Луԛа 14

Иса ль мала ферьсида нәхԝәшәки ԛәнщ дькә

1Рʼожәкә шәмийе Иса бона нанхԝарьне чу мала сәрԝерәки ферьсийа. Ԝана чʼәʼве хԝә жь сәр Ԝи нәдьбьрʼи. 2Ль ԝьр пешбәри Ԝи мәрьвәки бь нәхԝәшийа авзе һәбу. 3Иса жь ԛанунзан у ферьсийа пьрси у гот: «Рʼожа шәмийе ԛәнщкьрьн щайиз ә йан на?» 4Ԝана дәнге хԝә нәкьр. Һьнге Әԝи нәхԝәш гьрт, ԛәнщ кьр у вәрʼекьр. 5Паше Әԝи ԝанрʼа гот: «Жь ԝә кʼижан ә, һәгәр кӧрʼе#14:5 Нав һьнәк дәстньвисарада дәԝса «кӧрʼ» «кʼәр» һәйә. ԝи йан гайе ԝи бькʼәвә бире, рʼожа шәмийе перʼа-перʼа дәст нәвеже дәрнәхә?» 6Нькарьбун щаба ве пьрса Ԝи бьдана.

Һинкьрьна дәрһәԛа йед кӧ ль наве хԝә дьгәрʼьн

7У гава Әԝи дит, ԝәки мәрьвед тʼәглифкьри чаԝа хԝә щийе жорьн дьгьртьн, мәсәләк ԝанрʼа гот: 8«Гава йәк тә гази дәʼԝате дькә, щийе жорьн рʼунәни, нәбә кӧ йәки жь тә ԛәдьртьр жи алийе ԝида тʼәглифкьри бә, 9у хԝәйе дәʼԝате, аԝа готи тʼәглифкьрийе ԝә һәр дӧйа, бе тәрʼа бежә: ‹Кʼәрәма хԝә щи бьдә фьлан кәсе›. Һьнге те жь шәрма хԝә рʼаби щийе жерьн рʼунейи. 10Ле чахе тә тʼәглиф дькьн, һәрʼә щийе жерьн рʼуне, кӧ чахе хԝәйе дәʼԝате бе тәрʼа бежә: ‹Пьсмам, кʼәрәм кә, дәрбази жоре бә!› Һьнге ԛәдьре тәйе бәр чʼәʼве һʼәму рʼуньштийа бьльнд бә. 11Аԝа һәр кәсе кӧ хԝә бьльнд кә, ԝе ньмьз бә у кʼи кӧ хԝә ньмьз кә, ԝе бьльнд бә».

12У Иса тʼәглифкьрийе Хԝәрʼа гот: «Чахе тӧ фьравине йан шиве датини, гази һәвал-һогьр, бьра-пьсмам йан жи дәр-щинаред хԝәйә дәԝләти нәкә, нәбә әԝ жи тә тʼәглиф кьн у ԛәнщийа тә ль тә вәгәрʼиньн. 13Ле гава тӧ хԝарьнәке датини, гази фәԛир, сәԛәт, йед дькӧльн у кора кә. 14Һьнге те хԝәзьли би, чьмки әԝана нькарьн ԛәнщийа тә ль тә вәгәрʼиньн, ле бәле Рʼожа Рʼабуна рʼастайә жь мьрьне ԝе ль тә бе вәгәрʼандьне».

Мәсәла шайийа гьран

(Мәтта 22:1-10)

