Kada Bulawan 1
1
Makeangga' to sininna kada bulawan
1 #
1Raja-raja 4:32
Ia tee to sininna kada bulawanna Raja Sulaiman, anakkana Daud, rajana to-Israel.
2Ia to tujunna tee sininna kada bulawan la ntulung tau dikua namacca,
dikua nannampui pangpangngajah,
nampahang sininna kada mangkebattuan,
3dikua nantarima pangpangngajah namandalan pangtangngaranna,
nampugauk kamakassingan, maruruh mangra'tah te'da namangpasilaenan,
4dikua nannajahhi totangmapahangpa namangngakkalan melo,
namben kapaissenan sola mpamatarruh pangpikkirisanna to kallolo.
5Melo ke ia to tomacca mangpesa'ding,
na sakerangngan-rangnganna to kapaissenanna,
na ia to tomapahang nnampa' pangpatuju
6dikua nampahang kada bulawan, kada pangpasusian,
karume sola kadanna tomacca.
7 #
Ayub 28:28; Zabur 111:10; Bulawan 9:10 Ia ke madoangki' nnampui kapaissenan,
ia to kaminang parallu iamo to ngkalaja'- ngkasiri' Puang Allataala,
apa ia to tobango' ncapa' kamaccan sola pangpangngajah.
Pangpangngajah lako to kallolo
8Ee anakku', pesa'dingngii to pangpangngajahna tomatuammu,
na danggi' mupaboko'i penawa to pangpatujunna indo ambe'mu,
9nasaba' ia to pangpangngajahna la sampemelo-meloinna sipa'mu,
butung to dipasongko'iko bunga me'lok
ba'tu rara' llan kollongmu mpamaloloko.
10Ee anakku', ia ke nasedeko tomadosa,
danggi' muturu'i.
11Ia ke nakuanko joo tau,
“Ikee tamale nnangah tau tabunoi
ake' taadangngi, tapegaukkii to totangsala
12talamun tuoi susi to dipado' lino tomate
butung tonaamma' malebu lamunan.
13Taalaii to ewanan makeangga'na,
taissii ewanan dirampa to bolata'.
14Malemoko mai!
Doppa dau tatawa rampa'mira to assele' bokota'!”
15Ee anakku', danggi' muturu'i sipa'na to tosusi joo!
Danggi' mupugaukki to napugauk.
16Ia to tosusi joo, gaja doi' mpugauk kagajatan,
namarippa' papatean.
17Ia una to manuk-manuk, na nang napessalai
ke denni ba'tikan nakita,
18apa ia to togaja', kannori nggaragan poja kalena
to la ncilakaii.
19Susimi joo naperasai to toraka nnangah saro mpake kamajekkongan
natumangngi to katuoanna, napumatei.
Kadanna tomacca
20 #
Bulawan 8:1-3
Pesa'dingngii! Kamaccan susi to tometamba jio lalan,
susii tau mpeandongngi gamaranna jio pasa',
21jio tooi babangan kota
sola jio ngenan pangbudan tau mpeandongngi mangkada nakua,
22“Ee kamu' to tangmapahangpa,
la da'tan bangra kamu'ka cia' mapahang?
Ee kamu' to ngkabudai mangcapa',
la da'tan bangra kamu'ka mangcapa'?
Na kamu' to battuk,
la da'tan bangra kamu'ka la ngkaba'ci kapaissenan?
23Pesa'dingngi pole'i to pangpangngingaranku' lako kamu'!
La kupauan ngasan kamu' to llanna penawangku',
na la kuajahhi kamu' to kapaissenanku'.
24Kutambaimo kamu', apa cia' kamuq ratu,
mpengkoronganna' limangku' apa te'da miparinawai.
25Moi pangpakainga'ku' te'da miparinawai
na te'da mitarimai to pangpangngajahku',
26iamo joo, ia ke nakanna kamu' cilaka la kupetawa-tawai kamu',
kucapa'-capa' kamu' ke naratui kamu' abala' la'da',
27ke naratui kamu' abala' susi angin bara'
ba'tu nakanna kamu' kamacilakan susi kalimpuru.
28Ia joo wattu la metamba kamu' lako aku',
apa te'da kupebali kamu',
la mitonganni tongan nnangahna',
apa te'da miampa'na'.
29Susi kamu' to tongkaba'ci kapaissenan,
te'da mimadoang ngkalaja' ngkasiri' Puang Allataala.
30Te'da mimadoang ntarima pangpakainga'ku',
na tangmikabudai to sininna pangpangngajahku',
31iamo joo la miduppa to assele' panggaukanmi
butung la mipubarah to assele' akkatta gaja'mi.
32Ia to totangmapahangpa la matei,
nasaba' te'da namangpesa'ding,
na ia to tobattuk la macilakai,
nasaba' kabattukanna.
33Apa ia to tompesa'dingngina', la maparaka.
La tuo manyaman,
na te'da namalaja' kumua la naratuii abala'.”
Currently Selected:
Kada Bulawan 1: mvpAD
Highlight
Share
Copy
Want to have your highlights saved across all your devices? Sign up or sign in
© Wycliffe Bible Translators, Inc. All rights reserved.
