Кʼаред Шандийа 7

Щабдайина Стәйфан ль бәр щьвина гьрәгьра

1Һьнге сәрәккʼаһин Стәйфанрʼа гот: «Әв йәк рʼаст ьн?» 2Әԝи гот: «Гәли бав у бьра, бьбьһен! Гава баве мә Бьраһим һе Мәсопотамйайеда дьма, кӧ һе нәчубу бажаре Һʼаране, Хԝәдейе рʼумәте ԝива хӧйа бу 3у жерʼа гот: ‹Жь ԝәлат у пьсмамед хԝә бьԛәтә у һәрʼә ԝи ԝәлате кӧ әзе нишани тә кьм›#7:3 Дәстпебун 12:1. . 4Һьнге Бьраһим жь ԝәлате кʼьлданийа дәркʼәт ль Һʼаране ма. Пәй мьрьна баве ԝирʼа Хԝәде әԝ ԝаргӧһастә ви ԝәлате кӧ һун ньһа теда дьминьн. 5Ль ве дәре ԝаргәһ нәда ԝи, нә жи дәԝса ньгәки, ле соз да кӧ ви ԝәлати чаԝа мьлкʼ бьдә ԝи у пәй ԝирʼа жи бьдә зӧрʼәта ԝи, гава кӧ һе зарʼед ԝи тʼӧнәбун#7:5 Дәстпебун 17:8; 48:8. . 6Хԝәде ԝирʼа аһа гот: ‹Зӧрʼәта тәйе ԝәлате хәлԛеда хәрибийеда бә, ԝе ԝан бькьнә хӧлам у чарсьд сали бьдьнә щәфе. 7Ле диԝана ԝи мьләте кӧ ԝе жерʼа бьбьнә хӧлам› Хԝәде гот, ‹Әзе бькьм, пәй ԝе йәкерʼа әԝе дәрен, ль ви щийи Мьн бьһʼәбиньн›#7:7 Дәстпебун 15:13-14; Дәркʼәтьн 3:12. . 8Паше сьнәт чаԝа нишана пәймане да Бьраһим. Аԝа гава Исһаԛ жерʼа бу, рʼожа һʼәйшта әԝ сьнәт кьр у Исһаԛ жи Аԛуб ӧса кьр, Аԛуб жи һәр донздәһ кӧрʼед хԝәйә бавәʼширед мә ӧса кьрьн#7:8 Дәстпебун 17:10-14. .

9Бавәʼшира жи жь һʼәвсудийе Усьв чаԝа хӧлам фьротьн, кӧ ԝи бьбьнә Мьсьре, ле Хԝәде тʼәви ԝи бу#7:9 Дәстпебун 37:11-28; 39:2, 21. , 10әԝ жь һʼәму тәнгасийед ԝи хьлаз кьр. Гава әԝ бәр Фьрәԝьне пʼадше Мьсьре сәкьни, Хԝәде кʼәрәм у сәрԝахти дайе, пʼадше жи Усьв сәр Мьсьре у тʼәмамийа мала хԝә кьрә сәрԝер#7:10 Дәстпебун 37:1-36; 39:1–41:46. . 11Һьнге тʼәмамийа ԝәлате Мьсьре у Кәнанеда бу хәлайи у кʼәтьнә охьрме гьран, кал-бавед мә нькарьбун хӧрәк дәстхьстана#7:11-15 Дәстпебун 41:53–47:31; 49:33. . 12Аԛуб кӧ бьһист ль Мьсьре гәньм дәст дькʼәвә, щара пешьн кал-бавед мә шандьн. 13Щара дӧда Усьв хԝә бьрайед хԝәва да наскьрьне у әʼсьле ԝи Фьрәԝьнва әʼйан бу. 14Һьнге Усьв шанд гази баве хԝә Аԛуб у тʼәмамийа мала ԝи кьр, кӧ сәрһәв һʼәфте пенщ нәфс бун. 15Аԛуб бәржери Мьсьре бу, әԝ у кал-бавед мә ԝьр мьрьн. 16Щьнйазед ԝан бьрьнә Шәхәме кьрьнә ԝи мәзәле кӧ Бьраһим бь ԛимәтәки зива жь кӧрʼед Һаморе Шәхәме кʼьрʼибу#7:16 Йешу 24:32. .

