Кʼаред Шандийа 24

Щьһу шькийате Паԝлос дькьн

1Пенщ рʼожа шунда Һананийайе сәрәккʼаһин тʼәви һьнәкә жь рʼуспийа у Тәртулойе занәбеж бәржер бу һатә Ԛәйсәрийе. Вана бона Паԝлос гьли-газьне хԝә ԝәлирʼа кьрьн. 2-3Гава гази Паԝлос кьрьн, Тәртуло дәст бь шькийата кьр у гот: «Әм тʼьме у һәр дәра ԝан кьрьнед тә дьшекьриньн, Фәликсе хԝәйиԛәдьр, кӧ сайа сәре тә әви мьләте мә гәләк әʼдьлайи дитийә у гәләки пешда чуйә. 4Ле ԝәки гәләки сәре тә нәешиньм, һиви дькьм жь кʼәрәма хԝә кьн гӧһдарийа мә бькә. 5Мә әв мәрьва дит, чаԝа мина бәлаке кʼәтийә нава һʼәму щьһуйед сәр дьне тʼәвиһәв дькә у рʼебәре кʼомәла ньсрәтийа йә. 6Әви кьр кӧ пʼарьстгәһе жи бьһʼәрʼьминә, ле мә әԝ гьрт#24:6 Нав һьнәк дәстньвисарада әв жи һәйә: «Мә дьхԝәст кӧ әм диԝана ԝи анәгори ԛануна хԝә бькьн, (рʼеза 7) ле Лусйойе сәрһʼәзар сәр мәда гьрт, бь зоре жь дәсте мә станд у әʼмьр кьр, кӧ шькийаткьре ԝи бенә щәм тә». . 8Һәгәр тӧ жь ԝи бьпьрси, те хԝәха бькарьби жь ԝи һәр тьшти бьзаньби кʼа бона чь әм шькийате ԝи дькьн». 9Щьһуйа жи готьна ԝи әʼсәйи кьрьн, готьн: «Бәле, әв йәк ӧса йә».

Паԝлос щаба хԝә ль бәр Фәликсе ԝәли дьдә

10Гава ԝәли пе сәрийа кьр кӧ әԝ хәбәр дә, Паԝлос ле вәгәрʼанд у готе: «Әз заньм кӧ гәләк сал ьн тӧ һʼакьме ви мьләти йи, әзе жи бь рʼәзәдьли бона хԝә щаба хԝә бьдьм. 11Чаԝа кӧ тӧ дькари бьзаньби, әва донздәһ рʼож тʼӧнә, кӧ әз бона һʼәбандьне һәвраз чубумә Оршәлиме. 12Әвана әз нәдитьмә кӧ пʼарьстгәһеда тʼәви йәки текʼәвьмә дәʼԝе, йан жи кʼьништада ӧса жи щики дьн бажерда әʼлаләте дора хԝә тʼоп кьм. 13У нә жи ньһа дькарьн готьнед хԝә избат кьн, кӧ бона чь шькийате мьн дькьн. 14Ле әзе ашкәрә тәрʼа бежьм, ԝәки ль гора ԝе Рʼийа кӧ әԝана жерʼа кʼомәла шьһʼьти дьбежьн, әз һәма ӧса Хԝәдейе кал-бавед хԝә дьһʼәбиньм. У чь кӧ Ԛанун у ньвисаред пʼехәмбәрада жи ньвисар ә, баԝәр дькьм. 15Әз Хԝәдеда жи гӧман ьм, чаԝа кӧ әԝ жи ԝе гӧмане нә, кӧ һʼәму һәԛ у нәһәԛе жь мьрьне рʼабьн. 16Бона ве йәке чьԛас жь мьн те, әз дьщәʼдиньм һʼәму ԝәхти бь исафа рʼьһʼәт ль бәр Хԝәде у мәрьва бьм.

17Аԝа пәй гәләк саларʼа әз вәгәрʼийам һатьмә Оршәлиме, кӧ кʼомәке бьдьмә мьләте хԝә у һʼәдийа бьдьм. 18Һьнге ԝи шьхӧлида әз пʼарьстгәһеда паԛьжбуйи дитьм ль гора әʼдәте мә. Әз нә тʼәви әʼлаләте бум, нә жи шәрʼуда. 19Ле жь ԝан чәнд щьһуйед ԛәза Асйайе ль ԝьр бун. Һәгәр һьндава мьнда тьштәки ԝани готьне һәбуйа, әԝ гәрәке бьһатана бәр тә бьсәкьнийана шькийате мьн бькьрана. 20Йан жи бьра әвана бежьн, гава әз бәр щьвина гьрәгьра сәкьни бум, чь хьраби сәр мьн дитьн, 21пештьри ве йәке, кӧ мьн бь дәнге бьльнд нава ԝанда готийә: ‹Бона баԝәрийа рʼабуна мьрийа һун иро диԝана мьн дькьн›»#24:21 Кʼаред Шандийа 23:6. .

22Фәликсва әԝ Рʼе кӧ рʼьнд әʼйан бу, һьнге әԝи шьхӧле ԝан пашда авит у гот: «Кʼәнге Лусйойе сәрһʼәзар бәржер бе, әзе һьнге бона шьхӧле ԝә ԛьрара хԝә бьдьм». 23Әԝи әʼмьри сәрсәд кьр, кӧ Паԝлос пʼьрʼи-һьндьки аза хԝәй кьн у изьна һәвал-һогьред ԝи жи бьдьн, йе кӧ ԝе кʼомәкдарийа ԝи бькьн.

Паԝлос гьрти дьминә

24Чәнд рʼожа шунда Фәликс тʼәви Дьрусила кʼӧлфәта хԝәйә щьһу һат, гази Паԝлос кьр у бона ԝе баԝәрийа сәр Мәсиһ Иса жь ԝи бьһист. 25Паԝлос һе бона рʼастийе, хԝәгьртьне у диԝана Хԝәдейә кӧ ԝе бе хәбәр дьда, Фәликс саԝ кʼьшанд у гот: «Тӧ ньһа һәрʼә. Гава ԝәхте мьн һәбә, әзе гази тә кьм». 26Ӧса жи әԝ ԝе гӧмане бу, кӧ жь Паԝлос пʼәрә бьстанда, бона ԝе йәке жи гәләк щара гази ԝи дькьр у тʼәви ԝи хәбәр дьда.

27Гава дӧ сал дәрбаз бун, дәԝса Фәликс Поркийо Фесто бу ԝәли. Фәликс жи кӧ дьхԝәст ԛәнщи щьһуйарʼа бькьра, Паԝлос гьрти һьшт.

Currently Selected:

Кʼаред Шандийа 24: KmrNTC

Highlight

Copy