Мәтта 26

Шеԝьра кӧштьна Иса

(Марԛос 14:1-2; Луԛа 22:1-2; Йуһʼәнна 11:45-53)

1Гава Иса әв һʼәму хәбәр хьлаз кьрьн, шагьртед Хԝәрʼа гот: 2«Һун заньн кӧ ԝе дӧ рʼожа шунда Щәжьна Дәрбазбуне бә. У Кӧрʼе Мерьв ԝе бе дайине кӧ бе хачкьрьне».

3Һьнге сәрәкед кʼаһина у рʼуспийед щьмәʼте сәрайа сәрәккʼаһинда кӧ наве ԝи Ԛәйафа бу щьвийан 4у ль һәв шеԝьрин кӧ Иса дьзива бь фелбазийе бьгьрьн, бькӧжьн. 5Ле ԝана дьгот: «Бьра әв йәк щәжьнеда нибә, ԝәки щьмәʼт рʼанәбә сәр ньга».

Иса Бәйтанйайеда те рʼункьрьне

(Марԛос 14:3-9; Йуһʼәнна 12:1-8)

6Чахе Иса ль Бәйтанйайе мала Шьмһʼуне кʼотида бу, 7кʼӧлфәтәкә кӧ дәрданәкә ԝейә алабастьрейи рʼуне бинхԝәш һәбу, һатә щәм Ԝи у чахе Әԝ ль сәр сьфре рʼуньшти бу, әԝе әԝ рʼун рʼетә сәр сәре Ԝи. 8Гава шагьрта әв йәк дит, ль ԝан хԝәш нәһат у готьне: «Чьма әва зийана бу? 9Әва рʼуна ԝе ԛимәтәки бьһа бьһата фьротане у фәԛирарʼа бьһата бәлакьрьне».

10Ле әԝ йәк Исава әʼйан бу у ԝанарʼа гот: «Чьма һун хатьре ԝе кʼӧлфәте дькʼәвьн? Әԝе тьштәки ԛәнщ бона Мьн кьр. 11Фәԛире һәр гав тʼәви ԝә бьн, ле Әзе һәр гав тʼәви ԝә нибьм. 12Әԝе бона дәфьнкьрьна Мьн әԝ рʼун рʼетә сәр бәдәна Мьн. 13Әз рʼаст ԝәрʼа дьбежьм, дьнйайеда кʼидәре әва Мьзгинийа бе даннасинкьрьне, ԝе кьрьна ве кʼӧлфәте жи бона биранина ԝе бе готьне».

Щьһуда нәмамийа Иса дькә

(Марԛос 14:10-11; Луԛа 22:3-6)

14Һьнге йәк жь һәр донздәһа кӧ Щьһудайе Исхәрйоти дьһатә готьне, чу щәм сәрәкед кʼаһина 15у гот: «Һуне чь бьдьнә мьн, ԝәки әз Ԝи бьдьмә дәсте ԝә?» У ԝана си зив жьмьрин дане. 16Жь ԝьр шунда әԝ мәщаләке дьгәрʼийа кӧ чаԝа Иса бьдә дәсте ԝан.

Иса тʼәви шагьртед Хԝә шива Щәжьна Дәрбазбуне дьхԝә

(Марԛос 14:12-21; Луԛа 22:7-13; Йуһʼәнна 13:21-30)

17Ль рʼожа пешьнә Щәжьна Нане Шкәва, шагьрт һатьнә щәм Иса у жерʼа готьн: «Тӧ ль кʼӧ дьхԝази Шива Щәжьна Дәрбазбуне бьхԝи, ԝәки әм Тәрʼа һазьр кьн?» 18Әԝи жи гот: «Һәрʼьнә бажер, щәм фьлан мәрьви у бежьнә ԝи: ‹Дәрсдар дьбежә: Рʼожа Мьн незик ә. Әзе тʼәви шагьртед Хԝә мала тәда Щәжьна Дәрбазбуне дәрбаз кьм›». 19У шагьрта ӧса кьр, чаԝа кӧ Иса ԝанарʼа әʼмьр кьрьбу у шива Щәжьна Дәрбазбуне һазьр кьрьн.

