Kananet 35

I̱mi̱re̱ Ya̱ko̱bo̱ uk o̱rge̱ ci een Bethel

1Izek zin Ta̱mu̱ta̱dde̱n Ya̱ko̱bo̱ ne, “Bit o̱rge̱ ci een Bethel kar bak nginati, kar dimanek Ta̱mu̱ta̱dde̱n i̱te̱le̱ nginati, Ta̱mu̱ta̱dde̱n bali i̱ye̱le̱ki̱ ele baling a̱vi̱ri̱ i̱nna̱ ngati gotononnu I̱sa̱u̱.”

2Izek zin Ya̱ko̱bo̱ ollinne ce̱e̱za̱ ki ol wak aavtte ki nonno bu̱k ko̱ ne, “I̱di̱tta̱ to̱do̱yyo̱k ne̱k i̱do̱ngi̱nnu̱ anyikku kizeto ta̱mu̱ta̱dde̱ne̱t ciggo̱k ko̱, kar idimanit e̱le̱tti̱ cuggo̱k ki̱li̱le̱c kar uburucet ru̱u̱ma̱ni̱ cik een jor. 3Kar zin i̱vi̱ta̱ koot rok Bethel, ngati kokko atin anna kadimanek i̱te̱le̱ Ta̱mu̱ta̱dde̱n bali eelanna no̱ngi̱tto̱ne̱ cigannik, kar enne ka̱vvu̱ ngati kowoye anna.” 4Aanycik zin nege Ya̱ko̱bo̱ to̱do̱yyo̱k ne̱k anyak nege ke̱, ki wak aim nege iine, kar Ya̱ko̱bo̱ kadawek kaal ne̱ke̱ keet vu̱rru̱t o̱rge̱ ci een Shechem. 5U̱lu̱ge̱t zin nege, kar ki̱ra̱ki̱ra̱k ci Ta̱mu̱ta̱dde̱no̱ ki̱ta̱k o̱ro̱gjo̱k ne̱k aavtte orgene cinne̱ng ko̱ do̱o̱k ci iróng e̱e̱ti̱ imma annu nogo.

6I̱vi̱tta̱k zin Ya̱ko̱bo̱ ki ol wak orkor ki nonno ko̱ rok orog ci een Luz, aave lo̱o̱ce̱ ci Kanaani. E̱e̱ggi̱n zara uggak bo̱do̱k, Bethel. 7Idiman zin enne nginati i̱te̱le̱, kar kakatek ngin neci kize El Bethel,#35:7 El Bethel: Utuge ci I̱bu̱ru̱, azi keng cik zar ne̱ko̱ ne, Ta̱mu̱ta̱dde̱n ci Betheli. eci i̱ye̱le̱k Ta̱mu̱ta̱dde̱n ele cinne nonno nginati baling a̱vi̱r enne ngati gotononi.

8A̱da̱k zin Deborah, ngaa bali azunne Rebekah kar zin Ya̱ko̱bo̱ kadawek nonno keet vu̱rru̱t, Bethel abanyca. Kar zin kakatozik zara cik een Allon Bacuth.#35:8 Allon Bacuth: Utuge ci I̱bu̱ru̱, azi keng cik zar ne̱ko̱ ne, keet ci u̱lu̱wa̱nu̱.

9Baling oboda Ya̱ko̱bo̱ Paddan Arama, i̱ye̱le̱k zin Ta̱mu̱ta̱dde̱n nonno ele cinne bo̱do̱k kar ka̱mu̱yu̱k nonno. 10Izek zin Ta̱mu̱ta̱dde̱n nonno ne, “Een zara cigunnek Ya̱ko̱bo̱,#35:10 Ya̱ko̱bo̱: Azi ungec ci zar ciginnek ne e̱e̱t ci alaba ol. ma̱i̱je̱ ngatu iróng atin bo̱do̱k ol awuyi i̱nne̱t zare cik een Ya̱ko̱bo̱; een atin zara cigunnek Israil#35:10 Israil: Utuge ci I̱bu̱ru̱, azi keng cik zar ne̱ko̱ ne, E̱e̱t ci ocodo ki Ta̱mu̱ta̱dde̱n..” Akatek zin enne nonno zar cik een Israil.

