Луԛа 20

Пьрса дәрһәԛа һʼӧкӧме Исада

(Мәтта 21:23-27; Марԛос 11:27-33)

1У рʼожәкә жь ԝан рʼожада, гава Әԝи пʼарьстгәһеда хәлԛ һин дькьр у Мьзгини дьда, сәрәкед кʼаһина у ԛанунзан тʼәви рʼуспийа һатьнә щәм Ԝи 2у готьн: «Бежә мә, Тӧ бь чь һʼӧкӧми ван кьра дьки? Кʼе әв һʼӧкӧм дайә Тә?» 3Әԝи ль ԝан вәгәрʼанд у гот: «Әз жи тьштәки жь ԝә бьпьрсьм у һун Мьнрʼа бежьн: 4Һʼӧкӧме ньхӧмандьна Йуһʼәнна жь әʼзмен бу йан жь мәрьва?» 5Әԝана нав һәвда шеԝьрин у готьн: «Һәгәр әм бежьн: ‹Жь әʼзмен бу›, Әԝе бежә: ‹Ле ԝә чьма әԝ баԝәр нәкьр?› 6Ле һәгәр әм бежьн: ‹Жь мәрьва бу›, тʼәмамийа щьмәʼте ԝе мә бьдә бәр кәвьра, чьмки әԝ әʼсәйи баԝәр дькьн, кӧ Йуһʼәнна пʼехәмбәр бу». 7Ԝана щаба Ԝи да у готьн: «Әм ньзаньн жь кʼӧ бу». 8Иса ԝанрʼа гот: «Әз жи ԝәрʼа набежьм, кӧ бь чь һʼӧкӧми ван кьра дькьм».

Мәсәла рʼәзе тьрийа у рʼәзвана

(Мәтта 21:33-46; Марԛос 12:1-12)

9У Иса дәстпекьр әв мәсәлә щьмәʼтерʼа гот: «Мәрьвәки рʼәзе тьрийа дани у әԝ бь кʼьре да рʼәзвана, ԝәхтәки дьреж чу ԝәлатәки дьн. 10У ԝәхтда хӧламәк шандә щәм рʼәзвана, ԝәки жь ԝи рʼәзи бәре пʼара ԝи ԝирʼа бьшиньн, ле рʼәзвана хӧламе ԝи кʼӧта у дәствала вәрʼекьрьн. 11Ахе хӧламәки дьн жи шанд, ԝана әԝ жи кʼӧта, әԝ рʼобәт кьрьн у дәствала вәрʼекьрьн. 12Йе сьсийа жи шанд, вана әва жи бьриндар кьр у жь рʼәз дәрхьстьн. 13Хԝәйе рʼәз гот: ‹Әз чь бькьм? Кӧрʼе хԝәйи дәлал бьшиньм, һьлбәт ԝе жь ԝи шәрм бькьн›. 14Ле гава рʼәзван чʼәʼв ԝи кʼәтьн, ль һәв шеԝьрин у готьн: ‹Әв ԝаре ԝи йә! Ԝәрьн әм ԝи бькӧжьн, кӧ миратʼа ԝи мәрʼа бьминә›. 15У әԝ жь рʼәз дәрхьстьнә дәр у кӧштьн. Аԝа хԝәйе рʼәз ԝе чь бинә сәре ԝан? 16Нә әԝе бе ԛьрʼа ԝан рʼәзвана бинә у рʼәз бьдә һьнәкед дьн». Гава әв йәк бьһистьн, готьн: «Хԝәде нәкә». 17У Иса ль ԝан ньһерʼи у гот: «Ле әԝ чь йә, кӧ ньвисар ә?

‹Әԝ кәвьре кӧ һоста тʼәхсир кьр,

әԝ бу сәре әʼнишке›#20:17 Зәбур 118:22. .

18Һәр кәсе кӧ бькʼәвә сәр ԝи кәвьри, ԝе һурдәхԝәши бә у әԝ кәвьр бькʼәвә сәр кʼе, ԝе ԝи бьһʼьнщьрʼинә». 19Сәрәкед кʼаһина у ԛанунзана ԝе дәме кьрьн кӧ Ԝи бьгьрьн, чьмки фәʼм кьрьн, кӧ Әԝи әв мәсәлә ани сәр ԝан, ле жь щьмәʼте тьрсийан.

Пьрса хәрщдайин у нәдайине

(Мәтта 22:15-22; Марԛос 12:13-17)

