WƖAA DƖ-SUOMUŊ 24
24
Aɩzɩk arɩ Rɩbɛka
1Abɩraham fa hɩɛsa nɛ woruŋ, Wɩa pɛ ʋ lɛ wɩɩkala lɛ. 2Abɩraham bʋla pɩ ʋ dɩa tɩntɩnnɩ-hɩaŋ sɩɩ beŋ ʋ dɩa kʋŋkala, “Joŋ ŋ nɩsɩŋ hɛ mɩ naapuiŋ bʋbʋɔŋ. 3Mɩɩ chɛ dɩ ŋ ŋmɩɛsɛ La TƖƖNA Wɩa sɩ ŋaa wɩa-nyuŋ arɩ tinteeŋ kala arɩ ŋ bɩ jaŋ jaa tolo sɩ lɩɩ Kɛnaŋ tinteeŋ pɩ mɩ bie Aɩzɩk, nɩalɩŋ tʋɔŋ mɩ sɩ hɛ. 4Mʋ mɩ tinteeŋ, mɩ naambiiriŋ tɩtɩa tʋɔŋ a jaa haala kaa kʋ pɩ mɩ nanʋala Aɩzɩk.”
5Ŋɩɩ nɛ ʋ tɩntɩnnʋ-la pɩɛsʋ, “Ka dɩ haal-la nɛ bɩ sɛyɛ dɩ ʋ to mɩ harɩŋ kɔ daha, mɩ kɛŋ ŋ bile kaa mʋ tintee-la ŋ sɩ lɩaa?”
6Ŋɩɩ nɛ Abɩraham bʋl, “Pɔ ŋ sɩ́ mɩ bie kaa mʋ nɩmɛ. 7La TƖƖNA, Wɩa-la sɩ ŋaa wɩa-nyuŋ a kɛmmɛ kaa lɩɩ mɩ nyɩmma arɩ mɩ naambiiriŋ tʋɔŋ kɔ daha, ʋ bil niiŋ pɩmɛ arɩ ʋ jaŋ joŋ tinteeŋ deeŋ pɩ mɩ doho nɩaa. Ʋ jaŋ leŋ dɩ ʋ tɩndaara laa ŋ sɩpaaŋ dɩ ŋ wuo na haala lee-la a pɩ mɩ bie. 8Dɩ haal-la nɛ bɩ jaŋ to ŋ harɩŋ kɔ, ŋɩɩ-na mɩ ŋmɩaŋ-la bɩra bɩŋ dii, ama pɔ dɩ ŋ sɩ́ mɩ bie kaa mʋ nɩmɛ.” 9Ŋɩɩ nɛ ʋ tɩntɩnnɩ-hɩaŋ-la joŋ ʋ nɩsɩŋ hɛ ʋ kʋhɩaŋ Abɩraham naapuiŋ bʋbʋɔŋ a ŋmɩɛsɛ arɩ Abɩraham sɩ dagʋ ŋɩɩ.
10Ŋɩɩ nɛ tɩntɩnnɩ-hɩaŋ-la kɛsɛ Abɩraham bʋntaŋŋaba fii a pɛ paa Abɩraham kʋzɔŋ na-kala doho a lɩɩ mʋmʋ Aram Naharem tinteeŋ, taŋ-la lɛ Nahɔ sɩ hɛ. 11Ʋ sɩ mʋ yi taŋ-la dɩdaanɩŋ dɩɩrɩŋ, bʋa-la lɛ haalaa sɩ yie lɩɩ a ŋɩŋaa lɩɩŋ, ʋ leŋ bʋntaŋŋaba-la tuu pɩŋ viliŋ sɛmɛ.
