Йуһʼәнна 2

Дәʼԝата ль гӧнде Ԛанайа Щәлиле

1Дӧ рʼожа шунда бажаре Ԛанайа Щәлиледа дәʼԝатәк һәбу. Дийа Иса жи ль ԝе дәре бу, 2Иса у шагьртед Ԝи жи бона дәʼԝате һатьбунә тʼәглифкьрьне. 3Гава кемаси кʼәтә шәраве, дийа Иса жерʼа гот: «Шәрава ԝан нәма». 4Иса ле вәгәрʼанд у готе: «Әʼвде, чи тә Мьн кʼәтийә? Һе нә ԝәхте Мьн ә». 5Дийа Ԝи бәрдәстийарʼа гот: «Чь кӧ ԝәрʼа бежә, бькьн». 6У шәш кʼупед кәвьри һәбун, кӧ ль гора әʼдәтед щьһуйа бона шуштьн-вәшуштьна ԝана ль ԝьр данибун. Жь ԝана һәр йәки жь һʼәйште һʼәта сәд бист литьр ав һьлдьда. 7Иса ԝанрʼа гот: «Ван кʼупа тʼьжи ав кьн». У ԝана жи леварʼа дагьрт. 8Паше ԝанарʼа гот: «Ньһа һьнәки дагьрьн, бьбьн бьдьнә сәрдәʼԝати». Әԝана жи әԝ бьр. 9Гава сәрдәʼԝати жь ԝе ава кӧ бьбу шәрав тәʼм кьр, ԝи те дәрнәхьст кӧ әԝ жь кʼӧ һат, ле бәрдәстийед кӧ ав кʼьшандьбун заньбун. Сәрдәʼԝати гази зәʼве кьр 10у жерʼа гот: «Һәр кәс пешийе шәрава хԝәйә рʼьнд датинә сәр тʼәхтә у паше гава вәхԝари нә, әԝ йа нәрʼьнд дәрдьхә. Ле тә шәрава рʼьнд һʼәта ньһа хԝәй кьрийә».

11Әва нишана Исайә пешьн бу, кӧ Ԝи Ԛанайа Щәлиледа кьр. Бь ви аԝайи Әԝи рʼумәта Хԝә да хӧйакьрьне у шагьртед Ԝи баԝәрийа хԝә Ԝи анин.

12Пәй ве йәкерʼа, Иса тʼәви дийа Хԝә, бьред Хԝә у шагьртед Хԝә чу Кәфәрнаһуме, ле гәләк рʼожа Әԝ ль ԝе дәре нәман.

Иса пʼарьстгәһе паԛьж дькә

(Мәтта 21:12-13; Марԛос 11:15-17; Луԛа 19:45-46)

13Щәжьна щьһуйайә Дәрбазбуне незик бу, Иса һәвраз чу Оршәлиме. 14Пʼарьстгәһеда Әԝи йед кӧ дәԝар, пәз у кәвотк дьфьротьн, ӧса жи йед пʼәрәгӧһерʼ рʼуньшти дитьн. 15Дә ижар Ԝи жь бәна ԛамчик чекьр, һʼәму жь пʼарьстгәһе пәз у дәԝаред ԝанва дәрхьстьн, пʼәред пʼәрәгӧһерʼа рʼетьн у тʼәхтед ԝан ԝәлгәрʼандьн. 16Кәвоткфьрошарʼа гот: «Вана жь ве дәре һьлдьн! Иди мала Баве Мьн нәкьнә базаргәһ!» 17Һатә бира шагьртед Ԝи кӧ аһа һатийә ньвисаре: «Хирәта һьндава мала Тәда агьр Мьн дьхә»#2:17 Зәбур 69:9. . 18Һьнге щьһуйа же пьрси: «Те чь нишане нишани мә ки, кӧ һʼӧкӧме Тә һәйә ван тьшта бьки?» 19Иса ль ԝан вәгәрʼанд у гот: «Ве пʼарьстгәһе һьлшиньн, Әзе нава се рʼожада рʼакьм». 20Һьнге щьһуйа жерʼа гот: «Нава чьл шәш салада әва пʼарьстгәһа һатийә чекьрьне. Чаԝа Те ԝе нава се рʼожада рʼаки?» 21Ле Иса дәрһәԛа пʼарьстгәһа бәдәна Хԝәда хәбәр дьда. 22Пәйрʼа гава Әԝ жь мьрьне рʼабу, шагьрта әԝ готьна Ԝи ани бира хԝә у ԝана әԝ ньвисар у готьна Иса баԝәр кьрьн.

Дьле һәр мәрьви Исава әʼйан ә

23Аԝа гава кӧ Иса Щәжьна Дәрбазбунеда ль Оршәлиме бу, гәләка әԝ нишанед кӧ Ԝи дькьрьн дитьн, баԝәрийа хԝә наве Ԝи анин. 24Ле Иса баԝәрийа Хԝә ль ԝан нәдани, чьмки дьле һʼәму мәрьва Ԝива әʼйан бу. 25Нә һʼәԝщә бу, кӧ йәки һьндава мәрьвәкида шәʼдәти бьда, чьмки Ԝи дьле мәрьва заньбу.

Currently Selected:

Йуһʼәнна 2: KmrNTC

Highlight

Copy