Mbombo zya Bhasundikwa 1

1Nholo waanɨ mʉ lwɨtɨkho Seofiilo, mu shitaabu shaanɨ shiila ɨsha kwanda,#1:1 Ishitaabu shaanɨ shiila ɨsha kwanda kwe kʉtɨ ishitaabu sha Luuka. násimbile mʉmwo she uYeesu akhabhombaga, na she akhamanyɨzyaga, kufuma kʉwandɨlo 2kufishila isiku lye akhanyamvʉlwa kʉbhala kʉmwanya. We ashɨɨlɨ kʉbhalekha abhasundikwa bhaakwe bhe ábhasebhile, ábhalajiziizye kʉshɨlɨla kwa Mupepu uMufinjile she bhatɨbhombaje ɨmbombo. 3Kʉ khabhalɨlo akhi nsiku amashumi gani kufuma pe ázyushile mu wufwe, akhabhaloleshelaga abhasundikwa bhaala akhinji bhʉʉlo, akhabhalangaga apazelu kʉtɨ ʉweene mwumi. Khabhɨlɨ akhabhamanyɨzyaga ɨnongwa ɨzya wʉmwene wa Mʉlʉngʉ.#1:3 Ʉwʉmwene wa Mʉlʉngʉ Bhaazya mu Wilulanyo ʉwa mazwi amajeni.

4Isiku limo, we uYeesu akulya peeka na bhasundikwa, akhabhalajɨzya akhatɨ, “Mʉtasogolaje mʉ nhaaya ɨya mu Yelusaleemu, lyoli mʉgʉʉlɨle munuumu, paka mufishile akhabhalɨlo khe mʉkhayɨposheela ɨshɨkʉnjɨlwa sha Mupepu uMufinjile. Shɨnɨɨsho she shɨkʉnjɨlwa shiila she ʉTaata ʉMʉlʉngʉ álajile, ʉmʉlajɨ wʉnʉʉwo we ɨne ɨnhabhabhʉzyaga. 5UYookhani akhabhozyaga abhantʉ ku minzi, ɨleelo kʉ khabhalɨlo khashe bhʉʉlo khe khakwɨnza, ɨmwe mʉtɨyoozelwe kwa Mupepu uMufinjile.”#1:5 Mʉtɨyoozelwe kwa Mupepu uMufinjile kwe kʉtɨ ʉMʉlʉngʉ atɨmʉsonteelezye uMupepu uMufinjile kwɨkhala mukaasi yaabho, na kʉbhalongozya. Khabhɨlɨ atibhazelufwe imbiibhi zyabho, na kʉʉbhapa amakha aga kumunitinikha ʉMʉlʉngʉ.

UYeesu akʉnyamvʉlwa kʉbhala kʉmwanya

6We abhasundikwa bha Yeesu bhabhungaanile peeka na wʉʉyo, bhakhamʉbhʉzɨɨlɨzya bhakhatɨ, “Bhʉlɨ, Mwene, akhabhalɨlo ɨkha khe ʉtɨbhagalʉshɨzye aBhaisilaeli ʉwʉmwene waabho?” 7Akhabhaamʉla akhatɨ, “Insiku na khabhalɨlo akha kʉbhombekha zɨnɨɨzyo, te mbombo yiinyu kʉmanya. ɄTaata we avibhiishile kʉ makha gaakwe amapɨtɨ. 8Ɨleelo mʉtɨposheele amakha we uMupepu uMufinjile ayɨnza kukwinyu, ɨmwe mukhayimfumwizyaga uwukeeti mu Yelusaleemu, mʉ mʉkoa wonti ʉwa mu Yudeeya, na mu Samaliya, paka kufishila mwe ɨnsɨ yɨpeleleeye.”

9We uYeesu aamala kʉbhabhʉʉzya shɨnɨɨsho abhasundikwa bhaakwe, nalʉbhɨlo bhʉʉlo akhanyamvʉlwa pamiiso gaabho kʉbhala kʉmwanya. Ɨbhɨngo likhamugubishila, bhatakhamʉlola winza. 10Kʉ khabhalɨlo khanaakho we bhakwenya kʉmwanya we akʉsogola, nalʉbhɨlo bhʉʉlo bhakhɨmɨɨlɨla abhakhabhɨzya bhabhɨlɨ papɨɨpɨ nabho, bhe bhákwatile amenda amazelu. 11Bhakhatɨ, “Mʉbhasakhaala ɨmwe mʉbha mʉ Galɨlaaya, khooni khe mwɨmɨlɨɨye ɨpa mʉkwenya kʉmwanya? UYeesu ʉnʉ we anyamvʉlwa kukwinyu kʉbhala kʉmwanya, anza she mwamʉlola asogola, shɨnɨɨsho she akhayɨgalʉkha winza.”

Bhakʉmʉpwanɨzya uMasiiya pa Yʉʉda

12Pe abhasundikwa bha Yeesu bhakhasogola pɨ gamba lye bhakhatɨnjɨ ɨlya Mizeituni, bhakhagalʉkha mu Yelusaleemu, ye yáamɨle uwutali uwi kilomiita yeeka kufuma pɨ gamba lɨnɨɨlyo. 13We bhinjila mʉ nhaaya, bhakhabhala mu lupitu ʉlwa pamwanya mu nyumba ɨnjelenhanye, mwe bhakhakhomaanaga. Abhasundikwa bhanaabho bhe bha bhɨɨbha: uPeeteli, uYookhani, ʉYaakobo, ʉAndeleeya, uFilipo, uToomasi, ʉBatolomaayo, uMataayi, ʉYaakobo ʉmwana wa Alʉfeeyo, uSiimoni ʉmʉlwɨla nsɨ yaakwe,#1:13 USiimoni ʉmʉlwɨla nsɨ yaakwe Mʉ ndongo ɨya Shiyunaani yɨkʉtɨ uSiimoni ʉMʉzeloote. nʉ Yʉʉda ʉmwana wa Yaakobo. 14Bhonti bhanaabho bhakhabhʉngaanaga kʉmʉlaabha ʉMʉlʉngʉ, peeka nu Maliya unyina wa Yeesu, abhantanda abhanjɨ, na bhansi bha Yeesu.

