Mark 12
12
Fena baacılar
1İisus başladı onnara sölemää örneklärlän: «Bir adam koydu bir baa, dolayladı aullan, kazdı er üzüm täskası için, yıvdı bir bekçi külesi, sora, baayı verip baacılara, gitti başka memleketä.
2Üzüm vakıdında yolladı bir çırak baacılara, alsın kendi payını baa berekedindän.
3Ama baacılar tuttular onu, düüdülär da yolladılar geeri boş ellän.
4Sora yolladı başka bir çırak, onun yaraladılar kafasını hem aşaaladılar.
5Yolladı taa başkasını. Baacılar onu öldürdülär. Yolladı taa çoyunu, kimisini düüdülär, başkalarını öldürdülär.
6Onun yanında kaldı sade bir oolu, angısını sevärdi. Bitkidä yolladı onu baacılara, deyip: „Beki oolumu kabledirlär ikramnan“.
7Ama baacılar dedilär biri-birinä: „Tä çorbacının oolu, haydi öldürelim onu, da baa bizä kalacek“.
8Tuttular onu, öldürdülär da attılar baadan dışarı.
9Şindi ne yapacek baa çorbacısı? Gelecek da telef edecek bu baacıları, ama baayı verecek başkasına.
10Ne, okumadınız mı bunu Ayoz Yazılarda: „Taş, ani ustalar sıbıttı, sonda etişti köşä taşı olsun.
11Bu – Saabidän, hem pek şaşmaklı iş bizim için!“»
12Onnar bakardılar tutsunnar İisusu, ama korkardılar insandan. Zerä annadılar, ani İisus onnar için söledi bu örnää. Sora braktılar Onu da gittilär.
Hak Allaha hem Kesara
13Sora yolladılar İisusa kimisini fariseylerdän hem İrodun adamnarından, ki baksınnar Onu bir laflan tutmaa.
14Gelip, onnar sordular İisusa: «Üüredici, biz bileriz, ani Sän dooru adamsın, kimseyä pay tutmêêrsın, zerä adamın üzünä bakmêêrsın, Allahın yolunu hakına üüredersin. Düşer mi ödemää harç Kesara osa düşmeer mi? Harç ödeyelim mi osa ödämeyelim mi?»
15İisus tanıdı onnarın ikiüzlülüklerini da dedi onnara: «Neçin Beni deneersiniz? Getirin bir dinar, ki göreyim onu».
16Onnar getirdilär. İisus sordu onnara: «Kimin resimi hem adı yazılı burada?» Onnar cuvap ettilär: «Kesarın».
17Ozaman İisus dedi: «Verin Kesara ne Kesarın, ama Allaha ne Allahın». Bu cuvabına çok şaştılar.
Dirilmäk için soruş
18Sora geldilär Ona sadukeylär, angıları deerlär, ani yok dirilmäk, da sordular:
19«Üüredici, Moisey yazılarında dedi bizä: „Eer birkimsey, kimin yok uşaa, ölärseydi, da karısı saa kalarsaydı, onun kardaşı lääzım evlensin bu karıya da kaldırsın uşak ölmüş kardaşına tamızlık için“.
20Vardı edi kardaş. İlkinkisi evlendi, taa uşaa yokkan, öldü.
21İkincisi evlendi ona, o da uşaksız öldü. Hep ölä üçüncüsü yaptı.
22Edisi dä uşaksız öldülär. Hepsindän sora öldü karı da.
23Dirilmäk vakıdında, açan dirileceklär, angısının karısı o olacek? Zerä hepsi edi kardaş ona evliydi».
24İisus cuvap etti onnara: «Yanılêrsınız, zerä bilmeersiniz ne Ayoz Yazıları, ne dä Allahın kuvedini.
25Ölülär dirildiynän evlenmeyeceklär, ama olaceklar, nicä angillär göklerdä.
26Ölülerin dirilmesi için okumadınız mı Moiseyin kiyadında, neredä laf gider yanar gümä için, ne dedi Allah ona: „Bän Avraamın Allahı, İsaakın Allahı hem İakovun Allahıyım“.
27Allah – diil ölülerin Allahı, ama dirilerin. Ölä ki siz sarp yanılêrsınız».
En büük sımarlamak
28Bilgiçlerdän birisi, işidip onnarın dartışmaklarını da görüp, ani İisus islää cuvap etti, yaklaştı Ona da sordu: «Angı sımarlamak en büük?»
29İisus cuvap etti: «İlk sımarlamak var bu: „Seslä, İzrail, Saabi Allah – bizim bir Saabimiz!
30Seväsin Saabi Allahını bütün üräännän, bütün canınnan, bütün aklınnan hem bütün kuvedinnän“. Tä budur ilk sımarlamak!
31İkincisi bu: „Seväsin yakın olanını, nicä kendini“. Bunnardan taa büük sımarlamak yok».
32Bilgiç dedi Ona: «İslää, Üüredici, dooru söledin, ani var bir Allah, hem yok başka allah, Ondan kaarä.
33Onu sevmää bütün üreklän, bütün fikirlän, bütün canınnan, bütün kuvedinnän, hem yakın olanını sevmää, nicä kendini, bu – taa paalı, nekadar hepsi heptän yakılan hayvannar hem kurbannar».
34İisus, görüp, ani o aarifçesinä cuvap etti, ona dedi: «Diilsin sän uzak Allahın Padişahlıından». Bundan sora kimsey başka kıyışmadı sorsun Ona bişey.
Hristos – kimin oolu?
35Uzaldıp üüretmesini Ayoz bina içindä, İisus dedi: «Neçin bilgiçlär deerlär, ani Hristos – Davidin oolu?
36Kendi David, Ayoz Duhtan kullanılmış, deer: „Saabi dedi benim Çorbacıma: Otur saa tarafımda, Bän koyunca Senin duşmannarını ayaklarının altına“.
37Kendi David adlêêr Onu „Çorbacı“, ozaman nasıl O olabilir Davidin oolu?» Çok insan seslärdi İisusu mayıllıklan.
38Üürederäk onnarı, O dedi: «Korunun bilgiçlerdän, angılar severlär gezmää uzun rubaylan hem beenerlär, insan selämnesin onnarı meydannarda.
39Severlär oturmaa ilk skemnelerä sinagogalarda hem ön erlerä konak sofralarında.
40Onnar kemirerlär dulların evlerini, ama göstermäk için uzun dualar yapêrlar. Onnarın cezası çok aar olacek».
Dulun baaşışı
41İisus, Ayoz bina haznası karşısında oturup, bakardı, nicä insan para haznaya koyardı. Çoyu zenginnerdän çok koyardılar.
42Geldi bir dul karı da iki lepton#12:42 Lepton – en ufak para. koydu, ani yapêr bir kodrant.
43İisus topladı üürenicilerini da onnara dedi: «Dooru söleerim sizä, bu dul karı hepsindän taa çok koydu haznaya.
44Hepsi koydu kendi zeedeliklerindän, ama bu karı kendi yokluundan verdi hepsini, ne vardı yaşaması için».
Currently Selected:
Mark 12: GagNTL
Highlight
Share
Copy
Want to have your highlights saved across all your devices? Sign up or sign in
© Bіblіyayı çevіrän İnstіtut, Moskva, 2006
