Roma 2
2
Ndjaba œ wa ngbanga pa azu kɔ
1Endje wu oyo zœ nene, œɓœ, œdœ ɓœ kœdœ œɗe, á sœ kœwa ngbanga pa anga zœ. Gbambanœ nene, ɓœ kœsœ kœwa ngbanga pa uzu, ɓœ sœ ndje kœwa o'o ga tœ zœ dœ tœ zœ mbœrœ ɓœ sœ ndje awa bale œɓœ á ɓœ sœ kœwa ngbanga. 2Andaa a wusœ nœ adœke kœwa ngbanga nœ Ndjaba sœ kœmbœrœtœ ye lœ adja o'o mbœrœ azu á endje sœ kœmbœrœ mara œrœ ataa. 3Yé œɓœ á ɓœ sœ kœpa adœke azu sœ kœmbœrœ ekperœ, andaa œɓœ ndje ɓœ sœ tœ kœmbœrœ awa bale, ɓœ gbe adœke Ndjaba œ wa ngbanga pa zœ nœ zœ nene a? 4Ɓœ sœ kœwu egerœ ayo nœ Ndjaba, dœ ɔtshɔ lɔsu ndje dœ ugu lɔsu nœ ye ga ndœ zœ gbambanœ a? Ɓœ wuwusœ nœ nene adœke ayo nœ Ndjaba sœ kœmbœrœ adœke ɓœ fa lɔsu zœ a? 5Kashe mbœrœ ɔgbɔ lɔsu nœ zœ, dœ gbɔkumu nœ zœ, ɓœ sœ kœpara adœke Ndjaba za egerœ djofele fœ ɓœ dœ lɔkɔ á tshe ma ókó á ma kœwa ngbanga nœ ye á sœ ndjii. 6Gbambanœ nene, Ndjaba œ to fœ uzu dœ uzu kœli dœ œneke á tshe mbœrœ. 7Ndjaba œ za soro á ka nene fœ azu neke á endje sœ kœmbœrœ ɔtshɔ akwa, á sœ dœ kœru lɔsu, á sœ kœpara awa kœgbɔ mokɔ, kœlɨsœtœ œdœ pe ɔkɔ á tshu nene. 8Kashe azu á endje vwaratœ endje tœ adja o'o á tshapu kœza awa œrœ á sœ ndjii, ókó œdœ kœyiangbarœ nœ Ndjaba œ te ga pa endje. 9Azu kɔ á endje sœ kœmbœrœ ekperœ, œ wu kanga œdœ egerœ oyo: œdœ Ayuda œdœ ndje angbɨ Azu. 10Kashe uzu kɔ á tshe kœsœ kœmbœrœ ɔtshɔrœ, Ndjaba œ za mokɔ, kœlɨsœtœ œdœ kœsœ gee fœ she; Yuda utshunœ œdœ angbɨ uzu manda nœ. 11Gbambanœ nene, Ndjaba wuwu tshatshu uzu nene.
12Azu á endje wuwusœ awa akwa nene, œdœ endje kœtshu, awa akwa gugu dœ ádá bale pa endje nene. Kashe endjeneke kɔ á endje wusœ awa akwa, œdœ endje kœmbœrœ ekperœ, Ndjaba œ wa ngbanga pa endje liaka awa akwa. 13Gbambanœ nene, azu á endje dji awa akwa kolœ ndœ kœdji tœnœ, endje sœsœ ndjii tœ ala Ndjaba nene. Kashe endjeneke á endje mbœrœtœ endje lindœ awa akwa, endje dá lœ ndjii tœ ala Ndjaba. 14Lɔkɔ á angbɨ azu á endje wuwusœ awa akwa nene kœsœ kœmbœrœtœ endje lindœ nœ, œ sœ kœma ɓata œ sœ lœ endje andaa endje gugu dœ tœnœ nene. 15Atamœ, œ sœ kœma ɓata endje sú awa akwanœ ga tœ lɔsu endje. Œdœ endje kœmbœrœ ɔtshɔrœ, œdœ endje kœmbœrœ ndje ekperœ; gbetshelœ nœ endje sœ kœyisœ nœ fœ endje kɔ œdœ ndje œneke á sœ tœ lɔsu endje á sœ kœwa ngbanga too kœpa o'o tshapa endje. 16Kɔkɔ asœke œ wuta bala ngbɨ dœ lɔkɔ á Ndjaba œ wa ngbanga pa kœmbœrœtœ lœ ubunœ nœ azu lœ awa nœ Yisu Kristu. Asœ kœdœ Ɔtshɔ O'onœ á mœ sœ tœ kœpandœ nœ.