12Ŋɩɩ nɛ ʋ sʋl Wɩa a bʋl, “Ou, mɩ TƖƖNA, mɩ kʋhɩaŋ Abɩraham Wɩa, pɛ mɩ lɛ dɩ mɩ na wɩɩ-la mɩ sɩɩ chɛ jɩnɩŋ, a dagɛ ŋ zile pɩ mɩ kʋhɩaŋ. 13Na, mɩ sɩ chɩŋ lɩɩ-bulo deeŋ sɛmɛ ŋ-la, taŋ deeŋ nɩaa toloo jaŋ kʋ lɩɩ dɩ ba ŋaa lɩɩŋ. 14Leŋ dɩ mɩ nɛ bʋla pɩ hantolibie, ‘Jaaŋ jaaŋ, mɩɩ sʋlʋŋ, ŋaa lɩɩŋ pɩmɛ dɩ mɩ nyʋa,’ dɩ ʋ bʋl, ‘mɩ jaŋ ŋaa pɩŋ dɩ ŋ nyʋa aŋ pɛ ŋaa pɩ ŋ bʋntaŋŋaba maa,’ leŋ dɩ ʋ nɛ ŋaa nɩɩ-la ŋ sɩ lɩɩsa dɩ ŋ pɩ ŋ tɩntɩnna Aɩzɩk. Dɩ ŋ nɛ ŋaa ŋ-la, mɩ jaŋ jɩŋ arɩ ŋ dagɛ ŋ zile a pɩ mɩ kʋhɩaŋ nɛ.”
15Ʋ sɩ chʋɔlɛ Wɩa dɩ ʋ dɛrɛ, dɩ Rɩbɛka nɛ baasɛ nyuvie aa kɔ ŋɩɩ. Rɩbɛka ŋaa Bɛtʋɛl tolo nɛ, Mɩlɩka nanʋala. Mɩlɩka nɛ ŋaa Abɩraham ŋaana Nahɔ haala. 16Rɩbɛka zɔmɔ nɛ woruŋ, a ŋaa hapuŋ. Ʋ tuu lɩɩ-bulo a ŋaa lɩɩŋ hɛ ʋ nyuvie lɛ a kʋ lɩɩ.
17Ŋɩɩ nɛ Abɩraham tɩntɩnnʋ-la mʋ chemu lɩma a bʋl, “Mɩɩ sʋlʋŋ, ŋaa lɩɩŋ mʋa ŋ nyuvie tʋɔŋ pɩmɛ.”
18Ŋɩɩ nɛ ʋ bʋl, “Mɩ nɩhɩaŋ, ŋ jaŋ wuo nyʋa,” aŋ chʋgɛ nyuvie-la lɩma a hɛ ʋ nɩsɩŋ lɛ a wɛnsɛ lɩɩ-la pʋ.
19Ʋ sɩ nyʋa dɛrɛ, ŋɩɩ nɛ ʋ bɩra bʋl, “Mɩ jaŋ ŋaa lɩɩŋ pɩ ŋ bʋntaŋŋaba ma aŋ gbɛrɛ dɩ ba nyʋa dɛrɛ.” 20Ŋɩɩ nɛ ʋ bɩsɛ ʋ nyuvie lɩɩŋ kala lɩma lɩma a hɛ pʋsʋŋ dɩ-nyʋɔlʋŋ, aŋ fá mʋ viliŋ a bɩra ŋaa lɩɩŋ a kaa kʋ pɩ bʋntaŋŋaba-la ba nyʋa a vɔgɛ. 21Ka baal-la bɩ wɩɩkala bʋla aŋ chɩna bibeŋ fii dɩ ʋ na dɩ La Tɩɩna jaŋ ŋaa dɩ ʋ wombii-la ʋ sɩ vɛnɛ ŋaa wombii-zɔŋ.
