Луԛа 8

Кʼӧлфәтед кӧ пәй Иса дьчун

1Пәй ве йәкерʼа Иса гӧнд у бажара дьгәрʼийа, даннасин дькьр, Мьзгинийа Пʼадшатийа Хԝәде дьда у һәр донздәһ шагьрт жи Перʼа бун, 2ӧса жи чәнд кʼӧлфәтед кӧ жь рʼӧһʼед хьраб у нәхԝәшийа ԛәнщ бьбун: Мәрйәма кӧ жерʼа Мәждәлани дьготьн, йа кӧ һʼәфт щьн же дәркʼәтьбун 3у Йоһана, жьна Хузайе ԝәкʼилхәрще мала Һеродәс, Сосьн у гәләкед майин, кӧ ԝана бь һәбука хԝәва ԝанрʼа бәрдәсти дькьрьн.

Мәсәла тʼохьмрʼәш

(Мәтта 13:1-9; Марԛос 4:1-9)

4У гава әʼлаләтәкә гьран жь гәләк бажара щәм Иса щьвийа, Әԝи мәсәләк гот: 5«Тʼохьмрʼәш рʼабу чу кӧ тʼохьм бьрʼәшинә. Гава дьрʼәшанд, һьнәк кʼәтьнә дәве рʼе һатьнә пʼепәскьрьне у тәйрәдед әʼзмен һатьн әԝ хԝарьн. 6У һьнәк жи кʼәтьнә щийе кәвьри, гава шин бун, жь дәст кемасийа шьлайе һʼьшк бун. 7У һьнәк жи кʼәтьнә нава стьрийа, стьри жи перʼа шин бун у әԝ хәньԛандьн. 8Һьнәкед дьн жи кʼәтьнә нава әʼрде ԛәнщ у шин бун, сәд щар бәр дан». Гава әв йәк гот, кьрә гази: «Гӧһе кʼейи бьһистьне һәйә бьра бьбьһе!»

Иса чьма бь мәсәла хәбәр дьдә

(Мәтта 13:10-17; Марԛос 4:10-12)

9Шагьртед Ԝи же пьрсин: «Мәʼна әве мәсәле чь йә?» 10Әԝи гот: «Ԝәрʼа һатийә дайине, кӧ һун сӧрʼед Пʼадшатийа Хԝәде бьзаньбьн, ле йед майинрʼа бь мәсәла те хәбәрдане кӧ: ‹Бьньһерʼьн у нәбиньн, бьбьһен у фәʼм нәкьн›#8:10 Ишайа 6:9. .

Шьровәкьрьна мәсәла тʼохьмрʼәш

(Мәтта 13:18-23; Марԛос 4:13-20)

11Әв ә мәʼна ве мәсәле: Тʼохьм хәбәра Хԝәде йә. 12Тʼохьмед кӧ кʼәтьнә дәве рʼе әԝ ьн, йед кӧ хәбәре дьбьһен, ле мирещьн те хәбәре жь дьле ԝан дәрдьхә, кӧ нәбә баԝәр бькьн у хьлаз бьн. 13Тʼохьмед кӧ кʼәтьнә щийе кәвьри әԝ ьн, йед кӧ гава хәбәре дьбьһен, бь әшԛ у ша ԛәбул дькьн. Ле чьмки рʼаԝед ԝан тʼӧнәнә, дәмәкә кьн баԝәр дькьн у ԝәхте щерʼьбандьне дькʼәвьн. 14Тʼохьмед кӧ кʼәтьнә нава стьрийа әԝ ьн, йед кӧ хәбәре дьбьһен, хәмед дьнева, дәԝләт у шабуна ви әʼмьрива мьжул дьбьн, дьхәньԛьн у бәред ԝан нагьһижьн. 15У тʼохьмед кʼәтьнә нав әʼрде ԛәнщ әԝ ьн, йед кӧ бь дьле сах у ԛәнщ хәбәре дьбьһен, дьле хԝәда хԝәй дькьн у бь сәбьр бәре хԝә дьдьн.

Чʼьра сәр пʼечʼьре

(Марԛос 4:21-25)

16Тʼӧ кәс чʼьра вехьсти накә бьн фьраԛе, нә жи дькә бьн щи-ньвине, ле датинә сәр пʼечʼьре, ԝәки әԝед кӧ дькʼәвьнә һьндӧрʼ, рʼонайе бьбиньн. 17Чьмки тьштәки вәшарти тʼӧнә кӧ дәрнәйе у нә жи тьштәки дьзива, кӧ хӧйа нәбә у нәйе бәр рʼонайе. 18Аԝа дина хԝә бьдьне кӧ һун чаԝа дьбьһен, чьмки кʼерʼа кӧ һәйә, ԝе һе ле зедә бә у кʼерʼа кӧ тʼӧнә, әԝе кӧ ԝи тʼьре һәйә жи, ԝе же бе стандьне».

