Мәтта 10

Навед һәр донздәһ шандийа

(Марԛос 3:13-19; Луԛа 6:12-16)

1Иса һәр донздәһ шагьрт гази щәм Хԝә кьрьн у һʼӧкӧм да ԝан кӧ рʼӧһʼед һʼәрам дәрхьн, һʼәму еш у нәхԝәшийа жи ԛәнщ кьн. 2Наве һәр донздәһ шандийа әв ьн: Йе пешьн Шьмһʼун, кӧ Пәтрус те готьне у бьре ԝи Әндраԝьс, Аԛубе Зәбәди у бьре ԝи Йуһʼәнна, 3Филипо у Бәртоломәйо, Тʼума у Мәттайе хәрщгьр, Аԛубе Һалфаԝо у Тәдайо#10:3 Нав һьнәк дәстньвисарада дәԝса «Тәдайо» «Леԝи» һәйә, йан жи «Леԝи кӧ Тәдайо һатә бәрнавкьрьне». 4Шьмһʼуне ԝәлатпʼарьст#10:4 Аһа жи те фәʼмкьрьне: «Шьмһʼуне жь Ԛанане». у Щьһудайе Исхәрйоти, әԝе кӧ нәмамийа Иса кьр.

Шандьна һәр донздәһа

(Марԛос 6:7-13; Луԛа 9:1-6)

5Иса әв һәр донздәһ шандьн, тʼәми ль ԝан кьр у гот: «Нәчьнә нава нәщьһуйа у нәкʼәвьнә бажаред Самәрйайе. 6Ле пешийе һәрʼьнә нав пәзед мала Исраелейә ӧндабуйи. 7Гава һун һәрʼьн, даннасин кьн у бежьн: ‹Пʼадшатийа Әʼзмана незик буйә›. 8Нәхԝәша ԛәнщ кьн, мьрийа сах кьн, кʼотийа паԛьж кьн, щьна дәрхьн. Ԝә беһәԛ стандийә, беһәԛ жи бьдьн. 9Ль бәр пьшта хԝәда тʼӧ тьшти һьлнәдьн: Нә зерʼ, нә зив, нә сьфьр, 10нә турьк бона рʼе, нә дӧ дәст кьрас, нә чарьх, нә шьвдар, чьмки пʼалә һежайи рʼьсԛе хԝә йә.

11Чь бажар йан гӧнде кӧ һун бькʼәвьне, маләкә һежа бьбиньн у ль ԝьр бьминьн, һʼәта кӧ һун жь ԝьр дьчьн. 12Гава һун һәрʼьнә мале, сьлаве бьдьнә ԝе у бежьн: ‹Әʼдьлайи ве малерʼа›. 13У һәгәр әԝ мал һежа йә, бьра сьлава ԝә ль сәр ԝе бә, ле һәгәр нә һежа йә, бьра сьлава ԝә ль ԝә вәгәрʼә. 14Ле кʼи кӧ ԝә ԛәбул нәкә у гӧһдарийа хәбәред ԝә нәкә, гава кӧ һун жь ԝе мале, йан жи жь ԝи бажари дәрдькʼәвьн, тʼоза ньгед хԝә даԝшиньн. 15Әз рʼаст ԝәрʼа дьбежьм, Рʼожа Ахрәте һʼале ԝәлате Содом у Гоморайе ԝе жь йа ԝи бажари четьр бә.

Мина пез ль нав гӧра

(Марԛос 13:9-13; Луԛа 21:12-17)

16Ва Әз ԝә дьшиньм чаԝа пәз нава гӧра. Иди мина мәʼра сәрԝахт бьн у мина кәвотка дьлсах. 17Ле һʼәвза хԝә жь мәрьва бькьн, әԝе ԝә бьбьнә бәр диԝана у кʼьништед хԝәда ԝә бьдьнә бәр ԛамчийа. 18Рʼуйе Мьнда ԝе ԝә бьбьнә бәр ԝәлийа у пʼадша, кӧ һун бәр ԝан у нәщьһуйа шәʼдәтийе бьдьн. 19Ле чахе ԝә бьбьнә бәр диԝана, хәм нәкьн кӧ һуне чаԝа йан чь хәбәр дьн. Тьштед кӧ һуне хәбәр дьн, ԝе дәме ԝәрʼа ԝе бе дайине. 20Чьмки нә кӧ һуне хәбәр дьн, ле Рʼӧһʼе Баве ԝәйи кӧ нава ԝәда йә ԝе хәбәр дә.