22Bʋntaŋŋaba-la sɩ nyʋa lɩɩŋ dɛrɛ, ŋɩɩ nɛ baal-la joŋ sɛlɩmɛ nenii-pɩrɩŋ ba sɩ yie joŋo hɛ mɩɩsɩŋ arɩ sɛlɩmɛ kagunsuŋ balɩa a pɩ tolo-la. Ba yallɩŋ hɛyɛ. 23Ŋɩɩ nɛ aŋ pɩɛsɛ tolo-la, “Kʋbɛɛ tolo nɛ ŋ ŋaa, mɩɩ sʋlʋŋ bʋla pɩmɛ. Dɩpɩnɩŋ jaŋ hɛ ŋ nyɩmma dɩa lɛ dɩ la chʋa tɩtaŋɩŋ?”
24Ŋɩɩ nɛ tolo-la bʋl, “Mɩ ŋaa Bɛtʋɛl tolo nɛ, Nahɔ arɩ ʋ haala Mɩlɩka nɛ lʋl Bɛtʋɛl.” 25Ŋɩɩ nɛ aŋ bɩra bʋl, “La kɛŋ pʋsʋŋ yadiilee yʋgɛ nɛ arɩ dɩpɩnɩŋ ma, ma sɩ jaŋ wuo pɩŋ tɩtaŋɩŋ.”
26Ŋɩɩ nɛ baal-la tuu kpirimi a chʋɔlɛ La TƖƖNA 27aŋ bʋl, “Mɩɩ dɛnnɛ mɩ Tɩɩna, mɩ nɩhɩaŋ Abɩraham Wɩa, ʋ sɩ bɩ mɩ nɩhɩaŋ vɩa ta aŋ dagɛ ʋ zile arɩ ʋ wʋtɩtɩɩ, mɩ na dɩ La TƖƖNA nɛ kɛmmɛ vɛŋ wombiiŋ a kɔ mɩ nɩhɩaŋ nɩaa teeŋ.”
28Ŋɩɩ nɛ tolo-la fá mʋ bʋla pɩ ʋ naaŋ dɩa nɩaa wɩalɩŋ kala sɩ ŋaa. 29Rɩbɛka kɛŋ naambii nɛ, ʋ yɩrɩŋ nɛ Labaŋ. 30Labaŋ sɩ na nenii-pɩrɩ-la ba sɩ yie joŋo hɛ mɩɩsɩŋ arɩ kagunsu-la dɩ ba hɛ ʋ dɩhaala nɩsɩŋ arɩ wɩɩ-la Rɩbɛka sɩ bʋla arɩ baal-la bʋla pʋ, ʋ sii mʋ Abɩraham tɩntɩnnʋ-la teeŋ dɩ ʋ chɩŋ ʋ bʋntaŋŋaba bʋbʋɔŋ, lɩɩ-bulo-la sɛmɛ. 31Ŋɩɩ nɛ Labaŋ bʋla pʋ, “Kɔ, ŋ ŋaa nʋʋ La TƖƖNA sɩ pɛ ŋ lɛ nɛ. Bɛɛ nɛ tɩɩ ŋ chɩŋ jeeŋ harɩŋ? Mɩ wasɛ ŋ dɩpɩnɩŋ arɩ ŋ bʋntaŋŋaba ma leriŋ nɛ.”
32Ŋɩɩ nɛ baal-la jʋʋ dɩa, Labaŋ puri chʋgʋsʋ-la sɩ saga bʋntaŋŋaba-la nyuŋ a kɛŋ pʋsʋŋ yadiilee kʋ pɩ bʋntaŋŋaba-la, aŋ kɛŋ lɩɩŋ kʋ pɩba, ʋ dɩ baala-la kala sɩ to ʋ harɩŋ sɔŋ ba naasɩŋ. 33Ŋɩɩ nɛ ba ŋaa kʋdiilee kʋ pɩ baal-la, ʋ bʋl, “Mɩ ha bɩ jaŋ dii see dɩ mɩ bʋl wɩɩ-la sɩ kɛmmɛ kɔ daha.” Ŋɩɩ nɛ Labaŋ sɩ, “Bʋla pɩla.”
