WƖAA DƖ-SUOMUŊ 18
18
Nʋhʋɔraa batori kɔ Abɩraham teeŋ
1Ŋɩɩ nɛ La TƖƖNA kɛŋ ʋ tɩtɩa kʋ dagɛ Abɩraham a kpagɛ Mamɩrɛ tɩɩ-bala-la, bʋa-la lɛ dɩ Abɩraham hɔŋ ʋ lɛbɩŋ boiŋ niiŋ wɩɩ-hɛɛ-siesee. 2Ʋ kɛŋ ʋ nyuŋ je a na baalaa batori dɩ ba mʋ chɩŋ sɩpaaŋ. Ʋ sɩ naba, ʋ sii ʋ lɛbɩŋ boiŋ niiŋ a mʋ chemba lɩma lɩma. Ʋ sɩ chemba, ʋ tuu kpirimi ba sɩpaaŋ, 3aŋ bʋla pɩ ba dɔŋɔ, “Mɩ kʋhɩaŋ, dɩ ma tʋɔŋ nɛ tɔrɛ mɩ nyuŋ, má sɩ́ mɩ-na ma tɩntɩnna kiele bal. 4Má leŋ dɩ mɩ kɛŋ lɩɩŋ mʋa kɔ dɩ ma sɔŋ ma naasɩŋ aŋ wiesi tɩa deeŋ bʋbʋɔŋ. 5Ma sɩ zilmi ŋɩɩ a kɔ mɩ-na ma tɩntɩnna dɩa, má leŋ dɩ mɩ ŋaa kʋdiilee pɩma dɩ ma dii aŋ mʋ.”
Ŋɩɩ nɛ ba bʋl, “Ŋ lɔlʋŋ nɛ hɛ nɩmɛ, la sɛyɛ nɛ.”
6Ŋɩɩ nɛ Abɩraham fá jʋʋ lɛbɩŋ tʋɔŋ Sara teeŋ, a bʋla pʋ, “Ŋaa munuŋ gbansɩŋ batori a ŋaa kʋdiilee lɩma.”
7Abɩraham jʋʋ na-dɩa a kɛŋ na-bie sɩ kɛŋ nammɩa a pɩ ʋ tɩntɩnna ʋ kpʋ a bɩrɩmɛ lɩma lɩma. 8Ʋ kɛŋ nayɩl-nʋʋŋ, nayɩlɩŋ arɩ nammɩa-la ba sɩ chɔ kaa kʋ lɩɩ tɩa-la bʋbʋɔŋ pɩba ba didii, ka ʋ gbɛrɛ.
9Ŋɩɩ nɛ ba pɩɛsɛ Abɩraham, “Nɩɩ nɛ ŋ haala Sara hɛ?”
Ʋ sɩ ʋ hɛ lɛbɩŋ tʋɔŋ.
10Ŋɩɩ nɛ La TƖƖNA bʋla pɩ Abɩraham, “Harɩŋ jɩna, mɩ jaŋ mɩɩra kɔ bʋa deeŋ tɩtɩa lɛ dɩ ŋ haala Sara lʋl hambolibie.”
Bʋa-la lɛ dɩ Sara chɩŋ Abɩraham harɩŋ lɛbɩŋ boiŋ niiŋ a jijegili. 11Bʋa deeŋ lɛ dɩ Abɩraham arɩ Sara hɩɛsa, Sara paala kieli biiriŋ lʋlʋŋ. 12Sara fɩɛla mɔŋ a hɛ ʋ tʋɔŋ aŋ bʋl, “Mɩ sɩ hɩɛsa ŋ-la! Mɩ bala ma hɩɛsɛ, mɩ bɩra jaŋ bɩbɩɩnɛ baalaa wɩaa?”
