Anyaho bo̱do̱k dee kar ki̱ti̱rra̱ do̱le̱c ci maci kar kakatek zar cik een Shelah. A̱rri̱ta̱i̱ Shelah o̱rge̱ ci een zara Kezib.

6Baling i̱ddi̱ki̱r a̱bu̱ ci Ju̱da̱ wa een zara Er, i̱ti̱ya̱k zin Ju̱da̱ nonno do̱le̱c ci een zara Tamar. 7Imma Eri a̱bu̱ ci Ju̱da̱ een e̱e̱t ci mu̱nye̱nu̱ ngu̱me̱ ci Manyi; u̱ru̱k zin Manyi nonno ka̱da̱k.

8A̱nne̱k zin Ju̱da̱ gotoni Er wa dici een zara Onan ne, “Urumte ki Tamar ngaa ci gotononnu abunna ming a̱rri̱ta̱k nonno dooli.” 9Ma̱i̱je̱ Onani a̱gga̱ niko iróng dooli ne̱ke̱ atin een ciginnek; kar zin ming okko enne oogin ki ngaa ci gotononi, okko gon enne a̱ddu̱ta̱k zoolo wak ti̱rra̱k ke̱ tu̱. 10Ovvo kaala cik ogon enne ko̱ e̱e̱ggi̱n mu̱nye̱n ngu̱me̱ ci Manyi; u̱ru̱k zin Manyi nonno ka̱da̱k.

11Izek zin Ju̱da̱ alawan Tamar ne, “Bak i̱nna̱ ngaa ci boye ce̱e̱ze̱ ci baatunne zee ki̱ddi̱ki̱r ngeranni ci een Shelah.” Eci enne i̱no̱n azi ne, “Icima okko atin enne a̱da̱i̱ bu̱k, ki bali gotonoggja.” Uk zin Tamari abak ce̱e̱ze̱ ci baatinne.

12Imma bali e̱rki̱nya̱ u̱gge̱ a̱da̱k ngaa ci Ju̱da̱, buweenyi Shua. Baling edeca Ju̱da̱ u̱lu̱wa̱ cinne, itinga uk o̱rge̱ ci een Timnah, okko ngati ol cik etted ima azzane ovvo adimane ru̱u̱ma̱ni̱, orkor enne ki gooni ci een zara Hirah, e̱e̱t ci orog ci Adullami.

13Baling u̱du̱kta̱k ol Tamar zoz cu, “Okko i̱nyi̱k cunne goola rok orog ci een Timnah kuk kicin ol cik etted ima cik a̱zza̱ ciginnek,” 14aara Tamari ru̱u̱ma̱ni̱ balik u̱lu̱wa̱nu̱ ko̱, u̱bu̱ng ele cinne ru̱u̱me̱ ci iróng ol a̱gga̱we̱ nonno, kar kuk ka̱vvu̱ lo̱o̱ta̱ go̱o̱le̱ ci i̱zo̱we̱ ol nginti een Enaim go̱o̱le̱ ci Timnah. Eci enne icin i̱ddi̱ki̱r Shelah gotoni mac cinne, iróng zin ol aanyik nonno kabaito bu̱k kize mac.

15Baling okko Ju̱da̱ acin nonno, i̱no̱n enne azi ne een i̱yo̱ko̱ ngaa necu a̱li̱ya̱i̱t, eci enne a̱bu̱ng ngu̱m cinne. 16Iróng zin enne a̱gga̱ ming een do̱le̱c necu alawan cinne, uk zin enne ngatinne goola abanyca kar kize ne, “I̱jja̱ i̱yo̱ko̱, ka̱ta̱gu̱z anna ki i̱nne̱ta̱.”

I̱jji̱n zin Tamari nonno, “A̱ru̱we̱ka̱ atidic nya ming ka̱ta̱gu̱zzo̱ anna ki i̱nne̱ta̱?”

17O̱bo̱de̱k zin Ju̱da̱ nonno, “Kokko atin anna ki̱tto̱na̱ki̱ eez cidici eezai cigannik.”

I̱jji̱n zin Tamari nonno, “Inya arrak gi̱i̱ imma ka̱gga̱m anna zee kar atin i̱nna̱ i̱tto̱na̱ eez neci.”

18O̱bo̱de̱k zin enne, “Orongi i̱nna̱ kaanyi nya kar gga̱mu̱?”