34Ŋɩɩ nɛ ʋ bʋl, “Mɩ ŋaa Abɩraham tɩntɩnnʋ nɛ. 35La TƖƖNA pɛ mɩ nɩhɩaŋ lɛ nɛ kɩŋkɛŋ, ʋ kɛŋ kɩaa woruŋ. Ʋ pʋ piesee, nɛsɩŋ, warɩpʋla, sɛlɩmɛ, tɩntɩnnaa, baalaa arɩ haalaa bʋntaŋŋaba arɩ kakusuŋ. 36Mɩ nɩhɩaŋ haala Sara hɩɛsa nɛ aŋ lʋl hambolibie a pʋ, ŋɩɩ nɛ ʋ joŋ kʋŋkala ʋ sɩ kɛnɛ a pɩ bile. 37Ŋɩɩ nɛ mɩ nɩhɩaŋ leŋ mɩ ŋmɩɛsɛ arɩ ʋ bɩ maga dɩ mɩ jaa Kɛnaŋ tɩŋŋaa tolo a pɩ ʋ bie, nɩalɩŋ tinteeŋ lɛ mɩ sɩ hɔnɔ, 38dɩ mɩ mʋ ʋ nyɩmma dɩa, ʋ doho nɩaa tʋɔŋ, a jaa haala nɩmɛ a kaa kʋ pɩ ʋ bile.
39Ŋɩɩ nɛ mɩ pɩɛsɛ mɩ nɩhɩaŋ, ‘Ka dɩ haal-la nɛ vɩa dɩ ʋ to mɩ harɩŋ a kɔ daha?’
40Ŋɩɩ nɛ ʋ bʋl, ‘La TƖƖNA mɩ sɩɩ to arɩ mɩ wʋtɩtɩɩ, ʋ jaŋ tɩŋ ʋ tɩndaara dɩ ʋ pɛ ŋ lɛ a leŋ dɩ ŋ wombiiŋ zɔŋ, dɩ ŋ wuo na haala mɩ nyɩmma dɩa lɛ, mɩ doho nɩaa tʋɔŋ a kaa kʋ pɩ mɩ nanʋala. 41Dɩ ŋ nɛ mʋ mɩ doho nɩaa teeŋ, a kɛŋ tolo kɔ koo dɩ ba nɛ vɩa dɩ ba joŋ haala pɩŋ dɩ ŋ kaa kɔ, ŋɩɩ-na ŋ laa ŋ tɩtɩa nɛ ŋmɩaŋ-la lɛ.’
42Mɩ sɩ kɔ lɩɩ-bulo deeŋ bʋbʋɔŋ jɩnɩŋ, mɩ bʋla, ‘Mɩ TƖƖNA, mɩ nɩhɩaŋ Abɩraham Wɩa, dɩ ŋ nɛ jaŋ ŋaa dɩ mɩ wombiiŋ deeŋ mɩ sɩ vɛnɛ ŋaa wombii-zɔŋ, wɩɩ-la wɩaa mɩ sɩ kɔ. 43Na, mɩ chɩŋ lɩɩ-bulo deeŋ sɛmɛ nɛ, dɩ haal-la sɩ bɩ baal jɩŋ nɛ kɔ dɩ ʋ ŋaa lɩɩŋ dɩ mɩ bʋla pʋ: Jaaŋ jaaŋ, ŋaa lɩɩŋ pɩmɛ dɩ mɩ nyʋa,’ 44dɩ ʋ nɛ bʋla pɩmɛ, ‘Nyʋa lɩɩŋ ka dɩ mɩ ŋaa pɩ ŋ bʋntaŋŋaba ma, leŋ dɩ ʋ nɛ ŋaa tolo-la ŋ-na mɩ TƖƖNA sɩ lɩɩsa dɩ ŋ pɩ mɩ kʋhɩaŋ nanʋala.’