15Гава жь һазьра йәки әв йәк бьһист, Ԝирʼа гот: «Хԝәзи ль ԝи, кӧ Пʼадшатийа Хԝәдеда нен бьхԝә». 16Ле Иса ԝирʼа гот: «Мәрьвәки шайикә гьран һазьр кьр у гәләк мәри тʼәглиф кьрьн. 17Гава ԝәхте шайийе перʼа гьһишт, әԝи хӧламе хԝә шанд, кӧ һʼәму тʼәглифкьрийарʼа бежә: ‹Һәр тьшт иди һазьр ә, кʼәрәм кьн ԝәрьн›. 18Ле һәр йәки дәстпекьр мәʼни гьрт. Йе пешьн ԝирʼа гот: ‹Мьн хԝәрʼа әʼрд кʼьрʼийә, әз әʼсәйи гәрәке һәрʼьм бьбиньм. Әз һиви жь тә дькьм, мьн бьбахшинә›. 19У йе дьн гот: ‹Мьн пенщ щот га кʼьрʼинә, әз дьчьм кӧ ԝан бьщерʼьбиньм. Әз һиви жь тә дькьм, мьн бьбахшинә›. 20Йе сьсийа жи гот: ‹Әз зәԝьщимә, ләма нькарьм бем›. 21У әԝ хӧлам вәгәрʼийа һат, әв һʼәму ахайе хԝәрʼа гьли кьрьн. Һьнге аха һерс кʼәт, хӧламе хԝәрʼа гот: ‹Зу һәрʼә мәйдан у кʼучед бажер, фәԛира, ԛопа, сәԛәта у кора тʼоп кә бинә вьр›. 22Пәйрʼа хӧлем готе: ‹Ахайе мьн, тә чаԝа әʼмьр кьр, мьн ӧса жи кьр, ле диса щи һәйә›. 23У ахе хӧлемрʼа гот: ‹Дәркʼәвә сәре рʼе у дьрба, зоре ль һәр кәси бькә бинә вьр, кӧ мала мьн тʼьжи бә. 24Әз ԝәрʼа дьбежьм, кӧ жь ԝан мәрьвед тʼәглифкьри тʼӧ кәс жь шайийа мьн ԝе тьштәки тәʼм нәкә›».

Чаԝа бьбьнә шагьрте Иса

(Мәтта 10:37-38)

25Пәй ве йәкерʼа әʼлаләтәкә гьран тʼәви Иса дьчу у Әԝ сәр ԝанда вәгәрʼийа у гот: 26«Һәгәр йәк пәй Мьн бе у Мьн жь де у баве хԝә, жь жьн у зарʼед хԝә, жь хушк у бьрайед хԝә у ӧса жи жь хԝә зәʼфтьр һʼьз нәкә, нькарә бьбә шагьрте Мьн. 27У кʼи кӧ хаче хԝә һьлнәдә пәй Мьн нәйе, әԝ нькарә бьбә шагьрте Мьн. 28Жь ԝә кʼижан ә, кӧ бьхԝазә бьльндщикә нобәдара чекә, пешийе рʼунәни нәдә бәр һʼәсеб, гәло ԛәԝата ԝийе бьгьһиже бинә сери йан на? 29Нәбә кӧ һʼиме ԝе дайнә у нькарьбә бинә сери, йед кӧ бьбиньн ле бькʼәньн 30у бежьн: ‹Әви мәрьви дәстпекьр чекә у нькарьбу банийа сери›. 31Йан жи кʼижан пʼадша пʼадшакирʼа дәре шерʼ, пешийе рʼунәни нәшеԝьрә, гәло ԝе бькарьбә бь дәһә һʼәзара бәр йәки кӧ бь бист һʼәзари те сәр ԝи бькә шәрʼ? 32Һәгәр әԝ пе нькарә, гава һе дур ә ԝе ԛасьде хԝә бьшинә, бона льһәвһатьне һиви же бькә. 33Аԝа жь ԝә һәр кәс, кʼи кӧ дәсте хԝә жь тʼәмамийа һәбуна хԝә нәкʼьшинә, әԝ нькарә бьбә шагьрте Мьн.

Хԝейа бе тәʼм

(Мәтта 5:13; Марԛос 9:50)

34Хԝе тьштәки ԛәнщ ә. Ле һәгәр әԝ тәʼма хԝә ӧнда кә, паше әԝе бь чь тәʼме бьстинә? 35Нә ԝе дәԝса хԝәлийе бьгьрә у нә жи дәԝса пʼәйн. Ԝе бавежьнә ԝеда. Гӧһе кʼейи бьһистьне һәйә бьра бьбьһе».

Currently Selected:

Луԛа 14: KmrNTC

Highlight

Copy