WƖAA DƖ-SUOMUŊ 19

Wɩa chei Sodom arɩ Gomora tɩŋŋaa

1Wɩa tɩndaara-la balɩa mʋ Sodom dɩdaanɩŋ, dɩ Lɔt hɔŋ tabal-la boi-baalɩŋ. Ʋ sɩ naba, ʋ sii mʋ chemba a tuu kpirimi ba sɩpaaŋ a kɛŋ ʋ nyuŋ chuguli tinteeŋ, 2aŋ bʋla pɩba, “Mɩ kʋhɩasɩŋ, má kʋ jʋʋ mɩ-na ma tɩntɩnna dɩa a sɔŋ ma naasɩŋ aŋ chʋa, dɩ taŋ nɛ pʋla chʋchʋɔ-fɩɛla, ma sii viiri.”

Ŋɩɩ nɛ Wɩa tɩndaara-la bʋl, “Aɩ, la jaŋ lɩɩ chʋa lee-la taŋ nɩaa sɩɩ hilimu.”

3Lɔt vɩa aŋ pɛsɛ ba lɛ, ŋɩɩ nɛ ba to ʋ harɩŋ jʋʋ ʋ dɩa. Ʋ ŋaa kʋdiilee a wasɛ boroboro sɩ bɩ sɩbʋrʋŋ kɛnɛ a pɩba ba dii. 4Ka dɩ ba-na pɩŋ doŋ, baalaa lɩɩ Sodom sɛmɛ kala kɔ, nɩhɩasɩŋ arɩ bapʋɔsaa kala a golli Lɔt dɩa. 5Ŋɩɩ nɛ baala-la yɩrɛ Lɔt a pɩɛsʋ, “Nɩɩ nɛ nʋhʋɔra-la sɩ kɔ ŋ teeŋ tɩtaŋɩŋ deeŋ hɛ? Kɛmba kaa kʋ lɩɩ pɩla dɩ la tʋʋ ba bʋbʋɔ-niiree.”

6Ŋɩɩ nɛ Lɔt kʋ lɩɩ chemba boiŋ niiŋ aŋ kɛŋ boro-la tɔ 7aŋ bʋl, “Nandɔmba, aɩ, má sɩ́ wʋbɔmʋŋ deeŋ ŋaa. 8Mɩ kɛŋ toloo balɩa nɛ, ba ha bɩ baal jɩŋ. Mɩ jaŋ kɛmba kʋ lɩɩ pɩma, dɩ ma ŋaa ŋɩɩ kala ma sɩɩ chɛ ba lɛ. Ama má sɩ́ wɩɩkala ŋaa nʋhʋɔraa deemba lɛ, bɛɛ wɩaa ba ŋaa mɩ nʋhʋɔraa nɛ, ʋ maga mɩ pɔba.”

9Ŋɩɩ nɛ nɩalɩŋ bʋl dɩ Lɔt sii lee-la aŋ bɩra bʋl, “Ŋ ŋaa nʋhʋɔrʋ nɛ la jaŋ lɛ, sɩ́ la wɩaa laa jɩŋ. La jaŋ dɔgʋsʋŋ a kɩɩ nʋhʋɔra-la.” Ŋɩɩ nɛ ba yigi Lɔt ta aŋ mʋ dɩ ba ŋmoo ʋ boro chei.

10Ŋɩɩ nɛ Wɩa tɩndaara-la kɛŋ Lɔt lɛrɛ jʋʋ dɩa aŋ kɛŋ boiŋ niiŋ tɔ, 11aŋ ŋaa nɩalɩŋ fa sɩ chɩŋ boiŋ niiŋ, banɩhɩasɩŋ arɩ bapʋɔsɩa-la kala nyʋlɩmɛ, ba chɛ dɩa-la boiŋ niiŋ ka.

12Ŋɩɩ nɛ Wɩa tɩndaara-la balɩa pɩɛsɛ Lɔt, “Ŋ bɩra kɛŋ nʋʋ nɛ daha, naasaanaa, hambolibiisiŋ koo hantolibiisiŋ, koo ŋ sɩ tɩɩ nʋʋkala tabalɩŋ deeŋ lɛɛ? Kɛmba dɩ ma lɩɩ daha. 13Laa chɛ dɩ la chei taŋ deeŋ nɛ. Wɩa nɩa dɩ nɩaa faasa bubunsi a tɩgɛ nɩaa deemba lɛ, ŋɩɩ nɛ tɩɩ Wɩa tɩŋ la dɩ la kʋ chei taŋ deeŋ.”

