Mark 10
10
Düşer mi, karı-koca ayırılsınnar?
1İisus gitti oradan da geldi İudeya erlerinä, İordanın öbür tarafına. İnsan genä toplandı Onun dolayına. O alışmasına görä başladı enidän üüretmää onnarı.
2Geldilär fariseylär da, deneyip Onu, sordular: «Düşer mi, adam ayırılsın kendi karısından?»
3İisus sordu onnara: «Ne sizä Moisey sımarladı?»
4Onnar dedilär: «Moisey braktı, koca yazsın ayırılmak kiyadı da ayırılsın karısından».
5İisus cuvap etti onnara: «Sizin inatlıınız beterinä Moisey yazılarında verdi sizä bu sımarlamayı.
6Ama dünneyin kurulmasından „Allah yarattı insannarı, olsunnar adam hem karı.
7Onuştan brakacek adam bobasını hem anasını
8da birleşecek karısınnan. İkisi bir güüdä olacek“. Butakım olaceklar diil iki, ama bir güüdä.
9Ölä ki, ne Allah birleştirdi, insan onu ayırmasın».
10İçerdä üürenicilär enidän sordular Ona hep bunun için.
11O dedi onnara: «Kim ayırılêr karısından da evlener başkasına, orospuluk yapêr.
12Hem her karı, ani brakêr kocasını da evlener başka adama, orospuluk yapêr».
İisus iisözleer uşakları
13Getirärdilär İisusa uşakları, ki diisin onnara, ama üürenicilär azarladılar onnarı.
14İisus, görüp bunu, üfkelendi da dedi üürenicilerinä: «Brakın uşakları, gelsinnär Bana, da durgutmayın onnarı, zerä Allahın Padişahlıı onnarın gibileri için.
15Dooru söleerim sizä: kim kabletmeyecek Allahın Padişahlıını bir uşak gibi, o orayı hiç girämeyecek».
16Sora kucakladı uşakları, koydu ellerini onnarın üstünä da iisözledi.
Zenginnik hem diveç yaşamak
17Açan İisus yollandı yola gitmää, hızlı geldi bir adam, diz çöktü Onun önündä da sordu: «İi Üüredici, ne yapayım, ki diveç yaşamak edeneyim?»
18«Neçin deersin Bana „ii“? Kimsey diil ii, salt bir Allah, – cuvap etti İisus. –
19Bilersin sımarlamakları: „Orospuluk yapmayasın, öldürmeyäsin, çalmayasın, yalancı şaat olmayasın, aldatmayasın, bobanı-ananı ikramnayasın“».
20O cuvap etti: «Üüredici, hepsi bunnarı tamannadım taa gençliimdän».
21İisus baktı uz onun gözlerinä, sevdi onu da dedi: «Sana etişmeer salt bir iş. Git da sat, neyin var, payet fukaaralara, da olacek haznan göktä. Sora gel, /al stavrozunu/ da izlä Beni».
22O, işidip bu lafları, gücenik gitti, zerä çok zenginnii vardı.
23İisus baktı dolaya da dedi üürenicilerinä: «Nekadar zor Allahın Padişahlıına girsin onnar, kimin var zenginnii!»
24Üürenicilär şaş-beş kaldılar Onun sözlerindän. İisus enidän lafetti da dedi: «Uşaklar, nekadar zor Allahın Padişahlıına girsin /onnar, kim umudunu koyêr zenginnää/!
25Taa ilin bir devä iinenin kulaandan geçsin, nekadar bir zengin adam Allahın Padişahlıına girsin».
26Üürenicilär pek çok şaştılar da biri-birinä dedilär: «Ozaman kim kurtulabilir?»
27İisus baktı uz onnarın gözlerinä da dedi: «Bu insana olmaz, ama diil Allaha, zerä Allaha hepsi olur».
28Petri lafetmää başladı da Ona dedi: «Tä, biz braktık hepsini da geldik Senin ardına».
29İisus cuvap etti: «Dooru söleerim sizä: hepsi, kim braktı evini, kardaşlarını, kızkardaşlarını, anasını, bobasını, /karısını,/ uşaklarını eki merasını Benim için hem İi Haber için,
30o kabledecek şindi, bu ömürdä, üz katına taa çok ev, kardaş, kızkardaş, ana, uşak, tarla, koolamaklarlan bilä, ama gelän ömürdä kabledecek diveç yaşamak.