13Ŋɩɩ nɛ La TƖƖNA pɩɛsɛ Abɩraham, “Bɛɛ nɛ tɩɩ Sara mɔŋ ʋ tʋɔŋ lɛ, ʋ bɩɩna ʋ sɩ hɩɛsa wɩaa ʋ bɩra bɩ jaŋ wuo lʋl bie? 14Wɩɩ nɛ hɛ nɩmɛ La TƖƖNA bɩ ʋ doluŋ kɛnɛɛ? Bʋa deeŋ tɩtɩa mɩ sɩ daga lɛ, mɩ jaŋ mɩɩra kɔ dɩ Sara lʋl hambolibie.”
15La TƖƖNA sɩ pɩɛsɛ ŋɩɩ, fawʋllʋŋ kɛŋ Sara, ʋ nyɩɛ wɩaa arɩ ʋ bɩ mɔmɔ.
Ŋɩɩ nɛ La TƖƖNA bʋl, “Ŋ mɔmɔ nɛ.”
Abɩraham sʋla laa Sodom tɩŋŋaa
16Baala-la batori sɩ sie dɩ ba viiri, ba to Sodom dɩɩrɩŋ nɛ. Abɩraham kɛmba mʋ hɛ wombiiŋ lɛ. 17Ŋɩɩ nɛ La TƖƖNA bʋl, “Wɩɩ-la mɩ sɩɩ chɛ dɩ mɩ ŋaa, ʋ bɩ maga dɩ mɩ kaa faa Abɩraham. 18Abɩraham doho nɩaa jaŋ pʋŋ a yʋgɛ a kɛŋ doluŋ ma. Ba lɛ nɛ mɩ jaŋ to a pɛ dʋnɩa nɩaa kala lɛ. 19Mɩ nɛ lɩɩsʋ dɩ ʋ dagɛ ʋ biiriŋ arɩ ʋ doho nɩaa sɩ jaŋ to harɩŋ kɔ mɩ wombiiŋ dɩ ba kɛŋ wʋtɩtɩɩ, a ŋɩŋaa wɩaa ba bʋa lɛ, dɩ ŋɩɩ leŋ dɩ mɩ ŋaa wɩɩ-la mɩ sɩ bʋla pɩ Abɩraham arɩ mɩ jaŋ ŋaa pʋ.”
20Ŋɩɩ nɛ La TƖƖNA bʋl, “Mɩ nɩa arɩ Sodom arɩ Gomora nɩaa ŋaa nɩbɔmɔ nɛ a faasaa ŋaa wʋbɔŋŋɔɔ. 21Mɩ jaŋ tuu na wɩalɩŋ ba sɩ ŋaa sɩ nagɛ ŋɩɩ nɩaa bubunsi ba bɔmʋŋ lɛ, dɩ ʋ ŋaa wʋtɩtɩɩ dɩ mɩ jɩŋ.”
22Ŋɩɩ nɛ baala-la batori tʋɔŋ balɩa mɩɩra chaasɛ Sodom dɩɩrɩŋ a mʋmʋ aŋ ka Abɩraham ha chɩŋ La TƖƖNA sɩpaaŋ. 23Abɩraham sʋʋsa yi La TƖƖNA a pɩɛsʋ, “Ŋ jaŋ kpʋ tʋɔpʋl tɩŋŋaa arɩ nɩbɔŋŋɔɔ kala hɛ dɔŋɔɔ? 24Ka dɩ tʋɔpʋl tɩŋŋaa nɛ ŋaa mahɩŋ balɩa arɩ fii taŋ-la lɛ, ŋ jaŋ kpʋ ba kala koo ŋ jaŋ lemba a tɩŋ tʋɔpʋl tɩmma-la wɩaa? 25Ʋ bɩ kɩsɛ dɩ ŋ kpʋ tʋɔpʋl tɩŋŋaa arɩ nɩbɔŋŋɔɔ kala hɛ dɔŋɔ lɛɛ? Ŋɩɩ bɩ kɩsɛɛ, Nɩɩ-la sɩ jaŋ dii dʋnɩa kala sarɩya sɩ jaŋ ŋaa ŋɩɩ?”
