Genesis 22

Akngeyel Abraham renh ilantheyel, Isaac renh ipmek atwetyek

1Abraham renh Akngeyel arrkernek, nthekwern irrem ran wenh. Arraty renh arrkernek Akngeyel, ikwer-angkwarr anetyek apek. Akngeyan ikwer arlkek, “Abraham-ay!”

“Ilekekay!” ran angkek.

2“Isaac, alerengkw ngkwenhant aknga apmer yanh-warl, Moriah-warl. Atyeng aknga Apwert renhan atha ngkweng tnernemarl. Aknga renh tyenkerr-anem atyeng. Atwey-alha renh, tyenkerr-anem. Ikwerek-anem tyenkerr-anem atyeng atwa! Yanhan alerengkw ngkwenhan.”

3Ingwepenh-antey rap akemirrek. Ingwepenh-antey Abraham ra artwa ingwer-atherran-anem ikngwerl-alhek alerikw-anem ikwerenh. Rwanem ngkwelty ngkweltyilek ra, tangkey-anem ingwepenh-antey saddle-emiley-ayntek. Saddle arertney-ayntek tangkey-warl artep-warl. Rwanem ra inenh. Tywenerl-alhek ra. Apmer ikwer-warlap ra alhek Abraham irrkaty ikwer-warl renharl Akngeyel ilek-warl. 4Irrpety-inger-penh rap arek arleng innganem, alker innganem, arleng-antey-anem. 5“Mpwelherl-ayntenh-atherr. Akngeyek inkwerelhemel alhem-kety! Awey nhenh atyenh atha alerey akngem-kety. Anerl-ayntenh-atherr! Mpwelh-ayntenherr-atherr tangkey nhitwek. Akngeyek inkwerelhemel alhem-kety.”

6Abraham rap awey ikwer-warl rwernem tywenekan pwerlep-warl, artep-warl-anem, awey ra akngeyn-aynteyew-anem. Abraham-el akngeynenh rwalep-then inkwartey-then. Ilperlarlap ran. Anperl-alhek-anem ratherr. 7-8Awey rap apatey-alhek, “Aker nthenharl ngkwenh tyenkerrew? Yep-yepew?” Abraham renh-anem ayernenh. Awey apatenh-anem. Abraham-anem ikwer angkenh, “Akngeyelarl tyenkerr anthem.”

9Akngeyelarl Abraham renh ilek-angkwarr, akngeyel ratherr anperl-alhek-anem. Apwert ilperr-ilperr renhan ra arratyilekan. Rwernem ampwerrety-inenh arratyilemel. Awey renhan tyweney-alhek rlterr-atherr itep-atherr renhap athenew-anem. Awey renhan arertnek ra, rlterr-atherr itep-atherr.

10Inkwartey-anem irrwerlilek ra atanthetyek-anem awey renh. 11INGKART-kenh angel angkek ikwer, “Abraham, Abraham!”

“Ilekekay?” Abraham-an angkek.

12“Ipmay! ipmay! Abraham ipmay!” Angel-an angkek. “Abraham ipmay! Atwey-angenh! Yanh atha ngenh iterl-areyel-anem. Alerengkw ngkwenh ayenh anthek ntwa. Ngkwenh. Anyent-antey. Impen-antey. Iterl-areyel-anem. Athap ngenh anthem ampa arnkengeny-anem. Akngerr-anem.”

13Abraham-elan arerl-arrernek, “Ay, yep-yeparlap wenh!” Akapwert yanhey yep-yep mwernelhenh ra. Arwerl-rnemel mwernek artekerrel-anem. Akapwertan renh. Mwernek-anem. Rewelyey-anem renh. Artekerr arwerl-rnemel-anem renh yep-yep mwernekan. Rap ywarn-anem tyerrelhenhan, Abraham-el renh-anem arerl-arrernekan. Rap yep-yep renh, Abraham-el tyenkerr-anem renh anthekan, ikwer-warl-anem arrernekan. Apwert ilperr-ilperr ikwer-warl-anem ra arrernekan. Tyenkerr-anem renh anthekan. 14Abraham-el apmer renh itnewek INGKARTel Wantem. Lyert aley renh itneweyel INGKARTel Wantem apwert ikwerenhel. Itnan renh anthek, apmer Tyarlap-tyarlap ran. Itnan renh anthek Akngeyeley. Apwert ilperr-ilperr renhan.

15Angel ikwer angkek arrpemarl, 16“Ngarl impenirrey-angenh atyeng angwenhirrek, impenirrey-angenh alerengkw ngkwenhek. 17Ngenh anthem ampa arnkengeny-anem, akngerr-anem. Ampa akngerr-anem atha ngenh antheman. Athap ngenh anthem ampa arnkengeny-anem. Akngerr-anem. Ampa akngerr-anem atha ngenh antheman. Apmer arrpanenh-anem ampa ngkwenhel tern ilkwernem akngeman amentew-ament. Tern ilkwernem-anem. Apmer arrpanenh-anem. Tern arrpanenh ngkwenh ingkerrenh akngerrirreyenh, ahern akely-rnem akngerr aynteyel-apeny. Ampa ngkwenhel-rnemey. 18Athap ngenh arntarnt-arem irrwerl-theyan, ngarl atyeng awelhek. Athap ngenh arntarnt-areman Abraham-ay.”

19Abraham ra warrkenh ikwerenh-atherr-warl alpek alerikw ikwerenh-akert. Abraham rap alpek apmer Beersheba-warl-anem. Aleth-antey aney-alpek-anem ra. ...

Currently Selected:

Genesis 22: aly

Highlight

Copy