Israelfɔ Ɩlʋ 19
19
Nana Bulu mbla lɔfʋn
Dawid kanfʋ-ɩlʋ ha ɩlʋ osunapʋ.
1Kɩ alɩá ɔsʋsʋ ɩdɛ Bulu numnyam ɔwan lɛ,
pʋ́ alɩá nwʋlʋta lakʋkʋ ɩdɛ Bulu atɔ bwɛhɛ lɛ suna.
2Ekekegyiɛkɛ ɩdɛ mʋ ɩwɩ asʋn blɩ.
Onyegyionye ɛ ɩdɛ mʋ lɛ suna.
3Bʋmɛdɛ ɔblɩ kʋkʋ blɩ,
bʋmɛdɛtɔɩ,
tamɛ anɩdɛ mʋ asɩ nu.
4Amʋ́ ɔmɛ towie ɔyɩtɔ fɛ́ɛ́,
amʋ́ asʋn tɔyɔ ɔyɩ ɔka.
Bulu labwɛ otsiakpa nwʋlʋtasʋ ha owi.
5Ɔtɛdalɩ tsu ɩnʋ fɛ ɔka pɔpwɛ otsiapʋ
dɛdalɩ mʋ obutotɔ.
Ansɩ tegyi mʋ fɛ ɔwʋnlɩnpʋ oyetsii ɔsrɩ.
6Ɔtɔkʋsʋ tsu nwʋlʋta ɔka yewie mʋ́ ɔka.
Ɔtɛkplɩ yewie fʋnka nyɔsɩ.
Tɔtɔ tamaŋain mʋ okunku.
7Nana Bulu atosunahɛ lɔfʋn.
Ɩtɔwa ɔha ɩklʋn ɔwʋnlɩn.
Mʋ ɔnɔlɛ igyi ɔnɔkwalɩ.
Ɩtɛha ɔha mimlahɛ tɛtɩn ansɩ.
8Nana Bulu mbla ɩda ɔkpa,
ɩtɛha ansɩ tegyi ɔha.
Mʋ mbla lɔwankɩ.
Ɩtɛtɩtɩ ɔha ansɩsʋ.
9Nana Bulu ifunya bʋ alɛ.
Ɩbʋ ɩnʋ brɛ fɛ́ɛ́.
Mʋ asʋnbua igyi ɔnɔkwalɩ.
Mʋ́ fɛ́ɛ́ da ɔkpa.
10Ɩbʋ ibia dʋn sika pɛpɛ.
Ɩdʋn sika pɛpɛ onuto-onuto.
Ɩbʋ ɔdwɛ dʋn ɔkwɛn.
Ɩbʋ ɔdwɛ dʋn akwatabitɔ ɔkwɛn.
11Ɩtɛda mɩ fʋ osumbi ɔla.
Mʋ́sʋ gyi ɩhɩɛ bʋ labi kpɔnkpɔɔnkpɔntɩ.
12Ma ɔbɛ́talɩ wun tsitsa ánɩ́ mabwɛ?
Si mɩ lalahɛá mmowun kie mɩ.
13Máha mɩ fʋ osumbi anfɩ ankɩansɩ bwɛ lakpan.
Máha mʋ́ igyi mɩsʋ, mɛnɩ ɔlala méetsia mɩ ɩwɩ.
Fówun mméegyi ɩpɔn ánɩ́ nabwɛ lakpan kpɔnkpɔntɩ.
14Oo Nana Bulu, mɩ ɩbʋta pʋ́ mɩ ɔkalɛpʋ,
ha mɩ ɔnɔtɔ asʋn pʋ́ mɩ asʋn susuhɛ
igyi fʋ ansɩ.
Currently Selected:
Israelfɔ Ɩlʋ 19: nko
Highlight
Share
Copy
Want to have your highlights saved across all your devices? Sign up or sign in
© 2017, Wycliffe Bible Translators, Inc. in cooperation with Ghana Institute of Linguistics, Literacy and Bible Translation