45Mɩ sɩ chʋɔlɛ Wɩa mɩ tʋɔŋ lɛ ŋ-la a dɛrɛ, dɩ Rɩbɛka kʋ lɩɩ a baasɛ ʋ nyuvie ʋ vaaŋ lɛ. Ʋ tuu lɩɩ-bulo a ŋaa lɩɩŋ. Ŋɩɩ nɛ mɩ bʋla pʋ, ‘Mɩɩ sʋlʋŋ, ŋaa lɩɩŋ pɩmɛ mɩ nyʋa.’
46Ŋɩɩ nɛ ʋ chʋgɛ ʋ nyuvie ʋ vaaŋ lɛ lɩma lɩma aŋ bʋl, ‘Nyʋa ka dɩ mɩ ŋaa pɩ ŋ bʋntaŋŋaba ma.’ Ŋɩɩ nɛ mɩ nyʋa aŋ ka ʋ ŋaa pɩ mɩ bʋntaŋŋaba ma. 47Mɩ sɩ nyʋa dɛrɛ, mɩ pɩɛsʋ, ‘Ŋ ŋaa kʋbɛɛ tolo nɛ?’
Ŋɩɩ nɛ ʋ bʋl, ‘Mɩ ŋaa Bɛtʋɛl tolo nɛ, Nahɔ arɩ ʋ haala Mɩlɩka nɛ lʋl Bɛtʋɛl.’
Ŋɩɩ nɛ mɩ joŋ nenii-pɩrɩŋ a hɛ ʋ mɩɩsɩŋ aŋ joŋ kagunsuŋ a hɛ ʋ nɩsaa. 48Ŋɩɩ nɛ mɩ tuu kpirimi, a chʋɔlɛ La TƖƖNA. Mɩ dɛnnɛ La TƖƖNA, mɩ nɩhɩaŋ Abɩraham Wɩa, Wɩa-la sɩ kɛmmɛ kaa vɛŋ wombii-zɔmʋŋ deeŋ mɩ na mɩ nɩhɩaŋ naambie nihiŋ dɩ mɩ pɩ mɩ nɩhɩaŋ nanʋala. 49Dɩ ma nɛ jaŋ dagɛ zile arɩ wʋtɩtɩɩ a pɩ mɩ nɩhɩaŋ, má bʋla pɩmɛ, dɩ ŋɩɩ ma dee, má bʋla pɩmɛ dɩ mɩ jɩŋ wombii-la mɩ sɩ jaŋ to.”
50Ŋɩɩ nɛ Labaŋ arɩ Bɛtʋɛl bʋl, “Wɩɩŋ deeŋ lɩɩ La TƖƖNA teeŋ nɛ, la bɩ jaŋ wuo kaa lɛrɛ. 51Na Rɩbɛka nɛ ŋ-la, kɛnʋ kaa mʋ dɩ ʋ ŋaa ŋ nɩhɩaŋ nanʋala haala, arɩ La TƖƖNA sɩ dagɛ ŋɩɩ.”
52Abɩraham tɩntɩnna sɩ nɩɩ wɩɩ-la ba sɩ bʋla, ŋɩɩ nɛ ʋ tuu kpirimi La TƖƖNA sɩpaaŋ a zilu 53aŋ lɩɩsɛ sɛlɩmɛ arɩ hɔpʋla kpɩɛraa arɩ gɛnnɩŋ a joŋo pɩ Rɩbɛka, a bɩra joŋ kpɩɛraa dɔnsʋŋ ma sɩ yuŋŋie a pɩ Rɩbɛka naaŋ arɩ ʋ naambie Labaŋ. 54Ŋɩɩ nɛ ka Abɩraham tɩntɩnnʋ-la arɩ ʋ harɩ-tooroo kala dii kɩaa aŋ nyʋa a chʋa nɩmɛ.
Ba sɩ sie chʋchʋɔŋ, ŋɩɩ nɛ ʋ bʋl, “Má leŋ dɩ mɩ mɩɩra mʋ mɩ nɩhɩaŋ teeŋ.”
