Yaptıklar 8

Koolamak hristiannara

1Saul Stefanın öldürülmesinä kayıl oldu. O gün çeketti büük koolamak İerusalim klisesinä karşı. Apostollardan kaarä, hepsi daaldı İudeya hem Samariya erlerinä.

2Allahtan korkan adamnar Stefanı gömdülär da çok aaladılar onun için.

3Saul sa çalıştı yok etmää kliseyi. Girärdi evlerä, kuvetlän alardı adamnarı hem karıları da zındana kapardı.

Filip nasaat eder Samariyada

4Onnar, kim daalıştılar, erdän erä gidärdilär da ii haberi annadardılar Allahın sözü için.

5Filip Samariya kasabasına gitti da orada Hristos için nasaat edärdi.

6İnsan, nicä bir adam, esap almaklan seslärdi, ne sölärdi Filip, işidip hem görüp meraklı nışannarı, ani o yapardı.

7Çok hastalardan baarıp-çıkardı fena duhlar, hem çok kötürüm hem topal insannar saa olardılar.

8O kasabada oldu büük sevinmäk.

Büücü Simon

9Orada vardı bir adam, adı Simon, angısı çoktan büücülük yapardı da şaştırardı Samariya halkını. O kendini üstün bir adam sayardı.

10Hepsi, küçük-büük, esap almaklan seslärdilär onu da deyärdilär: «Bu adam o, kimä deerlär „Allahın büük kuvedi“».

11Seslärdilär onu, zerä büücülüklän çok vakıt onnarı şaştırardı.

12Ama, açan inandılar Filipi, angısı ii haberi annadardı Allahın Padişahlıı hem İisus Hristozun adı için, vaatiz oldular adamnar hem karılar.

13Simon da artık inandı da vaatiz oldu. O Filiptän hiç ayırılmardı da şaşmaklan bakardı meraklı nışannara hem kudretli işlerä, ani yapılardı.

Petri hem İoan Samariyada

14İerusalimdä apostollar, işidip, ani Samariya kabletti Allahın sözünü, orayı yolladılar Petriyi hem İoanı.

15Onnar, gelip, dua ettilär, ki samariyalılar kabletsinnär Ayoz Duhu.

16Zerä Ayoz Duh taa hiç birinin üzerinä inmemişti, sade vaatiz olmuştular Saabi İisusun adına.

17Ozaman Petri hem İoan koydular ellerini onnarın üstünä, da onnar kablettilär Ayoz Duhu.

18Açan Simon gördü, ani Ayoz Duh veriler apostolların el koymaklarınnan, ozaman teklif etti versin onnara para

19da dedi: «Verin bana da bu kuvettän, ki kimin üstünä ellerimi koyacam, kabletsin Ayoz Duh».

20Ama Petri dedi: «Senin paran telef olsun seninnän, zerä sän sandın, ki Allahın baaşışını var nicä kazanmaa paraylan!

21Yok payın, yok hakın bu iştä, zerä senin ürään diil haliz Allahın önündä.

22Pişmannık getir senin bu kötülüündän da dua et Saabiyä, beki afedilir senin bu kötü neetin.

23Zerä görerim, ani doluysun kin zihirinnän hem baalıysın zakonsuzluk sincirlerinnän».

24Simon cuvap etti: «Dua edin benim için Saabiyä, ki başıma gelmesin bişey bundan, ne sölediniz».

25Şaatlık edip, Saabinin sözünü nasaat ettiktän sora Petri hem İoan döndülär İerusalimä, annadarak İi Haberi Samariyanın çok küülerindä.

Filip hem Efiopiyalı

26Saabidän bir angil Filipä dedi: «Kalk da git üülenä dooru, o yola, ani İerusalimdän Gaza kasabasına dooru iner. O yol şindi boş».

27Filip kalktı da gitti. Bu arada bir efiopiyalı evnuh#8:27 Evnuh – evlenämeyän adam., Kandakın, Efiopiya padişahkasının, bir kudretli izmetkeri, ani bakardı bütün onun haznasını, geeri dönärdi İerusalimdän, nereyi gittiydi Allaha baş iiltsin deyni.

28O, faytonunda oturarak, okuyardı prorok İsayanın kiyadını.

29Ayoz Duh dedi Filipä: «Git da etiş bu faytonu».

30Filip kaçıp etişti faytonu da işitti, nicä evnuh okuyêr prorok İsayanın kiyadını. Filip sordu ona: «Acaba annêêrsın mı, ne okuyêrsın?»

31Evnuh cuvap etti: «Nesoy var nicä annayım, birkimsey yol göstermeyincä bana?» Da yalvardı Filipä, pinsin faytona da otursun onunnan barabar.

32Okuyardı o eri Ayoz Yazıdan, neredä yazılı: «O götürüldü, nicä bir koyun kesilmää deyni, hem nicä bir kuzu susar kırkanın önündä, O ölä açmadı aazını.

33Onu aşaaladılar hem dooru daava yapmadılar. Kim anacek Onun senselesini, zerä yaşaması alındı bu erdän».

34Evnuh dedi Filipä: «Yalvarêrım, sölä, kimin için lafeder prorok? Kendisi için mi osa başkası için mı?»

35Ozaman Filip aldı lafı da başladı bu Yazıdan annatmaa ii haberi İisus için.

36Onnar, yolda gidärkän, etiştilär bir suya. Evnuh dedi: «Tä su; ne köstekleer beni, ki vaatiz olayım?»

/ 37Filip dedi: «Eer inanarsaydın bütün üräännän, ozaman var nicä vaatiz olasın». Evnuh cuvap etti: «İnanêrım, ani İisus Hristos Allahın Oolu»./

38Sımarladı, faytonu durgutsunnar. İndilär ikisi dä su içinä, da Filip vaatiz etti evnuhu.

39Açan çıktılar su içindän, Saabinin Duhu#8:39 Saabinin Duhu: kimi tekstlerdä «Ayoz Duh indi evnuhun üstünä, hem Saabinin angili». alıp götürdü Filipi. Evnuh başka onu görmedi. O şen gitti kendi yoluna.

40Ama Filip buldu kendini Azot kasabasında, neredän gitti Kesariya kasabasınadan, annadarak İi Haberi hepsi kasabalarda.

Currently Selected:

Yaptıklar 8: GagNTL

Highlight

Copy