Mateo 3
3
Asu Ɔbɔpʋ Yohane Bulu Asʋn Ɔkanda
(Marko 1:1-8; Luka 3:1-18; Yohane 1:19-28)
1Brɛ kʋtɔ a, Asu Ɔbɔpʋ Yohane lɛba ɔdɛ Bulu asʋn ɔkan da Yudea ɔsʋlʋkpansʋ. 2Ɔbɛɛ, “Mlɩdamli klʋntɔ amlɩsi lakpan bwɛ, tsufɛ Bulu iwiegyi lawie woyi ta.” 3Yohane ɩwɩ asʋn Bulu ɔnɔsʋ ɔtɔɩpʋ Yesaia lɔwanlɩn ɔbɛɛ,
“Ɔkʋ dɛkplʋn ɔsʋlʋkpansʋ ɔbɛɛ,
‘Mlɩla anɩ Wie ɔkpa.
Mlɩtswii ɩkpa ha mʋ> ” amʋ nɩ.
4Yohane lɔwa kpɔsɔ-imi atadɩɛ, ɔlɔpʋ ɔwʋlʋ-kpakpa ɔfɛ klɩ mʋ́sʋ. Atsantsankʋ pʋ́ ɔkwɛn otegyi. 5Aha botsu Yerusalem wulutɔ, Yudea ɔmátɔ pʋ́ Yordan bʋnkpa ɔnɔ awulu fɛ́ɛ́sʋ ba bonu mʋ asʋn blɩhɛ. 6Bɛlɛ amʋ́ lakpan blɩ, ɔlɔbɔ amʋ́ asu Yordan ntsutso.
7Tamɛ brɛá Farisifɔ pʋ́ Sadukifɔ tsɔtsɔɔtsɔ bɛba bɛɛ ɔbɔ amʋ́ asu a, ɔlɛfɩtɛ amʋ́ ɔbɛɛ, “Abɛ abi-aná, ntɔ gya mlɩ, mlɩsrɩ Bulu ɩsʋbɩtɩ amʋʋ ɩba amʋ? 8Mʋmʋ mlɩswie abiá ibósuna ánɩ́ lɛlɛ mlɩladamli klʋntɔ. 9Mlɩmákɩ mlɩaa, mlɩ nain gyi Abraham. Mʋ́ sʋ Bulu mɛ́ɛbɩtɩ mlɩ ɩsʋ. Ndɛ mlɩ bla mbɛɛ, Bulu ɔbɛ́talɩ ha abwi anfɩ ɩbɛ́damli Abraham abi-aná. 10Sei a, Bulu lapʋ ɛfɛ yi nyi-atsitsitɔ. Oyigyioyiá imoswie abi wanklaan a, bókun mʋ́ da, wa mʋ́ fɛ́ɛ́ ogya. 11Mɩ mʋ́ a, ntsu ndɛpʋbɔ mlɩ asu pʋsuna ánɩ́ mlɩladamli klʋntɔ. Tamɛ ɔkʋá ɔdʋn mɩ bʋ ɔma ɔba. Mmɔfʋn ánɩ́ nɔ́sʋra mʋ ntʋkʋta kʋraa. Mʋ ɔbɔ́pʋ Ɔŋɛ Wankɩhɛ pʋ́ ogya bɔ mlɩ asu nɩ. 12Ɔdɛ mʋ ɩlɩn, ɔbɔ́pʋfuni ntɛtɛ lɛ ayo amʋtɔ. Ɔbɛ́kpa ayo amʋ wa mʋ odudutɔ, tamɛ ɔbɛ́fɛɩ ofunikpa ɩnʋ wanklaan; kpa ntɛtɛ amʋ wa ogya ánɩ́ ɩtamaduntɔ.”
Yesu Asubɔ
(Marko 1:9-11; Luka 3:21-22)
13Yesu lotsu Galilea ɔmátɔ ba Yordan ntsu ɔnɔ Yohane wa ɔbɛɛ, ɔbɔ mʋ asu. 14Tɛkɩ Yohane motsula ánɩ́ ɔbɔ́bɔ mʋ asu. Ɩnɩ sʋ ɔlɛbla Yesu ɔbɛɛ, “Mɩ ilehian ánɩ́ fɔ́bɔ asu. Nkalɩ igyi sʋ faba fɛɛ, mɩ ɔbɔ fʋ asu?”
15Yesu lɛbla mʋ ɔbɛɛ, “Sei a, ha atsu mʋ́ alɩ asa, tsufɛ ilehian ánɩ́ abɔ́bwɛ togyitɔá ɩda ɔkpa Bulu ansɩtɔ.”
Mʋ́ sʋ Yohane lotsula. 16Brɛá ɔlɔbɔ Yesu asu ta, Yesu lɛdalɩ ntsu amʋtɔ alɩ nwʋlʋta lefinki, olowun Bulu Ɔŋɛ dɛkplɩ fɛ lɔpɔ, ilobogyonka mʋsʋ. 17Ɩnʋ ɔmɛ kʋ tsu ɔsʋsʋ ɔbɛɛ, “Ɔ́nɩ gyi mɩ Biá ntɔdwɛ mʋ, mɩ ansɩ tɛhɩɛ gyi mʋ ɩwɩ nɩ.”
Currently Selected:
Mateo 3: nko
Highlight
Share
Copy
Want to have your highlights saved across all your devices? Sign up or sign in
© 2017, Wycliffe Bible Translators, Inc. in cooperation with Ghana Institute of Linguistics, Literacy and Bible Translation
