Romafɔ 8
8
Nkpatsia Dɩnka Bulu Ɔŋɛ Amʋ Asʋnsʋ
1Ɩnɩ sʋ sei a, Bulu mɛ́ɛtra ha aha ánɩ́ amʋ́a Kristo Yesunyɔ babwɛ kʋlɛ ɩpɔn. 2Tsufɛ Kristo Yesu sʋ Ɔŋɛ Wankɩhɛ tumiá ɩtɛha nkpa laha anɩlagyi ɩwɩ tsu lakpanbwɛ mʋ́a lowu ɩbɩtɔ. 3Mose Mbla amʋ ɩmɛtalɩ lɛ anɩ tsu anɩ lakpantɔ. Tsufɛ anɩ tsiatɔ dada amʋʋ ɩtɛha anɩtɔbwɛ lakpan amʋ ɩmɛha anɩmegyi mbla amʋ atosunahɛsʋ. Tamɛ Bulu lɔtsʋn ɔkpa pɔpwɛsʋ hɔ anɩ. Ɔlɔwa mʋ Bi onuto lɛba fɛ nyankpʋsa ánɩ́ ɔtɔbwɛ lakpan, tamɛ mʋ mʋ́ ɔmɔbwɛ lakpan. Bulu lɔtsʋn mʋ lowusʋ mɔ anɩ tsiatɔ dada amʋʋ lakpan legyi mʋ́sʋ amʋ. 4Ɔlɔbwɛ mʋ́ alɩ, mɛnɩ nɩ anɩbuo Ɔŋɛ Wankɩhɛ amʋ a, abɛ́talɩ tsia tsiatɔ wanklaan amʋʋ tɛkɩ mbla amʋ losuna amʋ, anɩmɛ́ɛtra tsia anɩ tsiatɔ dada amʋ. 5Tsufɛ lalahɛ aha ánɩ́ tsiatɔ dada amʋʋ ɩtɔbwɛ lakpan ɩdɛ amʋ́sʋ gyi bʋtɔgywɩɩn. Tamɛ aha ánɩ́ bʋbuo Ɔŋɛ Wankɩhɛ amʋ a, tɔá Ɔŋɛ amʋ tekle bʋtɔgywɩɩn. 6Ɔha ánɩ́ lakpan lagyi mʋ tsiatɔsʋ tenya lowu tsu mʋ́tɔ. Tamɛ ɔha ánɩ́ Ɔŋɛ Wankɩhɛ lagyi mʋsʋ mʋ́ tenya nkpa mʋ́a iwilwii. 7Tsufɛ ɔha ánɩ́ lakpan lagyi mʋ tsiatɔsʋ tolu Bulu. Ɔtamagyi Bulu mblasʋ, tsufɛ ɔmɛ́ɛtalɩ gyi mʋ́sʋ ɛkɛkɛɛkɛ. 8Aha ánɩ́ lakpan lagyi amʋ́ tsiatɔsʋ bʋmɛ́ɛtalɩ gyi Bulu ansɩ.
9Tamɛ Bulu Ɔŋɛ bʋ mlɩtɔ lɛlɛ. Mʋ́ sʋ mlɩmɛ́ɛtra tsia mlɩ tsiatɔ amʋʋ lakpan legyi mʋ́sʋ amʋ. Mlɔ́bwɛ tɔá Ɔŋɛ Wankɩhɛ amʋ tekle. Nɩ ɔkʋ má Kristo Ɔŋɛ amʋ a, omegyi mʋ klɛ. 10Ɩbʋ mʋ́tɔá lakpan sʋ mlɩ nyankpʋsa-oyi anfɩ obówu. Tamɛ nɩ Kristo bʋ mlɩtɔ a, mlɩ ɔkla bʋ nkpa. Tsufɛ Bulu latsu mlɩá mlɩ asʋn da ɔkpa mʋ ansɩtɔ. 11Bulu lɔkʋsʋa Kristo tsu afulitɔ lɛlɛ. Mʋ́ sʋ nɩ mʋ Ɔŋɛ bʋ mlɩtɔ a, mʋmʋ ɔbɔ́tsʋn Ɔŋɛ amʋsʋ ha mlɩ nyankpʋsa-oyi amʋʋ ibówu amʋ nkpa pɔpwɛ.
