Kada Bulawan 10
10
Kada bulawanna Raja Sulaiman
1Susi tee to sininna kada bulawanna Raja Sulaiman:
Ia to pea macca, napumario tomatuanna,
apa ia to pea battuk, ssussairi indo ambe'na.
2Ia to kasugiran diala majekkong te'da bua'na,
apa ia to tomaruruh penawa dipasalama' jio mai kamatean.
3Te'da Naeloranni Puang Allataala kakurangan kande to tomakassing,
apa ia to nakadoangngi togaja', te'da Nabenni.
4Ia to tomakuttu la kaasi-asi,
apa ia to tobassa' la buda assele'na.
5Melo pangpikkirisanna to torrempun assele' peparena ke wattunnami peparean,
apa ia to tomamma' bang ke wattu pepareanni, mpakasiri' kalena.
6Dibarakka'i to tomakassing,
apa ia to kadanna togaja', naniri mbuni kamaparranganna.
7Napubarakka' tau ke nningaranni tomakassing,
apa ia to togaja' te'damo nadiingaran.
8Ia to tomacca ntarima melo pangpakainga',
apa ia to tomangkada tangkebattuan la masolang.
9Ia to tomaruruh penawanna manyaman katuoanna,
apa ia to tomajekkong, nang la kaissenan to kamajekkonganna.
10Inda to mangkidi' mata la mpaden kamasussan,
ia to tomangkada tangkebattuan la masolang.
11Ia to kadanna tomakassing butung kalimbuah mepatuo,
apa ia to kadanna togaja', naniri mbuni kamaparranganna.
12 #
Yakub 5:20; 1Petrus 4:8 Ia to tongkaba'ci padanna rupa tau mpaden kasisakkan,
apa ia to tompakamoja' padanna rupa tau nnaddampangan sininna kasalan.
13Ia to tomapahang mpau kada macca,
apa ia to tote'da akkalanna perambira dipatajananni.
14Ia to tomacca nakabudai ke sabuda-budannai kapaissenanna,
apa ia to kadanna tobango' la mparaturi kamacilakan.
15Ewanan to butung napubenteng tosugih
na kamakario-rioan llanynya'i tokaasi-asi.
16Ia to sarona tomakassing mpamanyaman katuoan,
apa ia to naduppa to togaja', sabuda-budanna dosana.
17Inda-inda to mparinawa pangpangngajah mangnguju lakoi katuoan melo,
apa inda-inda cia' mparinawa pangpakainga' lao salai.
18Pangnguraga to tompallan penawa bang kamaba'cian,
tobattuk to tompau gaja' bang tau.
19Sabuda-budannai kada dipau, nang la den bang salana,
apa mandalan pangtangngaranna to tomangpikkiri' jolo' namane' mangkada.
20Ia to kadanna to tomakassing butung pera' massang,
apa ia to assele' pangpikkirisanna togaja' te'da bua'na.
21Ia to kadanna tomakassing
menjaji barakka' lako tobuda,
apa ia to kabangosanna tobango'
mbawai lako kamatean.
22Barakka'-Na Puang Allataala namessugih to tau,
tangngia kamawatangan mangjama mpupembuda ewanan.
23Ia to tobattuk nakabudai mpugauk kasalan,
apa ia to tomapahang nakabudai nnangah kamaccan.
24Ia to nakalaja'na to togaja' ia ora naduppa,
na ia to tomakassing, natarima to nakadoangngi.
25Ia ke naratuii angin bara' ta'pa lanynya'i to togaja',
apa te'da lalo natigesu' to tomakassing.
26Danggi' sua tomakuttu, saba' mekani-kanianri,
susi cukka mpamangngilu isi,
ba'tu rambu mpamapasse mata.
27Ngkalaja' ngkasiri' Puang Allataala mpamalambeh sunga',
apa ia to togaja', dipebondi'i sunga'na.
28Ia to narannuan tomakassing, la napumasannang,
apa ia to togaja' parannu lo'bang.
29Nalendungngi Puang Allataala to tomaruruh penawanna,
apa Nalanynya'i to togaja'.
30Ia to tomakassing la tatta' torro manyaman,
apa ia to togaja', la diula'i llan mai tana manahna.
31Ia to tomakassing mpau kada mepamacca,
apa ia to pangnguraga la dikerre'i lilana.
32Ia to tomakassing naissen mpau kada mangkebattuan to napumasannang tau,
apa ia to togaja' pangnguraga manda jio timunna.
Currently Selected:
Kada Bulawan 10: mvpAD
Highlight
Share
Copy
Want to have your highlights saved across all your devices? Sign up or sign in
© Wycliffe Bible Translators, Inc. All rights reserved.
