Lukas 14

Puang Isa mpamalagah tomasaki

14:1-6

1Den pissen simata Allo Katorroan, namale Puang Isa kumande jio bolana mesa' kapala to-Farisi. Padami to tau ntuu jio ssikita-kitai to Puang Isa. 2Ratumi lako Puang Isa to tomasaki, kambang ajena sola limanna. 3Nakutanaimi Puang Isa tuu lako guru agama sola to-Farisi nakua, “Wa'dingriki'ka mpamalagah tomasaki ke Allo Katorroan ba'tu te'daraka, situru' atoran agamanta'?” 4Apa kamma' bangngi sola ngasan. Natoemi Puang Isa joo tau, napamalagahhi, nasuai pole. 5Mangkai joo too nakuanmi Puang Isa tuu lako tau, “Ia ke den kamu' nnampui pea ba'tu sapin, napolloh do' bubun ke Allo Katorroan, tantu ta'pa miangka' silalona jiong mai.” 6Apa te'da bang tau ssarai mpebalii Puang Isa.

Tomajao penawa na tomajiong penawa

14:7-14

7Ia tonna kitai Puang Isa kumua den toratu mpilei cadokkoan to kaminang melona, naajahhimi mpake pangpasusian nakua, 8“Ia ke ditambai kamu' male mangpabotting, danggi' micumadokko jio cadokkoan to kaminang melo. Iamo ke denni tau ditambai toda to la'bih dikasiri' na kamu', 9anna ia to ampu bola ratu lako kalemi namangkada kumua, ‘Tabe', ia tee cadokkoan mangkami dipasadian tee tau.’ Anna liwa'mo masiri'mi ke mellele kamu' cumadokko jio boko'. 10Iamo joo, ia ammiditambai male mangpabotting, pilei memanni to cadokkoan kaminang jio boko'. Mbai la ratu to ampu bola nakuan kamu', ‘Ee mane, melleleki' cumadokko jio cadokkoan to la'bih melo.’ Ianna susi joo dipakala'bih kamu' jio olona toratu. 11Nasaba' ia to tompamajao kalena la dipamajiong, apa ia to tompamajiong kalena la dipamajao.”

12Nakua toopa Puang Isa lako joo tontambai ratu lako bolana kumua, “Ia ke mangmaroah-roah kamu' kumande allo ba'tu kumande bongi, danggi' omo mitambai to soba'mi ba'tu sile'tomi, rapummi ba'tu bali bolami tosugih, nasaba' la natambai toda kamu' dau. Ianna susi joo mitarimami to poleanna. 13Jaji, ia ke mangmaroah-roah kamu', ntambai naratu to tokaasi-asi, tosopok, susinna tokupi' sola tobuta. 14Na la dibarakka'i kamu', nasaba' ia tuu lako tau te'da nalangkullei mpabalahhii to kameloanmi. La miampa' to pahalami jio mai Puang Allataala, ke wattunnami to tomelo dipatuo pole' jio mai kamatean.”

Pangpasusian pangmaroasan gaja roah

14:15-24

(Matius 22:1-10)

15Ia tonna sa'dingmi joo kadan-Na Puang Isa nakuamo sala mesa'na to tonasolan kumande jio kumua, “Masannang to tomangmaroah-roah lan Lino Barun-Na Puang Allataala.” 16Nakuamo Puang Isa lako joo tau, “Den wattu naden tau mpugauk pangmaroasan gaja roah na buda tau ditambai ratu. 17Ia tonna dipamulamo joo pangmaroasan, nasuami to kaunanna male ntambai to mangka dipauan la ratu, nakuanni, ‘Malemiki' mai, nasaba' sadia ngasanmi!’ 18Apa ia tuu lako tau meta'da dampang ngasanni. Ia to jolona mangkada lako joo kaunan nakua, ‘Mangkana' mangngalli tana sangngenan, na paralluna' male ngkitai. Meta'da dampangna'.’ 19Ia to laenna nakua, ‘Mangkana' nnalli sapin limang ajoka, la malepa' ncobai. Meta'da dampangna'.’ 20Ia to laenna pole' nakua, ‘Mane' mangkana' botting, iamo joo na te'da kularatu.’ 21Polemi joo kaunan, napauanni puangna. Gaja gallii joo puangna, nakua lako kaunanna, ‘Maleko madoi' llingkai lalan sola sepe'-sepe' lan kota. Solanni jio mai to tokaasi-asi, tosopok, susinna tobuta na tokupi'.’ 22Mangkai joo too nakuamo joo kaunan, ‘Oo puang, kipugauk ngasanmo to tasuankan, apa budapa ngenan lo'bang.’ 23Nakuamo joo puang lako kaunanna, ‘Maleko llingkai bata' sola lalan salean kota, mparukui to tau naratu, naponno to bolaku'. 24La miingaran! Moi mesa' te'da to ditambai jolomo, la kumande lan pangmaroasanku'!’ ”

Indara to wa'ding nturu' Puang Isa

14:25-35

(Matius 5:13, 10:37-38; Markus 9:50)

25Buda tau undi nturu' Puang Isa lan kalingkan-Na. Messailemi Puang Isa ngkuanni tuu lako tau, 26“Ia ke den tau la ratu lako kale-Ku', apa la'bih napakamoja'i ia to indona, ambe'na, balinna, anakkana, sile'tona, iarika kalena, ia joo tau te'da nakullei menjaji tonturu'na'. 27Ia to tocia' mpassan kaju sitambenna nturu'na', te'da nakullei menjaji tonturu'na'.#14:27 Mpassan kaju sitamben battuananna: nturu' tarruhhi Puang Isa moi matumba sussanna, susi Puang Isa dipampang jao kaju sitamben da'tan bang nturu' pakkaeloran-Na Puang Allataala.

28Susinna ia ke den tau madoang manggaraga bola batu matande, manassa la cumadokkoi jolo' mpikkiri'i to ongkoso'na anna issenni kumua ganna'raka to doi'na la mpamangkaii ba'tu tangganna'paraka. 29Nasaba' ia ke mangkami dikabua' to pondasinna, apa te'damo nakullei mmangkaii, manassa la napetawa-tawai sininna tau to ngkitai. 30La mangkadai to tau kumua, ‘Wah, ia tee tau to mpamulaii, apa te'da nakullei mmangkaii!’

31Ba'tu ia ke den raja nnampui sangpulo sa'bu surudadu la nararii raja laen to nnampui duang pulo sa'bu surudadu, manassa la cumadokkoi jolo' ntangngahhi kumua nakulle unaraka la nnewai joo balinna. 32Ianna issenni kumua te'da nakullei, manassa mambelapi to balinna, nasuami to taunna male mpeta'da kasikalinoan.”

33Mpatarruhhi kadan-Na Puang Isa nakua, “Susi toda kamu'. Te'da bang kamu' mesa' tau ngkullei menjaji tonturu'na', ke te'da mipasalaii penawa to apammi.

34Melo to ce'la, apa ia ke tangbuaci'mi, te'damo nadikulle mpebuaci'i pole'i. 35Te'damo ia bua'na lako bara'bah moi diala pangpelompo, jaji dica'bean mandamira. Ia to tonnampui talinga la mangpesa'ding melo!”

Currently Selected:

Lukas 14: mvpAD

Highlight

Copy