12Ɩnɩ sʋ mɩ apio, imehian ánɩ́ abɛ́tra tsia anɩ tsiatɔ dada amʋ, bwɛ tɔá anɩ ɔwɔlɩ lalahɛ tekle. Mboun lehian ánɩ́ abɔ́bwɛ tɔá Ɔŋɛ Wankɩhɛ tekle. 13Tsufɛ nɩ mletsia mlɩ tsiatɔ dada amʋtɔ a, mlówu tsitsa. Tamɛ nɩ mlɔtsʋn Bulu Ɔŋɛ amʋsʋ kina mlɩ nyankpʋsa-oyi amʋ apɛ bwɛ a, mlétsia nkpa ánɩ́ ɩtamata. 14Tsufɛ aha ánɩ́ baha Bulu Ɔŋɛ dɛ amʋ́ kpa gyi Bulu abi. 15Megyi Ɔŋɛá ɩbɛ́ha mlɔ́bwɛ nkpábi, tsia nya ifu Bulu lɔpʋwa mlɩtɔ. Mboun Ɔŋɛ amʋ lɔbwɛ mlɩ Bulu abi. Ɔŋɛ amʋ sʋ anɩtɛtalɩ su kpoli Bulu anɩaa, “Abba, mɩ Sɩ!” 16Ɔŋɛ amʋ totsula ha anɩ ánɩ́ lɛlɛ a, Bulu abi anɩgyi. 17Nɩ Bulu abi anɩgyi a, mʋmʋ anɩgyi mʋ atɔ agyipʋ. Anɩa Kristonyɔ obégyi mʋ atɔ. Tsufɛ nɩ awun Kristo ipian amʋ kʋ a, mʋmʋ abénya mʋ numnyam amʋ ɛ kʋ.
Numnyam Ánɩ́ Abénya Ɛkɛkʋ
18Nɩ nɛkɩ numnyam ánɩ́ ɩda gyo anɩ, Bulu ɔbɛ́lɛ suna anɩ a, ipian anfɩ anɩdewun brɛ anfɩtɔ mɔfʋn mʋ́ ɔtɩnɛtɩnɛ. 19Bulu atɔ bwɛhɛ fɛ́ɛ́ bʋhɩɛ bʋdɛ ɔkpa kɩ ha ɛkɛá Bulu ɔbɛ́lɛ mʋ abi numnyam ɔwan. 20Tsufɛ Bulu atɔ bwɛhɛ fɛ́ɛ́ lasi ɩda kɛkɛ. Megyi mʋ́ onuto apɛ igyi. Mboun mʋlɔbwɛ mʋ́ alɩ, ɩha mʋ atɔ bwɛhɛ fɛ́ɛ́ ɩkɩ ɔkpa 21ánɩ́ ɛkɛkʋ a, ɔbɛ́ha amʋ́ fɛ́ɛ́ bégyi ɩwɩ. Bʋmɛ́ɛtra yinta ɛkɛkɛɛkɛ. Mʋ atɔ bwɛhɛ amʋ ibénya mʋ abi ɩwɩgyi pʋ́ amʋ́ numnyam amʋ kʋ. 22Anɩyin ánɩ́ bɔtʋ ndɛ a, Bulu atɔ bwɛhɛ fɛ́ɛ́ ɩdɛ ɩwɩɔsɩn wun. Ɩdɛkɩmɩ fɛ alɩá ɩkwɩɩ todwiin ɔtsɩ. 23Megyi Bulu atɔ bwɛhɛ amʋ nkʋlɛ dɛkɩmɩ. Anɩ amʋʋ alapʋ mʋ Ɔŋɛ, igyi mʋ atokiehɛ gyankpapʋ wa anɩtɔ amʋ ɛ anɩdɛkɩmɩ anɩ klʋntɔ. Anɩhɩɛ anɩtsie anɩgyo ɛkɛá Bulu ɔbɛ́ha anɩ nyankpʋsa-oyi anfɩ obégyi ɩwɩ, ɔbɔ́bwɛ anɩ mʋ abi. 24Tsufɛ ɔkpakɩ anfɩ sʋ ɔlɔhɔ anɩ nkpa. Bʋtamakɩ tɔá fʋbʋ ɔkpa. Tɔá fʋma ɔkpa bʋtɛkɩ. 25Nɩ anɩdɛ tɔá anɩmá ɔkpa kɩ a, anɩtenya klʋn tsia gyo mʋ́.
26Ɔŋɛ Wankɩhɛ amʋ tɛtsa anɩ anɩ pɔntɔ. Tsufɛ anɩmeyin alɩá abɔ́kʋlɩ Bulu atɔ, ibégyi mʋ ansɩ. Ɔŋɛ amʋ onuto tɛhɩɛ kɩmɩ pʋkʋlɩ Bulu atɔ ha anɩ, dʋn alɩá anɩ onuto abɛ́talɩ. 27Bulu yin ɔhagyiɔha klʋntɔ asʋn. Mʋ́ sʋ oyin mʋ Ɔŋɛ amʋ agywɩɩn. Tsufɛ Ɔŋɛ amʋ tokokoli Bulu ha mʋ aha alɩá Bulu onuto dɛ mʋ́ kle.
