Matfey 23
23
Azar bilgiçlerä hem fariseylerä
1Sora İisus danıştı insana hem Kendi üürenicilerinä
2da dedi: «Bilgiçlär hem fariseylär oturêrlar Moiseyin erindä.
3Onuştan hepsini, ne söleerlär sizä, koruyun hem yapın. Ama ne yapêrlar, siz yapmayın. Zerä onnar söleerlär, ama yapmêêrlar.
4Baalêêrlar aar üklär, ani zor götürmää. Koyêrlar insanın sırtına, ama kendileri baarlem parmaannan kımıldatmêêrlar.
5Hepsini insana göstermäk için yapêrlar. Dua paçkalarını büüldeerlär, ruba eteklerini uzun püsküllärlän yapêrlar.
6Severlär oturmaa öndeki erä konak sofralarında hem ilk skemnelerä sinagogalarda.
7Beenerlär, insan seläm versin onnara meydannarda da desinnär: „Üüredici!“
8Ama siz kendinizä „Üüredici“ sölettirmeyin, zerä sizdä bir üüredici – Hristos, ama siz hepsiniz kardaşsınız.
9Bu erdä kimseyä demeyin „Boba“, zerä sizin birdir Bobanız, ani göktä bulunêr.
10Kimseyä demeyin „Önderci“, zerä birdir sizdä Önderci – Hristos.
11Sizin aranızda en büüyü sizä izmetkär olsun.
12Kim kendini üüseklendirer, o aşaalandırılacek, kim kendini aşaalandırêr, o üüseklendirilecek.
13Vay sizä, bilgiçlär hem fariseylär, ikiüzlülär! Zerä siz kapêêrsınız insana Gök Padişahlıını. Kendiniz girmeersiniz, kim dä girmää isteer, brakmêêrsınız.
/ 14Vay sizä, bilgiçlär hem fariseylär, ikiüzlülär! Siz kemirersiniz dulların evlerini, ama göstermäk için uzun dualar yapêrsınız. Onuştan cezanız çok aar olacek./
15Vay sizä, bilgiçlär hem fariseylär, ikiüzlülär! Zerä siz dolanêrsınız eri hem denizi, ki çeviräsiniz baarlem birisini dininizä, da çevirip, yapêrsınız onu bir cendem adamı, iki kat taa fena sizdän.
16Vay sizä köör öndercilär, ani deersiniz: „Eer emin edärseydi birkimsey Ayoz binaylan, diil bişey. Ama emin edärseydi Ayoz binanın altınınnan, o baalı emininnän“.
17Fikirsizlär hem köörlar, ne taa büük? Altın mı osa Ayoz bina mı, ani ayozlêêr altını?
18Hem deersiniz: „Eer birkimsey emin edirseydi kurbannıklan, diil bişey, ama emin edirseydi kurbannan, ani kurbannık üstündä, o baalı emininnän“.
19/Fikirsizlär hem/ köörlar! Ne taa büük, kurban mı, osa kurbannık mı, ani kurbanı ayozlêêr?
20Ölä ki, kim emin eder kurbannıklan, o emin eder hepsinnän, ne var onun üstündä.
21Kim emin eder Ayoz binaylan, o emin eder Ayoz binaylan hem Onunnan, Kim orada yaşêêr.
22Hem kim emin eder göklän, emin eder Allahın çorbacılık skemnesinnän hem skemnedä Oturannan.
23Vay sizä, bilgiçlär hem fariseylär, ikiüzlülär! Zerä siz verersiniz onuncu payını naanedän, marardan hem kimyondan, ama brakêrsınız tamannanmadık Zakondan en paalı işleri: dooruluu, acıyannıı hem inanı. Bunnarı lääzım yapasınız, kalanını da brakmayasınız!
24Köör öndercilär, ani sivri sinää süzersiniz, ama deveyi yudêrsınız!
25Vay sizä, bilgiçlär hem fariseylär, ikiüzlülär! Siz yıkêêrsınız çölmään hem çanaan dışansını, ama içyansı dolu hırsızlıklan hem tamahlıklan.
26Köör farisey! İlkin pakla çölmään /hem çanaan/ içyansını, sora pak olacek dışansı da.
27Vay sizä, fariseylär hem bilgiçlär, ikiüzlülär! Zerä siz nicä kireçli mezarlar, ani dışandan görünerlär gözäl, ama içyandan dolu ölülerin kemiklerinnän hem hertürlü mındarlıklan.
28Hep ölä siz dä dışandan gösterilersiniz insanın önündä dooru, ama içyandan doluysunuz ikiüzlülüklän hem zakonsuzluklan.
29Vay sizä, bilgiçlär hem fariseylär, ikiüzlülär! Zerä siz düzersiniz prorokların mezarlarını hem donadêrsınız dooru adamnarın anılmak taşlarını.
30Siz deersiniz: „Eer biz yaşayaydık bizim dedelerin vakıdında, kayıl olmayaceydık prorokların kanını dökmää“.
31Butakım siz kendi-kendinizä karşı şaatlık edersiniz, ani siz prorok öldürücülerin oollarıysınız.
32Haydi, bitirin, ne bobalarınız çekettirdi.
33Yılannar, zihirli yılan yavruları! Nesoy kurtulacenız cendemin cezasından?
34Onun için, tä, yollêêrım sizä prorokları, aarifleri hem bilgiçleri. Kimisini öldüreceniz da stavroza gereceniz, başkalarını düüyeceniz sizin sinagogalarda hem koolayacenız onnarı kasabadan kasabaya.
35Ölä ki, siz cuvap edeceniz hepsi dooru olannarın kannarı için, ani döküldü bu erdä, kabaatsız Avelin kanından, Varahiyanın oolunun, Zahariyanın kanınadan, angısını öldürdünüz Ayoz bina hem kurbannık arasında.
36Dooru söleerim sizä, ani hepsi bunnar için bu boy insan cuvap edecek.
İerusalim için aalayış
37İerusalim, İerusalim, ani öldürersin prorokları hem taşlan düüyersin sana yollanılmışları! Kaç sıra istedim toplayım senin uşaklarını, nicä kloçka toplêêr piliçlerini kanatları altına, ama siz istämediniz!
38Tä, eviniz sizä boş brakılêr.
39Söleerim sizä, ani büündän ötää görmeyeceniz Beni, demeyincä: „İisözlenmiş olsun, Kim geler Saabinin adına!“»
Currently Selected:
Matfey 23: GagNTL
Highlight
Share
Copy
Want to have your highlights saved across all your devices? Sign up or sign in
© Bіblіyayı çevіrän İnstіtut, Moskva, 2006