Де у бьрайед Иса

(Мәтта 12:46-50; Марԛос 3:31-35)

19Һьнге де у бьрайед Ԝи һатьнә щәм Ԝи, ле жь дәст зәʼфбуна әʼлаләте нькарьбун незики Ԝи буна. 20Щаб данә Ԝи кӧ: «Дийа Тә у бьрайед Тә дәрва сәкьни нә у дьхԝазьн Тә бьбиньн». 21Әԝи жи ль ԝан вәгәрʼанд у гот: «Де у бьрайед Мьн әԝ ьн, йед кӧ хәбәра Хԝәде дьбьһен у дьԛәдиньн».

Иса фьртоне дьсәԛьрʼинә

(Мәтта 8:23-27; Марԛос 4:35-41)

22Рʼожәке Иса шагьртед Хԝәва кʼәтә ԛәйьке у готә ԝан: «Әм дәрбази ԝи бәри голе бьн». У рʼекʼәтьн. 23Гава ԛәйькеда дьчун, Әԝ хәԝрʼа чу. У фьртонәк ль голе рʼабу, ԛәйьк тʼьжи ав дьбу, әԝ ԛәзийеда бун. 24Һьнге шагьрт незики Ԝи бун, Әԝ һʼьшйар кьрьн у готьне: «Мамоста, Мамоста! Әм ӧнда дьбьн!» Әԝ рʼабу, ль байе у пелед аве һьлат, әԝ сәкьнин у сәԛьрʼин. 25Һьнге Әԝи ԝанрʼа гот: «Баԝәрийа ԝә кʼане йә?» У ԝана бь хоф, әʼщебмайи һәврʼа готьн: «Гәло әв кʼи йә, кӧ әʼмьри сәр бе у аве жи дькә у ельми Ԝи дьбьн?»

Иса йәки щьнакʼәти ԛәнщ дькә

(Мәтта 8:28-34; Марԛос 5:1-20)

26Әԝана бь ԛәйьке чунә тʼопрахед Гьрасине, пешбәри Щәлиле. 27Гава Әԝ дәркʼәтә бәже, жь ԝи бажари мәрьвәк дәркʼәтә пешийа Ԝи, кӧ щьн нав ԝида бун. Әԝи зува нә кʼьнщ ль хԝә дькьрьн у нә жи малда дьсәкьни, нава горʼьстанада дьма. 28Гава әԝи Иса дит, кьрә ԛирʼин кʼәтә бәр Ԝи у бь дәнгәки бьльнд гот: «Тӧ чь жь мьн дьхԝази Исайе Кӧрʼе Хԝәдейе Һәри Жорьн? Әз рʼәща жь Тә дькьм, мьн нәдә щәфе!» 29Чьмки Иса әʼмьри сәр рʼӧһʼе һʼәрам кьрьбу, кӧ жь ԝи мәрьви дәркʼәвә. Әԝ гәләк щара щьна дькʼәт, гава бь ԛәйд у зьнщира жи гьредьдан, әԝи диса ԛәйд дьԛәтандьн у щьна әԝ чола дьхьст. 30Һьнге Иса жь ԝи пьрси у готе: «Наве тә чь йә?» Әԝи гот: «Кʼомәскәр#8:30 Бь йунани хәбәр бь хәбәр аһа йә: «Легейон», аԝа готи «кʼомәкә щьнайә беһʼәсаб». », чьмки гәләк щьн кʼәтьбунә нава ԝи. 31У щьна лава Ԝи дькьр, кӧ әʼмьр нәкә әԝ һәрʼьнә гәлийе һәй-ԝайе. 32Ль ԝи щийи сурики бәразайи мәзьн һәбу, кӧ сәре чʼийе дьчʼерийа. Щьна рʼәща же дькьр, кӧ изьне бьдә ԝан, әԝ һәрʼьн бькʼәвьнә нава бәраза. Әԝи изьн да. 33У щьн жь нав ԝи мәрьви дәркʼәтьн, чун кʼәтьнә нава бәраза у әԝ сури жорда рʼәви, хԝә жь кәнделда авитьнә голе хәньԛин. 34Гава бәразвана әв йәк дит, рʼәвин чунә бажар у гӧнда, әв йәк гьли кьрьн. 35Мәрьв рʼабун чун, кӧ тьште буйи бьбиньн. Гава һатьнә щәм Иса, дина хԝә дане, ԝе әԝ мәрьве кӧ щьн же дәркʼәтьбун, кʼьнще ԝи ле, сәр һʼьше хԝәда һати, ль бәр ньгед Иса рʼуньшти йә. Һьнге әԝ тьрсийан. 36Әԝед кӧ әв йәк дитьбун, йед майинрʼа готьн, кӧ чаԝа әԝи щьнакʼәти ԛәнщ бу. 37Һьнге һʼәму бьнәлийед дор-бәред Гьрасине һиви жь Иса кьрьн, кӧ жь ԝан дур кʼәвә, чьмки саԝәкә мәзьн әԝ гьртьбун. Әԝ жи кʼәтә ԛәйьке у пашда вәгәрʼийа. 38Ле әԝ мәрьве кӧ щьн же дәркʼәтьбун лава Ԝи кьр, кӧ әԝ жи тʼәви Ԝи һәрʼә. Ле Иса әԝ вәрʼекьр у гот: 39«Вәгәрʼә мала хԝә у чь кӧ Хԝәде бона тә кьр гьли кә». У әԝ чу, чь кӧ Иса бона ԝи кьрьбу тʼәмамийа бажерда дьгот у дькьрә дәнги.

