Israelfɔ Ɩlʋ 36
36
Bulu Ɔdwɛá Ɩma Ɔka Lomoni
Dawid, Nana Bulu osumbi ɩlʋ ha ɩlʋ osunapʋ.
1Lakpan tɔtɔɩ kpla owuntɔlɩnpʋ ɩklʋn.
Ɔtamatepi nya Bulu ifu.
2Tsufɛ ɩwɩtsu tɛha mʋ ɔtɛmlɛ ɩwɩ.
Ɔtamawun mʋ lakpan,
mɛnɩ obési bwɛ.
3Asʋkpan mʋ́a afunu sɔɔn tɛdalɩ mʋ ɔnɔ.
Ɔtamatra bwɛ ansɩtɩnla, ɔtamatra bwɛ yile.
4Ɔtɔgywɩɩn lalahɛ mʋ ɔklansʋ.
Bregyibrɛ ɔlɛda ɩwɩsʋ ha lalahɛbwɛ.
Mʋ́ sʋ ɔtamakina lalahɛ kʋkʋʋkʋ.
5Oo Nana Bulu, fʋ ɔdwɛá ɩma ɔka lɔfʋa wɔ ɔsʋsʋ.
Fʋ ɔnɔkwalɩ ɛ ɩlɔfʋa wɔ nwʋlʋta.
6Fʋ yilebwɛ lɔfʋa fɛ abʋ akpɔnkpɔntɩ.
Fʋ asʋnbuatɔ bʋ oklu fɛ ɔpʋ ibuntɔ.
Oo Nana Bulu, fʋtɛkɩ anyankpʋsa mʋ́a mbwɩ fɛ́ɛ́sʋ.
7Oo Bulu, fʋ ɔdwɛá ɩma ɔka lɔkʋkʋ moni o.
Anyankpʋsa bʋteŋain fʋ abambasɩ.
8Fʋ woyitɔ atɔ ɩhɩɛ tsɔ. Mʋ́ fʋtɔpʋbʋla amʋ́.
Fʋtɛha amʋ́ bʋtonun fʋ ɔdwɛ-ntsu bregyibrɛ.
9Tsufɛ fʋ wa nkpa otsukpa bʋ.
Fʋ wankɩtɔ anɩtenya wankɩ tsu.
10Ha fʋ ɔdwɛá ɩma ɔka itsia aha ánɩ́ bʋyin fʋsʋ,
afʋbwɛ yile ha aha ánɩ́ amʋ́ asʋn da ɔkpa.
11Máha ɩwɩ atsupʋ abʋtsatsa mɩsʋ,
ntɛ awuntɔlɩnpʋ abʋwuta mɩ sɩsɩ.
12Kɩ awuntɔlɩnpʋ ɔdɩdakpa.
Amʋ́ bawuta da, kʋsʋ ma amʋ́ ɩnʋ a.
Currently Selected:
Israelfɔ Ɩlʋ 36: nko
Highlight
Share
Copy
Want to have your highlights saved across all your devices? Sign up or sign in
© 2017, Wycliffe Bible Translators, Inc. in cooperation with Ghana Institute of Linguistics, Literacy and Bible Translation