14Ŋɩɩ nɛ Lɔt lɩɩ bʋla pɩ nɩalɩŋ fa sɩɩ chɛ dɩ ba jaa ʋ toloo, “Má sii a ŋaa dee dee a lɩɩ taŋ deeŋ lɛ, bɛɛ wɩaa La TƖƖNA ka chɛ ʋ chei tabalɩŋ deeŋ nɛ.” Ama ba fa bɩɩna Lɔt faa gbieli nɛ.

15Taŋ sɩ pʋlaa kɔ, Wɩa tɩndaara-la bʋla pɩ Lɔt, “Ŋaa lɩma a kɛŋ ŋ haala arɩ ŋ toloo balɩa-la sɩ hɛ daha a lɩɩ, dɩ ŋɩɩ dee, ŋ ma jaŋ sʋʋ dɩ tabalɩŋ deeŋ nɩɩ chei.”

16Lɔt kɛŋ dɩ ʋ lɛrɛ, Wɩa tɩndaara-la kɛŋ ʋ nɩsɩŋ lɛ a kɛŋ ʋ haala ma nɩsɩŋ lɛ arɩ ʋ toloo balɩa-la kala nɩsaa lɛ a kaa lɛrɛ lɩɩ tabal-la lɛ, bɛɛ wɩaa La TƖƖNA fá ba nenige nɛ. 17Ba sɩ kɛmba lɩɩ dɛrɛ, ŋɩɩ nɛ Wɩa tɩndaara-la dɔŋɔ bʋla pɩba, “Má fá a laa ma mɩɩsɩŋ! Má sɩ́ harɩŋ daasʋ, a sɩ́ lee-kala ma chɩŋ! Má fá jɩl peele-la nyuŋ, dɩ ŋɩɩ dee ma jaŋ sʋʋ.”

18Ŋɩɩ nɛ Lɔt bʋla pɩba, “Mɩ kʋhɩasɩŋ, aɩ, mɩɩ sʋlma. 19Mɩ-na ma tɩntɩnna na ŋɩɩ ma sɩ chomi nɛ. Má kɛmmɛ woruŋ a chɩchɛ dɩ ma laa mɩ mɩɩsɩŋ, ama mɩ bɩ jaŋ wuo fá jɩl peele-la nyuŋ, wɩɩŋ deeŋ jaŋ puumi dɩ mɩ sʋʋ. 20Bee-na tabie nɛ kpagɛ daha, ʋ faasa muuri nɛ. Mɩ jaŋ wuo fá mʋ tabie-laa? Má leŋ dɩ mɩ fá mʋ lee-la a laa mɩ mɩɩsɩŋ.” 21Ŋɩɩ nɛ Wɩa tɩndaara-la dɔŋɔ bʋla pʋ, “Mɩ sɛɩ wɩɩ-la ŋ sɩ bʋla nɛ, mɩ bɩ jaŋ chei tabie-la wɩaa ŋ sɩ bʋla. 22Fá lɩma mʋ nɩmɛ, mɩ bɩ jaŋ wuo ŋaa wɩɩkala see dɩ ŋ yi Zʋaa (Zʋaa bʋbʋɔŋ nɛ tabie).”

23Wɩa kʋʋ haasɛ dɩ Lɔt jʋʋ Zʋaa. 24Wɩa leŋ jiribiiŋ chol nyiniŋ, a lɩɩ wɩa-nyuŋ a kʋ tuu dii Sodom arɩ Gomora kala, 25a dii nuhuobiinee arɩ kʋŋ na-kala sɩ hɛ tabala-la balɩamɩŋ tinteeŋ lɛ. 26Lɔt haala daasɛ harɩŋ a bɩrɩmɛ yɩsɩŋ a ŋaa jebiiŋ a chɩŋ.