Ԛиза мьри у кʼӧлфәта нәхԝәш

(Мәтта 9:18-26; Марԛос 5:21-43)

40У чахе Иса вәгәрʼийа, әʼлаләте Әԝ ԛәбул кьр, чьмки һʼәму жи һивийа Ԝи бун. 41Һьнге мәрьвәки наве ԝи Йайиро, сәрԝере кʼьниште, һат хԝә авитә ньгед Иса у һиви же кьр, кӧ һәрʼә мала ԝи. 42Чьмки тʼәне ԛизәкә ԝийә донздәһ сали һәбу у әԝ жи бәр мьрьне бу. Гава Иса дьчу, әʼлаләте зәʼмәт дьда Ԝи. 43Ԝьр кʼӧлфәтәк жи һәбу, кӧ донздәһ сале ԝе бун#8:43 Анәгори Ԛануна Муса кʼӧлфәта сәр хуне вәбуйи һʼәрʼьми дьһатә һʼәсабе. Һәр кәсе кӧ ԝе дькʼәт дьһʼәрʼьми (нәпаԛьж дьһатә һʼәсабе). Изьна ԝе тʼӧнәбу кӧ незики тьштәки пироз буйә. Бьхуньн: Ԛануна Кʼаһинтийе 15:19-31. , сәр хуне вәбьбу. Әԝе һʼәму һәбука хԝә дабу һʼәкима, ле тʼӧ кәси чʼарә ле нәкьрьбу. 44Әва пьштева һат ль рʼишийед кʼьнще Ԝи кʼәт у дәстхԝәда хун же чʼькийа. 45Иса гот: «Әԝ кʼи бу кӧ ль Мьн кʼәт?» Гава һʼәмуйа инкʼар кьр, Пәтрус#8:45 Нав һьнәк дәстньвисарада аһа йә: «У йед перʼа». гот: «Мамоста, әʼлаләт Тә дәʼф дьдә, тәнгасийе дьдә Тә#8:45 Нав һьнәк дәстньвисарада әв жи һәйә: «У Тӧ дьбежи, кʼи бу, ль Мьн кʼәт?» ». 46Ле Иса гот: «Йәк ль Мьн кʼәт, чьмки Әз пе һʼәсийам кӧ жь Мьн ԛәԝат дәркʼәт». 47У гава кʼӧлфәте дит кӧ нәһатә вәшартьне, ләрьзи, һат хԝә авитә бәр Ԝи у ль бәр тʼәмамийа щьмәʼте Ԝирʼа гот, кӧ бона чь ль Ԝи кʼәт у чаԝа перʼа-перʼа ԛәнщ бу. 48Әԝи ԝерʼа гот: «Әʼвде!#8:48 Нав һьнәк дәстньвисарада әв жи һәйә: «Сәрхԝә бә!» Баԝәрийа тә тӧ ԛәнщ кьри. Бь хер у сьламәт һәрʼә». 49Әԝи һе хәбәр дьда, жь мала сәрԝере кʼьниште йәки һат у гот: «Ԛиза тә мьр, иди зәʼмәте нәдә дәрсдар». 50Гава Иса әв йәк бьһист, ԝирʼа гот: «Нәтьрсә, тʼәне баԝәр бькә у ԝе ԛәнщ бә». 51Гава Әԝ чу мал, нәһьшт кәсәк һәрʼә һьндӧрʼ, пештьри Пәтрус, Йуһʼәнна, Аԛуб у де у баве ԛизьке. 52Һʼәму дьгьрийан у шина ԝе дькьрьн, ле Иса гот: «Нәгьрин. Әԝ нәмьрийә, ле һеньжийә». 53Ԝана ԛәрфе хԝә Пе дькьр, чьмки заньбун кӧ әԝа мьрийә. 54#8:54 Нав һьнәк дәстньвисарада әв жи һәйә: «Иса һʼәму дәрхьстьнә дәрва…» У Иса дәсте ԝе гьрт, дәнг да ԝе у гот: «Ԛизьк, рʼабә!» 55У рʼӧһʼе ԝе ле вәгәрʼийа, перʼа-перʼа рʼабу сәр хԝә. Иса әʼмьр кьр, кӧ хӧрәк бьдьнә ԝе. 56Де у баве ԝе зәндәгьрти ман. Ле Әԝи тʼәми ль ԝан кьр, кӧ ве йәке кәсирʼа нәбежьн.

Currently Selected:

Луԛа 8: KmrNTC

Highlight

Copy