Марԛос 2

Иса шьлушәʼтәки ԛәнщ дькә у гӧнед ԝи дьбахшинә

(Мәтта 9:1-8; Луԛа 5:17-26)

1Пәй чәнд рʼожарʼа Иса вәгәрʼийа Кәфәрнаһуме. Һьнге һатә бьһистьне, кӧ Әԝ малда йә. 2Маледа һаԛас мәрьв щьвийан, һʼәта кӧ ль бәр дери жи щи-сьтʼар тʼӧнәбу. Иса хәбәра мьзгинийе әԝ һин дькьрьн. 3У мәрьв һатьн, жь нав ԝанда чар мәрьва шьлушәʼтәк һьлдабун данинә щәм Иса. 4Ле жь дәст әʼлаләте рʼе нәдитьн кӧ незики Иса буна, ԝана бане ханийе кӧ Иса теда бу ԛӧл кьр у мәрьве шьлушәʼт бәрʼева дахьстьнә жере. 5Гава кӧ Иса баԝәрийа ԝан дит, готә йе шьлушәʼт: «Лаԝо, гӧнед тә һатьнә бахшандьне». 6Жь ԛанунзана һьнәк ԝьра рʼуньштьбун у дьле хԝәда дьготьн: 7«Әви һан чьма ӧса хәбәр дьдә? Әва ньге хԝә Хԝәдерʼа давежә! Пештьри Хԝәде кʼи дькарә гӧна бьбахшинә?»

8Дәстхԝәда рʼӧһʼе Исава әʼйан бу кӧ әвана аһа дьфькьрьн, Әԝи гот: «Һун чьма тьштед аһа дьле хԝәда дьфькьрьн? 9Кʼижан рʼьһʼәт ә, шьлушәʼтрʼа бежьн: ‹Гӧнед тә һатьнә бахшандьне?› йан бежьне: ‹Рʼабә бәрʼа хԝә һьлдә у бьгәрʼә?› 10Ле ԝәки һун бьзаньбьн кӧ һʼӧкӧме Кӧрʼе Мерьв һәйә ль сәр әʼрде гӧна бьбахшинә…» 11готә йе шьлушәʼт: «Әз тәрʼа дьбежьм, рʼабә бәрʼа хԝә һьлдә, һәрʼә мала хԝә». 12Әԝ жи перʼа-перʼа ль бәр чʼәʼве һәр кәси рʼабу, бәрʼа хԝә һьлда, дәркʼәт у чу. Һʼәму жи һʼәйири ман, шькьри данә Хԝәде у готьн: «Мә тьштәки ӧса тʼӧ щар нәдитийә!»

Иса гази Леԝи дькә

(Мәтта 9:9-13; Луԛа 5:27-32)

13Иса диса чу дәве голе. Тʼәмамийа әʼлаләт дьһатә щәм Ԝи у Әԝи жи әԝ һин дькьрьн. 14Чахе Иса рʼеда чу, Леԝийе кӧрʼе Һалфаԝо ль щийе хәрщһьлдане рʼуньшти дит у готе: «Пәй Мьн ԝәрә». Әԝ жи рʼабу пәй Иса чу. 15Гава Иса мала Леԝида сәр сьфре бу, гәләк хәрщгьр у гӧнәкʼар тʼәви Ԝи у шагьртед Ԝи ль сәр сьфре рʼуньштьбун, чьмки йед пәй Ԝи дьчун гәләк бун. 16Гава ԛанунзанед жь нава ферьсийа дитьн кӧ Иса тʼәви хәрщгьр у гӧнәкʼара ль сәр сьфре рʼуньшти йә, жь шагьртед Ԝи пьрсин: «Чьма Әԝ тʼәви хәрщгьр у гӧнәкʼара дьхԝә у вәдьхԝә?» 17Чахе Иса бьһист, ԝанрʼа гот: «Сахләм нә һʼәԝще һʼәким ьн, ле нәхԝәш. Әз нә һатьмә гази йед рʼаст кьм, ле гази гӧнәкʼара».

Пьрса рʼожигьртьне

(Мәтта 9:14-17; Луԛа 5:33-39)

18Щарәке шагьртед Йуһʼәнна у ферьсийа рʼожи дьгьртьн. Чәнд мәрьв һатьнә щәм Иса у же пьрсин: «Чьма шагьртед Йуһʼәнна у йед ферьсийа рʼожийа дьгьрьн, ле шагьртед Тә рʼожи нагьрьн?» 19Иса готә ԝан: «Һʼәта зәʼва тʼәви ԝан ә, гәло дьбә кӧ хԝәндийед дәʼԝате рʼожи бьгьрьн? Һʼәта зәʼва тʼәви ԝан ә, әԝ нькарьн рʼожи бьгьрьн! 20Ле рʼож ԝе бен, гава зәʼва жь ԝан бе һьлдане, һьнге ԝе рʼоже ԝе рʼожи бьгьрьн. 21Тʼӧ кәс пе пʼарчʼе ну кʼьнща кәвьн пʼинә накә. Һәгәр ӧса бькә, пʼарчʼе кʼьнща кәвьнва дьрути ԝе зоре ль кʼьнща кәвьн бькә у щийе ԛәльши ԝе һе ль бәр һәвва һәрʼә.

22У нә жи кәсәк шәрава ну дькә мәшкед кәвьн. Һәгәр ӧса бькә, шәрава ну ԝе мәшка бьтʼәԛинә, һьн шәраве ӧнда бә, һьн жи мәшк. Ле шәрава ну дькьнә мәшкед ну».

Пьрса рʼожа шәмийе

(Мәтта 12:1-8; Луԛа 6:1-5)

23Иса рʼожәкә шәмийе нава зәвийарʼа дәрбаз дьбу у шагьртед Ԝи рʼева дәстпекьрьн сьмбьлед геньм чьнин. 24Ферьсийа Исарʼа гот: «Бьньһерʼә! Чьма шагьртед Тә тьште нәщайизи рʼожа шәмийе дькьн?» 25Иса ль ԝан вәгәрʼанд у гот: «Ԝә ԛәт нәхԝәндийә кӧ Даԝьд жь һʼәԝщәтийе чь кьр, гава әԝ у йед перʼа бьрʼчи бун? 26Әԝ ԝәхте Әвйатаре сәрәккʼаһинда кʼәтә Хана Хԝәде у нане Хԝәдерʼа дайи хԝар, кӧ әԝ нан пештьри кʼаһина нә щайиз бу йәки дьн бьхԝара. Сәрда жи әԝ нан да йед тʼәви хԝә»#2:26 Ԛануна Кʼаһинтийе 24:9; Пʼадшати I, 21:1-6. . 27Паше сәр готьна Хԝәда зедә кьр готә ԝан: «Рʼожа шәмийе бона инсен һатә данине, нә кӧ инсан бона рʼожа шәмийе! 28Аԝа готи Кӧрʼе Мерьв Хӧдане рʼожа шәмийе йә жи».

Currently Selected:

Марԛос 2: KmrNTC

Highlight

Copy