21Бьра ԝе бьре хԝә бьдә кӧштьне, баве жи кӧрʼе хԝә у зарʼ жи ԝе һьмбәри де у баве хԝә рʼабьн у ԝан бьдьнә кӧштьне. 22Бона наве Мьн һуне бәр чʼәʼве һʼәмуйа рʼәш бьн. Ле кʼи кӧ һʼәта хьлазийе тәйах кә әԝе хьлаз бә. 23У гава нав ви бажарида ԝә бьзериньн, бьрʼәвьнә бажарәки дьн. Әз рʼаст ԝәрʼа дьбежьм, һʼәта һатьна Кӧрʼе Мерьв, һун һʼәму бажаред Исраеле перʼа нагьһиньн бьгәрʼьн.

24Шагьрт жь дәрсдаре хԝә нә мәстьр ә у нә жи хӧлам жь ахайе хԝә. 25Бәси шагьрт ә, ԝәки мина дәрсдаре хԝә бә у хӧлам жи мина ахайе хԝә бә. Һәгәр малхе малерʼа ‹Бәлзәбул› готьн, һьнге нәфәред ԝирʼа ԝе чь бежьн?

Бьзаньбьн кӧ тьрса ԝә жь кʼе һәбә

(Луԛа 12:2-7)

26Аԝа иди тʼӧ щар жь мәрьва нәтьрсьн. Тьштәки дьзива тʼӧнә кӧ дәрнәйе у нә жи вәшарти кӧ кʼьфш нәбә. 27Чь кӧ Әз тәʼрийеда ԝәрʼа дьбежьм, әԝи нав рʼонайеда бежьн у чь кӧ һун гӧһада дьбьһен, сәр бана бькьнә дәнги. 28У жь ԝан нәтьрсьн йед кӧ бәдәне дькӧжьн, ле нькарьн рʼӧһʼ бькӧжьн. Ле һун жь Ԝи бьтьрсьн, Йе кӧ дькарә рʼӧһʼ у бәдәне щәʼньмеда ӧнда кә. 29Нә дӧ чʼьвик бь дьравәки чарԛӧрʼуше тенә фьротане? Ле йәк жи жь ԝан бейи әʼмьре Баве ԝә накʼәвә әʼрде. 30Ле чь ль ԝә дькʼәвә, һәр тʼеләки пʼорʼед сәре ԝә жьмарти нә. 31Иди нәтьрсьн. Һун жь гәләк чʼьвика ԛимәттьр ьн.

Иԛрар у инкʼаркьрьна Иса

(Луԛа 12:8-9)

32Кʼи кӧ Мьн бәр мәрьва иԛрар кә, Әзе жи ԝи бәр Баве Хԝәйи Әʼзмана иԛрар кьм. 33Ле кʼи кӧ Мьн бәр мәрьва инкʼар кә, Әзе жи ԝи бәр Баве Хԝәйи Әʼзмана инкʼар кьм.

Шур у әʼдьлайи

(Луԛа 12:51-53; 14:26-27)

34Нәфькьрьн кӧ Әз һатьмә дьне әʼдьлайийе биньм. Әз нәһатьм әʼдьлайийе биньм, ле шур. 35Чьмки Әз һатьм кӧрʼ жь баве, ԛизе жь де у буке жь хԝәсийе бьԛәтиньм 36у дьжмьнед мерьв ԝе жь мала ԝи бьн#10:35-36 Миха 7:6. .

37Әԝе кӧ баве хԝә йан дийа хԝә жь Мьн зәʼфтьр һʼьз дькә, нә һежайи Мьн ә. Әԝе кӧ кӧрʼе хԝә йан ԛиза хԝә жь Мьн зәʼфтьр һʼьз дькә, нә һежайи Мьн ә. 38Әԝе кӧ хаче хԝә һьлнадә пәй Мьн найе, әԝ нә һежайи Мьн ә. 39Кʼи әʼмьре хԝә бьгәрʼә, әԝе ӧнда кә, ле кʼи әʼмьре хԝә бона Мьн ӧнда кә, әԝе бьбинә.

Һәԛстандьн

(Марԛос 9:41)

40Әԝе кӧ ԝә ԛәбул дькә, Мьн ԛәбул дькә у әԝе кӧ Мьн ԛәбул дькә, Йе кӧ Әз шандьмә ԛәбул дькә. 41Әԝе кӧ пʼехәмбәр ԛәбул дькә чаԝа пʼехәмбәр, ԝе һәԛе пʼехәмбәр бьстинә у әԝе кӧ мәрьвәки рʼаст ԛәбул дькә чаԝа мәрьве рʼаст, ԝе һәԛе йед рʼаст бьстинә. 42У әԝе кӧ тʼасә ава сар жи дьдә йәки жь ван бьчʼука, бона хатьре ԝе йәке кӧ әԝ шагьрте Мьн ә, Әз рʼаст ԝәрʼа дьбежьм, әԝе тʼӧ щар һәԛе хԝә ӧнда нәкә».

Currently Selected:

Мәтта 10: KmrNTC

Highlight

Copy