Israelfɔ Ɩlʋ 27
27
Nana Bulu, Fʋ Ndedunka
Dawid ɩlʋ.
1Nana Bulu tɔwankɩ mɩ ɔkpasʋ, ɔtɔhɔ mɩ nkpa.
Ma nénya ifu?
Nana Bulu ntɛsrɩ tanʋ mɩ nkpatɔ fɛ́ɛ́.
Ma ɔbɛ́ha opuni bétsii mɩ?
2Nɩ aha lalahɛ, alupʋ pʋ́ adʋn bɔkʋsʋ bɛɛ bɔ́wɩ mɩ a,
bósutin dɩda kpla.
3Ɩsa akɔpʋ bɛkafia mɩ kʋraa a, opuni méetsii mɩ.
Nɩ ɩsa ɩda mɩsʋ kʋraa a, nɔ́pʋ ansɩ dɩnka Bulusʋ.
4Toku kʋlɛ pɛ ndɛ Nana Bulu kʋlɩ.
Mʋ́ ɔkpa négya.
Mʋ́gyi; nétsia mʋ woyitɔ mɩ nkpatɔ fɛ́ɛ́,
pʋ mɩ ansibi wun alɩá ɔbʋ alɛ,
gywɩɩn mʋ́ ɩwɩ mʋ ɔtswɛkpa ɩnʋ.
5Tsufɛ ɔbɔ́pʋ mɩ ŋain mʋ otsiakpa mɩ ɔkplankɛ.
Obéŋain mɩ mʋ woyitɔ.
Obótsu mɩ dɩnka ɩbʋta fʋahɛsʋ, mɛnɩ mɩ alupʋ bʋméenya mɩ.
6Mʋ́ sʋ négyi adʋn amʋʋ bɛkafia mɩ klinklin amʋsʋ.
Nɔ́pʋ ansigyi bɔ afɔdɩɛ mʋ otsiakpa.
Nɔ́pʋ ɔmɛá ɩbʋ anulɛ wa ɩlʋ, da ɔsankuo ha mʋ.
7Nana Bulu, nosu kpoli fʋ kʋklʋkʋʋ a, nu.
Wun mɩ nwɛ, afʋsɔ mɩ ɔnɔ.
8Mɩ ɩklʋn ɔbɛɛ, “Dunka mʋ!”
Mʋ́ mbɛɛ, “Nana Bulu, fʋ ndedunka.”
9Mápʋ ansɩtɔ ŋain mɩ.
Mápʋ ɔblɔ wuta mɩ fʋ osumbi tɛɩa fʋ ɩwɩ.
Fʋgyi mɩ ɔbʋapʋ.
Mátswɩ mɩ tsalɩfwɩ.
Mɩ nkpa ɔhɔpʋ Bulu, mákpa mɩ ɔma.
10Tsufɛ mɩ sɩ mʋa mɩ yin basi mɩ tswɩ,
tamɛ Nana Bulu mʋ́ ɔbɔ́hɔ mɩ.
11Nana Bulu, mɩ alupʋ sʋ suna mɩ fʋ ɔkpa,
afʋkpa mɩ tsʋn ɔkpa tswiihɛsʋ.
12Mási mɩ, ankpa wie mɩ alupʋ ɩbɩtɔ,
tsufɛ adansɩfɔ afunupʋ bakʋsʋ mɩsʋ, bʋdɛ mɩ huna.
13Nahogyiá nówun Nana Bulu alɛ
asa nówu.
14Dɩnka ansɩ Nana Bulusʋ,
afʋwa ɩwɩ ɔwʋnlɩn. Nya ɩklʋn, afʋkɩ Nana Bulu ɔkpa!
Currently Selected:
Israelfɔ Ɩlʋ 27: nko
Highlight
Share
Copy
Want to have your highlights saved across all your devices? Sign up or sign in
© 2017, Wycliffe Bible Translators, Inc. in cooperation with Ghana Institute of Linguistics, Literacy and Bible Translation
