YouVersion Logo
Search Icon

Genesis 44

44
Joseph-el awayikw-rneman arrkerneyel
1Joseph-el warrkenh-rnem ilek, “Yakweth-rnem-warl amern arriwek-atwety arrernerr-arey. 2Man-anem yakweth ingwer-warl arenherr-arey irrkwa thilp-penh antywey-angker yanhan ayteyikw ikwerenh-rnem-kenh yakweth-warl arrerna.”
3Ingwepenh artwernem tangkey-akert alhek. 4-5Artwernem arrerenty-antey alpenh, Joseph-el warrkenh ikwerenh ilanthek, “Anterrkwetyek alha. Anterrkwentyelan renh-rnem ayernem, ‘Angwenhel irrkwa thilp-penh antywey-angker atyenh anyelkel inek irrtywerremel? Nhenh ikwerenh impen inngarl antywey-angker, akaltyiley-angker ikwerenh, ngangker-apeny. Arringkerr apmwel-areth mpwarek, ampwal atyenh anyelkel inerl-alhemel.’ ”
Warrkenhel inngantey renh-rnem arey-alhek angath-antey alperl-anenty. 6Ra renh-rnem ayernek Joseph-elarl renh ilek-angkwarr. 7Awayenheng-rnem ilelhek, “Arrangkwarl anwingkerr, ampwal anyelk iney-angenh yanhan. 8Anwingkerr man angkep antheynek Canaan-itwek. 9Arentyelan irrkwa thilp-penh antywey-angker yakweth ingwerenty-kenh-itwek ntwa renh atwemarl. Ingwer-rneman anwingkerr warrkenh-anem ngkweng irrem-anem.”
10Warrkenhel ilek, “Anyent ingweran atha aletharl anterrkwem, warrk ilkwa anthaynteyek. Ingwer-rnem atha tyarleweman.”
11Awayenheng-rnem yakweth ikwerenh-rnem-kenh ahern-warl arrernek, altywerilemel. 12-13Joseph-kenh warrkenhel yakweth-rnem areynek, arrwekeleny-they ingkern-penhek-atwety. Benjamin-kenh yakweth-itwek ra irrkwa thilp-penh antywey-angker ra renh arek, yakweth Benjamin-kenh-itwek.
Awayikw-rnem ikwer amperrngirrek. Ampwal-rnem ingkerrenh tangkey-rnem-warl tywenek angkep-antey tawen ikwer-warl-anem.
14Awayenheng-rnem Joseph-kenh apmer-warl alhek. Rernem Joseph-itwek kwenirrey-alhek. 15Ra renh-rnem ayernek, “Ilekek arringkerr anyelkel inetyek arrkernelheyel, athan iterl-areyelarl?”
16Judah angkek, “Ilek-angkwarr angketyek iterl-arey-angenh. Akngeyel lwewarrernek, anwingkerr apekarl apmwangkwarr mpwarek. Anwingkerr warrkenh ngkwenhan anayntem irrkwa thilp-penh antywey-angker anyelkel inek warrkenh inngan ngkwenh anayntem.”
17Joseph-el renh-rnem ilek, “Athan nthakenh arrenhingkerr anterrkwey-angenharl. Anyent renh atha anterrkweman irrkwa thilp-penh ra anyelkel-inekant.”
18Judah alhek Joseph-warl, angkey-alhek, “Ngan Atyetyart ilkwa Pharaoh-apeny. Anwekingkerr ahelirrey-angenh-antey. 19Ntwa anwenhingkerr ayernek artwamp anwekingkerrenh iteth-antey anentyek aytey anwekingkerrenh apek anentyek. Anwingkerr ngenh ilek, aynaynwekingkerrenh artwa ampwanemanarl. 20Artwa ampwantey ra anenh Benjamin ra atnyenek-angkwarr. Benjamin-kenh awayikw ilwek-anem. Artwa akely ra anyent impen-antey, ingwerarl ilwek-kety. Aynikw ikwer anyentekant arlkwenteyel.
21Ntwa anwenhingkerr ilanthek, ‘Artwa akely akngetyay nhenh-warl, atha renh aretyek.’ 22Anwingkerr ngenh ilek, ‘Aynaynwekingkerrenh ilwemarl, Benjamin atwentyelan.’ 23Ntwa anwenhingkerr ilek, ‘Aytey arrekingkerrenh arrangkwelan, nthakenh arringkerr atyeng-warl apetyey-angenhan.’ 24Anwingkerr apmer-warl alpek artwamp anwekingkerrenh iley-alpek.
25Artwampel anwenhingkerr ilanthek, ‘Ntang akngerr-antey inerl-alpetyek, apmer Egypt-itwek.’ 26Anwingkerr nthakenh Egypt-warl angkep alpey-angenh aytey anwekingkerr-wenyant. Atyetyartel anwenhingkerr irrenteyelantarl aytey anwekingkerr anwingkerr akngetyey-angenh-they.
27Anewikw anyentel awey-atherr atnyenek rarl ikwer-atherrant ilkelhenh. 28Anyent ywerrek aleth-antey arey-angenh apey-alpey-angenh. 29Akngey anwekingkerrenh iterreyel atnwenth ahelengkwel artwa akely arlkwentyek-athen. Artwampel anwenhingkerr ilek, ‘Arringkerr artwa akely atyeng-they akngenty, ayeng ilwemarl-anem.’
30Alakenhaym-kety artwamp anwekingkerr-warl anwingkerr artwa akely akngeynem. 31Artwamp anwekingkerrenh ilweman artwa akely anwekingkerr-angkwarr apey-alpey-angenh-kety. 32Atha artwamp renh ilek atha artwa akely renh apmer-warl iwerl-alhey-angenh. Atha artwamp renh ilek, ‘Atha artwa akely akngey-alpem. Arrangkwelan ntwa ayenh iterl-ara!’
33Ayeng nhel anem ngkweng warrkirr-ayntetyek. Artwa akely yanhan alpeman artwamp ikwer ywarn iterrerl-anekerr Ayeng nthakenh alpey-angenh artwa akely iwerl-alhemel apmer nhenh-itwek. 34Ayeng ilkelhey-angenh akngey atyenh atha aretyek amperrngirrenty artwa akely ikwer.”

Currently Selected:

Genesis 44: aly

Highlight

Share

Copy

None

Want to have your highlights saved across all your devices? Sign up or sign in