2 Korintofɔ 8
8
Akristofɔ Atokie
1Apio, anɩdekleá mlɩbɩ awɩtɔlɛá Bulu lawa ha ɔpasua amʋʋ bʋbʋ Makedonia ɔmátɔ amʋ. 2Ɩnɩá bʋbʋ ipian mʋ́a asʋn wunhɛ tsɔtsɔɔtsɔtɔ kʋraa a, bɔpʋ amʋ́ ohian fututuutu lɛ amʋ́ awɩtɔlɛ kpɔnkpɔɔnkpɔntɩ suna ansigyisʋ tsʋn amʋ́ atokiehɛtɔ. 3Nɛ́blɩ mbɛɛ, bekie atɔ dʋn alɩá bɛtalɩ kʋraa, tsu amʋ́ klʋntɔ. 4Betsia kʋlɩ anɩ ɔkpa bɛɛ, aha amʋ́ ɛ abʋnya ɔkpa wa awɩtɔlɛ ha Bulu aha ánɩ́ bʋbʋ Yerusalem. Fowun amʋ́ ɛ amʋ́ ɩbɩ bówie osum agyʋma anfɩtɔ. 5Bɔbwɛ dʋn alɩá anɩlosusu. Gyankpapʋ a, besi amʋ́ ɩwɩ ha anɩ Wie, bɛlasi amʋ́ ɩwɩ ha anɩ Bulu apɛtɔ. 6Mʋ́ sʋ anɩlaha Tito amʋʋ olegyankpa bɛha mlɩlɔwa nsi amʋ anɩaa, ɔtra yinki bɛha amlɩwa nsi mɔ mlɩ awɩtɔlɛ agyʋma amʋ ɔnɔ wanklaan. 7Mlɩlafʋn ɔkpagyiɔkpasʋ, tsufɛ mlɩhɩɛ mlɩbʋ hogyi, mlɩyin tɔɩ, mlɩlɛtɩn ansɩ. Tɔtɔ tamakpɔn mlɩ, mlɩtɛhɩɛ dwɛ anɩ ɛ. Ndekleá mlɩbɔ mbɔdɩ awɩtɔlɛ agyʋma anfɩ ɛtɔ dʋn ɔhagyiɔha.
8Mmɛdɛ mlɩ hɩɛ mbɛɛ, mlɩbwɛ mʋ́. Mboun ndɛpʋ mlɩ ɔdwɛ kapʋ akʋá bʋdɛprɩá amʋ́ ɛ bɔ́bʋa. 9Tsufɛ mlɩyin alɩá anɩ Wie Yesu Kristo lɔdwɛ aha, wa awɩtɔlɛ. Ɩwɩ onyapʋ ogyi tɛkɩ, tamɛ anɩ sʋ ɔlɔbwɛ ɩwɩ ohiani, mɛnɩ abɔ́tsʋn mʋ ohian amʋsʋ bwɛ ɩwɩ anyapʋ.
10Mɩ agywɩɩn gyi, nɩ mlɔmɔ agyʋma amʋʋ mlɩlefi asɩ ofikʋ amʋ ɔnɔ a, ɩbɔ́wa labi ha mlɩ. Tsufɛ mlɩgyi ɔpasua gyankpapʋá mlɩlɔbwɛ agywɩɩn amʋ, mlɩ kɛn lefi mʋ́ asɩ. 11Mlɩwuna bwɛ mʋ́ ɩmɔ ɔnɔ. Mlɩlɛ ɩklʋntɔ bwɛ mʋ́, fɛ alɩá mlɩlefi mʋ́ asɩ. Mlɩkie mʋ́ mlɩ ɔwʋnlɩn ɔnɔ, mɛnɩ ɩbɛ́kana agywɩɩn amʋʋ mlɩlɔbwɛ amʋ. 12Nɩ ɩhɩɛ igyi mlɩ apɛá mlɛ́ha a, mlɩkie tɔá mlɩbʋ. Mʋ́tegyi Bulu ansɩ, megyi mʋ́á mlɩmá.
