Kananet 33

U̱ru̱mto̱ Ya̱ko̱bo̱ ki I̱sa̱u̱

1Owo Ya̱ko̱bo̱ zee baling okko odong ebere ki ta̱dde̱n, acin I̱sa̱u̱ ki ol obet we̱c (400); enger zin dooli ki ngaai ciginnek, Le̱ya̱, ki Rachel ki ngaai balik een du̱cca̱k rama ke̱. 2Aanyik zin enne ngaai wak een du̱cca̱k ko̱ koot oowa ki dooli cigge̱k, kar kanyik Le̱ya̱ ki dooli kunuwet nogo, okko anyike Rachel ki Yosevo kizeto vu̱rru̱t. 3Okko Ya̱ko̱bo̱ enne eliya oowa kar kuluc oo cinne lak turgerem baling okko enne ojongoz gotoni, I̱sa̱u̱.

4I̱vi̱ra̱ zin I̱sa̱u̱ ki̱ki̱ya̱ kurumek Ya̱ko̱bo̱ gool kar zin kizza nonno; a̱gga̱m zin nonno azzine do̱o̱k kar kizza. Kar nege do̱o̱k ku̱tu̱lu̱zzo̱. 5Edev zin I̱sa̱u̱ ta̱dde̱n acin ngaai ki dooli. I̱jji̱nno̱ zin, “Ciko ngene cik orkorannu bu̱k ko̱?”

O̱bo̱de̱k zin Ya̱ko̱bo̱ nonno, “E̱e̱ggi̱n ne̱ko̱ dooli balik aanyik Ta̱mu̱ta̱dde̱n du̱ca̱i̱t cunne.”

6I̱vi̱ta̱ zin ngaai wak e̱e̱ggi̱n du̱cca̱k ke̱ ki dooli cigge̱k kar kakatek u̱zu̱ngti̱nne̱ ngati I̱sa̱u̱. 7Okko bo̱do̱k Le̱ya̱ arawa ki dooli ciginnek kar kakatek u̱zu̱ngti̱nne̱. Kar vu̱rrta̱, i̱vi̱ta̱ Yosevo ki Rachel kar kakatek u̱zu̱ngtti̱ bu̱k.

8I̱jji̱nno̱ zin I̱sa̱u̱, “Nya ming i̱tto̱na̱ kaal cik meelek karumona ki agit goola oowa ko̱?”

O̱bo̱de̱k zin Ya̱ko̱bo̱ nonno, “Kaal cigunnek manyi, kaanyi anna kar i̱nna̱ leman.”

9Ma̱i̱je̱ I̱sa̱u̱ a̱nne̱k nonno ne, “Gotona, kanyai anna kaal cik meelek giir. Zuute kaal ne̱ko̱ kizeto cigunnek.”

10Izek zin Ya̱ko̱bo̱ nonno ne, “I̱llo̱i̱ bai ke̱! Kumuda anna zoz ci abunna ngatunne, lema muci necu ngatinanni. Eci ming kacinni ngu̱m cunne ogon ki ci kacinni ngu̱m ci Ta̱mu̱ta̱dde̱no̱, i̱yo̱ko̱ elema i̱nna̱ annit talninta. 11Lema bai muci ci anyoniki i̱nne̱t ko̱ la̱du̱n, eci Ta̱mu̱ta̱dde̱n aanya deten kar kaanya kaal cik korongi anna.” Eci Ya̱ko̱bo̱ adangek nonno zoz necu, elema zin I̱sa̱u̱ kaal ne̱ke̱.

12Ize zin I̱sa̱u̱ ne, “Kotoz zin gool cinna; ki̱nya̱ma̱nnu̱ng atidic anna i̱ge̱ta̱.”

13Ma̱i̱je̱ Ya̱ko̱bo̱ a̱nne̱k nonno ne, “A̱gga̱ i̱nna̱ manyi cinanni ngane dooli idice, abunna la̱du̱n ming kazunne anna nyoo ki maala. Ming kangid naga nogo oroot i̱i̱te̱n co̱de̱, ovvo kaala do̱o̱k a̱da̱i̱. 14Anyik ddi̱ki̱ryo̱i̱t cinanni kuk oowe ci du̱ca̱i̱t cinne, kokko anna kowo vu̱rrta̱ idic, kitto dooli zee bak kokko kamudaki Seir.”

15Ize zin I̱sa̱u̱ ne, “Abunna, ja zin kutungei ol cigannik ko̱ u̱gge̱.”

Ize zin bo̱do̱k Ya̱ko̱bo̱ ne, “Nya ming ogoni niko? Abunna kamuda anna bunnat ci elemanna i̱nna̱ annita, manyi cinanni.”

16I̱mi̱re̱ zin I̱sa̱u̱ i̱i̱te̱n neci eliya uk lo̱o̱ce̱ ci Seiri. 17U̱lu̱g zin Ya̱ko̱bo̱ uk o̱rge̱ ci een zara Succoth, kar eteheeny ce̱e̱z cinne kar kuluk ngintik aavtte kaala ciginnek. Zoz zin ci akannek ngin neci kize Succoth#33:17 Succoth: Utuge ci I̱bu̱ru̱, azi keng cik zar ne̱ko̱ ne, ti̱ti̱. ko̱ nenen.

18Baling i̱ki̱ya̱ Ya̱ko̱bo̱ Paddan Arama, arawa zin enne orog ci een Shechem labak, lo̱o̱ce̱ ci Kanaani kar zin ka̱vvu̱ orog abanyca. 19Kar zin kutuwa lo̱o̱c neci o̱ro̱bi̱ya̱i̱ cik e̱e̱ggi̱n o̱bo̱n co̱de̱ (100) ngati logoz cik Hamor, be̱e̱ti̱ Shechemi, kar kidimanek ti̱ti̱ cinne. 20Imma nginati idiman zin enne i̱te̱le̱ nginati kar kakatek zar cik een El Elohe Israilo.#33:20 El Elohe Israilo: Utuge ci I̱bu̱ru̱, azi keng cik zar ne̱ko̱ ne, Ta̱mu̱ta̱dde̱n, Ta̱mu̱ta̱dde̱n ci Israilo.

Currently Selected:

Kananet 33: tex

Highlight

Copy