Ize zin Tamari ne, “Inya muul ci aimi i̱nna̱ ko̱ ki keet ci omtine ko̱.” Aanyik zin Ju̱da̱ nonno kaal ne̱ke̱ do̱o̱k kar zin ka̱ta̱gu̱zzo̱ ki nonno, bali vu̱rrta̱ anyaho zin Tamari niko. 19Baling okko Tamari a̱mi̱re̱ okko ce̱e̱za̱, aara ru̱u̱ma̱ni̱ balik aim enne ke̱, kar zin kobodozik ki̱ti̱m ru̱u̱ma̱ni̱ cik u̱lu̱wa̱nu̱ dee.

20I̱tto̱n zin Ju̱da̱ eez cidici ki gooni ci een Hirah, e̱e̱t ci orog ci Adullami abunna okko obodane kaal balik aanyik enne ngaa ci een a̱li̱ya̱i̱t ke̱, iróng zin enne ngen amuda ngaa neci. 21I̱jji̱n zin enne ol cik abak nginati, “I̱nno̱ ngaa wagon een a̱li̱ya̱i̱t aave goola o̱rge̱ ci Enaimi ko̱?”

O̱bo̱dde̱k zin ol nonno, “I̱llo̱i̱ nginti aave a̱li̱ya̱i̱ti̱ imma ngatu.”

22I̱mi̱re̱ zin Hirah uk ngati Ju̱da̱ kar kizek ne, “Ngen anna kumuda nonno. A̱du̱wa̱ ol cik abak nginati azi ne, ‘I̱llo̱i̱ nginti a̱li̱ya̱i̱t imma ngatu udut.’”

23Ize zin Ju̱da̱ ne, “Anyik da̱ nonno kanyak muul neci ki ki̱ri̱, icima ovvo atin araneta. Ki̱tto̱ni̱ya̱ ri̱t anna nonno wanai eez cidici, ma̱i̱je̱ ngatu ngen i̱nna̱ ruba nonno.”

24Baling e̱de̱cca̱ nege nyelowi i̱i̱yo̱, u̱du̱wa̱k e̱e̱ti̱ imma Ju̱da̱ azi ne, “Ize alawani cunne Tamari a̱li̱ya̱i̱t, abarik anyaho.”

Egereny zin Ju̱da̱, “U̱tu̱gu̱rre̱t nonno o̱o̱tte̱ orog abanyca kar utuzet gwo̱o̱ya̱ ka̱da̱k!”

25Baling ovvo ol anyaha nonno re̱e̱nu̱n, i̱tto̱na̱k zin enne Ju̱da̱ i̱nyi̱k cinne zoz. A̱nne̱k ne, “Kanyakce anna ngati e̱e̱t ci een manyi kaal ciko. Cin da̱ ming i̱ye̱za̱, e̱e̱ggi̱n kaala ne̱ko̱ cik ngene.”

26Elema zin Ju̱da̱ kaal ne̱ke̱ de̱de̱ ming een ciginnek, kar kize ne, “Abunna enne kommoga annita, eci anna ngen ku̱tu̱gu̱ zoz bali ka̱du̱wa̱k ke̱ azi ne abak atin enne ki ngeranni Shelah ming i̱ddi̱ki̱ra̱.” Ngen zin Ju̱da̱ ka̱ta̱gu̱zzo̱ ki Tamar bo̱do̱k dee.

27Baling ize ojon tuyanet, anyak da̱ enne cuude kenge cinne. 28Ming okko enne ukcai, iyowai do̱le̱c co̱de̱ a̱zzi̱t; idima ngaa ci eela nonno tuyanta ko̱ baruc ci ma̱ri̱ kar kecebek a̱zzi̱t cinne kar kize ne, “Iyowa do̱le̱c cu arrak oowa.” 29Imma baling i̱mi̱ro̱i̱ enne a̱zzi̱t cinne, iyowa zin gotoniya re̱e̱nu̱n, kar ngaa ci eela Tamar tuyanta ko̱ kize ne, “Een necu gool ci alibane i̱nna̱ re̱e̱nu̱n!” Kar zin kakatek zar ciginnek kize Perez.#38:29 Perez: Utuge ci I̱bu̱ru̱, azi keng cik zar ne̱ko̱ ne, uk tu̱a̱. 30Baling i̱ti̱rra̱i̱ gotoniya wa anyak baruc ci ma̱ri̱ a̱tta̱ ko̱, kar zin kakatek zar cik een Zerah.#38:30 Zerah: Utuge ci I̱bu̱ru̱, azi keng cik zar ne̱ko̱ ne, ma̱ri̱k.

Currently Selected:

Kananet 38: tex

Highlight

Copy