20У чʼәʼвед ԝан ль Иса бун, чәнд мәрьвед щәʼсус шандьн, кӧ бь дӧрʼути хԝә дәԝса рʼаста данибун, ԝәки Ԝи бь хәбәра бьгьрьн у бьдьнә дәсте һʼӧкӧмәте у диԝана ԝәли. 21Ԝана жь Ԝи пьрси у готьне: «Дәрсдар, әм заньн кӧ Тӧ рʼаст хәбәр дьди у һин дьки, нав мәрьвада фьрԛийе жи данайни, ле рʼийа Хԝәде рʼаст һин дьки. 22Гәло рʼаст ә кӧ әм хәрщ бьдьнә Ԛәйсәр йан на?» 23Әԝи кӧ фелбазийа ԝан заньбу ԝанарʼа гот#20:23 Нав һьнәк дәстньвисарада әв жи һәйә: «Һун чьма Мьн дьщерʼьбиньн?» : 24«Зивәки нишани Мьн кьн. Әв наве ньвисар у сьфәт йе кʼе йә сәр?» 25Ԝана гот: «Йед Ԛәйсәр ьн». Әԝи ԝанрʼа гот: «Ԝәки ӧса йә, чь кӧ йед Ԛәйсәр ьн, бьдьнә Ԛәйсәр у чь йед Хԝәде нә бьдьнә Хԝәде». 26У нькарьбун бәр щьмәʼте нава хәбәра Ԝида Әԝ бьгьртана, сәр щабдайина Ԝи зәндәгьрти дәнге хԝә бьрʼин.

Пьрса рʼабуна мьрийа

(Мәтта 22:23-33; Марԛос 12:18-27)

27Садуԛи, кӧ дьбежьн рʼабуна мьрийа тʼӧнә, һьнәкә жь ԝан һатьнә щәм Ԝи жь Ԝи пьрсин у готьн: 28«Дәрсдар, Муса мәрʼа ньвисийә: ‹Һәгәр бьре йәки бьзәԝьщә у безӧрʼәт бьмьрә, бьра бьре ԝи жьна ԝи бьстинә у ԝаре бьре хԝә шин кә›#20:28 Ԛануна Дӧщари 25:5. . 29Аԝа һʼәфт бьра һәбун. Бьре мәзьн жьнәк станд, безӧрʼәт мьр. 30Пәйрʼа йе дӧда 31у паше йе сьсийа әԝ жьн станд, һәйнәсәр ԝан һәр һʼәфта жи әԝ жьн станд у зарʼ пәй ԝан нәкʼәтьн, мьрьн. 32Пәй гьшкарʼа әԝ кʼӧлфәта жи мьр. 33Дә ижар ԝе Рʼожа Рʼабуна мьрийа әԝ кʼӧлфәте бьбә жьна кʼижани? Чьмки һәр һʼәфта жи әԝ стандьбу». 34Иса ль ԝан вәгәрʼанд у гот: «Мәрьве ве дьне дьзәԝьщьн у мер дькьн. 35Ле әԝед кӧ һежайи ԝе дьне бьн у бьгьһижьнә рʼабуна мьрийа, нә ԝе бьзәԝьщьн у нә жи мер кьн. 36Әԝе иди нькарьбьн бьмьрьн, әԝ ԝәкә мьлйакʼәта нә. Әԝ зарʼед Хԝәде нә, чьмки пʼара рʼабуна мьрийа нә. 37Ле бона рʼабуна мьрийа, Муса жи дайә кʼьфше. Әԝ сәрһатийа дара дьрʼийеда бона Хӧдан дьбежә: ‹Хԝәдейе Бьраһим, Хԝәдейе Исһаԛ, Хԝәдейе Аԛуб›#20:37 Дәркʼәтьн 3:6. . 38Аԝа Хԝәде нә Хԝәдейе мьрийа йә, ле йе зендийа йә, чьмки бона Ԝи һʼәму жи сах ьн». 39Жь ԛанунзана һьнәка ле вәгәрʼанд у готьне: «Дәрсдар, Тә ԛәнщ гот». 40У иди кәсәки нәԝерьбу кӧ тьштәки жи жь Ԝи бьпьрсә.

Мәсиһ кӧрʼе кʼе йә?

(Мәтта 22:41-46; Марԛос 12:35-37)

41У Иса ԝанарʼа гот: «Чаԝа дьбежьн кӧ Мәсиһ кӧрʼе Даԝьд ә? 42Даԝьд хԝәха кʼьтеба Зәбурада дьбежә:

‹Хӧдан готә Хӧдане мьн:

Ль мьле Мьни рʼасте рʼуне,

43һʼәта кӧ дьжмьнед Тә бькьмә бьне пʼийед Тә›#20:43 Зәбур 110:1. .

44Аԝа һәгәр Даԝьд Ԝи ‹Хӧдан› һʼәсаб дькә, иди Әԝ чаԝа дьбә кӧрʼе Даԝьд?»

Һʼәвза хԝә жь ԛанунзана бькьн

(Мәтта 23:1-36; Марԛос 12:38-40; Луԛа 11:37-54)

45Һе тʼәмамийа щьмәʼте гӧһдари дькьр, Әԝи шагьртед Хԝәрʼа гот: 46«Һʼәвза хԝә жь ԝан ԛанунзана бькьн, йед кӧ һʼьз дькьн бь чӧхед дьреж бьгәрʼьн, базарада сьлаве бьдьнә ԝан, кʼьништада кʼӧрсийед пешьн бьгьрьн у шайийада жи һәрәма жорьн рʼунен. 47Әвана аликива малед жьнәбийа һʼуфи хԝә дькьн, алийе дьнва жи бона хԝәкʼьфшкьрьне дӧайе хԝә дьреж дькьн. Диԝана ԝане һе гьран бә».

Currently Selected:

Луԛа 20: KmrNTC

Highlight

Copy