17Гава әԝ ԝәхте кӧ Хԝәде бь сонд Бьраһимрʼа соз дабу незик дьбу, щьмәʼт Мьсьреда гәләки зедә бьбу. 18Ԝи чахи пʼадшаки дьн Мьсьреда рʼабу, кӧ дәрһәԛа Усьвда тьштәк ньзаньбу#7:18 Дәркʼәтьн 1:7-8. . 19Әԝи һʼьләкʼари ль мьләте мә кьр у кал-бавед мә данә щәфе, пʼейи сәр ԝан кьр, кӧ әԝ зарʼокед хԝә бавежьнә дәрва, кӧ нәжин#7:19 Дәркʼәтьн 1:10-11, 22. . 20Ԝи чахи Муса жь дийа хԝә бу, әԝ йәки гәләки бәдәԝ бу у се мәһа мала баве хԝәда мәзьн бу#7:20-22 Дәркʼәтьн 2:1-10. . 21Гава әԝ һатә авитьне, ԛиза Фьрәԝьн әԝ һьлда бьр, чаԝа кӧрʼ хԝәрʼа мәзьн кьр. 22Муса тʼәмамийа сәрԝахтийа мьсьрийа һин бу, хәбәрдан у шьхӧле хԝәда жи зор бу.

23Гава чьл салийа ԝи тʼәмам бу, дьле ԝирʼа дәрбаз бу кӧ сәрики бьдә хушк-бьрайед хԝә зарʼед Исраел. 24Әԝи йәки исраели дит кӧ йәки мьсьри нәһәԛи ле дькьр, чу пьшта ԝи, һʼәйф һьлда йе мьсьри кӧшт. 25Муса тʼьре хушк-бьрайед ԝийе фәʼм бькьн, кӧ Хԝәде ԝе бь дәсте ԝи хьлазбуне бьдә ԝан, ле фәʼм нәкьрьн. 26Рʼожа дьне рʼасти дӧ исраелийа һат кӧ шәрʼ дькьрьн, хԝәст кӧ ԝан ль һәв бинә у гот: ‹Әʼвдно! Һун бьра нә, чьма нәһәԛийе ль һәвдӧ дькьн?› 27Ле әԝе кӧ нәһәԛи ль һәвале хԝә дькьр, әԝ дәʼф да у готе: ‹Кʼе тӧ сәр мә сәрԝер у һʼакьм кʼьфш кьри? 28Йан тӧ дьхԝази мьн жи мина ԝи мьсьрийе дӧһӧ бькӧжи?›#7:28 Дәркʼәтьн 2:14. 29Гава Муса әв йәк бьһист, рʼәви ԝәлате Мьдйане хәрибийеда ма у ль ԝьр дӧ кӧрʼ жерʼа бун#7:29 Дәркʼәтьн 2:11-22; 18:3-4. .

30Пәй чьл салирʼа бәрʼийеда ль чʼийайе Синайе мьлйакʼәтәк нава алава агьре дьрʼийеда ԝива хӧйа бу#7:30-34 Дәркʼәтьн 3:1-10. . 31Муса кӧ дит, ль сәр ԝе йәке әʼщебмайи ма. Гава незик дьбуйе кӧ бьбинә, дәнге Хӧдан бьһист: 32‹Әз Хԝәдейе кал-бавед тә, Хԝәдейе Бьраһим, Исһаԛ у Аԛуб ьм›. Муса дьләрьзи у нәԝерьбу бьньһерʼийа. 33Һьнге Хӧдан готе: ‹Чарьхед ньгед хԝә бехә, чьмки әԝ щийе кӧ тӧ ле сәкьни йи әʼрде пироз ә. 34Бәле Мьн щәфе щьмәʼта Хԝә Мьсьреда дит у заринийа ԝан бьһист, пәйа бум кӧ ԝан хьлаз кьм. Дә ньһа ԝәрә Әз тә бьшиньмә Мьсьре›.