20Еваре тʼәв һәр донздәһа сәр сьфре рʼуньшт. 21Гава ԝана һе дьхԝар, Иса гот: «Әз рʼаст ԝәрʼа дьбежьм, йәки жь ԝә ԝе нәмамийа Мьн бькә». 22Шагьрт гәләки бәр хԝә кʼәтьн у һәр йәки жь ԝан готә Ԝи: «Хӧдан, дьбә кӧ әз ьм?» 23Әԝи ль ԝан вәгәрʼанд у гот: «Әԝе кӧ пәʼрийе Хԝә тʼәви Мьн тʼаседа кьр, әԝе нәмамийа Мьн бькә. 24Рʼаст Кӧрʼе Мерьв ԝе ӧса һәрʼә чаԝа кӧ бона Ԝи һатийә ньвисаре, ле ԝәй ль ԝи мәрьве кӧ нәмамийа Кӧрʼе Мерьв бькә! Ԝирʼа һе ԛәнщ бу кӧ әԝ ԛәт дьне нәкʼәта». 25Щьһудайе кӧ ԝе нәмамийа Ԝи бькьра, ле вәгәрʼанд у готе: «Дәрсдар, дьбә кӧ әз ьм?» Иса ԝирʼа гот: «Тә бь дәве хԝә гот».

Шива Хӧдан

(Марԛос 14:22-26; Луԛа 22:14-23; Корьнтʼи I 11:23-25)

26Аԝа гава ԝана һе нан дьхԝар, Иса нан һьлда шькьри да, кәркьр да шагьрта у гот: «Һан һьлдьн бьхԝьн. Әва бәдәна Мьн ә».

27Пәйрʼа кʼас һьлда шькьри да, да ԝан у ԝанарʼа гот: «Һун һʼәму жи жь ве вәхԝьн, 28әва хуна Мьн ә бона пәймане#26:28 Нав һьнәк дәстньвисарада «пәймана ну» һәйә. , кӧ бона бахшандьна гӧнед гәләка те рʼетьне. 29Ле Әз ԝәрʼа дьбежьм, иди Әз жь вьр шунда тʼӧ щар жь ве мәйа тьрийе вәнахԝьм, һʼәта ԝе рʼожа кӧ Әзе тʼәви ԝә Пʼадшатийа Баве Хԝәда жь йа ну вәхԝьм».

30Паше ԝана зәбурәк стьра, дәркʼәтьн чунә чʼийайе Зәйтʼуне.

Иса дәрһәԛа инкʼарийа Пәтрусда дьбежә

(Марԛос 14:27-31; Луԛа 22:31-34; Йуһʼәнна 13:36-38)

31Һьнге Иса ԝанарʼа гот: «Ишәв һун һʼәмуйе жи жь Мьн пʼьшк бьн һәрʼьн, чьмки ньвисар ә: ‹Әзе ль шьвен хьм у пәзе жи бәла-бәлайи бә›#26:31 Зәкәрийа 13:7. . 32Ле гава кӧ Әз жь мьрьне рʼабьм, Әзе бәри ԝә һәрʼьмә Щәлиле». 33Пәтрус ле вәгәрʼанд у готе: «Һәгәр һʼәму жи жь Тә пʼьшк бьн һәрʼьн, ле әз тʼӧ щар жь Тә начьм». 34Иса ԝирʼа гот: «Әз рʼаст тәрʼа дьбежьм, һәма ишәв һе бәри бангдана дик, те се щара Мьн инкʼар ки». 35Пәтрус Ԝирʼа гот: «Һәгәр щи бе, әзе тʼәви Тә бьмьрьм жи, ле тʼӧ щар Тә инкʼар накьм». Һʼәму шагьрта жи ӧса гот.

Иса ль Гетшәманийе дӧа дькә

(Марԛос 14:32-42; Луԛа 22:39-46)

36Һьнге Иса тʼәви ԝан чу ԝи щийе кӧ жерʼа Гетшәмани дьбежьн у шагьртарʼа гот: «Вьра рʼунен, һʼәта Әз һәрʼьм дәра һан дӧа бькьм». 37Әԝи тʼәви Хԝә Пәтрус у һәр дӧ кӧрʼед Зәбәди һьлдан, кʼәсәр һате у бәр Хԝә кʼәт. 38Һьнге Иса ԝанарʼа гот: «Дьле Мьн һаԛас дәрд у кʼәдәр ә, мина бәр мьрьне. Вьра бьминьн у тʼәви Мьн һʼьшйар бьн».

