Kananet 21

Ti̱rra̱ne̱t ci I̱sa̱ko̱

1Aanyik zin Manyi Sarah eezet kedete ki bali a̱nne̱k enne ke̱, kar Manyi ku̱tu̱gu̱we̱k Sarah zoz bali u̱du̱wa̱ enne ke̱. 2Anyaho zin Sarah kar ki̱ti̱rra̱k Aburaham lo̱gu̱t ci maci ngati anyate, i̱i̱te̱n bali u̱du̱wa̱k Ta̱mu̱ta̱dde̱n nonno ke̱. 3Akatek zin Aburahami do̱le̱c zar kize I̱sa̱ko̱,#21:3 I̱sa̱ko̱: Utuge ci I̱bu̱ru̱, azi keng cik zar ne̱ko̱ ne, arari. do̱le̱c bali a̱rri̱ta̱ Sarah ke̱. 4Baling izeto i̱i̱nya̱ cik I̱sa̱ko̱ tu̱rge̱, etteda zin Aburahami vi̱ca̱vi̱ca̱ cinne, ki bali ming u̱du̱wa̱k Ta̱mu̱ta̱dde̱n nonno ke̱. 5Izeto da̱ e̱rki̱to̱wa̱ cik Aburahami do̱o̱k o̱bo̱n co̱de̱ (100) baling a̱rri̱ta̱i̱ ngerinne I̱sa̱ko̱.

6Ize Sarah ne, “Aanya Ta̱mu̱ta̱dde̱n katarar anna bu̱k, imma ol cik aziye zoz necu arari atin nege bu̱k ki annita.” 7Kar zin bo̱do̱k enne kotorek zoz cu, “Ngene wo̱ye̱ ci a̱du̱wa̱k Aburaham azi ne oroktine atin Sarah dooli? I̱yo̱ko̱ zin ki̱ti̱rra̱ zin anna nonno do̱le̱c ngati kizewe ma̱ti̱yo̱c oroot.”

Ottok Aburahami Hagar ki ngerinne Ismail

8Baling i̱ddi̱ki̱r I̱sa̱ko̱ iróng ngen orokte, idiman zin Aburahami kwo̱o̱r ci a̱ddi̱ki̱re̱ wazin neci. 9Ma̱i̱je̱ Sarah icin ngerrti Hagari ngaa ci Masiro bali a̱rri̱ta̱k Aburaham do̱le̱c ko̱ ming arane ngerinne I̱sa̱ko̱, 10kar zin Sarah kizek Aburaham ne, “Ottok la̱ngi̱ze̱ni̱t cu ki ngerinne koot, eci ngerrti ngaa ci een du̱ca̱i̱t ko̱ iróng atin okko ozol ki ngeranni I̱sa̱ko̱ kaal cik okko enne aragizi.”

11U̱u̱c zin zoz neci zinine ci Aburahami oroot, eci zoz necu obod ki ngerinne. 12Ma̱i̱je̱ Ta̱mu̱ta̱dde̱n izek Aburaham ne, “Ma anyik zinin ku̱u̱c zo̱ze̱ ci ngerunne ki du̱ca̱i̱t cunne. Zik zoz ci a̱du̱wa̱ki̱ Sarah ko̱, eci zo̱ze̱ ci I̱sa̱ko̱, okko i̱nna̱ a̱va̱dde̱ ki bali ku̱du̱wa̱ anna ke̱. 13Kanyike atin anna do̱le̱c ci du̱ca̱i̱t cunne ko̱ kize orog ci a̱ddi̱ki̱re̱ bu̱k, eci enne een do̱le̱c cunne.”

14Imma nge̱rre̱t ingani, idima Aburahami da̱i̱ne̱t u̱gge̱ ki de̱e̱re̱ ci maamu kar zin kaanyik Hagar. I̱ti̱ye̱k zin i̱nya̱ cinne kar zin ki̱nya̱ma̱ne̱k nonno gool ki do̱le̱c. Akat Hagari gool cinne kar kuk ki̱ti̱k tu̱ balale ci een Beersheba.

15Baling edeccai maama balik de̱e̱ra̱ ke̱, u̱zu̱we̱k zin Hagari do̱le̱c ri̱i̱ i̱rri̱t imma. 16Kar zin enne kuk ka̱vvu̱ lo̱o̱ta̱ ojonun, kar enne ki̱no̱n, “Iróng anna korongi kicin do̱le̱c ming a̱da̱i̱.” Kar ngati aave enne ke̱ akate u̱tu̱lu̱.