Sharapu nœ azu Israyele
17Kashe œɓœ á ɓœ dœ Yuda, á ɓœ ka ga pa awa akwa á sœ tœ kœdu okoro zœ mbœrœ Ndjaba nœ zœ, 18œɓœ á ɓœ wusœ gbetshelœ nœ ye, œɓœ á awa akwa nœ ye yisœ œrœ fœ ɓœ adœke ɓœ wusœ kœke œrœ á sœ dœ ɔtshɔnœ, 19œɓœ á ɓœ gbe adœke ɓœ kœdœ ayi kœgbota aayibula, ɨngbɨsho mbœrœ azu á endje sœ lœ ubu osho, 20œɓœ, ɓœ gbe adœke ɓœ kœdœ ayi kœmbœrœ ala fœ azu á endje wuwusœ œrœ nene œdœ amba azu. Ɓata á ɓœ wusœ awa akwa á dœ́ ada kœwusœrœ œdœ adja o'o. 21Œɓœ á ɓœ kœdœ ayi kœyisœrœ fœ azu, mbœrœ gaɗe á ɓœ sœsœ kœyisœ œrœ fœ ɓœ dœ tœ zœ nene a? Ɓœ sœ kœyisœ œrœ adœke: Zɨzɨ angba nene, yé mbœrœ gaɗe á ɓœ sœ kœzɨ angba a? 22Ɓœ sœ kœpakata kœlo dœ awo azu, mbœrœ gaɗe á ɓœ lo dœ awo azu a? Ɓœ sœ kœtshene andjaba, yé mbœrœ gaɗe á ɓœ kpa zɨ angba œrœ tshelœ anda kœdonga dœ andjaba a? 23Ɓœ sœ kœdu okoro zœ adœke ɓœ wusœ awa akwa, kashe ɓœ sœsœ kœlɨsœ ɨ'ɨrɨ Ndjaba nene dœ kœmbœrœ œrœ á sœ kœndɨ awa akwa. 24Gbambanœ nene, endje sú ɓala Buku nœ Ndjaba adœke: «Angbɨ azu œ gu œsœ Ndjaba kolœ manda 'e.»
25Ádá gaza sœ tœnœ œdœ ɓœ kœsœ kœmbœrœtœ zœ lindœ awa akwa. Ká ɓœ kœsœsœ kœmbœrœtœ zœ lindœ awa akwa nene, ɓœ li ndje dœ uzu á tshe wawa gaza nene. 26Œdœ angbɨ uzu á tshe wawa gaza nene kœsœ kœmbœrœtœ ye lindœ awa akwa, endje wu ndje she ɓata uzu á tshe wa gaza. 27Uzu á tshe wawa gaza nene, á tshe kœsœ kœmbœrœtœ ye lindœ awa akwa, tshe wa ngbanga pa zœ; œɓœ á ɓœ wa gaza, á sœ dœ awa akwa kashe á sœsœ kœmbœrœtœ zœ lindœ nœ nene. 28Œ dœ́dœ́ œneke á a wu ɓa ushu dá mbœrœ uzu tœ Yuda nene, œ dœ́dœ́ ndje sherœwa uku gaza nœ ɔkɔ dá mbœrœ gaza nene. 29Kashe adja Yuda kœdœ tsheneke á tshe dœ Yuda ɓa tœ lɔsu ye. Adja gaza kœdœ œnœ lɔsu uzu, œneke á to lœ Ɨshirɨ kashe œ toto lœ mbeti nœ awa akwa nene. Mara uzu ataa, kolœ Ndjaba dá donga she kashe azu nene.
Currently Selected:
Roma 2: mnh
Highlight
Share
Copy

Want to have your highlights saved across all your devices? Sign up or sign in
© 2020 ACOTBA-SUBO