Кʼаред Шандийа 18

Паԝлос бажаре Корьнтʼеда

1Жь ԝьр шунда Паԝлос жь Атʼине рʼекʼәт һатә Корьнтʼе. 2Ль ԝьр йәки щьһу наве ԝи Акила дит, буйина хԝәда жь Понтосе. Әва тʼәви кʼӧлфәта хԝә Прьскилайе ну жь Италйайе һатьбу, чьмки Ԛәйсәр Клаԝдйо әʼмьр кьрьбу, кӧ һʼәму щьһу жь Рʼоме дәркʼәвьн. Паԝлос чу щәм ԝан, 3щәм ԝан ма у тʼәви ԝан хәбьти, чьмки пʼеше ԝан йәк бу, кон чедькьрьн. 4Әԝ һʼәму рʼожед шәмийа кʼьништада щьһу у йунанарʼа дькʼәтә хәбәрдане, әԝ дьданә баԝәркьрьне.

5Гава Силас у Тимотʼейо жь Мәкәдонйайе һатьн, Паԝлос бь хирәт тʼәмамийа ԝәхте хԝә да һинкьрьна Хәбәре#18:5 Нав һьнәк дәстньвисарада дәԝса «Хәбәр» «Рʼӧһʼва» һәйә, кӧ һьн аһа фәʼм дькьн: «Бь алава Рʼӧһʼва гьредайи». у щьһуйарʼа шәʼдәти дьда кӧ Мәсиһ, Иса йә. 6Гава әԝ мьԛабьли ԝи рʼабун у әԝ беһӧрмәт кьрьн, әԝи кʼьнще хԝә даԝшанд у готә ԝан: «Хуна ԝә сәре ԝә бә, әз бесущ ьм. Жь вьр шунда әзе һәрʼьмә щәм нәщьһуйа». 7Әԝ һьнге жь ԝьр чу кʼәтә мала йәки наве ԝи Тито Йусто. Әԝ мәрьвәки нәщьһу бу, ле хԝәдебаԝәр бу, мала ԝи кʼеләка кʼьниште бу. 8Кьриспойе сәрԝере кʼьниште жи нәфәред хԝәва баԝәрийа хԝә Хӧдан ани у жь корьнтʼийа гәләка кӧ бьһистьн, баԝәр кьрьн у пе аве һатьнә ньхӧмандьне.

9Шәвәке Хӧдан дитьнокеда һатә бәр чʼәʼве Паԝлос у готе: «Нәтьрсә, хәбәр дә у хԝә кәрʼ нәкә. 10Чьмки Әз тʼәви тә мә у кәсәке бәр тә рʼанәбә зийане нәдә тә, чьмки гәләк щьмәʼта Мьн ви бажарида һәйә». 11Әԝ ль ԝе дәре саләке у шәш мәһа ма, әԝ һини хәбәра Хԝәде дькьрьн.

12Һена ԝәлийе Галийойе Ахайайеда щьһу бунә йәк, һʼьщуми сәр Паԝлос кьрьн у бьрьнә бәр диԝане 13готьн: «Әва щьмәʼте һин дькә, кӧ нә ль гора ԛануне Хԝәде бьһʼәбиньн». 14Гава Паԝлос ԝе дәстпекьра хәбәр да, Галийо щьһуйарʼа гот: «Һәгәр гьли бона нәһәԛийе у хьрабийе буйа, щьһуно, дьбу кӧ мьн гӧһдарийа ԝә бькьра, 15ле һәгәр пьрс сәр хәбәра, нава у ԛануна ԝә йә, һун хԝәха бьньһерʼьн. Әз нахԝазьм бьбьмә һʼакьме ван тьшта». 16У әԝ жь диԝанхане дәрхьстьн. 17Һьнге һʼәмуйа Состенисе сәрԝере кʼьниште гьртьн, ль бәр диԝанхане кʼӧтан, ле ԛәт хәма Галийо жи нибу.

Паԝлос вәдьгәрʼә Әнтакйайе

18Паԝлос гәләк рʼожа диса ль ԝьр ма, паше хатьре хԝә жь баԝәрмәнда хԝәст, бь гәмийе чу алийе Сурйайе. Прьскила у Акила жи тʼәви ԝи бун. Әԝи Кәнхерйайеда пʼорʼе хԝә кӧрʼ кьрьбу, чьмки ад-ԛьраркьри#18:18 Ԝе ад-ԛьрарерʼа «нәзир» дьбежьн. Дәрһәԛа ԛәйдә-ԛанунед нәзирда Жьмар 6:1-21-да бьхуньн. бу. 19Әԝ гьһиштьнә Әфәсе, Прьскила у Акила ль ԝьр һьштьн, хԝәха кʼәтә кʼьниште щьһуйарʼа кʼәтә хәбәрдане. 20Ԝана һиви жь ԝи кьр, кӧ һьнәки дьреж ль ԝьр бьминә, әԝ ԛайл нәбу. 21Ле гава хатьре хԝә жь ԝан хԝәст, гот: «Әзе диса сәр ԝәда бем, һәгәр Хԝәде һʼьз бькә»#18:21 Нав һьнәк дәстньвисарада аһа йә: «Әз гәрәке әʼсә әве щәжьна кӧ те Оршәлимеда дәрбаз кьм. Ле әзе диса сәр ԝәда бем, һәгәр Хԝәде һʼьз бькә». . Бь гәмийе жь Әфәсе чу. 22Гава гьһиштә Ԛәйсәрийе, һәвраз чу Оршәлиме сьлав да щьвине, паше бәржер чу Әнтакйайе. 23Гава һьнәк ԝәхт ль ԝьр ма, рʼабу бәрева кʼәтә ԝәлате Галатйа у Фьригйа, һʼәму шагьрт баԝәрийеда дьшьдандьн.

Аполо бажаре Әфәседа Мьзгинийе дьдә

24Щьһуки наве ԝи Аполо, буйина хԝәда жь Скәндәрйайе, һатә Әфәсе. Әва готьнбежәки сәрхԝә у ньвисаред пирозда занәки зор бу. 25Әԝ Рʼийа Хӧданда һинбуйи бу, агьре хирәте сери кʼәтьбу#18:25 Аһа жи те фәʼмкьрьне: «Бь алава Рʼӧһʼе Хԝәде». бона Иса рʼаст хәбәр дьда у һин дькьр, ле тʼәне ньхӧмандьна Йуһʼәнна заньбу. 26Әви дәстпекьр кʼьништеда меркʼими хәбәр да. Ле гава Прьскилайе у Акила хәбәрдана ԝи бьһистьн, әԝ бьрьнә щәм хԝә, һе рʼаст Рʼийа Хԝәде ԝирʼа шьровәкьрьн. 27Аполо кӧ хԝәст һәрʼә Ахайайе, бьра дьл данә бәр у шагьртарʼа жи нәʼмәк ньвисин кӧ ԝи ԛәбул кьн. Гава гьһиштә ԝьр, әԝ гәләки кери ԝан һат, йед кӧ бь кʼәрәма Хԝәде бьбунә баԝәрмәнд. 28Чьмки бь щьмәʼти хәбәрданеда йа ԝи ль сәр йа щьһуйа дькʼәт, бь ньвисаред пироз дьда избаткьрьне, кӧ Мәсиһ, Иса йә.

Рʼеԝитийа Паԝлосә сьсийа (18:23; 19:1–21:16)

Currently Selected:

Кʼаред Шандийа 18: KmrNTC

Highlight

Copy