31Ama çoyu ilk olannardan bitki olacek, çoyu da bitkilerdän ilk olacek».
İisus üçüncü sıra haberleer ölümünü hem dirilmesini
32Açan onnar yolda İerusalimä dooru gidärdilär, İisus onnarın önü sora gidärdi. Üürenicilär titsinärdilär, Onun ardına gidennär korkardılar. İisus, enidän alıp bir tarafa oniki üürenicisini, başladı onnara sölemää, ne olacek Onunnan:
33«Tä, biz gideriz İerusalimä. Adam Oolu verilecek büük popazların hem bilgiçlerin elinä. Onu ölümä daava edeceklär da yabancıların elinä vereceklär.
34Onu gülmää alaceklar, kamçıylan düüyeceklär, tüküreceklär üzünä da öldüreceklär, ama O üç gündän sora dirilecek».
Zevedeyin oollarının istemesi
35Yaklaşêr Zevedeyin oolları İakov hem İoan da deerlär Ona: «Üüredici, biz isteeriz, yapasın, ne biz Sana yalvaracez».
36O sordu onnara: «Ne isteersiniz, yapayım sizin için?»
37Onnar dedilär: «İzin ver, ani oturalım Seninnän, birimiz saa tarafında, birimiz dä sol tarafında, açan Sän metinniktä olacan».
38İisus cuvap etti onnara: «Bilmeersiniz, ne isteersiniz. Var mı nicä siz içäsiniz o çölmektän, ani Bän içerim, eki vaatiz olasınız o vaatizliklän, ani Bän olêrım?»
39Onnar cuvap ettilär: «Var nicä». İisus dedi onnara: «İçeceniz o çölmektän, ani Bän içerim, hem vaatiz olacenız o vaatizliklän, ani Bän olêrım.
40Ama Bendän tutunmêêr, izin vereyim oturmaa saa eki sol tarafımda. Bu verilecek onnara, kimä hazırlanmış».
41Kalan on üürenici, işidip bunu, üfkelendilär İakova hem İoana.
42İisus çaardı onnarı da dedi: «Bilersiniz, ani kim sayılêr milletlerin öndercileri, onnar çorbacılık ederlär insan üstünä hem büükleri zaabitlik ederlär.
43Ama sizin aranızda bölä olmasın. Kim sizdän isteer büük olsun, o izmetkär olsun kalanına.
44Kim sizdän isteer ilk olsun, o çırak olsun hepsinä.
45Zerä Adam Oolu gelmedi, ki Ona izmet etsinnär, ama Kendi izmet etsin insana hem versin yaşamasını çoyun erinä, ki kurtarabilsin onnarı».
Köör Vartimey
46Geldilär İerihon kasabasına. Açan İisus çıkardı İerihon kasabasından üürenicilerinnän hem çok insannan, Timeyin oolu, Vartimey, köör dilenci, oturardı yol boyunda.
47O işitti, ani Nazaretli İisus oradan geçer, da başladı baarmaa: «İisus, Davidin Oolu, acı beni!»
48Çoyu takazalardı onu, sussun deyni, ama o taa pek baarardı: «Davidin Oolu, acı beni!»
49İisus durgundu da dedi: «Çaarın onu». Çaardılar köör adamı da dedilär: «Kalk da girgin ol, O seni çaarêr».
50O sıbıttı üstünkü rubasını, kalkıp-atladı da geldi İisusa.
51İisus sordu: «Ne isteersin, yapayım sana?» «Ravvuni#10:51 Ravvuni – arameycä annaması «Üüredici»., görmäk edeneyim», – cuvap etti bu köör adam.
52Ozaman İisus dedi ona: «Var nasıl gidäsin, senin inanın seni kurtardı». Çabuk köör adam başladı görmää da gitti yol boyunca İisusun ardına.
Currently Selected:
Mark 10: GagNTL
Highlight
Share
Copy
Want to have your highlights saved across all your devices? Sign up or sign in
© Bіblіyayı çevіrän İnstіtut, Moskva, 2006
