Romafɔ 6
6
Kristo Sʋ Anɩbʋ Nkpa
1Nkalɩ abɛ́blɩ sei? Ilehian ánɩ́ abɔ́yɔ anɩ lakpanbwɛsʋ, mɛnɩ Bulu awɩtɔlɛ bómoni tsɩa? 2Ɛkɛkɛɛkɛ! Igyi fɛ anɩlawu. Mʋ́ sʋ lakpan ma tumi anɩsʋ. Ntogyi sʋ abɛ́tra tsia bwɛ lakpan? 3Brɛ amʋʋ bɔbɔ anɩ asu amʋ a, anɩa Kristo Yesunyɔ anɩlɔbwɛ kʋlɛ. Mlɩyin mʋ́ alɩ? Alɩ brɛ amʋtɔ a, anɩa Kristonyɔ lowu, 4bopula anɩ, tsufɛ anɩa mʋnyɔ anɩlabwɛ kʋlɛ. Mʋ́ sʋ alɩ amʋʋ anɩ Sɩ Onumnyampʋ amʋ lɔkʋsʋa mʋ tsu afulitɔ amʋ a, alɩ kɛn anɩ ɛ abétsia itsia pɔpwɛtɔ nɩ.
5Mʋ́ sʋ ɩnɩá anɩa mʋnyɔ anɩlɔbwɛ kʋlɛ mʋ lowutɔ a, alɩ kɛn anɩa mʋnyɔ lɔbwɛ kʋlɛ mʋ kʋsʋ tsu afulitɔ ɛ nɩ. 6Mlɩbɩá brɛá bɛda Yesu manta oyikpalihɛ amʋsʋ a, mʋa anɩ tsiatɔ dada amʋ lowu, mɛnɩ anɩmɛ́ɛtra bwɛ lakpan nkpábi. 7Tsufɛ nɩ ɔha owu a, ɔtamatra bwɛ lakpan. Lakpan má mʋsʋ tumi. 8Ɩnɩá anɩa mʋnyɔ anɩlawu sʋ a, anɩbʋ hogyiá anɩa mʋnyɔ abétsia nkpa. 9Anɩyin ánɩ́ Bulu lɔkʋsʋa Kristo tsu afulitɔ. Ɔmɛ́ɛtra wu ɛkɛkɛɛkɛ. Lowu ɩtra ma mʋsʋ tumi. 10Yesu lowuna wu ɔtsawʋlɛ, mɛnɩ ɔbɛ́lɛ lakpan ɩnʋ. Tamɛ ɩnɩá otsie nkpa a, otsie ha Bulu. 11Mlɩ ɛ mlɩkɩ mlɩ ɩwɩ ánɩ́ mlɩlawu ha lakpan, amlɩlɛ mlɩ ɩwɩ lɛ mʋ́ tumi asɩ. Mlɩtsia nkpa ha Bulu, tsufɛ mlɩa Kristo Yesunyɔ mlɩlabwɛ kʋlɛ.
12Ɩnɩ sʋ mlɩmáha lakpan igyi mlɩ nyankpʋsa-oyi anfɩ ibówu anfɩsʋ, mɛnɩ ɩmɛ́ɛha ɔwɔlɩ lalahɛ igyi mlɩsʋ, amlɩbwɛ tɔá idekle. 13Mlɩmápʋ mlɩ nyankpʋsa-oyi ɩwɩ atɔ ha lalahɛbwɛ. Mboun mlɩpʋ mlɩ ɩwɩ fɛ́ɛ́ ha Bulu, fɛ aha ánɩ́ alakʋsʋa amʋ́ tsu afulitɔ ba nkpatɔ, ɔpʋ mlɩ bwɛ tɔá ɩda ɔkpa. 14Ɩma alɛá lakpan ɔbɛ́tra gyi mlɩsʋ, tsufɛ sei mlɩtra mlɩmá Mose Mbla amʋ asɩ. Bulu awɩtɔlɛ asɩ mboun mlɩbʋ.
Yilebwɛ Nkpábi Anɩgyi
15Ɩnɩ ɔma a, amansʋ abɛ́blɩ? Ɩbʋ alɛá abɛ́tra bwɛ lakpan sei anfɩ anɩmá mbla amʋ asɩ, anɩbʋ Bulu awɩtɔlɛ mboun asɩ anfɩ? Ɛkɛkɛɛkɛ! 16Mlɩmeyin ánɩ́ nɩ mlɛba ɩwɩasɩ ha tɔkʋ, mlɩdɛ mʋ́ apɛ bwɛ, mlɩdɛ mʋ́ sum fɛ mlɩ wie a, mlɩlabwɛ mʋ́ nkpábi? Nɩ mlɛba ɩwɩasɩ ha lakpan a, mʋmʋ mlówu, tamɛ nɩ mlɛba ɩwɩasɩ ha Bulu a, mlégyi asʋ mʋ ansɩtɔ. 17Mlɩlɔbwɛ nkpábi ha lakpan brɛ kʋtɔ. Sei a, mlɩlapʋ mlɩ klʋn fɛ́ɛ́ hɔ atosunahɛ amʋʋ bapʋha mlɩ amʋ, mlɩdɛ mʋ́sʋ gyi. Mʋ́ sʋ ndɛ Bulu ɩpan da. 18Bulu laha mlɩlagyi ɩwɩ lɛ lakpan ɩbɩtɔ, mlɩlabwɛ nkpábi ha yilebwɛ. 19Alɩá ɩbɔ́bwɛ mlónu asʋn anfɩ asɩ, sʋ napʋ nkpábi tsiatɔ ndɛ mlɩ suna. Brɛ kʋtɔ a, mlɩlɔbwɛ mlɩ ɩwɩ nkpábi ha hakpan mʋ́a lalahɛbwɛ. Alɩ kɛn ilehian ánɩ́ mlɔ́bwɛ mlɩ ɩwɩ nkpábi ha yilebwɛ, mɛnɩ mlɔ́fʋn yi nɩ.
20Brɛ amʋʋ mlɩgyi nkpábi ha lakpanbwɛ amʋ a, yilebwɛ ma tumi mlɩsʋ. 21Labi mɔmʋ mlɩlenya tsu lakpan amʋʋ mlɩlɔbwɛ, ndɛ ɩbʋ mlɩ pɛlɩ amʋtɔ? Mʋ́ labi gyi lowu. 22Tamɛ sei mʋ́ a, Bulu laha mlɩlagyi ɩwɩ lakpanbwɛ tumi asɩ. Mlɩlamli mʋ nkpábi. Labiá mlénya tsu mʋ́tɔ gyi; mlétsia tsiatɔá ɩlɔfʋn yi, nya nkpa ánɩ́ ɩtamata. 23Tsufɛ lakpanbwɛ ɩkɔka gyi lowu, tamɛ Bulu atokiehɛ gyi nkpa ánɩ́ ɩtamata. Mʋ́ ɔlɔpʋgyi anɩ bʋalɛ tsʋn anɩa anɩ Wie Kristo Yesu ɩkʋlɛbwɛsʋ nɩ.
Currently Selected:
Romafɔ 6: nko
Highlight
Share
Copy
Want to have your highlights saved across all your devices? Sign up or sign in
© 2017, Wycliffe Bible Translators, Inc. in cooperation with Ghana Institute of Linguistics, Literacy and Bible Translation