26Ŋɩɩ nɛ La TƖƖNA bʋl, “Dɩ mɩ nɛ na nɩaa mahɩŋ balɩa arɩ fii Sodom lɛ sɩ kɛŋ tʋɔpʋla, a tɩŋ tʋɔpʋl tɩmma-la wɩaa, mɩ jaŋ joŋo chɛba.”
27Ŋɩɩ nɛ Abɩraham bɩra bʋl, “Lɛɛlɛ mɩ nyuŋ duoro nɛ dɩ mɩ wuo bʋl wɩaa La TƖƖNA teeŋ, mɩ paala bɩ kʋŋkala ŋaa ŋ sɩpaaŋ. 28Dɩ nɩaa mahɩŋ balɩa arɩ banɔŋ nɛ ŋaa tʋɔpʋl tɩŋŋaa taŋ-la lɛ, ŋ ha jaŋ kpʋ nɩalɩŋ?”
Ŋɩɩ nɛ Wɩa bʋl, “Dɩ tʋɔpʋl tɩŋŋaa mahɩŋ balɩa arɩ banɔŋ nɛ hɛ nɩmɛ, mɩ bɩ jaŋ chei taŋ-la nɩaa kala.”
29Ŋɩɩ nɛ Abɩraham bɩra pɩɛsɛ, “Ka dɩ nɩaa mahɩŋ balɩa nɛ ŋaa tʋɔpʋl tɩmma nɩmɛ, ŋ jaŋ kpʋbaa?” La TƖƖNA bʋl, “Dɩ nɩaa mahɩŋ balɩa nɛ ŋaa tʋɔpʋl tɩmma nɩmɛ, mɩ bɩ jaŋ chei taŋ-la.”
30Ŋɩɩ nɛ Abɩraham bɩra bʋl, “Mɩ Tɩɩna, sɩ́ baanɩŋ na, leŋ dɩ mɩ pɩɛsɛ, ka dɩ nɩaa mara arɩ fii nɛ hɛ nɩmɛ?” Ʋ bʋl, “Mɩ bɩ jaŋ chei taŋ-la dɩ mɩ nɛ na nɩaa mara arɩ fii sɩ kɛŋ tʋɔpʋla.”
31Abɩraham bɩra bʋl, “Lɛɛlɛ mɩ nyuŋ sɩ duoro mɩ wuo bʋl wɩaa La TƖƖNA teeŋ, mɩ bɩra jaŋ pɩɛsɛ, ka dɩ nɩaa mara nɛ hɛ nɩmɛ a ŋaa tʋɔpʋl tɩmma?”
Ŋɩɩ nɛ La TƖƖNA bʋl, “A tɩŋ nɩaa mara-la wɩaa mɩ bɩ jaŋ chei taŋ-la.”
32Ŋɩɩ nɛ Abɩraham bɩra bʋl, “Mɩ Tɩɩna Wɩa, sɩ́ baanɩŋ na, leŋ dɩ mɩ ha pɩɛsɛ wɩɩŋ deeŋ. Ka dɩ nɩaa fii nɛ hɛ nɩmɛ a ŋaa tʋɔpʋl tɩmma?”
Ŋɩɩ nɛ La TƖƖNA Wɩa bʋl, “Dɩ nɩaa fii nɛ hɛ nɩmɛ, mɩ bɩ jaŋ chei taŋ-la.”
33La TƖƖNA Wɩa arɩ Abɩraham sɩ bʋl wɩaa dɛrɛ, ʋ ta Abɩraham, ʋ mʋ dɩa.
Currently Selected:
WƖAA DƖ-SUOMUŊ 18: SIS
Highlight
Share
Copy
Want to have your highlights saved across all your devices? Sign up or sign in
©Ghana Institute of Linguistics Literacy and Bible Translation 1984, 2014
