Colossians 2

1Arrantherr iterl-areyew ayeng arrewantherr warrkerreyel, ingkerrenhew-antey, ingwer-rnem Laodicea tyaty-areny-rnem-then, ayenh iterl-arey-angenh-rnem-then. 2-3Arrantherr arnkaty aneyew, mwerrant-arey ingkerrenh anaynteyew. Angka anyelk awank-akerr ayntenh rernem iterl-areyew. Alakenh-anem ingkerrenh akwerrngel Ingkart-wenh-angkwarr arraty iterl-araynteyew. Arrantherr Christ-ew akalty aneyew. Christ ra Ingkart-wenh angka ingkerrenhew akalty, arratyant anaynteyew. 4Atha arrenhantherrenh arratyant ileyel, ingwerentyel arrenhantherrenh irrtywerremel ilewerr, akaltyel-arrpantey angka ingwer-angkwarr. 5Ayeng arrewantherr-itwew aney-angenh arrangkw, ayeng aleth-antey iterreyel arrewantherr. Ayeng inkwerelheyel, atha awewarl, arrantherr arraty apenteyel, Christ rlterrk nakemel aleth.

Jesus anyent impen

6Arrantherr Christ Jesus nakeyel, Ingkart arrewantherr. Kel ikwerenh-angkwarrant apenteyew arrantherr. 7Ikwerenh-angkwarrant akaltyerreyew, aleth-antey ikwer angkaynteyew. Renh rlterrk nakaynta, anantherr arrenhantherrenh akalty-anthew-apeny. Rlterrk nakaynteyew, iylpelerrey-angenh.

8Akalty-arrpantey ingwer-rnem-wety, arrantherr ikwer-rnem-wety arntarnt-arelheyew, rernem arrenhantherrenh ilpertelewerr apmwewarlelewerr ahern-areny-wenh-angkwarr Christ-wenh-angkwarr-wety akngewerr.

9Christ Ingkart anyent rey-antey, inweng anyent-akert. 10Christ ra inngarl aneyel, anewantherr-itwel, arrantherr ikwerenh-angkwarr anyenterrew arrpemarl. Christ rey-antey arrpemarl, atyetyart ingkerrenhew aneyel atyetyart ahern-areny-rnemew, irrwerl-areny-rnemew-then. 11Arrantherr Jesus Christ-warl anyenterrew, arrantherr apmwangkwarr ahern-areny-wenh-angkwarr apentey-angenh anaynteyew. Apmwamwam ahern-areny-wenh ament arrpemarl. Ra apmwa arrewantherr-wety iwew rlterrk ikwerenhel, arrenhantherrenh itethelew arrpemarl. 12Rernem arrenhantherrenh baptise-emelew, arrantherr Jesus Christ-angkwarr aylpem-apeny. Arrantherr ilwem-apeny, arrantherr itetherrem-apeny. Arrantherr itetherrew, Ingkart renh rlterrk nakemel. Arrantherr Ingkart renh nakew, rarl Christ renh ipmepenh itethelew 13Awank-akerr arrantherr apmwangkwarr-tangkwel apentenh, akwerrp-antey anenh. Arrantherran ipmapeny anenh. Ingkartel arrenhantherrenh itethelew, Christ-angkwarr, apmwa arrewantherr-wety iwew.

14Ingkartel anenhantherrenh menty arew, tyatyemeley-angenh. Apmwa irrarlkew Jesus Christ-el, arwerl iylpeyl-atherrel ilwewel. 15Ran arrenty-rnem antengelew arwerl iylpeyl-atherrel ilwemel. Ra arrenty-rnem ywerrelhelew.

16Ingwer-rnem apatemel iterreyel Alakenh-anyem rernem angka ingwerek-ingwer ilpertel arrerneyew-arrpantey ahern-areny-wenh-angkwarr, <<Nthakenh anantherr arlkweyew, nthakenh antyweyew.>> Arlta ltyerrey-angker anyenterr-aynteyew-arrpantey ayntarrp-ileyel. 17Ingkart-wenh angka arrwekeleny anantherr arrwekelant apentenh, alyep, arrkay-apeny. Jesus Christ ranem aremerrew. Aleyan ikwerenh-angkwarrant apenteyel aketh innganem. 18Ingwer-rnem arraty-arrpantey nakelheyel, rernem ilelhem <<altyerr areyel>> wenh, <<antyerl-rnem areyel>> wenh. Ikwer-rnem-wety arntarnt-arelha, rernem apal-angkwarr apenteyelarl-wety. 19Aray, rernem Jesus Christ renh ipmew. Christ ra tyaty-areny-wenh atyetyart aneyel, akapwert. Alwerrngel arlka anterrkwem. Arlwerrng-akert arlka rlterrk. Arlwerrng-weny arlka thapelerrem, apekap, nthakenh akngelhey-angenh. Arlwerrng-apeny Christ-el ikwerenh-rnem ingkerr anterrkweyel, rlterrkeleyel arrpemarl.

20Arrantherr Christ-angkwarr anyenterrew-apeny-arrpantey, arrantherr ahern-areny-wenh apenteyel-antey apmwantey. Arrantherr awelheyel, ahern-arenyew, rernem arrenhantherrenh ilerl-anenty, <<Alakenh mpwareyel>> wenh. 21Rernem ilem, <<Ampwal yanh arney-angenh>> wenh, <<amern yanh arlkwey-angenh>> wenh. 22Amern ahern-areny-wenh arwa aynteyel, apmwerrey-angker. Amern arlkwenty, anamerl ywerrem-anem. 23Ingwer-rnem iterreyel ikwer-rnem-wenh-angkwarr mwerr-arrpantey. Rernem irrtywerremel ileyel, arraty-angkwarr aneyew-arrpantey. Alakenh-anyem rernem ywarn arratyerreyew-arrpantey arrkernelheyel. Rernem ywarn-antey ilelhem, rernem mwerr-angkwarr anerl-anenty-arrpantey.

Currently Selected:

Colossians 2: aly

Highlight

Copy