35Әԝ Мусайе кӧ тʼәхсир кьрьн у готьне: ‹Кʼе тӧ сәр мә сәрԝер у һʼакьм кʼьфш кьри?› Хԝәде бь дәсте ԝи мьлйакʼәте кӧ нав дьрʼийеда ԝива хӧйа бу, әԝ чаԝа сәрԝер у хьлазкьр шанд#7:35 Дәркʼәтьн 2:14; 3:2. . 36Әԝи әԝ жь Мьсьре дәрхьстьн, Мьсьре, бәʼра Сор у бәрʼийеда чьл сали нишан у кʼәрәмәт кьрьн#7:36 Дәркʼәтьн 7:3; 14:21; Жьмар 14:33. . 37Муса һәма әԝ бу, йе кӧ зарʼед Исраелрʼа гот: ‹Хԝәде ԝе жь нав бьрайед ԝәда пʼехәмбәрәки мина мьн бона ԝә рʼакә›#7:37 Ԛануна Дӧщари 18:15. . 38Муса әԝ бу, йе кӧ бәрʼийеда нава щьмәʼте бу, ль сәре чʼийайе Синайе жи тʼәви ԝи мьлйакʼәти бу, кʼижани тʼәви ԝи кал-бавед мәрʼа хәбәр дьда. Әва әԝ бу, йе кӧ әԝ хәбәред жийине һьлдьдан кӧ бьдә мә#7:38 Дәркʼәтьн 19:1–20:17; Ԛануна Дӧщари 5. .

39Ле кал-бавед мә нәхԝәстьн гӧрʼа ԝи бькьн, әԝ тʼәхсир кьрьн, дьлед хԝәда вәгәрʼийанә Мьсьре 40у Һарунрʼа готьн: ‹Мәрʼа хԝәдейа чекә, кӧ пешийа мә кʼәвьн, чьмки әԝ Мусайе кӧ әм жь ԝәлате Мьсьре дәрхьстьн, әм ньзаньн чь һатә сәре ԝи›#7:40 Дәркʼәтьн 32:1. . 41Һәма ԝан рʼожада пʼутәки мина голька чекьрьн, ԛӧрбан ԝи пʼутирʼа дан у бона шьхӧле дәсте хԝә кʼеф кьрьн#7:41 Дәркʼәтьн 32:2-6. . 42Һьнге Хԝәде бәре Хԝә жь ԝан гӧһаст у һьшт кӧ әԝ стәйркед әʼзмен бьһʼәбиньн, чаԝа кʼьтеба пʼехәмбәрада ньвисар ә:

‹Гәло чьл сали ԛӧрбан у һʼәди ԝә бәрʼийеда Мьнрʼа дан, Мала Исраел?

43На, ле ԝә коне Молох хԝәде у стәйрка Рʼәмфан хԝәдейе хԝә һьлдьдан,

әв сурәт ьн, йед кӧ ԝә чекьрьн,

ԝәки һун ԝан бьһʼәбиньн.

Бона ве йәке Әзе ԝә бьгӧһезьмә ԝи алийе ԝәлате Бабилоне›#7:43 Амос 5:25-27. .