55Ŋɩɩ nɛ Rɩbɛka dɩbaala arɩ ʋ naaŋ bʋl, “Leŋ dɩ tolo-la hɛ la teeŋ tapʋlaa fii aŋ ka dɩ ma-na mʋ.”
56Ama ʋ bʋla pɩba, “Má sɩ́ leŋe dɩ mɩ dieni, La TƖƖNA sɩ leŋe mɩ wombiiŋ zɔŋ. Ma hɛla wombiiŋ lɛ dɩ mɩ wuo mʋ mɩ nɩhɩaŋ teeŋ.”
57Ŋɩɩ nɛ ba bʋl, “Leŋ dɩ la yɩrɛ tolo-la a pɩɛsʋ na.” 58Ba yɩrɛ Rɩbɛka a pɩɛsʋ, “Ŋ jaŋ to baala deeŋ harɩŋ mʋ?”
Ʋ bʋl, “Mɩ jaŋ mʋ.” 59Ŋɩɩ nɛ ba hɛ Rɩbɛka arɩ nɩɩ-la sɩɩ benu wombiiŋ lɛ, a pɛ Abɩraham tɩntɩnna arɩ ʋ nɩaa lɛ. 60Ŋɩɩ nɛ ba sʋl Wɩa pɩ Rɩbɛka a bʋl,
“La dɩhaala, Wɩa jaŋ leŋ dɩ ŋ pʋŋ a yi bʋɩba bʋɩ,
a leŋ dɩ ŋ doho nɩaa wuo ba dʋndɔŋŋɔɔ.”
61Ŋɩɩ nɛ Rɩbɛka arɩ ʋ ketiee kɛŋ ba tɩtɩa hɛ dɔŋɔ a jɩl ba bʋntaŋŋaba a to Abɩraham tɩntɩnna arɩ ʋ nɩaa harɩŋ ba mʋ.
62Bʋa-la lɛ dɩ Aɩzɩk fa lɩɩ Nɛgɛf tintee-hɩlɩɩ-la a kɔ Bɛɛ-Lahaɩ-Roi. 63Ŋɩɩ nɛ dɩdaaŋ kʋbala ʋ lɩɩ jɩl pɔkɔŋ nyuŋ dɩ ʋ kɛŋ ʋ tʋɔbɩɩnaa chɔ, ʋ bee na bʋntaŋŋaba dɩ baa kɔ. 64Rɩbɛka ma sɩ bee na Aɩzɩk, ʋ ŋaa bʋntaŋŋa-la chɩŋ, ʋ tuu 65aŋ pɩɛsɛ Abɩraham tɩntɩnnʋ-la, “Kʋbɛɛ nɛ baala deeŋ sɩɩ chenla pɔkɔŋ deeŋ nyuŋ ŋɩɩ?”
Abɩraham tɩntɩnnʋ-la bʋl, “Mɩ nɩhɩaŋ nɛ ŋɩɩ.” Ŋɩɩ nɛ Rɩbɛka joŋ ʋ nyu-kpala a tɔ ʋ sɩaa.
66Ba sɩ kʋ cheŋ dɔŋɔ, ŋɩɩ nɛ Abɩraham tɩntɩnnʋ-la bʋl wɩalɩŋ kala ʋ sɩ ŋaa a pɩ Aɩzɩk.
67Ŋɩɩ nɛ Aɩzɩk kɛŋ Rɩbɛka ba jʋʋ ʋ naaŋ Sara lɛbɩŋ. Ʋ jaaʋ, ba cho dɔŋɔ woruŋ. Aɩzɩk naaŋ sʋʋŋ harɩŋ ʋ ha kɛŋ kenyiri a tɩŋ ʋ sɩ jaa Rɩbɛka wɩaa.
Currently Selected:
WƖAA DƖ-SUOMUŊ 24: SIS
Highlight
Share
Copy
Want to have your highlights saved across all your devices? Sign up or sign in
©Ghana Institute of Linguistics Literacy and Bible Translation 1984, 2014