39Һьнәки пешда чу Хԝә дәвәрʼуйа авит дӧа кьр у гот: «Баве Мьн! Һәгәр дьбә, бьра әв кʼаса щәфе сәр Мьнрʼа дәрбаз бә. Ле нә кӧ чаԝа Әз дьхԝазьм, ле бьра хԝәстьна Тә бә».

40Паше һатә щәм шагьрта, әԝ рʼазайи дитьн у готә Пәтрус: «Ԝә нькарьбу кӧ сьһʼәтәке һун тʼәви Мьн һʼьшйар бьмана? 41Һʼьшйар бьминьн у дӧа бькьн, ԝәки һун нәкʼәвьнә нава щерʼьбандьне. Бәле рʼӧһʼ рʼази йә, ле бәдән сьст ә».

42Щарәкә дьн жи Иса чу дӧа кьр у гот: «Баве Мьн! Һәгәр набә кӧ әв кʼаса щәфе жь Мьн дәрбаз бә һʼәта кӧ Әз ԝе вәнәхԝьм, бьра хԝәстьна Тә бә».

43Иса һат, әԝ диса хәԝеда дитьн, чʼәʼвед ԝан жь хәԝе вәнәдьбун. 44У әԝ һьштьн чу, щара сьсийа дӧа кьр, диса әԝ хәбәр готьн.

45Һьнге һатә щәм шагьрта у ԝанарʼа гот: «Һун һәла һе рʼазайи нә у рʼьһʼәт дьбьн? Ва ԝәхт перʼа гьһишт кӧ Кӧрʼе Мерьв бькʼәвә дәсте гӧнәкʼара. 46Рʼабьн әм һәрʼьн. Ва йә әԝе кӧ нәмамийа Мьн дькә незик бу».

Гьртьна Иса

(Марԛос 14:43-50; Луԛа 22:47-53; Йуһʼәнна 18:3-12)

47Әԝи һе хәбәр дьда, ньшкева Щьһудайе кӧ йәк жь ԝан донздәһа бу һат. Әԝи тʼәви хԝә жь алийе сәрәкед кʼаһина у рʼуспийед щьмәʼтеда әʼлаләтәкә гьран анибу, бь дара у шура. 48Аԝа нәмаме Ԝи әʼшәрәт дабу ԝан у готьбу: «Әз кʼижани кӧ рʼамусьм, Әԝ ә, Ԝи бьгьрьн».

49Һьнге Щьһуда незики Иса бу у готе: «Сьлав ль Тә, дәрсдар!» у рʼамуса. 50Иса ԝирʼа гот: «Һәвал, те чь бьки зу бькә!»#26:50 Аһа жи те фәʼмкьрьне: «Һәвал, тӧ бона чь һати?» Ԝе гаве әԝ пешда һатьн, дәст авитьнә Иса у Әԝ гьртьн. 51Ньшкева йәки жь әԝед кӧ тʼәви Иса бу, рʼабу шуре хԝә кʼьшанд ль хӧламе сәрәккʼаһин хьст у гӧһе ԝи пәканд. 52Ԝе гаве Иса ԝирʼа гот: «Шуре хԝә бькә щи. Кʼи кӧ шур һьлтинә, әԝе бь шур һәрʼә. 53Тә тʼьре Әз нькарьм жь Баве Хԝә бьхԝазьм ԝәки перʼа-перʼа донздәһ ордийа зедәтьр мьлйакʼәт бьгьһинә Мьн? 54Ле ньвисар ԝе чаԝа бенә сери кӧ дьбежьн, гәрәке һʼәму аһа бьн?»

55Ԝе гаве Иса әʼлаләтерʼа гот: «Те бежи ԝә сәр ԛачахәкида гьртийә, кӧ һун бь дара у шура һатьнә Мьн бьгьрьн? Нә Әз һәр рʼож тʼәви ԝә пʼарьстгәһеда рʼудьньштьм Мьн һун һин дькьрьн, ле ԝә Әз нәдьгьртьм. 56Ле әв һʼәму тьшт ԛәԝьмин, кӧ ньвисаред пʼехәмбәра бенә сери». Ԝе дәме һʼәму шагьрта Әԝ һьштьн у рʼәвин.

