Luka 4

Diavol deneer İisusu

1İisus, dolu Ayoz Duhlan, döndü İordandan, da Duh götürdü Onu çol erä.

2Orada denenmiş oldu diavoldan kırk gün. Bişey imedi o günnerdä. Sonda acıktı.

3Diavol dedi: «Eer Sän Allahın Oolusaydın, sımarla bu taşa, ekmek olsun».

4İisus cuvap etti: «Yazılı, ani „Adam yaşamêêr salt ekmeklän, /ama Allahın herbir sözünnän/“».

5Diavol pindirdi Onu bir üüsek bayır üstünä da bir göz kıpımda gösterdi hepsi erin padişahlıklarını.

6O dedi Ona: «Sana verecäm zaabitlik hepsi bu metinni padişahlıkların üstünä, zerä onnar bana verili. Bän dä vererim, kimä isteerim.

7Eer baş iildirseydin bana, hepsi olacek Senin».

8İisus cuvap etti: «/Çekil Bendän, şeytan, zerä/ var yazılı: „Baş iilt senin Saabi Allahına hem salt Ona izmet et“».

9Ondan sora diavol götürdü Onu İerusalimä, koydu Ayoz binanın saçaana da dedi: «Eer Sän Allahın Oolusaydın, atıl buradan erä,

10zerä yazılı: „Allah Kendi angillerinä sımarlayacek, Seni korusunnar“

11hem: „Seni kucak alaceklar, urulmayasın ayaannan bir taşa deyni“».

12İisus cuvap etti: «Sölendi: „Denämä senin Saabi Allahını“».

13Açan diavol Onu hertürlü denedi, sora gitti Ondan bir parça vakıda.

İisus paasızlanêr Kendi memleketindä

14İisus Ayoz Duhun kuvedinnän döndü Galileyaya. Haber Onun için daaldı hepsi dolay erlerä.

15O üüredärdi insanı onnarın sinagogalarında. Hepsi Onu metinnärdi.

16İisus geldi Nazaret kasabasına, neredä büüdüydü, Kendi alışmasına görä, cumertesi günü girdi sinagoga içinä da kalktı, okusun.

17Ona verdilär prorok İsayanın kiyadını. O açtı kiyadı da buldu o eri, neredä var yazılı:

18«Saabinin Duhu Benim üstümdä, O yaaladı Beni, ii haber götüreyim fukaaralara. Yolladı Beni, /alıştırayım o falanık üreklileri,/ nasaat edeyim esirliktä olannara serbestlik, köörlara görmäk, zeetlenmişleri kolvereyim serbestlää,

19haberleyim acıyannık yılını Saabidän».

20Sora kapadı kiyadı da verdi izmetçiyä, Kendisi oturdu erinä. Hepsi, kim bulunurdu sinagoga içindä, baktılar Ona.

21Ozaman başladı onnara sölemää: «Büün tamannandı bu sözlär Ayoz Yazıdan, ani şindi işittiniz».

22Hepsi ii lafedärdilär Onun için hem şaşardılar, ne käämil laflar Onun aazından çıkardı. «Diil mi O İosifin oolu?» – sorardılar onnar biri-birinä.

23İisus onnara dedi: «Şindi siz söleyeceniz Bana o söleyişin laflarını: „Doftor! Alıştır ilkin kendi-kendini“, yap burada da, kendi vatanında, ne işittik, yapmışın Kapernaum kasabasında».

24Sora ekledi: «Dooru söleerim sizä: bir dä prorok kabledilmeer islää kendi erindä.

25Hakına söleerim sizä, ani prorok İliyanın vakıdında, açan kitlendiydi gök, yaamur yaamasın deyni üç yıl hem altı ay, nezaman oldu büük aaçlık bütün memlekettä, o vakıt vardı çok dul karı İzraildä.

26Ama prorok İliya yollanılmadı birisinä bilä, ama salt dul karıya Sarepta kasabasından, ani yakın Sidon kasabasına.

27Çok lepralı hasta vardı İzraildä, ama prorok Eliseyin vakıdında birisi bilä paklanmadı, sade Naaman Siriyadan».

28Hepsi, kim sinagoga içindeydi, işidip bunu, pek üfkelendilär.

29Kalktılar da çektilär Onu kasabadan dışarı, götürdülär bayırda kanaranın kenarına, neredä onnarın kasabası erleşikti, ki atsınnar Onu dipsizlää.

30Ama İisus geçti onnarın arasından da gitti.

Sinagogada fena duhlu adam alıştırılêr

31Bundan sora İisus gitti Kapernaum kasabasına, Galileya tarafına. Orada insanı üüredärdi cumertesi günü.

32Onnar şaşardılar Onun üüretmesinä, zerä O lafedärdi büük zaabitliklän.

33Sinagoga içindä vardı bir adam, angısında vardı fena duh. Bu adam baardı büük seslän:

34«Brak bizi, ne isteersin bizdän, Nazaretli İisus? Geldin bizi telef etmää? Bilerim, kimsin Sän, Sän Allah Ayozuysun!»

35Ama İisus takazaladı onu da dedi: «Sus da çık bu adamdan dışarı!» Fena duh urdu adamı erä insan arasında da sora çıktı dışarı ondan. Yapmadı bir dä zarar bilä ona.

36Hepsi şaştılar da lafedärdilär biri-birinnän: «Nedir bu? O fena duhlara zaabitliklän hem kuvetlän sımarlêêr, da onnar Onu sesleer!»

37İisus için haber daaldı hepsi dolay erlerä.

Simonun kaynanası hem başka hastalar alıştırılêr

38Çıkıp sinagogadan, İisus geldi Simonun evinä. Simonun kaynanası hastaydı sıtmadan, onuştan İisusa yalvardılar, yardım etsin.

39İisus, iilip ona, azarladı hastalıı, da sıtma karıyı braktı. Karı çabuk kalktı da başladı izmet etmää onnara.

40Gün kauşmasından sora hepsi, kimdä vardı hasta olannar hertürlü aarılarlan, getirärdilär İisusa, da O, koyup ellerini herbir hasta üstünä, alıştırardı onnarı.

41Çoyundan çıkardı fena duhlar, angıları baarardılar: «Sänsin Hristos – Allahın Oolu!» Ama O azarlardı onnarı da brakmardı sölesinnär, zerä onnar bilärdilär, ani O Hristos.

42Açan aydınnanmaa başladı, İisus çıktı da gitti bir sapa erä. İnsan aarardı Onu, da, bulup, tutardılar, gitmesin deyni onnardan.

43Ama İisus dedi onnara: «Lääzım başka kasabalarda da nasaat edeyim Allahın Padişahlıının İi Haberini, zerä bunun için Allah yolladı Beni».

44O nasaat edärdi İudeyanın#4:44 İudeyanın: kimi tekstlerdä yazılı «Galileyanın». sinagogalarında.

Currently Selected:

Luka 4: GagNTL

Highlight

Copy