PHILEMON 1

1Ni-wehnag, Philemon:

Ia ani kuhpi ahni Paul nani pi ahgachug g Jiosh haꞌichu ahga ab amjed g Jesus Christ. K ia ni-wehmaj g Timothy ch ab s-em-hoꞌigeꞌid.

Am ant haꞌichu wo m-oꞌohani, Philemon, s-chegitokch map wa s-ap i t-wehmaj id eda chikpan. 2Kupt id am wo neꞌokchul Aphia wui ch heg wui Archipus mo wa t-wehm ahgahim g Jiosh haꞌichu ahga, pej wehs ha wui hegam mo am em-wehm e mihshmad em-kih am.

3Ab o si s-em-hoꞌigeꞌid g t-ohg Jiosh ch t-kownalig Jesus Christ ch ab wo wa baꞌich i em-mahkad g i wehmtadag ch g s-ap tahhadkam.

Mash e hoꞌigeꞌidahun Philemon wehhejed

4-7Ab apsh wabsh kia si hiwig g t-kownalig Jesus ch si pihk e elid ha hekaj g e-wehm wohochuddam. (7) Sh hegam ab si i e gewkemhun ab neidch map s-ap haꞌichu hab ha junid. Ni heg hekaj si s-ap ni-tahtk (4) ch ab hoꞌigeꞌid g Jiosh ch ab tahni mat baꞌich wo i m-wehmt hemu. (6) Pt hab baꞌich ab wo i chehgi map geꞌe edgid g s-apꞌekam ab ihmch g Jesus Christ.

Matsh haꞌichu hab wo chum e juh g Philemon

8Ab o ni-mahkch g Christ g gewkdag mant ab wo haꞌichu em-cheha ahpim mam ab ihm. 9Nt wabshaba ab wabsh wo i m-gewkemhu mapt haꞌichu hab wo ni-juni heg wabsh hekaj map si pihk e elid t-hekaj. Dani keli hemu ch ia kuhpi Jesus Christ wehhejed. Kupt ab wo si pihk e el ni-wui k hekaj hab wo juh g ni-tatchui.

10Ia o ni-wehmaj ihda m-neholiga mo hab chehgig Onesimus. Ni am ahgid ab amjed g t-kownalig Jesus. T ab i s-wohoch. K heg wa wepo mo d ni-alidag am t-wohochudadag ed. 11Heki ash hu s-padmam chikpan m-wehhejed ch wabshaba hemu s-wagimam chikpan mo hab masma hab d ahga g chehgigaj ch hab haꞌichu ni-junid am m-wehhejed.

12Ab ani chehani mat am uhpam ep wo hih m-wui. Kupt hab masma ab wo neidad mo d ni-alidag. 13-14Chum ani hi wa tatchua mat ia wo i ni-wehmt m-wehhejed mani ia kuhpi ch ahg g s-kehg haꞌichu ahgaj g Jiosh. K wabshaba pi hab chum chuꞌig manis wo m-wohppoꞌi g m-pionag. Baꞌich o i s-apꞌe mat hejel hab wo i e ah mapt has masma wo i ni-wehmt. 15Do heb hu himkam ihda m-pionag al heꞌes i tash. Kuki wabshaba hab d elidaj g Jiosh mat hab masma wo e chehg k d haha wo m-wehm wohochuddamk chum hekid. 16Do si t-wehnag, wahm ahpi, no pi d m-pionag ch am i dahm d hahawa m-wehm wohochuddam.

17Bap masma hab ni-elid mani d si m-wehnag, pegih, k ch hab wa masma hab wo elidad g Onesimus mat d wo si m-wehnagk. 18Ab atsh m-wui pi ap chuꞌi. Kupt wabshaba ahni ab wo ni-mohtoꞌi. 19Ahni ant wo m-namkid heg hekaj, chum aps ahpi ab ni-ab e wulshch nant pi am m-wui uꞌapa g Jiosh haꞌichu ahga mapt hekaj e doꞌibia.

20Pegih, pt hab masma hab wo elidad g Onesimus mat d wo m-wehnagk. Id at ab wo si i ni-gewkemhu am wehhejed g Jiosh alidag. 21Id ant am i m-oꞌohani s-mahchch mapt baꞌich i dahm haꞌichu hab wo ni-juni mani m-tahni.

22Jiosh at ab wo kaiha g em-hoꞌigeꞌidahuna k ab wo i ni-wuhshad ab amjed g kukpaikud. Nt am ep wo i em-chehgim. Kumt heg hekaj am wo i apꞌech g kih ni-wehhejed.

Mash haꞌi ep s-hoꞌigeꞌid g Philemon

23Ia o ep ni-wehm kuhpi g Epaphras ch s-m-hoꞌigeꞌid. 24K ia ep dadha g Mark ch Aristarcas ch Demas ch Luke ch hab waꞌap s-m-hoꞌigeꞌid.

25T-kownalig Jesus Christ at wo wa s-em-hoꞌigeꞌel.

Currently Selected:

PHILEMON 1: ood

Highlight

Copy