13Megyi bɛɛ, anɩdekleá abɛ́ha ɩwɩ bólwii akʋ, ɩwɩ ɩklɩ mlɩ mʋ́; mboun alɩá ɩwɩ bólwii mlɩa amʋ́nyɔ fɛ́ɛ́ kɛkɛ. 14Sei mlɩbʋ atɔ tsɔtsɔá mlɛ́talɩ pʋbʋa amʋ́. Mʋmʋ nɩ ɩwa alɛ ha amʋ́, ɩwɩ lɛklɩ mlɩ ɛ a, amʋ́ ɛ bɛ́talɩ bʋa mlɩ, mɛnɩ mlɩa amʋ́nyɔ fɛ́ɛ́ mlénya kɛkɛ. 15Mlɩkaɩn ánɩ́ Bulu asʋn wanlɩnhɛ amʋ lɛblɩ ɔbɛɛ, “Ɔha amʋʋ ɔlɛkpa tsɔtsɔɔtsɔ amʋ menya mʋ́ dʋbɩ. Ɔha amʋʋ ɔlɛkpa kpalobi amʋ ɛ klɛ lɔfʋn mʋ.”
Tito Mʋa Mʋ Aba
16Ada Bulu ɩpan ánɩ́ alaha Tito ɛ latsula dɩnka mlɩ klɛsʋ fɛ mɩ. 17Brɛá anɩlɔwa mʋ anɩaa ɔba mlɩ wa a, olotsula. Mʋ onuto o, ɩbʋ mʋ ɔdwɛá ɔbɛ́tra ba ɩnʋ. 18Anɩdɛ mʋa opio ɔkʋ wa sɩsɩ mlɩ. Ɔpasua amʋ fɛ́ɛ́ bʋdɛ mʋ kanfʋ, asʋn wanklaan amʋ ɔkan da sʋ. 19Makedonia ɔpasua amʋ fɛ́ɛ́ lɛlɛ mʋ ánɩ́ anɩa mʋnyɔ anatɩ ki, ahɔ atokiehɛ amʋ ya Yerusalem. Anɩdɛ atɔ anfɩ bwɛ pʋwa anɩ Wie numnyam, mɛnɩ ibósuna ánɩ́ anɩ onuto latsu dɩnka ɩwɩsʋá abɔ́bwɛ mʋ́.
20Anɩdɛ anɩ ɩwɩ kɩ wanklaan, mɛnɩ ɔhaa mɛ́ɛlɛ anɩ ɩla, tsu alɩá anɩlɔpʋ anɩdɛ atokiehɛ amʋsʋ kɩ. 21Tɔá anɩdesusu gyi, alɩá abɔ́bwɛ mʋ́á ɩda ɔkpa Bulu mʋa anyankpʋsa fɛ́ɛ́ ansɩtɔ.
22Ɩnɩ sʋ anɩlapʋ anɩ apio amʋtɔ ɔkʋ manta Tito anásʋ. Anɩlasɔ mʋ kɩ, anɩlawun ánɩ́ ɔhɩɛ ɔbʋ nsi. Alahɔ mlɩ gyi sei. Mʋ́ sʋ ɔhɩɛ odekleá ɔbɛ́tsa anɩ agyʋma amʋ yɔ. 23Nɩ ɔkʋ lɛfɩtɛ mʋsʋ a, mlɩbla mʋ mlɩaa, mɩa mʋnyɔ dɛ agyʋma yɔ pʋsum mlɩ. Makedonia ɔpasua lɔwa apio atrahɛ amʋʋ mʋa amʋ́nyɔ bɛba amʋ. Ɩnɩ desuna ánɩ́ Kristo bʋdɛ numnyam wa. 24Mʋ́ sʋ mlɩlɛ mlɩ ɔdwɛ suna amʋ́. Isuna ɔpasua amʋ fɛ́ɛ́ ánɩ́ mlɩ sʋ anɩbʋ ɔkpa tsu ɩwɩ.
Currently Selected:
2 Korintofɔ 8: nko
Highlight
Share
Copy
Want to have your highlights saved across all your devices? Sign up or sign in
© 2017, Wycliffe Bible Translators, Inc. in cooperation with Ghana Institute of Linguistics, Literacy and Bible Translation
