Matfey 17
17
İisus peydalanêr metinniktä
1Altı gündän sora İisus aldı salt Petriyi, İakovu hem onun kardaşını, İoanı, da, götürüp, pindirdi onnarı bir üüsek bayır üstünä.
2Hemen görünüşü diişti onnarın önündä, üzü yalabıyardı gün gibi. Rubaları da ak-biyaz oldu, nicä aydınnık.
3Birdän gösterildi onnara Moisey hem İliya, angıları lafedärdilär İisuslan.
4Petri dedi İisusa: «Saabi, ii, ki buradayız. İstärseydin, yapalım üç çalmar: bir Senin için, bir Moisey için, bir dä İliya için».
5Bunu sölärkän, bir aydınnıklı bulut gölgesinnän kapladı onnarı, da bulut içindän bir ses dedi: «Budur Benim sevgili Oolum, Onda Benim isleeliim».
6Açan üürenicilär bunu işittilär, pek korktular da üzükoynu düştülär.
7İisus, yaklaşıp, onnara diidi da dedi: «Kalkın, hiç korkmayın!»
8Açan onnar baktılar, başka kimseyi görmedilär, İisustan kaarä.
9Açan inärdilär bayır üstündän, İisus sımarladı onnara: «Kimseyä sölämeyin, ne gördünüz, Adam Oolu dirilmeyincä ölüdän».
10Üürenicilär sordular Ona: «Neçin bilgiçlär deerlär, ani ilkin lääzım gelsin İliya?»
11İisus cuvap etti onnara: «Hakına, ani İliya ilkin gelecek da erleştirecek hepsini.
12Ama söleerim sizä, ani İliya şindän sora geldi, ama onu tanımadılar da yaptılar onunnan, ne istedilär. Hep ölä Adam Oolu da onnarın elindän zeetlenecek».
13Ozaman üürenicilär annadılar, ani İisus İoan Vaatizedici için lafeder.
Çocuk fena duhtan kurtulêr
14Açan onnar etiştilär insanın yanına, yaklaştı İisusa bir adam, diz çöküp Onun önündä, bölä yalvardı:
15«Saabi, acı benim oolumu, zerä onu kara hastalık çok zeetleer. Çok sıra düşer ateş içinä hem su içinä.
16Getirdim onu Senin üürenicilerinä, ama onnar alıştıramadılar onu».
17«İnansız hem şaşırık senselä! Nekadar vakıt taa sizinnän olacam? Nekadar vakıt dayanacam sizä? Getirin onu Bana», – cuvap etti İisus.
18İisus azarladı fena duhu, da o çocuktan çıktı. Çocuk birdän saa oldu.
19Ozaman üürenicilär, yalnız İisusa yaklaşıp, sordular: «Neçin biz çıkaramadık fena duhu?»
20«Sizin inansızlıınızın beterinä, – cuvap etti İisus. – Dooru sizä söleerim: eer olursa sizdä inan hardal toomu gibi, da deyärseniz bu bayıra: „Diiş buradan“, o diişecek. Bişey olmayacek, ani siz yapamayasınız.
/ 21Busoy fena duhlar çıkêrlar sade duaylan hem oruçlan/».
İisus enidän haberleer ölümünü hem dirilmesini
22Açan onnar barabar Galileyada bulunardılar, İisus dedi onnara: «Adam Oolu verilecek insan elinä.
23Onu öldüreceklär, ama üçüncü günü dirilecek». Üürenicilär çok kahırlandılar.
İisus ödeer harç Ayoz bina için
24Açan etiştilär Kapernaum kasabasına, Ayoz binaya iki drahma toplayannar, gelip Petriyä, sordular: «Sizin Üürediciniz ödämeer mi harç?»
25«Ödeer», – cuvap etti Petri. Açan Petri girdi içeri, İisus ilkin lafetti: «Simon, nasıl sän sanêrsın, dünnä padişahları kimdän harç hem vergi alêrlar? Kendi oollarından mı osa yabancılardan mı?»
26«Yabancılardan», – cuvap etti Petri. İisus dedi: «Ozaman çıkêr, ani oolların yok zorları ödesinnär.
27Ama gücendirmeyelim onnarı deyni, git gölä, at balık çengelini. Al ilk balıı, ani tutulacek, aç aazını da bulacan bir statir#17:27 Statir – dört drahma (para).. Al onu da ödä benim için hem kendin için».
Currently Selected:
Matfey 17: GagNTL
Highlight
Share
Copy
Want to have your highlights saved across all your devices? Sign up or sign in
© Bіblіyayı çevіrän İnstіtut, Moskva, 2006