27Chʋchʋɔ-fɩɛla Abɩraham sii folo mʋ lee-la ʋ fa sɩ chɩŋ La TƖƖNA sɩpaaŋ. 28Ʋ sɩ beŋ Sodom arɩ Gomora tinteeŋ dɩɩrɩŋ, dɩ nyiŋgeliŋ arɩ nyʋɔsʋŋ sii jɩjɩl wɩa-nyuŋ a nagɛ ŋɩɩ hololo a dii fuonaa-la kala.

29A tɩŋ Wɩa sɩ bil nii-la pɩ Abɩraham wɩaa, nyiniŋ dii tasɩ-la kala lɛ Lɔt fa sɩ hɔnɔ aŋ lɩɩsɛ Lɔt ta.

Lɔt arɩ ʋ toloo wɩaa

30Ŋɩɩ nɛ Lɔt arɩ ʋ toloo balɩa-la lɩɩ Zʋaa lɛ a mʋ hɛ peele-la tʋɔŋ a jʋjʋʋ bʋ-bʋa a tɩŋ fawʋllʋŋ sɩ kɛmba wɩaa. 31Tapʋlɩɩ kʋbala ʋ tol-hɩaŋ bʋla pɩ ʋ ŋaana, “La nyɩmma hɩɛsa nɛ, ka baal ma kala tuo sɩ jaŋ jaala dɩ la lʋl biiriŋ. Biiriŋ lʋlʋŋ ŋaa dʋnɩa kala wɩɩ nɛ. 32Leŋ dɩ la pɩ la nyɩmma sɩnɩŋ dɩ ʋ nyʋa bugi, a kɛnla pɩŋ dɩ la to ʋ lɛ kɛŋ biiriŋ dɩ la doho sɩ́ dɛrʋ.”

33Ʋ tɩtaŋɩŋ ba pɩ ba nyɩmma sɩnɩŋ ʋ nyʋa bugi, tol-hɩaŋ jʋʋ ʋ dɩ ʋ nyɩmma pɛ bɔsɔ, ka ʋ nyɩmma bɩ jɩŋ ŋɩɩ ʋ tolo sɩ ŋaa kʋ jʋʋ a bɩra bɩ jɩŋ ŋɩɩ ʋ sɩ ŋaa lɩɩ.

34Ʋ taŋ sɩ pʋla, ŋɩɩ nɛ tol-hɩaŋ-la bʋla pɩ ʋ ŋaana arɩ ʋ dɩ ʋ nyɩmma dɩa pɛ bɔsɔ nɛ. Ʋ sɩ, “Leŋ dɩ la bɩra pʋ sɩnɩŋ jɩnɩŋ tɩtaŋɩŋ dɩ ʋ nyʋa bugi dɩ ŋ ma jʋʋ dɩ ŋ dɩ ʋ pɩŋ. Ŋɩɩ lɛ nɛ la jaŋ to ʋ lɛ a lʋl biiriŋ dɩ la doho sɩ́ dɛrʋ.” 35Ŋɩɩ nɛ ba bɩra leŋ ba nyɩmma nyʋa sɩnɩŋ bugi tɩtaŋɩŋ, tol-bie-la ma bɩra jʋʋ ʋ dɩ ʋ pɛ bɔsɔ, ka ʋ nyɩmma bɩ jɩŋ ŋɩɩ ʋ sɩ ŋaa jʋʋ arɩ ŋɩɩ ʋ sɩ ŋaa lɩɩ.

36Ŋɩɩ nɛ Lɔt tolie-la balɩa kala ŋaa ba nyɩmma lɛ a kɛŋ luoruŋ. 37Ʋ tol-hɩaŋ lʋl hambolibie a hɛ ʋ yɩrɩŋ Mʋab, ʋ nɛ jɩnɩŋ ŋaa Mʋab tɩŋŋaa naabalɩma. 38Ʋ tol-bie ma lʋl hambolibie, a ma hɛ ʋ yɩrɩŋ Bɛŋ-Ami, ʋ ma nɛ ŋaa Amɔŋ tɩŋŋaa naabalɩma jɩnɩmba ŋ-la.

Currently Selected:

WƖAA DƖ-SUOMUŊ 19: SIS

Highlight

Copy