WƖAA DƖ-SUOMUŊ 16

Haga arɩ Ɩsɩmɛl

1Abɩram haala Saraɩ bɩ bii kala lʋla. Ama ʋ fa kɛŋ ketiiŋ nɛ, baa yɩrɛ Haga a lɩɩ Ijipiti tinteeŋ. 2Ŋɩɩ nɛ Saraɩ bʋla pɩ Abɩram, “La TƖƖNA bɩ leŋe mɩ lʋl bii, mɩɩ sʋlʋŋ, kɛŋ mɩ ketiiŋ Haga dɩ ʋ lʋl biiriŋ pɩmɛ.”

Abɩram sɛɩ wɩɩ-la Saraɩ sɩ bʋla. 3Abɩram hɛ Kɛnaŋ tinteeŋ lɛ jɩsɩŋ fii nɛ ka ʋ haala Saraɩ joŋ ʋ ketiiŋ Haga a pʋ, ʋ ŋaa ʋ haal. 4Abɩram arɩ Haga pɛ bɔsɔ ʋ kɛŋ luoruŋ.

Haga sɩ na dɩ ʋ kɛŋ luoruŋ, ʋ sɩɩŋ bɩra bɩ Saraɩ ka su. 5Saraɩ bʋla pɩ Abɩram, “Wɩɩŋ deeŋ sɩɩ ŋaa mɩ lɛ ŋ nɛ tɩɩ. Mɩ nɛ joŋ mɩ ketiiŋ pɩŋ, ʋ sɩ na dɩ ʋ kɛŋ luoruŋ, ʋ sɩɩŋ bɩra bɩ mɩɩ su. La TƖƖNA nɛ jaŋ laa wɩɩ-la bʋla pɩ la kala.”

6Ŋɩɩ nɛ Abɩram bʋla pɩ Saraɩ, “Ŋ ketiiŋ hɛ ŋ nɩsɩŋ lɛ nɛ, ŋaaʋ wɩɩ-la kala ŋ sɩɩ chɛ.” Ŋɩɩ nɛ Saraɩ dɔgɩsʋ woruŋ, ʋ lɩɩ fá.

7Wɩa tɩndaara na Haga dɩ ʋ hɛ tintee-hɩlɩŋ lɛ a kpagɛ lɩɩ-bulo. Lɩɩ-bulo-la hɛ lee-la ba sɩɩ yɩrɛ Suu wombiiŋ nɛ. 8Ŋɩɩ nɛ Wɩa tɩndaarʋ-la pɩɛsʋ, “Saraɩ ketiiŋ Haga, nɩɩ nɛ ŋ lɩɩ a mʋmʋ nɩɩ?”

Ŋɩɩ nɛ Haga bʋl, “Mɩ fáa kagɛ mɩ dɩa-naaŋ lɛ nɛ.”

9Wɩa tɩndaarʋ-la bʋla pʋ, “Mɩɩra mʋ ŋ dɩa-naaŋ teeŋ a sɛɩ pʋ. 10Mɩ jaŋ leŋ dɩ ŋ kɛŋ doho a pʋŋ woruŋ. Nʋʋ bɩ jaŋ wuo dɩɩsɛ ba kala.”

11Wɩa tɩndaarʋ-la bɩra bʋla pʋ,

“Ŋ kɛŋ luoruŋ nɛ,

ŋ jaŋ lʋl hambolibie

a hɛ ʋ yɩrɩŋ Ɩsɩmɛl,

bɛɛ wɩaa Wɩa na ŋ nenige nɛ.

12Bile jaŋ waa a nagɛ kaku-werigiŋ,

ʋ dɩ nʋʋkala bɩ jaŋ sɩŋ.

Ʋ jaŋ tɛrɛ ʋ naambiiriŋ teeŋ.”

13Ʋ sɩ bʋl ŋɩɩ dɛrɛ, Haga bʋl: “Lɛɛlɛ mɩ na Wɩa arɩ mɩ sɩɩŋ aŋ bɩ sʋba. Mɩ jaŋ hɛ ʋ yɩrɩŋ ‘Wɩa-la sɩ namɛ’.” 14Ŋɩɩ nɛ ba kɛŋ lɩɩ-bul-sɩɩ-la sɩ pɩŋ Kadɛs arɩ Bɛrɛd pɛgɛ yɩyɩrɛ Bɛɛ-Lahaɩ-Roi. Bɛrɛd bʋbʋɔŋ nɛ: ‘Wɩa-la sɩ weye a namɛ viliŋ lɛ’.

15Ŋɩɩ nɛ Haga lʋl hambolibie pɩ Abɩram. Abɩram hɛ ʋ yɩrɩŋ Ɩsɩmɛl. 16Haga sɩ lʋl Ɩsɩmɛl, bʋa-la lɛ dɩ Abɩram ŋaa jɩsɩŋ mahɩŋ banɛsɛ arɩ balɩdʋ.

Currently Selected:

WƖAA DƖ-SUOMUŊ 16: SIS

Highlight

Copy