17Izik zin Ta̱mu̱ta̱dde̱n do̱le̱c ming a̱lu̱, kar anjilo ci Ta̱mu̱ta̱dde̱no̱ kutu Hagar ta̱mu̱-kenga kar kizek nonno ne, “Nya ci gerze, Hagar? Ma o̱ngo̱o̱le̱ gi̱i̱ imma; izik Ta̱mu̱ta̱dde̱n do̱le̱c ming a̱lu̱, adunge nginati ke̱. 18Dong do̱le̱c kar gga̱m a̱zzi̱t cinne, eci kokko atin anna kanyike nonno kize orog ci a̱ddi̱ki̱re̱.”

19Oo zin Ta̱mu̱ta̱dde̱n ebere cik Hagari kar enne kicin iit ci anyak maam. Uk zin enne rok ṯu̱k kar kibbizitanek maam de̱e̱re̱ kar zin kanyik u̱gge̱ do̱le̱c kuud.

20Aave da̱ Ta̱mu̱ta̱dde̱n ki lo̱gu̱t neci baling ngen enne ingazi ke̱. Abak enne balala kar kize e̱e̱t ci anyak arizet ci adimane enne laanit ki i̱ri̱ye̱. 21Baling ngen enne abak Balale ci Parani, i̱ti̱ya̱k zin yaatinne nonno ngaa ci a̱kku̱ olle cik Masiro.

Olom ci Beersheba

22Ma̱i̱je̱ wazin imma e̱rki̱to̱we̱ ne̱ke̱, izettek Abimelechi ki Phicol ddi̱ki̱ryo̱i̱t wa aciiru, Aburaham ne, “Aave Ta̱mu̱ta̱dde̱n ki i̱nne̱t kaale cik ogonni i̱nna̱ do̱o̱k. 23Du̱l zin i̱yo̱ko̱ keet ngatinanni kicin Ta̱mu̱ta̱dde̱n bu̱k, ize ne iróng atin a̱lu̱ti̱ icima dooli cigannik ki dooli cigge̱k. Abunna ming i̱ye̱le̱ka̱ bunnat ki ol cik o̱rgu̱ abahe i̱nna̱ e̱e̱ni̱ i̱do̱ngo̱je̱ni̱t ko̱, ki bali ki̱ye̱le̱i̱ anna i̱nne̱t bunnat ke̱.”

24O̱bo̱de̱k zin Aburahami Abimelech iizek ne, “Ka̱du̱li̱ zin keet.”

25U̱du̱wa̱k zin Aburahami Abimelech zoz ci da̱ a̱gga̱ma̱ne̱ du̱cca̱ha̱ cik Abimelechi nonno iit. 26Ma̱i̱je̱ Abimelechi a̱nne̱k nonno ne, “Iróng anna ka̱gga̱ ngene ci da̱ ogon zoz necu. Ngen i̱nna̱ du̱wa̱ka̱n, kazii anna wazin necu do̱.”

27Anyaha zin Aburahami a̱zza̱ ki tiin kar kaanyik Abimelech, kar zin nege kidimanit olom. 28Atahala zin Aburahami zu̱be̱nwa̱ turgerem azzane, 29i̱jji̱n zin Abimelechi Aburaham a̱nne̱k ne, “Azi keng ci zoz ci engerane i̱nna̱ zu̱be̱nwa̱ turgerem ko̱ nya?”

30O̱bo̱de̱k zin enne a̱nne̱k ne, “Lema a̱zza̱ ne̱k een turgerem ko̱ azzine cigannik kize zoz ci ibbaca annit ci ka̱da̱ iit cu.”

31Akatozik zin ngineci kize Beersheba eci ol cik een rama ko̱ u̱tu̱gu̱zzo̱ olom nginati.

32Baling e̱de̱cca̱ nege olom cinne̱ng Beershebakte, i̱mi̱rrte̱ Abimelechi ki Phicol ddi̱ki̱ryo̱i̱t ci aciiru oot lo̱o̱ce̱ ci Philistino. 33Irir zin Aburahami keet ci een motongoc ngati een Beersheba ke̱, kar nginati kala zar cik Manyi, Ta̱mu̱ta̱dde̱n wa aave udut. 34Abak zin da̱ Aburahami lo̱o̱ce̱ ci Philistino u̱u̱mu̱c.

Currently Selected:

Kananet 21: tex

Highlight

Copy