15Isiku limo, abhantʉ bhe bhámwitishile uYeesu bhábhungaanile peeka, pamu bháfishiiye abhantʉ imia yeeka na mashumi gabhɨlɨ (120). Pe uPeeteli akhɨmɨɨlɨla pakaasi yaabho, 16akhabhabhʉʉzya akhatɨ, “Ɨmwe bhanholo bhɨɨtʉ, zye zyásimbiilwe mu Wusimbe uWufinjile kʉ zya Yʉʉda, zyaakhondeeye kʉbhombekha. Zɨnɨɨzyo zye uMupepu uMufinjile álonjile kwi lomu lya maama wɨɨtʉ uDaudi#1:16 Ʉmaama wɨɨtʉ uDaudi Bhaazya uDaudi mu Wilulanyo ʉwa mazwi amajeni. zibhombeshile kʉtɨ, ʉYʉʉda we aabhalongooye abhantʉ bhaala bhe bhaamulemile uYeesu, 17she poope aamɨle nɨɨtwe tubhasundikwa, twabhombaga ɨmbombo peeka nawo.”

18We aposheela ɨnhela ɨzya mabheko, akhakalɨla ishiizi. Mu shiizi shɨnɨɨsho mwe akhagwa shikupama, ʉlwanda lʉkhatʉlʉkha, uwula wonti wʉkhasaata paasɨ. 19Izwi lɨnɨɨlyo lɨkhamanyɨkha mʉ bhantʉ bhonti bhe bhakwɨkhala mu Yelusaleemu. Ishiizi shiila bhakhaashipa ɨtaawa ɨlya Hakelidama mʉ ndongo yaabho#1:19 Ɨndongo yaabho kwe kʉtɨ iShialaamu. kwe kʉtɨ, iShiizi ɨshɨ Bhanda. 20UPeeteli akhajendeelela kʉlonga kʉtɨ, “Zɨnɨɨzyo zye zisimbiilwe mu shitaabu ɨsha Zabuuli kʉtɨ,

‘Inyumba yaakwe yɨtɨzwɨme,

te asyale umuntu nʉʉmo mʉmwo winza.’#1:20 Bhaazya Zabuuli 69:25.

Khabhɨlɨ yisimbiilwe kʉtɨ,

‘Ɨmbombo yaakwe ɨya kʉlongozya

bhaamupe umuntu uwunji.’#1:20 Bhaazya Zabuuli 109:8.

21-22Kʉnongwa yɨnɨɨyo, yɨkʉtɨ abhe ʉmʉsakhaala uwunji weeka we atɨjendaje peeka nɨɨtwe mʉ mbombo, afumwaje uwukeeti kʉtɨ ʉMwene wɨɨtʉ uYeesu azyushile mʉ bhafwe. Umuntu ʉyo, akwanzɨwa abhe weeka mʉ bhaala bhe bháamɨle nɨɨtwe mʉ khabhalɨlo khonti khe tʉkhamʉlandataga ʉMwene wɨɨtʉ uYeesu, we akʉshɨla mʉ bhantʉ, kufuma akhabhalɨlo khe uYookhani akhozyaga abhantʉ, kufishila isiku liila lye uYeesu akhanyamvʉlwa kʉkwɨtʉ kʉbhala kʉmwanya.”

23Pe abhantʉ bhe bhámwitishile uYeesu, bhakhatekha amataawa aga bhasakhaala bhabhɨlɨ. Ʉmo áamɨle wu Yoosefu we bhakhatɨnjɨ ʉBalɨsaaba, awe uYusito, nʉ wa wʉbhɨlɨ, bhakhatɨnjɨ uMasiiya. 24Pe bhakhamʉlaabha ʉMʉlʉngʉ bhakhatɨ, “Ɨwe Mwene, umanyile zye zɨlɨ mukaasi mʉ mooyo ga bhantʉ bhonti. Ishi, ʉtʉlanje ʉla we umusebhile mʉ bhɨɨbha, 25ɨnga apwanɨle pa mbombo ɨya wusundikwa ye ʉYʉʉda áyileshile, akhafwa, akhabhala pe pamʉkhondeeye wʉʉyo.” 26Pe bhakhabhakhomela ɨkʉʉla#1:26 Bhakhabhakhomela ɨkʉʉla ABhayahuudi bhakhasimbaga amataawa ga bhantʉ mʉ mawe amansi, na kʉbhɨɨkha gonti mʉ shɨkoopa. Bhakhayinzanyaaga paka iwe lyeka lifume na kʉlenda paasɨ. Umuntu we iwe lye lɨlɨ nɨ taawa lyakwe lyatala kufuma, we bhakhatɨnjɨ aashɨla. abhantʉ bhabhɨlɨ bhaala, ɨkʉʉla yɨkhamʉgwɨla uMasiiya, we akhabha peeka na bhasundikwa abhanjɨ bhaala ishumi na weeka.

Currently Selected:

Mbombo zya Bhasundikwa 1: Malila

Highlight

Copy