Иса ль бәр щьвина гьрәгьра

(Марԛос 14:53-65; Луԛа 22:54-55, 63-71; Йуһʼәнна 18:13-14, 19-24)

57Йед кӧ Иса гьртьн, Әԝ бьрьнә щәм Ԛәйафайе сәрәккʼаһин, ль ԝи щийе кӧ ԛанунзан у рʼуспи щьвийабун. 58Пәтрус жи дурва һʼәта һʼәԝша сәрәккʼаһин пʼе-пʼе пәй Ԝи чу кʼәтә һьндӧрʼ у ль нав нобәдара рʼуньшт, кӧ бьзаньбә ахьри ԝе чаԝа бә. 59Сәрәкед кʼаһина у тʼәмамийа щьвина гьрәгьра жи мьԛабьли Иса шәʼдәтикә дәрәԝ дьгәрʼийан кӧ Ԝи бькӧжьн, 60ле нәдитьн. Гәләк шәʼдед дәрәԝ жи һатьн, диса нәдитьн. Паше дӧ шәʼдед дәрәԝ пешда һатьн 61у готьн: «Әви гот: ‹Әз дькарьм пʼарьстгәһа Хԝәде һьлшиньм у нава се рʼожада диса ԝе чекьм›».

62Сәрәккʼаһин рʼабу сәр пʼийа у Ԝирʼа гот: «Бона ван шәʼдәтийа кӧ әвана мьԛабьли Тә дьдьн Тӧ чьма щабәке нади?» 63Ле Иса дәнге Хԝә нәкьр. Сәрәккʼаһин диса Ԝирʼа гот: «Әз Тә бь Хԝәдейе сах дьдьмә сонде. Мәрʼа бежә, Тӧ йи Мәсиһ, Кӧрʼе Хԝәде?» 64Иса готә ԝи: «Тә бь дәве хԝә гот. Ле Әз ԝәрʼа дьбежьм,

жь вьр шунда һуне Кӧрʼе Мерьв ль кʼеләка Йе Һәри Зор,

ль мьле Ԝийи рʼасте рʼуньшти

у ль сәр әʼԝред әʼзмен те бьбиньн»#26:64 Зәбур 110:1; Данийел 7:13. .

65Һьнге сәрәккʼаһин кʼьнщед хԝә ԛәлаштьн у гот: «Әва Хԝәде беһӧрмәт дькә! Иди шәʼдә чи мәрʼа нә? Ва ԝә бьһист Әԝи чаԝа Хԝәде беһӧрмәт кьр! 66Ԝәва чаԝа хӧйа дькә?» Ԝана жи ле вәгәрʼанд у готьн: «Ԝирʼа кӧштьн дькʼәвә».

67Ԝе гаве тʼуйи рʼуйе Ԝи кьрьн, бь кʼӧлма лехьстьн, һьнәка жи шәмаԛ ле дьдан 68у дьготьне: «Мәсиһ, пʼехәмбәртийе мәрʼа бькә, кʼа кʼи бу кӧ Тә хьст?»

Пәтрус Иса инкʼар дькә

(Марԛос 14:66-72; Луԛа 22:56-62; Йуһʼәнна 18:15-18, 25-27)

69Ԝи чахи Пәтрус дәрва ль һʼәԝшеда рʼуньштьбу. Щарик һатә щәм ԝи у готе: «Тӧ жи тʼәви Исайе Щәлиле буйи». 70Ле әԝи ль бәр һʼәмуйа инкʼар кьр у гот: «Әз ньзаньм тӧ чь дьбежи».

71Чахе әԝ чу бәр дәргәһ, йәкә дьн әԝ дит у готә әԝед кӧ ль ԝьр бун: «Әве һан жи тʼәви Исайе Ньсрәте бу». 72Әԝи диса бь сонд инкʼар кьр гот: «Әз ԝи мәрьви нас накьм». 73Хеләке шунда әԝед кӧ ль ԝьр бун чунә щәм Пәтрус у готьне: «Һәбә-тʼӧнәбә тӧ жи жь ԝан и, чьмки хәбәрдана тә тә дьфьрошә». 74Һьнге әԝи ньфьрʼ хԝә кьр, сонд хԝар у гот: «Әз ԝи мәрьви нас накьм».

Ԝе гаве дик банг да 75у Пәтрус әԝ готьна Иса ани бира хԝә кӧ ԝирʼа готьбу: «Бәри бангдана дик, те се щара Мьн инкʼар ки». Дәркʼәтә дәрва у кʼәлә-кʼәл гьрийа.

Currently Selected:

Мәтта 26: KmrNTC

Highlight

Copy