2 Korintofɔ 12
12
Paulo Atowunhɛ Pʋ́ Mʋ Atɔ Lɛsunahɛ
1Ilehian ánɩ́ nótsu ɩwɩ, tamɛ tɔtɔɔtɔ ɩma ɩwɩtsutɔ. Tamɛ mblɩ atɔá nowun pʋ́ tɔá anɩ Wie lalɛ suna mɩ. 2Nfi duana (14) nɩ, bɔwan mɩ ya ɔsʋsʋ sasɩtɔ. (Mɩ nyankpʋsa-oyi lɔyɔ ɩnʋ o, mɩ ɔkla o, mmɛ́ɛtalɩ bɩ. Bulu nkʋlɛ yin.) 3-4Fɛ alɩá nakʋblɩ a, bɔwan mɩ ya Paradiso. (Mɩ nyankpʋsa-oyi lɔyɔ ɩnʋ o, mɩ ɔkla o, mmɛ́ɛtalɩ bɩ. Bulu nkʋlɛ yin.) Nonu asʋn ánɩ́ ɩma blɩtɔ, ɔhaa ɛ má ɔkpa blɩ mʋ́. 5Nɛ́talɩ pʋ ɩtɔ amʋʋ nowun amʋ tsu ɩwɩ, tamɛ mmɔ́ɔpʋ mɩ atɔ bwɛhɛ tsu ɩwɩ. Ntobiá ɩtɛha mɩ ɔwʋnlɩn ɔnɔ tɛba asɩ ntɔpʋtsu ɩwɩ. 6Nɩ mbɛɛ nótsu ɩwɩ kʋraa a, mmóotsu ɩwɩ fɛ ɔha mimlahɛ, tsufɛ nɛ́blɩ ɔnɔkwalɩ. Tamɛ mmɔ́ɔbwɛ. Mmedekleá ɔhaa ɔkɩ mɩ dafa alɩá mɩ tsiatɔ gyi, ntɛ asʋn amʋʋ nɔpʋba amʋ.
7Alɩá mmɔ́ɔpʋ ntobi anfɩ ɩbʋ ifu, ɩbʋ wanwan, Bulu lalɛ suna mɩ anfɩ tsu ɩwɩ sʋ a, ɔlɔpʋ owu kʋ wa mɩ awutɔ, igyi Ɔbʋnsam-ɔbɔpʋ. Ɩtɛda wɔ mɩ, mɛnɩ mmóotsu ɩwɩ. 8Nakokoli anɩ Wie Yesu tse sa kɛkɛ mbɛɛ, ɔlɛ ɩtɔ amʋ mɩtɔ. 9Tamɛ asʋn ánɩ́ ɔtɛbla mɩ bregyibrɛ gyi, “Mɩ awɩtɔlɛ pɛ gyi tɔá fehian. Tsufɛ ɔha ánɩ́ mʋ ɔwʋnlɩn ɔnɔ laba asɩtɔ mɩ tumi tɛhɩɛ lɩn ɔwan.” Ɩnɩ sʋ ɩbʋ mɩ ansigyiá nɔ́pʋ tɔá ɩtɛha mɩ ɔwʋnlɩn ɔnɔ tɛba asɩ tsu ɩwɩ, mɛnɩ Kristo tumi amʋ ɩbɛ́hɩɛ bun mɩsʋ. 10Kristo sʋ ansɩ bégyi mɩ bregyibrɛ. Nɩ mɩ ɔwʋnlɩn ɔnɔ ɩba asɩ, bʋdɛ mɩ sia, mbʋ ɩkplantɔ, bʋdɩn mɩsʋ, ntɛ ɩwɩ dɛ mɩ ɔsɩn. Tsufɛ nɩ mɩ ɔwʋnlɩn ɔnɔ ɩba asɩ a, mʋ́ ntɛlanya ɔwʋnlɩn nɩ.