11Kar zin Ta̱mu̱ta̱dde̱n kizek nonno ne, “Ke̱e̱ni̱ anna Ta̱mu̱ta̱dde̱n wa anyak Komiz do̱o̱k; ti̱ro̱ kar otorte izet meele. Iyowa zu̱we̱ cik o̱ro̱gjo̱k cik meelek ngatunne, ovvo atin alaata iyowa eliye cunne. 12Imma lo̱o̱c bali kanyike anna Aburaham ki I̱sa̱ko̱, kaanyi anna i̱nne̱t bu̱k, kanyike atin anna lo̱o̱c necu dooli cik dooli cigunnek.” 13Uk zin Ta̱mu̱ta̱dde̱n ta̱mu̱-kenga ngati bali ozoze enne ki nonno ke̱.

14Adawek zin Ya̱ko̱bo̱ bee ngin bali ozozike Ta̱mu̱ta̱dde̱n nonno ke̱, kar zin enne kutuv ngin neci; kar ku̱du̱te̱k bo̱do̱k maal ngin neci. 15Akatek zin Ya̱ko̱bo̱ ngin bali ozozike Ta̱mu̱ta̱dde̱n nonno ke̱ kize Bethel.#35:15 Bethel: Utuge ci I̱bu̱ru̱, azi keng cik zar ne̱ko̱ ne, Ce̱e̱z wa Ta̱mu̱ta̱dde̱no̱.

Daiz ci Racheli ki I̱sa̱ko̱

16U̱lu̱ge̱t zin nege utungtek Bethel lo̱o̱c. Baling ngen nege kojongozzit Ephrath, orong Racheli kutuyai kar kanyak u̱u̱ce̱z ci a̱ppwe̱. 17Baling u̱u̱c do̱le̱c oroot, izek zin ngaa wa eela ngaai wak ukcai ko̱ nonno ne, “Ma o̱ngo̱o̱le̱, anyai i̱nna̱ do̱le̱c imma ci maci!” 18Baling okko Racheli a̱vu̱da̱k do̱yo̱i̱t niko eci enne uk daiza, kar zin kakatek do̱le̱c zar cik een Ben-Oni.#35:18 Ben-Oni: Utuge ci I̱bu̱ru̱, azi keng cik zar ne̱ko̱ ne, ngeranni ci een no̱ngi̱tto̱n cigannik. Ma̱i̱je̱ baatinne akatek zar cik een Benjamin.#35:18 Benjamin: Utuge ci I̱bu̱ru̱, azi keng cik zar ne̱ko̱ ne, ngeranni ci a̱zzi̱t ci a̱zzo̱.

19A̱da̱k zin Racheli kar zin kadayek gool ci okko ki Ephrath, awu ol bo̱do̱k kize Betelem. 20Adawek zin Ya̱ko̱bo̱ bee ilomi ci Racheli, aave bee neci ilome ci Racheli rok i̱yo̱ko̱.

21U̱lu̱g zin Israili dee kar kuk kidimanek ti̱ti̱ cinne kutungek orog ci een Migdal Eder vu̱rru̱t. 22Baling ngen Israili abak lo̱o̱ce̱ neci, atangwei zin Reubeni ngaa ci baatinne rianto, een zara Bilhah, kar Israili kizik zoz neci.

Anyak Ya̱ko̱bo̱ dooli omoto ki ram:

23Dooli cik Le̱ya̱:

Een Reubeni a̱bu̱ ci Ya̱ko̱bo̱,

kar zin Si̱mo̱ne̱, Le̱vi̱, Ju̱da̱, Issachar, ki Zebulun.

24Iciko dooli cik Racheli:

Yosevo ki Benjamin.

25Iciko dooli cik du̱ca̱i̱t ci Racheli een zara Bilhah:

Dan ki Naphtali.

26Iciko dooli cik du̱ca̱i̱t ci Le̱ya̱ een Zilpah:

Gad ki Asher.

E̱e̱ggi̱n ne̱ko̱ dooli cik Ya̱ko̱bo̱ balik a̱rri̱ta̱i̱ Paddan Arama.

27I̱ki̱ya̱k zin Ya̱ko̱bo̱ baatinne I̱sa̱ko̱ o̱rge̱ ci een zara Mamre, ojono ki Kiriath Arba, awu ol bo̱do̱k zare cik een Hebron, ngin bali abahe Aburahami ki I̱sa̱ko̱.

28Abak zin I̱sa̱ko̱ e̱rki̱nya̱ o̱bo̱n co̱de̱ ki moten tu̱rge̱ (180). 29A̱da̱k zin I̱sa̱ko̱ kar zin kadawozik ki ol ciginnek. Kar logoz ciginnek I̱sa̱u̱ ki Ya̱ko̱bo̱ ku̱bu̱nge̱t nonno.

Currently Selected:

Kananet 35: tex

Highlight

Copy