WƖAA DƖ-SUOMUŊ 17

Ba keri nɩaa penee

1Abɩram sɩ ŋaa jɩsɩŋ mahɩŋ banɛsɛ arɩ fii arɩ nibi, La TƖƖNA kɛŋ ʋ tɩtɩa kʋ dagʋ a bʋla pʋ, “Mɩ nɛ ŋaa Wɩa doluŋ kala Tɩɩna, kɛŋ tʋɔpʋla mɩ teeŋ. 2Mɩ jaŋ leŋ dɩ nii-la mɩ sɩ bile mɩ dɩŋ pɛgɛ chɩŋ a leŋ dɩ ŋ doho nɩaa pʋŋa yʋgɛ kɩŋkɛŋ.” 3Ŋɩɩ nɛ Abɩram tele chu, Wɩa bʋla pʋ, 4“Niiŋ deeŋ nɛ mɩ bil mɩ dɩŋ pɛgɛ: Ŋ nɛ jaŋ ŋaa dʋnɩa nɩaa kala nyɩmma. 5Ba bɩra bɩ jaŋ yɩrɩŋ Abɩram, ŋ yɩrɩŋ jaŋ ŋaa Abɩraham, bɛɛ wɩaa mɩ jaŋ leŋ dɩ ŋ ŋaa tintee daŋ nyɩmma. 6Mɩ jaŋ leŋ dɩ ŋ pʋŋ. Ŋ doho nɩaa jaŋ ŋaa tintee daŋ, dɩ kuoroo lɩɩ ba tʋɔŋ. 7Mɩ jaŋ leŋ dɩ nii-la mɩ sɩ bile mɩ dɩ ŋ doho nɩaa arɩ nɩalɩŋ sɩ jaŋ to ŋ harɩŋ kɔ pɛgɛ, dɩ ʋ chɩŋ kpaŋkpaŋ a kaa mʋ wuu. Mɩ jaŋ ŋaa ŋ dɩ nɩalɩŋ sɩ jaŋ to ŋ harɩŋ kɔ Wɩa. 8Kɛnaŋ tinteeŋ deeŋ lɛ ŋ sɩ hɛ a ŋaa nʋhʋɔrʋ ŋ-la, mɩ jaŋ joŋu pɩ ŋ dɩ ŋ doho nɩaa dɩ ʋ ŋaa ma kʋŋ a kaa mʋ wuu dɩ mɩ ŋaa ba Wɩa.”

9Ŋɩɩ nɛ Wɩa bɩra bʋla pɩ Abɩraham, “Ŋ-na Abɩraham arɩ ŋ doho nɩaa, má to nii-la mɩ sɩ bile mɩ dɩ ma pɛgɛ a kaa mʋ wuu. 10Nii-la mɩ sɩ bile mɩ dɩŋ arɩ ŋ doho nɩaa pɛgɛ nɛ ŋ-la: Má keri hambolibie na-kala ma sɩ lʋla peniŋ. 11Peniŋ keriŋ nɛ jaŋ ŋaa mɩ dɩ ma pɛgɛ nii-bilii-la magɩlɩŋ. 12Má keri hambolibie sɩ ŋaa tapʋlaa chori peniŋ, dɩ ʋ ŋaa ŋ doho nʋʋ koo dɩ ʋ ŋaa yoŋ ma sɩ yɔbɔ nʋhʋɔraa teeŋ. 13Nii-la mɩ sɩ bile mɩ dɩ ma pɛgɛ jaŋ hɛ nɩmɛ a mʋmʋ wuu, dɩ ma kikeri ma doho nɩaa arɩ yosu-la ma sɩ yɔbɔ penee. 14Dɩ baal-na kala nɛ bɩ ʋ peniŋ kere, ʋ bɩ jaŋ ŋaa mɩ nʋʋ, bɛɛ wɩaa ʋ bɩ nii-la mɩ sɩ bile ka to.”

15Ŋɩɩ nɛ Wɩa bʋla pɩ Abɩraham, “Lɛɛlɛ bɩra sɩ́ ŋ haala Saraɩ yɩrʋ, yɩyɩrʋ Sara. 16Mɩ jaŋ pɛ ʋ lɛ dɩ ma lʋl hambolibie, a bɩra pɛ ʋ lɛ dɩ ʋ ŋaa tintee daŋ naaŋ, dɩ kuoroo lɩɩ ba tʋɔŋ.”

17Ŋɩɩ nɛ Abɩraham kɛŋ sɩaa chu tinteeŋ a mɔŋ aŋ bʋl ʋ tʋɔŋ lɛ, “Nʋʋ jaŋ wuo yi jɩsɩŋ zɔlɔ aŋ lʋl bie? Sara ma sɩ ŋaa jɩsɩŋ mahɩŋ banɛsɛ arɩ fii jaŋ wuo lʋl bii?” 18Ŋɩɩ nɛ Abɩraham bʋla pɩ Wɩa, “Dɩ ŋ nɛ jaŋ pɛ Ɩsɩmɛl lɛ.”

19Ŋɩɩ nɛ Wɩa bʋl, “Mɩ sɛyɛ nɛ, ama ŋ haala Sara jaŋ lʋl hambolibie, dɩ ŋ hɛ ʋ yɩrɩŋ Aɩzɩk. Mɩ jaŋ bil nii-la sɩ bɩ dɛrɛ a pɩ Aɩzɩk arɩ ʋ doho nɩaa kala. 20Ɩsɩmɛl ma wɩaa, mɩ nɩa nɛ, mɩ jaŋ pɛ ʋ lɛ a leŋ dɩ ʋ doho nɩaa pʋŋ woruŋ. Mɩ jaŋ leŋ dɩ ʋ ŋaa kuori-gentisiŋ fii arɩ balɩa nyɩmma, dɩ ʋ doho nɩaa pʋŋ woruŋ. 21Ama mɩ ha jaŋ bil niiŋ mɩ dɩ Aɩzɩk, pɛgɛ, bile Sara sɩ jaŋ lʋl harɩŋ jɩna bʋa deeŋ lɛ a leŋ dɩ ʋ chɩŋ.” 22Wɩa sɩ bʋl wɩaa pɩ Abɩraham dɛrɛ, ʋ leŋu aŋ mʋ.

23Tapʋlɩɩ-la tɩtɩa Wɩa sɩ bʋl ŋɩɩ, Abɩraham kɛŋ ʋ bie Ɩsɩmɛl arɩ baala-la kala ba sɩ lʋla ʋ dɩa lɛ, arɩ yosu-la kala ʋ sɩ yɔbɔ a keri ba penee. 24Abɩraham fa ŋaa jɩsɩŋ mahɩŋ banɛsɛ arɩ fii arɩ nibi nɛ aŋ-na keri ʋ peniŋ. 25Ʋ nanʋala Ɩsɩmɛl ma fa ŋaa jɩsɩŋ fii arɩ batori nɛ aŋ ma keri ʋ peniŋ. 26Chɛ-bala nɛ Abɩraham arɩ Ɩsɩmɛl kala keri ba penee 27a keri baala-la kala ba sɩ pɛ lʋl Abɩraham dɩa lɛ, arɩ yosu-la kala ba sɩ yɔbɔ nʋhʋɔraa teeŋ.

Currently Selected:

WƖAA DƖ-SUOMUŊ 17: SIS

Highlight

Copy