Korinto Ɔpasua Ɩwɩ Asʋn
11Nabwɛ ɩwɩ fɛ ɔha mimlahɛ, tamɛ mlɩlaha ɩlaba alɩ. Tɛkɩ ilehian ánɩ́ mlɛ́blɩ asʋn wanklaan tsu mɩ ɩwɩ. Tsufɛ ɩbʋ mʋ́tɔá mmegyi tɔtɔ, tamɛ ndʋn “sumbi ayɔpʋ akpɔnkpɔntɩ” anfɩ mʋ́. 12Brɛá mbʋ mlɩ wa a, notomi bwɛ tɔá ɩbʋ wanwan pʋ́ osuna mʋ́a ofula ɔtsan-ɔtsan, pʋsuna mlɩ ánɩ́ lɛlɛ sumbi ɔyɔpʋ ngyi. 13Ntɔ dɛ mlɩ han? Tɔá nɔbwɛ mlɩtɔ, mmɔbwɛ ɔpasua bambatɔ gyi, mmesi ɩwɩ tswɩ mlɩsʋ. Kokoli, mlɩsikie mɩ!
14Sei a, otse sasɩ ndɛbwɛá nɛ́ba mlɩ wa a. Mmɛ́ɛba besi ɩwɩ tswɩ mlɩsʋ, tsufɛ mmɛdɛ tɔtɔ fɩtɛ tsu mlɩ wa. Mlɩ onuto ndehian. Kebi tamatsu mʋ sɩ wa akɔnkɔ, mʋ sɩ totsu mʋ wa akɔnkɔ. 15Ɩbʋ mɩ ɔdwɛá néyinta togyitɔá mbʋ mlɩ sʋ, si mɩ ɩwɩ fɛ́ɛ́ kʋraa ha mlɩ. Ɩnɩá ndɛ mlɩ dwɛ dʋbɩ alɩ a, ntogyi sʋ ɔdwɛá mlɩ mʋ́ mlɩbʋ ha mɩsʋ dɛdɩnkɩ?
16Fialɩ mlɩlawun ánɩ́ lɛlɛ, mmɛba besi ɩwɩ tswɩ mlɩsʋ, tamɛ mlɩdɛblɩ mlɩaa, nofwifwi ansɩ. Ndɛpʋ atɔ tsʋn mlɩ omua wa mlɩ ɔnɔ. 17Ɔkpa ɔmɔmʋsʋ? Nɔtsʋn aha amʋʋ nɔwa mlɩ wa amʋtɔ ɔkʋsʋ sisi mlɩ loo? 18Brɛá nokokoli Tito, nɔwa mʋa anɩ pio Okristoyin amʋ mlɩ wa mɛ, olebesisi mlɩ? Ɛkɛkɛɛkɛ! Tsufɛ agywɩɩn kʋlɛ mɩa mʋnyɔ anɩdɛpʋbwɛ toku kʋlɛ.
19Fialɩ mlɩdɛ mʋ́ tsu brɛ anfɩtɔ fɛ́ɛ́ mlɩaa, anɩdɛtɔɩ pʋka ɩwɩ lɛ. Megyi alɩ igyi. Akristofɔ anɩgyi, anɩdɛtɔɩ Bulu ansɩtɔ. Mɩ adwɛpʋ, anɩdɛ togyitɔ bwɛ pʋwa mlɩ ɔwʋnlɩn. 20Tsufɛ ifu dɛ mɩá nɛ́ba mlɩmetsie wanklaan. Mʋ́ sʋ mɩ asʋn blɩhɛ bɔ́wɔ mlɩ asʋtɔ. Fialɩ nɔ́bɔtʋ ɩtrɛ, ɔnsɩpɛ, ɔblɔ, olu, ahasia, aha ɩwɩ asʋnblɩ, ɩwɩtsu pʋ́ abasʋda mlɩtɔ. 21Nhɩɛ ndɛ ifu nya ánɩ́ nɩ nɛba ɩnʋ a, mɩ Bulu ɔbɛ́tra ba mɩ asɩ mlɩ sʋ. Nósu, tsufɛ mlɩtɔ akʋ mlɩmɔkʋsi mlɩ lakpan dada amʋ bwɛ, damli klʋntɔ si mbʋatɔ, hakpanla pʋ́ ɔwɔlɩ lalahɛ amʋ.
Currently Selected:
2 Korintofɔ 12: nko
Highlight
Share
Copy
Want to have your highlights saved across all your devices? Sign up or sign in
© 2017, Wycliffe Bible Translators, Inc. in cooperation with Ghana Institute of Linguistics, Literacy and Bible Translation