Rut 2
2
Rut mangjama jio bara'bahna Boas
2:1-23
1Den mesa' rapunna Elimelekh, muanena Naomi, gaja sugih disanga Boas. 2Den wattu namangkada Rut joo to-Moab lako Naomi nakua, “Oo indo', la malena' lako bara'bah to nanii tau mejelai#2:2 Kitai 1:22. . Mbai na den una tau mamase ngkitana' naeloranna' ndurukki to jelai polloh jio mai limanna.” Nakuamo Naomi, “Malemoko anakku'!” 3Malemi Rut lako bara'bah to nanii tau mejelai, naundi jio boko'na to tomassae' nadurukki to jelai polloh. Te'da nakalannaii kumua bara'bahna Boas rapunna Elimelekh joo nanii.
4Te'da namasain ratumi Boas jio mai Betlehem namangbere sallang lako tomejelai nakua, “Dennaa upa' na PUANG Allataala ssolan kamu'!” Napebalii tomejelai nakua, “Dennaa upa' Nabarakka'iki' PUANG Allataala!” 5Namekutana Boas lako bandoro'na nakua, “Indara joo baine?” 6Mebalii joo bandoro' nakua, “Baine to-Moab, to mane' ratu sola Naomi jio mai tana Moab. 7Meta'dai lako aku' nadieloran undi jio boko'na tomejelai ndurukki to jelai polloh ba'tu disala.#2:7 Lan basa Ibrani: ndurukki na rrempunni to jelai ra'dak to mangka dikutuhhi. Mellao makale'pa namelolang bangmo, nacingga'tu'ra kenden.”
8-9Mangkadami Boas lako Rut nakua, “Pesa'dingngina'! Danggi'mo mumale melolang lako bara'bahna tolaen. Inde' bangmo munii nduruk jelai sola tuu mati' tomangjamaku' baine. Kita bangmi to bara'bah nanii tomassae', muundi jio boko'na to tomangjamaku' baine. Ia ke mawakkeko, ala bangmoko wai jio busu to mangka naissii tuu mati' tomangjamaku' muane. Mangkamo kukuan danggi' naapa-apaiko.” 10Ia tonna sa'dingngi Rut joo kada, suju'i jio olona Boas namangkada nakua, “Tabe' puang, la mekutanana': Antakamaseira' taparinawana', na toratura' aku'?” 11Mebalii Boas nakua, “Mangka ngasanmo kusa'ding sininna to panggaukan melo to mangka mupugauk lako indo matuammu, tonna mangka mate muanemu. Kuissenni kumua mpatorromoko tomatuammu sola kampong kajajianmu, muratu inde' torro sola tau to te'dapa musiissen. 12Dennaa upa' Nabalahhi PUANG Allataala to kameloanmu, Nabarakka'iko to sipato' mutarima jio mai PUANG Allataala to kisompa kami' to-Israel, na Ia toomo munii mentilendung.” 13Mangkadai Rut nakua, “Ie', puang, nang takamaseina', moiraka kutangngia pangjamata'. Ia to kameloan penawanta' liwa' kupumatana sola napumasannang penawangku'.”
14Ia tonna wattunnamo la kumande, mangkadai Boas lako Rut nakua, “Maleko mai mukumande. Inde' to pangkandean.” Jaji cumadokkomi kumande Rut sola to tomangjamana Boas. Naben tooi pamba'te jelai Boas to Rut, nakumande sabarahna. Ia tonna mangkamo kumande Rut, den unapa torrona. 15Mangkai joo too, male pole' omi Rut melolang. Nakuanmi Boas topangjamana kumua, “Danggi' mianggaii ke madoangngi ndurukki to jelai jio mai alla'na to mangka dikapu'. 16Na moi to jelai mangkamo dikapu' la midu'dukkii sici'di'-ci'di' mipatorroi naratu ndurukki. Danggi' mikassakkii.”
17Melolang bangmi Rut jio bara'bah ratu lako kabuh allo. Ia tonna mangkamo mangtambak jelai, narempunmi na agi-agi den sangpulo kilo to pelolangna. 18Namane' pole lako kota mbawai joo assele' pangdurukkuna, napakitanni indo matuanna kumua pira budanna. Naben tooi indo matuanna to kande te'da nacappu' nakande tonna kumande. 19Mekutanami Naomi lako Rut nakua, “Umbo ngasanra munii nnampa'i tee? Indara bara'bah munii mangjama tee allo? Dennaa upa' Nabarakka'ii Puang Allataala joo tompugauk kameloan lako kalemu.” Nacuritami Rut lako Naomi kumua ia to bara'bah nanii nduruk jelai, bara'bahna mesa' muane disanga Boas. 20Nakua Naomi, “Rapunta' unapa joo Boas. Sitonganna iamo la njampangki'. Dennaa upa' Nabarakka'ii PUANG Allataala. Ia to basse-Na Puang Allataala te'da naballe la lako totuo, la lako to tomatemo.” 21Nakuapa Rut, “Ia joo tau nakuanna' kumua wa'ding unapa' ade' melolang tarruh jio bara'bahna to nanii tomangjamana ratu lako mangka ngasan to bara'bahna dialai jelainna.” 22Mebalii Naomi nakua, “Io anakku', nang la'bih melo ke male bangmoko sola topangjamana baine lako bara'bahna Boas, nasaba' ia ke male lakoko bara'bahna tau laen, iamo ke nasussaiko tau jio.” 23Susimi joo, Rut male sola to pangjama baine jio bara'bahna Boas. Ndurukki jelai jio, ratu lako mangkanna peganduman sola pejelaian, natorro bang sola indo matuanna.
Currently Selected:
Rut 2: mvpAD
Highlight
Share
Copy
Want to have your highlights saved across all your devices? Sign up or sign in
© Wycliffe Bible Translators, Inc. All rights reserved.