44Коне Шәʼдәтийе бәрʼийеда тʼәви кал-бавед мә бу. Әԝ ӧса һатә чекьрьне, чаԝа Әԝе кӧ Мусарʼа хәбәр да, әʼмьр кьр кӧ мина ԝи шькьле кӧ дитьбу чекә#7:44 Дәркʼәтьн 25:8-9, 40. . 45Паше кал-бавед мә жи әԝ коне кӧ жь пешийа ԝанрʼа мабу, һьлдан анинә ви ԝәлати, ԝи ԝәхте кӧ ԝан тʼәви Йешу жь ԝан мьләта зәфт кьрьбун у Хԝәде жь бәр кал-бавед мәва бәри ԝан мьләта дабу. Әԝ кон ль ԝьр ма һʼәта ԝәхте Даԝьд#7:45 Йешу 3:14-17. . 46Даԝьд жи кʼәрәм жь Хԝәде станд, хԝәст кӧ ханәке бона Хԝәдейе Аԛуб чекә#7:46 Пʼадшати II, 7:1-16; Дирок I, 17:1-14. . 47Ле Сьлеман бона Ԝи ханәк чекьр#7:47 Пʼадшати III, 6; Дирок II, 3:1-17. . 48Ле бәле Йе Һәри Жорьн малед бь дәста чекьрида наминә, чаԝа пʼехәмбәр дьбежә:

49‹Әʼзман кʼӧрсийа Мьн ә,

әʼрд жи бьне пʼийед Мьн ә.

Һуне чь мале Мьнрʼа чекьн? Хӧдан дьбежә.

Йан жи чь щийи бона рʼьһʼәтийа Мьн?

50Нә дәстед Мьн әв һәр тьшт чекьрьнә?#7:50 Ишайа 66:1-2. ›

51Сәрһʼьшкно! Кʼафьр у гӧһада кәрʼно!#7:51 Бь йунани хәбәр бь хәбәр аһа йә: «Дьл у гӧһада бе сьнәтно». Һун тʼьме мьԛабьли Рʼӧһʼе Пироз дьсәкьньн, кал-бавед ԝә чаԝа бунә, һун жи ӧса нә#7:51 Ишайа 63:10. . 52Кал-бавед ԝә жь пʼехәмбәра кʼижан нәзерандьн? Әԝед кӧ һе бәреда бона һатьна Йе Рʼаст дьготьн, дькӧштьн. У ва ньһа жи ԝә нәмамийа Ԝи кьр у кӧшт. 53Ԝәрʼа Ԛанун бь дәсте мьлйакʼәта һатә дайине, ле ԝә хԝәй нәкьр!»

Кӧштьна Стәйфан

54Гава әв тьшт дьбьһистьн, һәԝа ԝан дькʼәт у дьранед хԝә сәр ԝи дьчʼьрʼькандьн. 55Ле Стәйфан бь Рʼӧһʼе Пироз тʼьжи бәре хԝә әʼзменда кьр, рʼумәта Хԝәде у Иса ль мьле Хԝәдейи рʼасте сәкьни дит 56у гот: «Ва йә әз әʼзмана вәбуйи дьбиньм у Кӧрʼе Мерьв ль мьле Хԝәдейи рʼасте сәкьни!» 57Ԝи чахи ԝана кьрә ԛирʼин у гӧһед хԝә гьртьн, һʼәму һәврʼа рʼаһьштьнә ԝи, 58әԝ жь бажер дәрхьстьн, данә бәр кәвьра. Шәʼда жи кʼьнщед хԝә данинә бәр ньгед хортәки наве ԝи Шаԝул. 59Гава кәвьр давитьне, Стәйфан дӧа кьр у гот: «Хӧдан Иса, рʼӧһʼе мьн бьстинә». 60Һьнге ԝи чок да, бь дәнге бьльнд кьрә гази: «Хӧдан, ве йәке ванарʼа гӧнә һʼәсаб нәкә». Аһа кӧ гот, һеньжи#7:60 Бь заравәки дьн: «Кʼәтә хәԝе». Аһа те фәʼмкьрьне: «Рʼӧһʼе хԝә да, мьр». .

Currently Selected:

Кʼаред Шандийа 7: KmrNTC

Highlight

Copy