28Anɩyin ánɩ́ Bulu tɛha togyitɔ tɔwa alɛ ha mʋ adwɛpʋ. Amʋ́gyi aha ánɩ́ mʋ onuto ɔlɛtɩ mʋ nhɩhɩɛ ɔnɔ nɩ. 29Tsufɛ aha amʋʋ Bulu yin yaɩ amʋ a, amʋ́ ɔlɛlɛ. Aha amʋʋ ɔlɛlɛ amʋ ɔlɛtɩ ɔbɛɛ, bʋbɛ́lɩan mʋ Bi amʋ. Fówun mʋ Bi amʋ ɔbɔ́bwɛ ɔdɛhɛn mʋ abi tsɔtsɔɔtsɔtɔ. 30Aha amʋʋ Bulu yin yaɩ dodo amʋ ɔlɛtɩ. Aha amʋʋ ɔlɛtɩ amʋ olotsuá amʋ́ asʋn da ɔkpa mʋ ansɩtɔ. Aha amʋʋ olotsuá amʋ́ asʋn da ɔkpa amʋ ɔlɔwa numnyam.
Yesu Bulu Ɔdwɛ Ɔwanlɛ
31Amansʋ anɩtra anɩbʋ blɩ tsu ɩnɩ ɩwɩ? Nɩ Bulu bʋ anɩ wa a, ma ɔbɛ́talɩ kʋsʋ lɩɩ anɩsʋ? Ɔhaa má ɩnʋ! 32Bulu mekina mʋ onuto mʋ Bi amʋ si ha lowu anɩ fɛ́ɛ́ nwunsʋ. Olesi mʋ ha faan. Nkalɩ sʋ ɔmɔ́ɔpʋ atɔ trahɛ fɛ́ɛ́ tsɩa mʋ Bi amʋtɔ ha anɩ? 33Ma ɔbɛ́talɩ ka asʋn dɩnka aha amʋʋ Bulu lalɛ amʋsʋ? Bulu loo? Ɛkɛkɛɛkɛ! Mʋgyi ɔha ánɩ́ alatsu anɩ ánɩ́ anɩ asʋn da ɔkpa mʋ ansɩtɔ. 34Ma ɔbɛ́talɩ ha anɩ ɩpɔn? Ɔhaa má ɩnʋ! Tsufɛ Kristo Yesu gyi ɔha ánɩ́ olobowu ha anɩ, Bulu lɔkʋsʋa mʋ tsu afulitɔ. Alayɔ otsie Bulu gyɔpɩsʋ, ɔdɛ mʋ kokoli anɩ nwunsʋ. 35Ma ntɛ ntɔ ɔbɛ́talɩ tɩtɩ anɩa Kristonyɔ nsɩnɛ ɔdwɛtɔ? Asʋn wunhɛ loo, ntɛ ɩkplan? Nɩ bʋdɩn anɩsʋ loo, ntɛ akʋn? Yaya natɩ loo, ntɛ lowu? 36Tsufɛ bɔwanlɩn wa Bulu asʋn wanlɩnhɛ amʋtɔ bɛɛ,
“Fʋ sʋ bʋdɛ anɩ mɔ ekekegyiɛkɛ.
Bʋdɛ anɩ kɩ fɛ akufa ánɩ́ bapʋ bɛya ɔmɔkpa.”
37Tamɛ ɩnɩ fɛ́ɛ́tɔ a, ɔdwɛ amʋʋ Kristo bʋ ha anɩ amʋ sʋ anɩlagyi ɩsʋ dafa. 38Tsufɛ nhɩɛ nyin ánɩ́ tɔtɔ mɛ́ɛtalɩ ka ɔdwɛá Bulu bʋ ha anɩtɔ. Lowu o, nkpa o, Bulu-abɔpʋ o, tumi kugyikʋá ɩtra dɛ iwie gyi ɔsʋsʋ o, atɔá ɩbʋ nʋ sei pʋ́ mʋ́á ɩbɛ́ba o. 39Togyitɔá ɩbʋ ɔsʋ mʋ́a asɩ ntɛ ɔsʋlʋ ayasɩ kʋkʋʋkʋ mɛ́ɛtalɩ ka ɔdwɛ amʋʋ Bulu ladwɛ anɩ tsʋn anɩ Wie Kristo Yesusʋ amʋtɔ ɛkɛkɛɛkɛ.
Currently Selected:
Romafɔ 8: nko
Highlight
Share
Copy
Want to have your highlights saved across all your devices? Sign up or sign in
© 2017, Wycliffe Bible Translators, Inc. in cooperation with Ghana Institute of Linguistics, Literacy and Bible Translation
